CJ အင်တာမိုင်ယာမီအသင်း ပူးတွဲပိုင်ရှင် ဒေးဗစ်ဘက်ခမ်က အသင်းရဲ့ကွင်းသစ် Nu Stadium ဖွင့်ပွဲအပြီးမှာ မိမိအိပ်မက်တွေ အမှန်တကယ် ဖြစ်လာခဲ့တယ်လို့ ပြောကြားခဲ့ပါတယ်။
အင်္ဂလန်နာမည်ကျော်ကစားသမားဟောင်း ဘက်ခမ်ဟာ LAဂလက်ဆီမှာ ခြောက်နှစ်ကြာ ကစားပြီးနောက် ၂၀၁၈ ခုနှစ်မှာ ဒီအသင်းကို ဖွဲ့စည်းတည်ထောင်ခဲ့တာဖြစ်တယ်။
အင်တာမိုင်ယာမီအနေနဲ့ ၂၀၂၀ ပြည့်နှစ်မှာ မေဂျာလိဂ်ပွဲဦးထွက် ယှဉ်ပြိုင်ခဲ့ပြီး ပြီးခဲ့တဲ့ရာသီက အမြင့်ဆုံး မေဂျာလိဂ်ချန်ပီယံဆု ဆွတ်ခူးခဲ့ပါတယ်။
ဘက်ခမ်က ”လွန်ခဲ့တဲ့ နှစ် ၂၀ ဝန်းကျင် ကျွန်တော် အမေရိကနဲ့ မေဂျာလိဂ်ကို ရောက်လာချိန် ကျွန်တော့်အိပ်မက်က ချန်ပီယံရှစ်မှာ အနိုင်ရဖို့၊ ကျွန်တော်ချစ်တဲ့ ဘောလုံးအားကစားနည်း မြင့်မားလာရေး ကူညီဖို့နဲ့ ကိုယ်ပိုင်အသင်း တည်ထောင်ဖို့ပါပဲ။
လွန်ခဲ့တဲ့ ၁၃ နှစ်ကမိုင်ယာမီကို ကျွန်တော် ရွေးချယ်ခဲ့တယ်ဆိုတာကို ကြေညာခဲ့တယ်။ အဲဒီအချိန်မှာ ကျွန်တော်တို့မှာ အသင်းနာမည် မရှိဘူး။
ပရိသတ် မရှိဘူး။ ကွင်းမရှိဘူး။ အခု ကျွန်တော်တို့ရဲ့အိမ်အသစ်မှာ မတ်တပ်ရပ်နိုင်ပါပြီ။ ကျွန်တော်တို့က မေဂျာလိဂ် ချန်ပီယံတွေပါ။
မိုင်ယာမီမှာ ဘောလုံးသမိုင်းရဲ့ အကောင်းဆုံးကစားသမားလည်း ရှိပါတယ်။ အိပ်မက်တွေ အမှန်တကယ် ဖြစ်လာခဲ့ပါတယ်”လို့ပြောခဲ့ပါတယ်။
အင်တာမိုင်ယာမီအသင်းဟာ ၂၀၂၃ ခုနှစ်မှာ မက်ဆီ ရောက်လာပြီးနောက် မေဂျာလိဂ်ထိပ်တန်းကလပ်အဖြစ် ပြောင်းလဲနိုင်ခဲ့ပါတယ်။
မေဂျာလိဂ်ဖလားမတိုင်ခင် ၂၀၂၃ Leagues Cup နဲ့ ၂၀၂၄ Supporters’ Shield တွေကိုလည်း ဆွတ်ခူးနိုင်ခဲ့ပါတယ်။
