ခက်ဆစ်

တအာင်းတပ်မတော် TNLA သိမ်းပိုက်ထိန်းချုပ်ထားတဲ့ မြို့နယ်တွေကို စစ်ကောင်စီက နေ့စဉ်ရက်ဆက် လေကြောင်းမှ ဗုံးကြဲတိုက်ခိုက်နေတဲ့အပေါ် အလှည့်ပြန်လာမယ်လို့ TNLA ခေါင်းဆောင်တစ်ဦးဖြစ်သူ ဗိုလ်ချုပ် တားဘုန်း‌ကျော်က ပြောကြားလိုက်ပါတယ်။

“မနက်၊ နေ့ခင်း၊ ညနေ၊ ညသန်းခေါင် ဆက်တိုက် လေယာဉ် ဗုံးကြဲနေတာ၊ ကြဲတဲ့သူ၊ ကြဲဖို့ဆော်ဩသူ၊ ကြဲခံရတာကို ဝမ်းမြောက်လက်ခုပ်တီးသူ အားလုံးကို ထုံးသေချာတို့မှတ်ထားမယ်၊ အလှည့်ဆိုတာ ရှိစမြဲပါ” လို့ ဗိုလ်ချုပ် တားဘုန်းကျော်က သူ့ရဲ့ လူမှုကွန်ဖေ့စ်ဘွတ်ခ်မှာ ရေးသားအသိပေးထားတာပါ။

ရှမ်းပြည်နယ်မြောက်ပိုင်းရှိ TNLA သိမ်းပိုက်ထိန်းချုပ်ထားတဲ့ မြို့နယ်တွေကို စစ်ကောင်စီက အောက်တိုဘာလအတွင်းမှာ နေ့စဉ်ရက်ဆက် လေကြောင်းမှ ဗုံးကြဲတိုက်ခိုက်နေတာ ဖြစ်ပါတယ်။

ပြီးခဲ့တဲ့ အောက်တိုဘာလ ၁၇၊ ၁၈၊ ၁၉ ရက်တွေမှာလည်း နမ့်ဆန်မြို့ကို စစ်ကောင်စီက ၃ ရက်ဆက်တိုက် ဗုံးကြဲတိုက်ခိုက်ခဲ့တာကြောင့် အသက် ၁၀ နှစ်အရွယ် ကလေးငယ် ၁ ဦးအပါအဝင် အရပ်သားပြည်သူ ၉ ဦး သေဆုံးခဲ့တယ်လို့ TNLA က ထုတ်ပြန်ထားပါတယ်။

ဒါ့အပြင် နမ့်ဆန်၊ မန်တုံနဲ့ မိုင်းငေါ့ မြို့နယ်တွေကိုလည်း အောက်တိုဘာလ ၁၉ ရက်၊ နေ့လယ်ပိုင်းမှာလည်း ဂျက်ဖိုက်တာနဲ့ ပေါင် ၂၅၀ ဗုံးတွေ ကြဲချတိုက်ခိုက်ခဲ့တာကြောင့် အရပ်သား ပြည်သူ ၂ ဦးထိခိုက်ဒဏ်ရာရပြီး နေအိမ်၊ အဆောက်အဦနဲ့ ဘုန်းကြီးကျောင်းတွေ ပျက်စီးခဲ့တယ်လို့ သိရပါတယ်။

“မိုးကုတ်အနောက်ပိုင်းကောပါ၊ ဒီနေ့လေယာဉ် အရမ်းဝဲနေတာ၊ နေရာစုံပတ်ရမ်းကြဲနေတာဗျ” လို့ မိုးကုတ်မြို့နယ် ဒေသခံတစ်ဦးကလည်း ယမန်နေ့က BBM ကိုပြောပါတယ်။

မန်တုံ၊ ကျောက်မဲ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ္မတူ၊ မိုးကုတ်နဲ့ မိုးမိတ် မြို့နယ်တွေကို စစ်ကောင်စီက အောက်တိုဘာလ ၁ ရက်နေ့မှ ၁၈ ရက်အထိ လေကြောင်းဗုံးကြဲတိုက်ခိုက်မှု ၂၈ ကြိမ်ပြုလုပ်ခဲ့တာကြောင့် သံဃာတော် ၂ ပါး၊ ကလေးငယ် ၈ ဦး၊ အမျိုးသမီး ၁၉ ဦးနဲ့ အမျိုးသား ၁၂ ဦးတို့ သေဆုံးခဲ့ပြီး ပြည်သူ ၄၀ ‌‌ကျော် ထိခိုက်ဒဏ်ရာရခဲ့တယ်လို့ သိရပါတယ်။

စစ်ကောင်စီဟာ တော်လှန်ရေးအင်အားစုတွေ တိုက်ခိုက်သိမ်းပိုက်ထားတဲ့ နေရာတွေကို လူအင်အားတွေ၊ လက်နက်ကြီး၊ ဒရုန်းတွေအပြင် လေကြောင်းတိုက်ခိုက်မှုတွေနဲ့ ပြည်သူတွေအပေါ် နေ့စဉ်ရက်ဆက် စစ်ရာဇဝတ်မှုတွေ ကျူးလွန်လျက်ရှိတယ်လို့ TNLA က အသိပေးထားတာ ဖြစ်ပါတယ်။

ပုံ-PSLF/TNLA

လက်နက် ၈ လက်နဲ့ ခဲယမ်းဆက်စပ်ပစ္စည်းများ သိမ်းဆည်းရရှိ

မြင်းခြံမြို့နယ်မှာ ပြည်သူထံမှ ဆက်ကြေးကောက်လုယက်နေတဲ့ စစ်ကောင်စီတပ်ဖွဲ့ဝင်တွေကို တိုက်ခိုက်မှု ဗိုလ်ကြီး အောင်သောင်းအပါအဝင် စစ်ကောင်စီတပ်သား ၇ ဦးသေဆုံးပြီး လက်နက် ၈ လက်နဲ့ ခဲယမ်းများ သိမ်းဆည်းရရှိခဲ့တယ်လို့ ရွှေခြံသားပြောက်ကြားတပ်ဖွဲ့မှ တာဝန်ရှိသူက BBM ကို ပြောပါတယ်။

ကုက္ကဲအထက်တန်းကျောင်းခွဲမှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေဟာ ပြည်သူတွေနဲ့ ခရီးသွားပြည်သူတွေကို နေ့စဉ်ဆက်ကြေးကောက် အနိုင်ကျင့်လုယက်နေတာကြောင့် သတင်းရယူပြီး စက်တင်ဘာလ ၂ ရက်၊ မနက် ၉ နာရီ ၁၅ မိနစ်မှာ ရှေ့ထွက်ပဒေသာမိုင်းနဲ့ အသင့်စောင့်ဆိုင်းဖောက်ခွဲပြီး ပစ်ခတ်တိုက်ခိုက်ခဲ့တယ်လို့ သိရပါတယ်။

တိုက်ခိုက်မှုကြောင့် စစ်ကောင်စီတပ်သား ၇ ဦးသေဆုံးပြီး MA3 ၆ လက်၊ ကျည်ဘောက် ၂၀ ခု၊ MA5 ၁ လက်၊ ၆၀ မမ ၁ လက်၊ 5.56 ကျည် ၉၀၄ တောင့်၊ ၉ မမ ကျည် ၅ တောင့်၊ ၆၀ မမ ၃ ဖူး၊ အိနာဂါ ၂ ဖူး၊ ဓား ၅ ချောင်း၊ လက်ပစ်ဗုံး ၂ လုံး၊ လေးခွ ၂ လက်၊ ဝက်အူလှည့် ၁ ချောင်း၊ ငွေသား ၁၄၉၂၀၀၀ ကျပ်၊ ဖုန်း ၇ လုံး၊ လက်ပတ်နာရီ ၂ လုံးနဲ့ စစ်အသုံးအဆောင်အများအပြားကို သိမ်းဆည်းရရှိခဲ့တယ်လို့ ဖော်ပြထားပါတယ်။

“သေဆုံးတဲ့ ၇ ယောက်ထဲမှာ သုံးပွင့်နဲ့ ဗိုလ်ပါပါတယ်၊ သုံးပွင့်နဲ့ အောင်သောင်းပါ၊ တိုက်ခိုက်တာကတော့ ကျနော်တို့ တစ်ဖွဲ့ထဲပါ”

လို့ ရွှေခြံသားပြောက်ကြားတပ်ဖွဲ့မှ တာဝန်ရှိသူက BBM ကို‌ပြောပါတယ်။ ပြည်သူတွေကို အနိုင်ကျင့်လုယက်နှိပ်စက်နေတဲ့ စစ်ကောင်စီကို ရွှေခြံသားပြောက်ကြားတပ်ဖွဲ့ တိုက်နယ်(၁)အနေနဲ့ ဆက်လက်တိုက်ခိုက်သုတ်သင်ရှင်းလင်းသွားမှာ ဖြစ်ကြောင်း အဆိုပါတပ်က အသိပေးထားပါတယ်။

ပြည်သူတွေအနေနဲ့လည်း စစ်ကောင်စီက ပြည်သူတွေကို ပစ်မှတ်ထားပြီး လက်နက်ကြီး၊လေကြောင်းတို့နဲ့ တိုက်ခိုက်နေတာကြောင့် ဗုံးခိုကျင်းတွေတူးပြီး အသင့်အနေအထားနဲ့ အထူးသတိပြုနေထိုင်ကြဖို့ကိုလည်း ရွှေခြံသားပြောက်ကြားတပ်ဖွဲ့ မြင်းခြံမြို့နယ်က တိုက်တွန်းထားပါတယ်။

Video- ရွှေခြံသားပြောက်ကြားတပ်ဖွဲ့

#BBM#News#UpdateNews#ရွှေခြံသားပြောက်ကြားတပ်ဖွဲ့

စစ်ကိုင်းတိုင်း၊ ကန့်ဘလူမြို့နယ်မှာ အင်အား ၁၀၀ ခန့်ရှိတဲ့ စစ်ကောင်စီ စစ်ကြောင်းက စစ်ဘေးရှောင်ပြည်သူ လင်မယားကို ပစ်ခတ်သတ်ဖြတ်ခဲ့ပြီး စစ်ရှောင်တဲ ၄ လုံးကို မီးရှို့ဖျက်ဆီးခဲ့တယ်လို့ ကျွန်းလှ တက်ကြွလှုပ်ရှားသူများအဖွဲ့က ဒီနေ့ ထုတ်ပြန်ထားပါတယ်။

ဩဂုတ်လ ၃၁ ရက်နေ့၊ မနက် ၈ နာရီခွဲခန့်မှာ ချပ်သင်းကျေးရွာ စစ်ကောင်စီအထိုင်စခန်းမှ ပုဏ္ဏားကြီးရွာဘက်သို့ စစ်ကြောင်းထိုးလာတဲ့ စစ်ကောင်စီနဲ့ ပျူ ပူးပေါင်းအင်အား ၁၀၀ ခန့်ဟာ ဦးကင်းကြည်ရွာနဲ့ နှောကုန်းရွာကို ဒရုန်းနဲ့ ဗုံးကြဲတိုက်ခိုက်ခဲ့ပြီး‌နောက် ပုဏ္ဏားကြီးရွာမှ စစ်ဘေးရှောင်နေတဲ့ ကိုဇော်မျိုးလှိုင် ၄၅ နှစ်နဲ့ မမာမာသင်း ၄၄ နှစ်တို့ကို ပစ်ခတ်သတ်ဖြတ်ခဲ့ပြီး စစ်ရှောင်တဲ ၄ လုံးကို မီးရှို့ဖျက်ဆီးခဲ့တယ်လို့ ဆိုပါတယ်။

“ချပ်သင်းအထိုင်ကထွက်ခဲ့တဲ့ ‌ခွေးတွေက အင်အား ၁၀၀ လောက်ရှိတယ်၊ ၃ ဖွဲ့လောက်ခွဲထွက်ခဲ့တာ Drone နဲ့ကလဲ ဦးကင်းကြည်နဲ့ နှောကုန်းရွာတွေဘက် ဗုံးသီး ၄လုံးချလို့ ‌ပြေးရတာ၊ စစချင်းစစ်ရှောင်တဲဘက်ဝင်တာ တဲတွေကို ဝိုက်ပစ်တာဆိုတော့ တဲနားရှိနေတဲ့ ကိုဇော်မျိုးလှိုင်တို့ လင်မယားနှစ်ယောက်လုံး ပစ်သတ်ခံရတာ၊ ပစ်သတ်ပြီး ပါးစပ်တွေခေါင်းတွေ ဓားတွေနဲ့ ဖြဲထားတာ ရက်ရက်စက်စက်ပါ ကြောက်စရာကောင်းမှကောင်း လူစိတ်တကယ်မရှိတဲ့သူတွေ၊ စစ်ရှောင်ပြည်သူမှန်းသိသားနဲ့ကို ရက်ရက်စက်စက်သတ်ဖြတ်သွားတာ ပြီးတော့ တဲတွေမီးရှို့ခဲ့တာ”

လို့ ဒေသခံစစ်ရှောင်တစ်ဦးက ပြောဆိုကြောင်း ဖော်ပြထားပါတယ်။ စစ်ဘေးရှောင်လင်မယားကို သတ်ဖြတ်ခဲ့တဲ့ အဆိုပါစစ်ကြောင်းကို ပုဏ္ဏားကြီးရွာအရှေ့ဘက်မှာ ဒေသခံ ပကဖ အဖွဲ့နဲ့ KB2 ရဲဘော်တွေက မနက် ၁၀ နာရီခန့်မှာ စောင့်ကြိုပစ်ခတ်တိုက်ခိုက်ခဲ့ရာ စစ်ကောင်စီဘက်မှာ ထိခိုက်မှုရှိပြီး ဒဏ်ရာရသူ ၅ ဦးကို အထမ်းတွေ၊ လှည်းတွေနဲ့ တင်ဆောင်သွားတယ်လို့ ဖော်ပြထားပါတယ်။

“အဲဒီနောက်မှာ ပုဏ္ဏားကြီးရွာကျော်မှ ပကဖတွေ၊ PDF တွေနဲ့ ထိတွေ့တိုက်ပွဲဖြစ်ကြတာ ခွေးတွေဘက်က ၇ ယောက်လောက်ထိတယ်၊ အထမ်းတွေရော လှည်းနဲ့ရော တင်သွားတာ”

လို့ အဆိုပါဒေသခံစစ်ရှောင်က ပြောဆိုထားပါတယ်။ အဆိုပါထိတွေ့တိုက်ပွဲဟာ ၁ နာရီခွဲခန့်ကြာမြင့်ခဲ့ပြီး စစ်ကောင်စီဘက်မှ အထိနာခဲ့တဲ့အတွက် ရှေ့ဆက်မတိုးနိုင်ဘဲ မနက် ၁၁ နာရီ ၃၀ မိနစ်မှာ ချပ်သင်းအထိုင်စခန်းသို့ ပြန်လည်ဆုတ်ခွာသွားတယ်လို့ သတင်းရရှိပါတယ်။

Photo- ကန့်ဘလူမြို့နယ်မှာ ဩဂုတ်လအတွင်း ကျေးရွာတွေကို စစ်ကောင်စီ မီးရှို့ဖျက်ဆီးထားစဉ်။(ပုံဟောင်း)

🟥စစ်‌ကောင်စီတပ်သား ၁၃ ဦးသေဆုံးပြီး လက်နက်ခဲယမ်းအချို့ သိမ်းဆည်းရရှိ

စစ်ကိုင်းတိုင်း၊ မြင်းမူမြို့နယ်၊ မုံရွာ-မန္တလေး လမ်းပေါ်မှာ စစ်ကောင်စီ ယာဉ် ၂ စီးကို တော်လှန်ရေးပူးပေါင်းတပ်ဖွဲ့တွေက စောင့်ကြိုတိုက်ခိုက်ခဲ့ရာ စစ်ကောင်စီတပ်သား ၁၃ ဦးသေဆုံးပြီး လက်နက်ခဲယမ်းအချို့ သိမ်းဆည်းရရှိခဲ့တယ်လို့ Black Eagle Defence Force – MMU မှ တာဝန်ရှိသူက BBM ကို ပြောပါတယ်။

ဩဂုတ်လ ၃၀ ရက်နေ့၊ မနက် ၆ နာရီခန့်မှာ မြောင်လမ်းခွဲအထိုင်စခန်းမှ ထွက်လာတဲ့ အင်အား ၂၅ ဦးခန့်ပါ စစ်ကောင်စီ ကား ၂ စီးကို RPG နဲ့ စတင်ပစ်ခတ်ပြီး လက်နက်ငယ်တွေနဲ့ ထပ်မံတိုက်ခိုက်ခဲ့ရာ ကားတစ်စီးမှာ လုံးဝပျက်စီးသွားပြီး မျက်မြင် ၅ ဦးထက်နည်းသေဆုံးခဲ့တယ်လို့ ဆိုပါတယ်။

“အခုဖြစ်စဉ်မှာ ဆိုရင် Alphard ၁ စီးရယ်၊ 4 Wheel ၁ စီးရယ် အင်အား ၂၅ လောက်နဲ့ ရှေ့မှာလမ်းဘေးဝဲယာတွေကို Gun နဲ့ပစ်ပြီးတော့ ကား ၂ စီးက နောက်ကလိုက်လာတာတွေရှိတယ်၊ ပထမဆုံးကားကို RPG နဲ့ ထုလိုက်တာ ထိသွားပြီးတော့ ကားပေါ်မှာ ဘာမှပြန်ပြီးတော့ မလုပ်နိုင်ဘဲနဲ့ အောက်မှာ ခြေလျင်လျှောက်လာတဲ့ စခတွေနဲ့ တိုက်ခိုက်မှုဖြစ်တာပေါ့”

လို့ မြင်းမူလင်းယုန်နက် ကာကွယ်ရေးအဖွဲ့မှ တာဝန်ရှိသူက BBM ကိုပြောပါတယ်။ မြင်းမူမြို့နယ်အတွင်းမှာ အလ္လကပ္ပမှ မုံရွာ-မန္တလေးလမ်းတလျှောက် ဒို့မြန်မာကျော်ဆီဆိုင်၊ ရေဦးဆီဆိုင်၊ မြောင်လမ်းခွဲ စတဲ့နေရာတွေမှာ စစ်ကောင်စီက တခုနဲ့တခု နီးကပ်စွာတပ်စွဲထားတာတွေရှိသလို အဲဒီအထိုင်စခန်းတွေမှ အင်အားတွေက ကင်းပုန်းထွက် ပိုက်ဆံကောက်တာတွေလည်းရှိတယ်လို့ သိရပါတယ်။

“ကျနော်တို့ တက်ပြီးတော့ ကားတွေကို သိမ်းမယ်လုပ်တဲ့အချိန်မှာ မြင်းမူကနေပြီးတော့ ကား ၂ စီးထွက်လာတာတွေရှိတယ်၊ အဲဒီမှာ ရဲဘော်ထိထားတဲ့ အနေအထားတွေရော၊ ကျည်အခက်အခဲရှိတာတွေရော ဆိုတော့ လက်နက်တွေကတော့ အကုန်လုံး မကောက်နိုင်ဘူးပေါ့၊ အလောင်းတွေပုံနေတာတွေ ရုပ်သံဖိုင်တွေမှာ ရှိတယ်”

လို့ ဆက်လက်ပြောပါတယ်။ တိုက်ခိုက်မှုအတွင်း စစ်ကောင်စီဘက်မှ ၁၃ ဦးသေဆုံးပြီး အများအပြား အပြင်းအထန်ဒဏ်ရာရတဲ့အပြင် MA11 ၂ လက်၊ ကျည်ဘောက် ၁ ခုနဲ့ အီနာဂါဗုံးသီး ၁ လုံးတို့ကို သိမ်းဆည်းရရှိခဲ့တယ်လို့ ထုတ်ပြန်ချက်မှာလည်း ဖော်ပြထားပါတယ်။

“ခွေးသေဆုံးမှုကတော့ ကျနော်တို့ ဒီဖြစ်စဉ်မှာ ဖြစ်နေတုန်းကတော့ ကျနော်တို့ မျက်မြင်ကို ကားပေါ်မှာပါလာတဲ့ ကားသမားရယ်၊ Alphard ထဲကတော့ အကုန်သေသွားပြီးတော့၊ ကျန်တဲ့ လမ်းလျှောက်လာတဲ့ ၂ ကောင်ဆိုတော့ ဖြစ်စဉ်မှာ ၅ ကောင်မျက်မြင်သေတာပေါ့၊ ဒဏ်ရာရတာကတော့ အများအပြား ဒဏ်ရာရတယ်၊ မြေပြင်သတင်းပို့တာက ဆေးရုံမှာ နောက်ထပ် ခွေး ၃ ကောင်ထပ်သေတယ်၊ ကုသနေချိန်မှာ နောက်ထပ် ၅ ကောင်ထပ်သေတာ”

လို့ အဆိုပါ တာဝန်ရှိသူက ဆက်ပြောပါတယ်။ တိုက်ခိုက်မှုကြောင့် စစ်ကောင်စီဘက်မှ အများအပြားထိခိုက်ဒဏ်ရာရတာတွေ ရှိခဲ့တဲ့အတွက် တိုက်ခိုက်မှုဖြစ်စဉ်အပြီးမှာ အနီးပတ်ဝန်းကျင်ကို စစ်ကောင်စီက လက်နက်ကြီးတွေနဲ့ ရမ်းသမ်းပစ်တာတွေလည်း ရှိခဲ့တယ်လို့ ဆိုပါတယ်။

စစ်ရေးအခြေအနေတွေကို လုပ်နိုင်တဲ့အတိုင်းအတာ တစ်ခုအထိ လုပ်ဆောင်နေပြီး ပြည်သူလူထုအနေနဲ့ စစ်ရေးဖြစ်စဉ်တွေ ဖြစ်နေတဲ့အချိန်မှာ အကုန်လုံးက စစ်ရေးအသိသတိရှိဖို့‌နဲ့ အသွားအလာတွေ ဂရုစိုက်ကြဖို့ကိုလည်း Black Eagle Defence Force – MMU က အသိပေးထားပါတယ်။

“အခုဖြစ်စဉ်အပြီး ရဲဘော်တွေဆုတ်လာတဲ့အချိန်မှာလဲ သူတို့က သူတို့လုပ်ရိုးလုပ်စဉ်အတိုင်း ပြည်သူကိုအဓိကထားပြီးတော့ အကြောင်းမဲ့လိုက်ပစ်တာတွေရှိပါတယ်၊ သူတို့အထိုင်တွေကနေ ဆိုင်ကယ်စီးသွားတာတွေကို ရမ်းသမ်းပစ်ခတ်တာတွေရှိပါတယ်”

လို့ အဆိုပါတပ်မှ တာဝန်ရှိသူက အသိပေးပြောဆိုပါတယ်။ အဆိုပါစစ်ဆင်ရေးကို မြင်းမူမြို့နယ် ပကဖ တပ်ဖွဲ့ဦးဆောင်ပြီး Black Eagle Defence Force (MMU)၊ စစ်ကိုင်းခရိုင် တပ်ရင်း(၁) တပ်ခွဲ(၂)၊ အလ္လကပ္ပတိုက်နယ်တပ်ဖွဲ့၊ တောချောင်းဦးတိုက်နယ်တပ်ဖွဲ့၊ မြင်းမူမြို့နယ် ပလဖ တပ်ဖွဲ့တို့က ပူးပေါင်းတိုက်ခိုက်ခဲ့တာဖြစ်ပြီး ရဲဘော် တစ်ဦး ခြေထောက်ကျည်ထိမှန်ဒဏ်ရာရခဲ့တယ်လို့ သတင်းရရှိပါတယ်။

စစ်ကောင်စီတပ်သား ၁၀ ဦးသေဆုံးပြီး လက်နက်ခဲယမ်းအချို့ သိမ်းဆည်းရရှိ

မန္တ‌လေးတိုင်း၊ နွားထိုးကြီးမြို့နယ်မှာ ရွာပေါင်း ၂၀ ကျော် စစ်ကြောင်းထိုးမီးရှို့လာတဲ့ စစ်ကောင်စီနဲ့ ပျူခေါင်းဆောင် သီတာယုမွန် လက်အောက်ခံ ပူးပေါင်းအဖွဲ့ကို တိုက်ခိုက်ခဲ့ရာ စစ်ကောင်စီတပ်သား ၁၀ ဦးသေဆုံးပြီး လက်နက်ခဲယမ်းအချို့ သိမ်းဆည်းရရှိခဲ့တယ်လို့ နွားထိုးကြီး ပကဖ က ယမန်နေ့၊ ညပိုင်းမှာ ထုတ်ပြန်ပါတယ်။

ဩဂုတ်လ လဆန်းပိုင်းမှစပြီး မြင်းခြံမြို့နယ်မှ စတင်စစ်ကြောင်းထိုးလာတဲ့ စစ်‌ကောင်စီနဲ့ ပျူ ပူးပေါင်းအင်အား ၃၀၀ ခန့်စစ်ကြောင်းကို မာန်လည်ရွာသို့ စစ်ကြောင်းထိုးလာစဉ် ဩဂုတ်လ ၂၀ ရက်မှာ တိုက်ခိုက်ခဲ့ရာ စကစတပ်သား ၁၀ ဦးမျက်မြင်သေဆုံးပြီး ၈ ဦးခန့်အပြင်းအထန်ဒဏ်ရာရခဲ့တယ်လို့ ဖော်ပြထားပါတယ်။

“ရွာပေါင်း ၂၀ ကျော် ဗလုံတို့ ဘာတို့မှာ မီးရှို့ထားတဲ့ စစ်ကြောင်းပေါ့၊ အဓိကကတော့ သီတာယုမွန် လက်အောက်ခံ ပျူစောထီးတွေလဲပါတယ်၊ အင်အားက ၃၀၀ ခန့်ဝန်းကျင်၊ ဩဂုတ်လ ၁၈ ရက်မှာ မာန်လည်ကိုရောက်တယ်၊ ၃ ရက်အကြာမှာ တော်လှန်ရေးတပ်ဖွဲ့တွေနဲ့ တိုက်ပွဲဖြစ်တယ်၊ စခ ဘက်ကနေ မျက်မြင် ၁၀ ယောက်အထိ ကျရှုံးတယ်၊ အထိအခိုက်က ၈ ယောက်အထက်မှာပဲရှိတယ်”

လို့ နွားထိုးကြီး ပကဖ သတင်းနဲ့ပြန်ကြားရေး တာဝန်ခံက BBM ကိုပြောပါတယ်။ တိုက်ပွဲအတွင်း MA11 ၂ လက်၊ Drone Shooter ၁ လက်၊ ငါးကြင်းမြီးပြောင်း ၁ ချောင်း၊ လက်ပစ်ဗုံး ၃ လုံး၊ Starlink ၁ လုံး၊ ငွေသားအချို့၊ ကျည်ဘောက် ၂ ခုနဲ့အတူ ကျည်အချို့ကိုပါ သိမ်းဆည်းရရှိခဲ့တယ်လို့ ဆိုပါတယ်။

စစ်ကောင်စီစစ်ကြောင်းဟာ ပြည်သူလူထု နေအိမ်တွေကို မီးရှို့ဖျက်ဆီးခဲ့သလို ကျေးရွာတွေရှိ ပြည်သူတွေကိုလည်း သတ်ဖြတ်မှုတွေ ရှိခဲ့ကြောင်းနဲ့ မာန်လည်တိုက်ပွဲမှာလည်း လေကြောင်းပစ်ကူ၊ ဟောင်ဝစ်ဇာ လက်နက်ကြီး ပစ်ကူတွေ များစွာပေးပြီး တိုက်ခိုက်ခဲ့တယ်လို့ သိရပါတယ်။

“မာန်လည်မှာတော့ သူတို့ တပ်ချထာစဉ်မှာ မီးရှို့ခဲ့တာတွေရှိတယ်၊ အိမ်ခြေ ၁၀၀ ဝန်းကျင်ရှိတယ်၊ သတ်ဖြတ်ခံရတာဆိုရင် တံစိုး အဲဒီ ၂ ရွာပါဗျ၊ ပြီးတော့ မြင်းခြံနယ်ထဲက ဗလွန်ရယ်၊ ၅ ယောက်ပါဗျ အသတ်ခံရတာ၊ လက်ဝဲက ၁ ယောက်၊ စုစုပေါင်း ၆ ယောက်”

လို့ နွားထိုးကြီး ပကဖ သတင်းနဲ့ပြန်ကြားရေး တာဝန်ခံက ဆက်လက်ပြောဆိုပါတယ်။ မာန်လည်ရွာတိုက်ပွဲကို နွားထိုးကြီးမြို့နယ် ပြည်သူ့ကာကွယ်ရေးအဖွဲ့ (ပကဖ) နဲ့အတူ မြင်းခြံခရိုင် တပ်ရင်းတပ်ဖွဲ့တွေ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီစစ်ကြောင်းဟာ မြင်းခြံဘက်သို့ ပြန်လည်ဆုတ်ခွာသွားပြီဖြစ်တယ်လို့ သတင်းရရှိပါတယ်။

#BBM#News#UpdateNews#Jumta#PeopledefenseForce#Natogyi#Myingyan

ဒေါ်‌အောင်ဆန်းစုကြည်၊ သမ္မတကြီး ဦးဝင်းမြင့်အပါ နိုင်ကျဉ်းအားလုံး နွေဦးတော်လှန်ရေးနဲ့ တသားတည်းရှိနေဟု အသိပေး

လူထုခေါင်းဆောင် ဒေါ်အောင်ဆန်းစုကြည်ကို စစ်ကောင်စီက တွေ့ဆုံညှိနှိုင်းမှုတွေ လုပ်ဆောင်နေသော်လည်း ဘယ်အရာကိုမှ ညှိနှိုင်းမရတဲ့အတွက် လွှတ်မပေးတာဖြစ်ပြီး ဒေါ်‌အောင်ဆန်းစုကြည်၊ သမ္မတကြီး ဦးဝင်းမြင့်အပါအဝင် နိုင်ကျဉ်းတွေအားလုံး နွေဦးတော်လှန်ရေးနဲ့ တသားတည်းရှိနေကြောင်း AAPPမှ ဦးအောင်မျိုးကျော်က BBM ကိုပြောပါတယ်။

လူထုခေါင်းဆောင် ဒေါ်အောင်ဆန်းစုကြည်၊ သမ္မတ ဦးဝင်းမြင့် တို့ရဲ့ အကျဉ်းချခံထားရမှု အခြေအနေ အပါအဝင် နိုင်ငံရေးအကျဉ်းသားတွေနဲ့ ပတ်သက်ပြီး BBM က တွေ့ဆုံမေးမြန်းရာမှာ နိုင်ငံရေးအကျဉ်းသားများကူညီစောင့်ရှောက်ရေးအသင်း AAPPမှ ဦးအောင်မျိုးကျော်က အခုလိုထည့်သွင်းပြောကြားခဲ့တာပါ။

“သူတို့လိုအပ်လာရင် ကျနော်တို့ ခေါင်းဆောင်တွေကို လွှတ်ပြီးတော့ ကစားတာမျိုးလုပ်မယ်၊ အခုလဲကျနော်တို့ ကြားသိသ‌လောက်က တောက်လျှောက်ညှိနေတာပဲ၊ ရာပြည့် သွားသွားပြီးတော့ တွေ့နေတယ်ဆိုတဲ့ သတင်းတွေက ကြားနေရတယ်၊ သူတို့လိုချင်တဲ့ အခြေအနေမျိုး သူတို့လိုချင်တဲ့ အတိုင်းအတာကို ဒေါ်အောင်ဆန်းစုကြည်ဘက်က လိုက်လျောတာ မရှိသေးတဲ့အတွက်ကြောင့် အခုအချိန်ထိ မလွှတ်သေးတာ”

လို့ ဦးအောင်မျိုးကျော်က BBM ကိုပြောပါတယ်။ ဒေါ်အောင်ဆန်းစုကြည်ကို စစ်ကောင်စီက ညှိနှိုင်းပြီး လွှတ်ပေးခဲ့ပါက တော်လှန်ရေး ကပြောင်းကပြန်ဖြစ်နိုင်ပြီး တော်လှန်ရေး အား‌လျော့သွားနိုင်သလို တော်လှန်ရေးအင်အားစုတွေ အချင်းချင်းတွေကြားမှာလည်း ပြဿနာတွေ ဖြစ်ပေါ်လာနိုင်ကြောင်းကို သူက ဆက်လက်ပြောဆိုပါတယ်။

“သူတို့လိုချင်တဲ့ ပုံစံအတိုင်း ဒေါ်အောင်ဆန်းစုကြည်ဘက်က ဘာမှလက်မခံတဲ့အတွက်ကြောင့် အခုအချိန်ထိ မလွှတ်သေးတာ၊ နို့မို့ဆိုရင် လွှတ်ပြီးတော့ ကျနော်တို့ တော်လှန်ရေးကို ကပြောင်းကပြန်ဖြစ်အောင် လုပ်တော့မှာ၊ သေချာတယ် ဒေါ်အောင်ဆန်းစုကြည်သာ သူတို့နဲ့ ညှိနှိုင်းပြီးတော့ထွက်လာရင် ကျနော်တို့ တော်လှန်ရေးက တစုံတရာအားလျော့သွားနိုင်တယ်၊ လက်မခံတဲ့သူနဲ့ လက်ခံတဲ့သူနဲ့ အချင်းချင်းကြားထဲမှာကို ပြသနာတက်နိုင်တယ်၊ အခုအချိန်ထိတော့ ကျနော်တို့က ကျနော်တို့ ခေါင်းဆောင်ကို ယုံတယ်၊ စစ်အုပ်စုဘက်က ညှိနှိုင်းတဲ့ကိစ္စတွေကို ကျနော်တို့ ခေါင်းဆောင်ဘက်က ဘာတခုမှ လက်မခံသေးဘူးဆိုတာကို ကျနော်တို့ ယုံကြည်တယ်၊ ဒါကြောင့်မို့ သူတို့ မလွှတ်သေးတာ”

လို့ သုံးသပ်ပြောဆိုခဲ့ပါတယ်။ လက်ရှိအကျဉ်းထောင်ထဲမှာရှိနေတဲ့ ဒေါ်‌အောင်ဆန်းစုကြည်၊ သမ္မတ ဦးဝင်းမြင့် အပါအဝင် နိုင်ငံ‌ရေးအကျဉ်းသားတွေအားလုံးဟာ နွေဦးတော်လှန်ရေးထဲမှာ တသားတည်းရှိနေပြီး ထောင်ထဲမှာ နေနေတာကိုက နွေဦးတော်လှန်ရေးနဲ့ အတူရပ်တည်နေတာဖြစ်သလို နွေဦးတော်လှန်ရေးအတွက် တိုက်ပွဲဝင်နေတာလည်းဖြစ်တယ်လို့ AAPP မှ ဦးအောင်မျိုးကျော်က ထောက်ပြပြောဆိုခဲ့တာ ဖြစ်ပါတယ်။

စစ်သုံ့ပန်း ၄ ဦး၊ အလောင်း ၄ လောင်းနဲ့ သေနတ် ၆ လက်သိမ်းဆည်းရရှိ

စစ်ကိုင်းမြို့နယ်၊ မင်းကွန်း‌ဒေသ၊ ဘုန်းကြီးကျောင်းမှာ အင်အား ၃၀ ခန့် တပ်စွဲထားတဲ့ စစ်ကောင်စီစခန်းကုန်းကို တော်လှန်‌ရေးတပ်ဖွဲ့တွေက တိုက်ခိုက်သိမ်းပိုက်ခဲ့ရာ စစ်ကောင်စီတပ်သား ၄ ဦးသေဆုံးပြီး သေနတ် ၆ လက်နဲ့ ခဲယမ်းတွေ သိမ်းဆည်းရရှိခဲ့တယ်လို့ သိရပါတယ်။

မင်းကွန်းတောင်ရွာရှိ နဂါးပတ်တောင်ကျောင်းတိုက်မှာ အင်အား ၃၀ ခန့်နဲ့ တပ်စွဲထားတဲ့ စစ်ကောင်စီစခန်းကုန်းကို ဇွန်လ ၂၇ ရက်နေ့မှာ အလစ်အငိုက်ဝင်ရောက်တိုက်ခိုက်ခဲ့ရာ စစ်သုံ့ပန်း ၄ ဦးအရှင်မိပြီး စစ်ကောင်စီ အလောင်း ၄ လောင်းနဲ့ G3 ၄ လက်၊ MA1 ၂ လက်၊ ခဲယမ်းပစ္စည်းတွေ သိမ်းဆည်းရရှိခဲ့တယ်လို့ ယူနီကွန်းပျောက်ကြားတပ်ဖွဲ့က ထုတ်ပြန်ထားတာပါ။

“နဂါးပတ်တောင်စခန်းကုန်းကို ၂၇ ရက်နေ့၊ နေ့ခင်း ၂ နာရီလောက်က တိုက်တယ်၊ အရှင်လေးကောင်၊ အသေလေးကောင်ပါ၊ စစ်ကောင်စီတပ်က မင်းကွန်းတောင်ရွာ တရွာလုံးနီးပါးကို မီးရှို့သွားပါတယ်” လို့ ယူနီကွန်းပျောက်ကြားတပ်ဖွဲ့မှ တာဝန်ရှိသူ တစ်ဦးက BBM ကို ပြောပါတယ်။

စခန်းကုန်း တစ်ခုလုံးကို သိမ်းပိုက်နိုင်ခဲ့တာဖြစ်ပြီး ကျန်တဲ့ စကစတပ်ဖွဲ့ဝင်တွေ စခန်းစွန့်ခွာထွက်ပြေးသွားကြောင်းနဲ့ မင်းကွန်းရဲစခန်းမှ စစ်ကူအများအပြား ထွက်ခွာလာတာကြောင့်အပြင် စခန်းကုန်းမှာလည်း ဘုန်းကြီးကျောင်းဖြစ်နေတာကြောင့် မီးရှို့ရှင်းလင်းမှု မလုပ်ဆောင်ခဲ့ခြင်းဖြစ်တယ်လို့ အသိပေးထားပါတယ်။

ဇွန်လ ၂၈ ရက်နေ့မှာလည်း ချောင်းမကြီးနဲ့ ကင်းကျေးရွာမှ စစ်ကြောင်းကို ဝင်ရောက်စီးနင်းတိုက်ခိုက်ခဲ့ရာ စစ်ကြောင်းပျက်ပြီး ဆုတ်ခွာထွက်ပြေးသွားကြောင်းနဲ့ အလောင်း၊ လက်နက်တွေရသလို တော်လှန်ရေးတပ်ဖွဲ့တွေဘက်မှာလည်း ထိခိုက်ကျဆုံးမှုရှိတယ်လို့ ထုတ်ပြန်ထားတာနဲ့ပက်သက်ပြီး အခြေအနေကို BBM ကမေးမြန်ရာမှာ ဖြေကြားနိုင်ခြင်းမရှိသေးကြောင်း အဆိုပါတပ်ဖွဲ့က ပြန်ကြားပါတယ်။

အဆိုပါစစ်ဆင်ရေးကို ယူနီကွန်း ပျောက်ကြားတပ်ဖွဲ့ နဲ့ No More Dictatorship (NMD) တပ်ဖွဲ့တွေကပူးပေါင်းတိုက်ခိုက်ခဲ့တာဖြစ်ပြီး တော်လှန်ရေးရဲဘော် တစ်ဦးထိခိုက်ဒဏ်ရာရခဲ့တယ်လို့ သိရပါတယ်။