နိုင်နိုင်

စစ်ကောင်စီစစ်ကြောင်းက ကျဆုံးရဲဘော် ၂ ဦးရဲ့ ဂူဗိမာန်ကိုပါ ဖျက်ဆီးသွား

မကွေးတိုင်း၊ ပခုက္ကူခရိုင်၊ မြိုင်မြို့နယ်မှာ အခြေစိုက်တဲ့ Burma Revolution Rangers အဖွဲ့ရဲ့တပ်စခန်းကို စစ်ကောင်စီက စစ်ကြောင်းထိုးဝင်ရောက်စီးနင်းမှုကြောင့် ရဲဘော်တစ်ဦး ကျဆုံးခဲ့ပြီး စခန်းကိုလည်းမီးရှို့ဖျက်ဆီးသွားတဲ့အပြင် ကျဆုံးသွားတဲ့ ရဲဘော် ၂ ဦးရဲ့ ဂူဗိမာန်တွေကိုပါ ဖျက်ဆီးသွားတယ်လို့ သိရပါတယ်။

မနေ့က ဒီဇင်ဘာလ ၈ ရက်မှာ ပခုက္ကူအခြေစိုက် စစ်ကောင်စီရဲ့ တပ်မ ၁၀၁ မှထွက်လာတဲ့ အင်အား ၁၀၀ ကျော်ပါ စစ်ကြောင်းဟာ Burma Revolution Rangers အဖွဲ့တွေ နေရာယူထားတဲ့ စခန်းအနီးကို စစ်ကြောင်းထိုးလာတာကြောင့် တိုက်ပွဲတွေဖြစ်ပွားခဲ့တာ ဖြစ်တယ်လို့ Burma Revolution Rangers အဖွဲ့ရဲ့ ပြန်ကြားရေးတာဝန်ခံ ကိုဒီမိုက BBM ကို ပြောပါတယ်။

“မနေ့က ၈ ရက်နေ့၊ မနက်ပိုင်းလောက်က ပခုက္ကူအခြေစိုက် ၁၀၁ တပ်ရင်းကနေ ထွက်လာတဲ့စစ်ကြောင်းက ၇ ရက်နေ့လောက်မှာ ထွက်လာပါတယ်၊ အဲဒီလိုထွက်လာတော့ ဘုန်းကန်ပျူရွာနဲ့ ကျောက်ဆက်ကန်ဆိုတဲ့ ရွာတွေကိုဝင်ပါတယ်၊ အဲဒီမှာ ညအိပ်ပြီးတော့ ကျနော်တို့ စခန်းရှိတဲ့နေရာဘက်ကို ဦးတည်ပြီးထွက်လာတာ ဖြစ်ပါတယ်၊ ထွက်လာတဲ့အခါ သတင်းတွေအရ ကျနော်တို့က လူအင်အား၊ လက်နက်အင်အားတွေနဲ့ ကာကွယ်တာပေါ့၊ စစ်ကောင်စီဘက်ကလည်း အင်အားတွေများပါတယ်၊ သူတို့ကတော့ လက်နက်ကြီး၊ RPG ၊ ၆၀ မမ၊ ၄၀ မမ တွေနဲ့ ပစ်ခတ်တာရှိပါတယ်၊ အင်အားကလည်း မမျှတော့ စစ်ကူလာတဲ့ ရဲဘော်တစ်ယောက်လည်း လက်နက်ကြီးကျည် ထိသွားပါတယ်” လို့ Burma Revolution Rangers အဖွဲ့ရဲ့ ပြန်ကြားရေးတာဝန်ခံ ကိုဒီမိုက ပြောပါတယ်။

စစ်ကောင်စီက အခုလို အင်အားအလုံးအရင်းနဲ့ စစ်ကြောင်းထိုးလာတာကြောင့် Burma Revolution Rangers အဖွဲ့ရဲ့ စခန်းတစ်ခုလုံး မီးလောင်ပျက်ဆီးသွားသလို ကား ၂ စီး၊ ဆိုင်ကယ်နဲ့ လက်နက်ခဲယမ်းရိက္ခာတွေလည်း ဆုံးရှုံးသွားခဲ့ရပြီး စစ်ဘေးရှောင်နေအိမ် ၁၀ လုံးကျော်ကိုလည်း မီးရှို့ဖျက်ဆီးသွားတယ်လို့ သိရပါတယ်။

“အဖွဲ့မှာက အကုန်လုံးပေါင်းမှ ရဲဘော် ၂၀ ကျော် ၃၀ လောက်ပဲရှိပါတယ်၊ အင်အားကလည်း အဖွဲ့မှာက အရမ်းကိုနည်းပါတယ်၊ အင်အားမမျှတော့ အကုန်လုံးပြန်ဆုတ်ရတာပေါ့၊ အဲဒီအချိန်မှာ စစ်ကောင်စီတပ်ဖွဲ့တွေက စခန်းအနီးကို ဝင်ရောက်လာတာပါ၊ ဝင်ရောက်လာတော့ စခန်းမှာကျန်ရှိခဲ့တဲ့ ပစ္စည်းတွေ၊ အဆောက်အအုံတွေ၊ ဘန်ကာတွေအကုန်လုံးကို ဖျက်ဆီးခဲ့တာရှိပါတယ်၊ ပြီးတော့ ကျဆုံးရဲဘော်တွေရဲ့ ဂူဗိမာန် ၂ ခုကိုလည်း ဖျက်ဆီးသွားတာရှိပါတယ်” လို့ ကိုဒီမိုက ဆက်ပြောပါတယ်။

လက်ရှိမှာတော့ အဆိုပါ စစ်ကောင်စီစစ်ကြောင်းဟာ ကျောက်ဆက်ကန်ကျေးရွာအနီးမှာ တပ်စွဲနေရာယူထားပြီး ထိတွေ့တိုက်ပွဲတွေ ဖြစ်ပွားတာမရှိသေးဘူးလို့လည်း သိရပါတယ်။

ပခုက္ကူမြို့နယ် ပြည်သူ့ကာကွယ်‌ရေးအဖွဲ့ – Burma Revolution Rangers (BRR)တပ်ဟာ ပခုက္ကူ၊ မြိုင်နဲ့ ပေါက်မြို့နယ်အတွင်းမှာ စစ်ရေးလှုပ်ရှားမှုတွေရှိနေတာဖြစ်ပြီး အခုနှစ် ဧပြီလမှာ ပခုက္ကူ PDF နဲ့ ပူးပေါင်းပြီး စစ်တပ်ရဲ့ ပါရာမော်တာတစ်စီးကို ပထမဆုံးဖျက်ဆီးနိုင်ခဲ့တဲ့ တော်လှန်ရေးအဖွဲ့တစ်ခုလည်း ဖြစ်ပါတယ်။

Photo-BRR

မကွေးတိုင်း၊ အမ်း – ပဒါန်းလမ်းပိုင်းရှိ နတ်ရေကန်လေကြောင်းရန်ကာကွယ်ရေးစခန်း ဗျူဟာကုန်းအနီးမှ AA နဲ့ ပူးပေါင်းတပ်တွေ သိမ်းထားတဲ့ ကာကင်းစခန်းတွေကို စစ်ကောင်စီက လက်နက်ကြီး၊ လေကြောင်း၊ ဒရုန်းတွေနဲ့ ဗုံးကြဲချတိုက်ခိုက်နေတယ်လို့ တော်လှန်ရေးတပ်ဖွဲ့ဝင်တွေနဲ့ နီးစပ်တဲ့သူတွေဆီက သိရပါတယ်။

AA နဲ့ ပူးပေါင်းတပ်တွေဟာ နတ်ရေကန်ဗျူဟာကုန်းရှိ စခန်းတွေအကုန်လုံးနီးပါးကို သိမ်းပိုက်ထိန်းချုပ်ထားတာဖြစ်ပြီး လက်ကျန်စခန်းဖြစ်တဲ့ ခမောက်တောင်စခန်းတစ်ခုကိုသာ သိမ်းပိုက်ဖို့ ကျန်ရှိတော့တာလည်း ဖြစ်ပါတယ်။

ဒါကြောင့် အာရက္ခတပ်တော် AA နဲ့ ပူးပေါင်းတပ်တွေဟာ နတ်ရေကန်ဗျူဟာကုန်းရှိ ခမောက်တောင်စခန်းကို သိမ်းပိုက်ဖို့အတွက် ထိုးစစ်ဆင်တိုက်ခိုက်နေပြီး စစ်ကောင်စီတပ်ကလည်း AA နဲ့ ပူးပေါင်းတပ်တွေသိမ်းထားတဲ့ စခန်းနေရာတွေကို လေကြောင်း၊ ဒရုန်းတွေနဲ့ ဗုံးကြဲချတိုက်ခိုက်တာ၊ လက်နက်ကြီးတွေနဲ့ ပစ်ခတ်တာတွေ နေ့စဥ်နဲ့အမျှ ပြုလုပ်နေတယ်လို့ AA နဲ့ နီးစပ်တဲ့တော်လှန်ရေးတပ်ဖွဲ့ဝင်တစ်ဦးက ပြောပါတယ်။

“နတ်ရေကန်ဗျူဟာကုန်းကတော့ အမ်း – ပဒါန်းလမ်းပိုင်းအတွက် အရေးပါတဲ့ စခန်းတစ်ခုဖြစ်ပါတယ်၊ ဒါကို စစ်တပ်ဘက်ကလည်း ကောင်းကောင်းကြီး သိပါတယ်၊ အဲဒီစခန်းသာ တော်လှန်ရေးတပ်တွေက ရသွားရင် ပဒါန်းတပ်နယ်အတွင်းက စခန်းတွေ၊ ကပစ စက်ရုံတွေကို ခြိမ်းခြောက်လာနိုင်တော့မှာပါ၊ ဒါကြောင့် စစ်တပ်က ဗျူဟာကုန်းမကျရောက်ရေးအတွက် လေကြောင်း၊ ဒရုန်း၊ လက်နက်ကြီးတွေကို အသုံးပြုပြီး အသည်းအသန် ခုခံကာကွယ်နေတာပါ” လို့ တော်လှန်ရေးတပ်ဖွဲ့ဝင် တစ်ဦးက BBM ကို ပြောပါတယ်။

စစ်ကောင်စီတပ်ဟာ အမ်း – ပဒါန်းလမ်းပိုင်းက နတ်ရေကန်ဗျူဟာကုန်းနဲ့ ၆ မိုင်အကွာမှ ပျင်းဝစစ်ဆေးရေး ဂိတ်မှာလည်း ကာကင်းစခန်းတွေ၊ လက်နက်ကြီးစခန်းတွေကို တိုးချဲ့ဆောက်လုပ်ထားပြီး အဲဒီလက်နက်ကြီး စခန်းတွေကလည်း လက်နက်ကြီးတွေ ဗျူဟာကုန်းအနီးကို အဆက်မပြတ် ပစ်ခတ်နေတာရှိတယ်လို့လည်း သိရပါတယ်။

နတ်ရေကန်ဗျူဟာကုန်းမှာ ကျန်ရှိနေသေးတဲ့ ခမောက်တောင်စခန်းမှာ စစ်ကောင်စီတပ်ဖွဲ့ဝင်အင်အား ၃၀၀ ဝန်းကျင်သာရှိတော့တာဖြစ်ပြီး ဗျူဟာကုန်းကို စစ်ကူအင်အားလာပို့နိုင်တဲ့ မြေပြင်ကုန်းလမ်းကြောင်းတွေ အကုန်လုံးနီးပါးကိုလည်း AA နဲ့ ပူးပေါင်းတပ်တွေက ပိတ်ဆို့ဖြတ်တောက်ထားတာ ဖြစ်ပါတယ်။

ဒါကြောင့် စစ်ကောင်စီတပ်ဟာ မြေပြင်ကနေ စစ်ကူအင်အား၊ စစ်လက်နက်ခဲယမ်းပစ္စည်းတွေကို ပို့ဆောင်လို့မရတာကြောင့် လေကြောင်းကနေ ပို့ဆောင်ပေးမှုတွေရှိနေပြီး တချို့စားနပ်ရိက္ခာပစ္စည်းတွေကိုလည်း AA နဲ့ ပူးပေါင်းတပ်တွေက ရရှိနေတယ်လို့ သိရပါတယ်။

နတ်ရေကန်ဗျူဟာကုန်းဟာ အခုနှစ်မကုန်ခင် တော်လှန်ရေးတပ်ဖွဲ့တွေဆီမှာ ကျရောက်နိုင်တာကြောင့် ပဒါန်းတပ်နယ်အတွင်းမှာလည်း စစ်ကောင်စီတပ်က စစ်အင်အားတွေဖြည့်တင်းနေကာ ဆုံကုန်း၊ ပျင်းဝ စစ်ဆေးရေးဂိတ်တွေကို ပို့ဆောင်ပေးနေတယ်လို့လည်း သိရပါတယ်။

“ပဒါန်းတပ်နယ်အတွင်းကို စစ်အင်အားတွေ ရောက်တာရှိပါတယ်၊ အဲဒီစစ်အင်အားတွေကို ဆုံကုန်းတို့ ပျင်းဝ စစ်ဆေးရေးဂိတ်တွေကို ပို့ပေးနေတာရှိပါတယ်၊ အဓိကတော့ ကပစ ၁၄ စက်ရုံ ခုခံမဲ့သဘောအတွက် ကာကွယ်နေတာဖြစ်ပါတယ်” လို့ AA နဲ့ နီးစပ်တဲ့စစ်ရေးသတင်းရင်းမြစ်တစ်ဦးက ဆိုပါတယ်။

အာရက္ခတပ်တော် AA ဟာ ရခိုင်မှ မြို့နယ် ၁၄ ခုကို အပြီးသတ်သိမ်းပိုက်ထိန်းချုပ်လိုက်ပြီးနောက် အခုနှစ် ၂၀၂၅၊ နှစ်ဆန်းပိုင်းမှစတင်ပြီး မကွေးတိုင်း၊ ပဲခူးတိုင်း၊ ဧရာဝတီတိုင်းတွေကို ထိုးစစ်ဆင်တိုက်ခိုက်ခဲ့ရာ ၁၀ လကျော်ကြာတိုက်ခိုက်မှုအတွင်းမှာ ရခိုင်ရိုးမအစပ်မှ စစ်ကောင်စီတပ်စခန်း ၅ ခုနဲ့ ကျေးရွာ ၃ ရွာကို AA နဲ့ ပူးပေါင်းတပ်တွေက သိမ်းပိုက်ထိန်းချုပ်ထားတယ်လို့ ISP Myanmar ရဲ့ ဒီဇင်ဘာလ ၁ ရက်နေ့ ထုတ်ပြန်တဲ့အစီရင်ခံစာအရ သိရပါတယ်။

AA နဲ့ ပူးပေါင်းတပ်တွေ ထိုးစစ်ဆင်တိုက်ခိုက်နေတဲ့ မကွေးတိုင်းမှာ စစ်ကောင်စီတပ်ရဲ့ စစ်လက်နက်ပစ္စည်းထုတ်လုပ်ရေး ကပစ စက်ရုံ ၁၅ ရုံ ရှိနေတာဖြစ်ပြီး အထက်မင်းလှမြို့နယ်မှာ ကပစ ၂ ၊ ၁၀ နဲ့ ၁၃၊ ဆင်ပေါင်ဝဲ မြို့နယ်မှာ ကပစ ၈၊ သရက်မြို့နယ်မှာ ကပစ ၁၂၊ ပွင့်ဖြူမြို့နယ်မှာ ကပစ ၁၄၊ အောင်လံမြို့နယ်မှာ ကပစ ၁၅ နဲ့ ၁၇၊ တောင်တွင်းကြီးမြို့နယ်မှာ ကပစ ၁၈၊ စေတုတ္တရာမြို့နယ်မှာ ကပစ ၂၀၊ ဆိတ်ဖြူမြို့နယ်မှာ ကပစ ၂၁ နဲ့ ၂၂၊ ကျောမြို့နယ်မှာ ကပစ ၂၃၊ ပေါက်မြို့နယ်မှာ ကပစ ၂၄၊ လောင်းရှည်မြို့နယ်မှာ ကပစ ၂၅ စက်ရုံတို့ ရှိနေကြတာလည်း ဖြစ်ပါတယ်။

ဧရာဝတီတိုင်း၊ လေးမျက်နှာမြို့နယ်အတွင်း၊ ပုသိမ် – မုံရွာလမ်းပိုင်းရှိ စက်စက်ယိုကျေးရွာအနီးတွေမှာ စစ်ကောင်စီတပ်နဲ့ အာရက္ခတပ်တော် AA ၊ ပူးပေါင်းမဟာမိတ်တပ် PDF တို့ တိုက်ပွဲတွေ ပြင်းထန်နေပြီး စစ်ကောင်စီတပ်က သေဆုံးထိခိုက်မှုများပြားနေတယ်လို့ စစ်ရေးသတင်းရင်းမြစ်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ပုသိမ် – မုံရွာလမ်းပိုင်းကို သိမ်းပိုက်နိုင်ဖို့အတွက် စက်စက်ယိုကျေးရွာအနီးကို ထိုးစစ်ဆင်တိုက်ခိုက်လာနေပြီး စစ်ကောင်စီတပ်ကလည်း အင်အားအလုံးအရင်းနဲ့ ခုခံကာကွယ်နေတာကြောင့် တိုက်ပွဲတွေ ပိုမိုပြင်းထန်နေတယ်လို့ သိရပါတယ်။

အဆိုပါ တိုက်ပွဲတွေအတွင်းမှာ စစ်ကောင်စီတပ်က သေဆုံးထိခိုက်မှု များပြားနေတာကြောင့် ဟင်္သာတ၊ ကွင်းကောက်စတဲ့ မြို့နယ်တွေမှ စစ်ကားကြီးတွေနဲ့ လေးမျက်နှာမြို့နယ်အတွင်းကို စစ်အင်အားတွေ ဖြည့်တင်းနေရတယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ ပုသိမ် – မုံရွာလမ်းပိုင်းမှ ပန်းတောကြီး၊ မြို့ကုန်း၊ ကျောက်စရစ်ကုန်းနဲ့ သဲနုကုန်း စတဲ့ကျေးရွာတွေကို ထိန်းချုပ်ထားပြီး စစ်ကောင်စီတပ်ကလည်း အဲဒီကျေးရွာကို ပြန်လည်ရရှိဖို့အတွက် စက်စက်ယိုကျေးရွာနဲ့ အင်္ဂပူမြို့နယ်အတွင်းကနေ ထိုးစစ်ဆင်တိုက်ခိုက်ဖို့ ပြုလုပ်နေတယ်လို့လည်း သိရပါတယ်။

“လေးမျက်နှာမြို့နယ်မှာတော့ တိုက်ပွဲတွေဖြစ်နေကြတာရှိပါတယ်၊ အဓိကတော့ စက်စက်ယို ကျေးရွာအနီးမှာ ဖြစ်နေကြတာပါ၊ AA နဲ့ ပူးပေါင်းတပ်တွေက သူတို့ ထိန်းချုပ်ထားတဲ့ ပန်းတောကြီးရွာဖက်ကနေ စက်စက်ယိုကျေးရွာဖက်ကို ထိုးစစ်ဆင်လာတာရှိပါတယ်၊ စစ်ကောင်စီတပ်ကလည်း အင်အားတွေဖြည့်တင်းပြီးတော့ ရေနံ့သာဂိတ်ကနေ စစ်ကြောင်းထိုးလာတာကြောင့် တိုက်ပွဲတွေမှာ ပိုပြင်းထန်နေကြတာပါ ” လို့ တော်လှန်ရေးတပ်ဖွဲ့ဝင်တစ်ဦးက BBM ကို ပြောပါတယ်။

ပြီးခဲ့တဲ့ အောက်တိုဘာလ တတိယအပတ်ကလည်း စစ်ကောင်စီတပ်နဲ့ ပူးပေါင်းမဟာမိတ်တပ်တွေဟာ လေးမျက်နှာမြို့နယ်ရှိ စက်စက်ယိုကျေးရွာအနီးဝန်းကျင်နဲ့ တောတောင်တွေမှာ တိုက်ပွဲတွေပြင်းထန်စွာ ဖြစ်ပွားခဲ့ပြီး စစ်ကောင်စီကလည်း လေကြောင်း၊ ဒရုန်းနဲ့ လက်နက်ကြီးပစ်ကူတွေ အဆက်မပြတ်ပြုလုပ်ခဲ့တယ်လို့ ဆိုပါတယ်။

ဒါ့အပြင် နိုဝင်ဘာလ ၇ ရက်နေ့ကလည်း စက်စက်ယိုကျေးရွာအနီးမှာ တိုက်ပွဲတွေပြန်လည်ပြင်းထန်ခဲ့တာကြောင့် စစ်ကောင်စီတပ်က သေဆုံးထိခိုက်မှုများပြားခဲ့တဲ့အတွက် ဂျက်ဖိုက်တာ၊ Y-12 လေယာဥ်တွေနဲ့ တစ်ရက်လုံး ဗုံးကြဲချတိုက်ခိုက်မှုတွေ ရှိခဲ့တယ်လို့လည်း သိရပါတယ်။

လက်ရှိ တိုက်ပွဲတွေပြင်းထန်နေတဲ့ စက်စက်ယိုကျေးရွာနဲ့ ၄ မိုင်ကျော်အကွာအဝေးမှာ ရေနံ့သာစစ်ဆေးရေးဂိတ်ရှိနေတာဖြစ်သလို စစ်ကောင်စီတပ်ဟာ အဆိုပါ စစ်ဆေးရေးဂိတ်ကို စစ်အင်အားတွေ အဆက်မပြတ်ပို့ဆောင်နေတာဖြစ်ပြီး AA နဲ့ ပူးပေါင်းတပ်တွေရဲ့ ထိုးစစ်ကိုခုခံဖို့အတွက် ဘန်ကာတွေ အခိုင်အမာဆောက်လုပ်နေကြတယ်လို့လည်း AA နဲ့ နီးစပ်တဲ့စစ်ရေးသတင်းရင်းမြစ်တွေဆီက သိရပါတယ်။

ပြီးခဲ့တဲ့ နိုဝင်ဘာလပထမအပတ်မှာလည်း စစ်ကောင်စီဟာ ဟင်္သာတမြို့နယ်ကနေ စစ်ကားကြီး ၁၀ စီးကျော်နဲ့ လေးမျက်နှာမြို့နယ်ရှိကျေးရွာတွေ၊ ငသိုင်းချောင်းမြို့နယ်အတွင်းမှ ရေနံ့သာစစ်ဆေးရေးဂိတ်နဲ့ မြောက်စမ်းအမြောက်တပ် (အမတ ၃၄၄) တို့ကို အင်အားဖြည့်တင်းမှုတွေ ရှိခဲ့တယ်လို့လည်း သိရပါတယ်။

“ဟင်္သာတမြို့နယ်ကနေ စစ်အင်အားတွေ လေးမျက်နှာမြို့နယ်ကို ဆက်တိုက်ပို့ဆောင်နေတာပါ၊ ငသိုင်းချောင်းဖက်ကိုလည်း ပို့ဆောင်တာရှိပါတယ်၊ ပြီးခဲ့တဲ့တစ်ရက်လောက်ကဆိုရင် အမြောက်တပ်နဲ့ ရေနံ့သာဂိတ်ဖက်ကို စစ်ကား ၁၀ ကျော်လောက်တက်သွားတယ်လို့ သိရပါတယ်၊ စစ်ကောင်စီတပ်က အင်အားတွေဖြည့်မလောက် ဖြစ်နေကြတာပါ” လို့ AAနဲ့ နီးစပ်တဲ့ စစ်ရေးသတင်းရင်းမြစ်တစ်ဦးက ပြောပါတယ်။

တိုက်ပွဲပြင်းထန်နေတဲ့ စက်စက်ယိုကျေးရွာအနီးကို မြောက်စမ်းကျေးရွာမှာရှိတဲ့ အမြောက်တပ် (အမတ ၃၄၄) တပ်ရင်းကလည်း လက်နက်ကြီးတွေနဲ့ တစ်ရက်လုံး ပစ်ကူပေးနေတယ်လို့ သိရပါတယ်။

အဆိုပါ အမြောက်တပ်ကနေ လက်နက်ကြီးပစ်ခတ်မှုကြောင့် ဂွေးတောက်ကုန်း၊ ကွမ်းခြံကုန်း၊ ညောင်ပင်ကြီး၊ သပြုပင်၊ သပြေကွင်း၊ ရှမ်းစု၊ ကြပ်ကုန်း၊ ရုပ်သေးတန် စတဲ့ ကျေးရွာပေါင်း ၂၀ ကျော်မှ ဒေသခံတွေဟာ အခြားနေရာတွေကို စစ်ဘေးတိမ်းရှောင်နေကြရပြီး လူမရှိတဲ့နေအိမ်တွေ၊ စျေးဆိုင်ခန်းတွေကိုလည်း စစ်ကောင်စီတပ်က ဖောက်ထွင်းမှုတွေရှိနေတယ်လို့ ငသိုင်းချောင်းဒေသခံတွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ရခိုင်ရိုးမတစ်လျှောက် ဧရာဝတီတိုင်းမှ ရေကြည်၊ သာပေါင်း ၊ ငါးသိုင်းချောင်း၊ လေးမျက်နှာ၊ အင်္ဂပူနဲ့ မြန်အောင်မြို့နယ်တွေအထိ ထိုးစစ်ဆင်တိုက်ခိုက်လာနေတာလည်း ဖြစ်ပါတယ်။

မြန်မာနိုင်ငံအနှံ့မှာ စစ်ကောင်စီရဲ့ အကြမ်းဖက်တိုက်ခိုက်မှုတွေကြောင့် ပြီးခဲ့တဲ့ အောက်တိုဘာလ တစ်လအတွင်းမှာ အမျိုးသမီး ၇၀ ဦးသေဆုံးခဲ့ပြီး ၈၀ ဦးထိခိုက်ဒဏ်ရာ ရရှိခဲ့တယ်လို့ မြန်မာ့အမျိုးသမီးသမဂ္ဂ (BWU) က နိုဝင်ဘာလ ၇ ရက်နေ့မှာ ထုတ်ပြန်ထားပါတယ်။

စစ်ကောင်စီဟာ မြန်မာနိုင်ငံအတွင်းရှိ တိုင်း ၆ ခုနဲ့ ပြည်နယ် ၅ ခုမှာ လေကြောင်းတိုက်ခိုက်တာ၊ လက်နက်ကြီးပစ်ခတ်တိုက်ခိုက်တာတွေနဲ့ ဖမ်းဆီးသတ်ဖြတ်မှုတွေကြောင့် အမျိုးသမီးတွေ သေဆုံးခဲ့ရတာလည်း ဖြစ်ပါတယ်။

စစ်ကောင်စီသတ်ဖြတ်မှုကြောင့် အောက်တိုဘာလ တစ်လအတွင်း သေဆုံးသွားခဲ့ရတဲ့ အမျိုးသမီးတွေမှာ ရှမ်းပြည်နယ် (၂၃) ဦး၊ မန္တလေးတိုင်းမှာ (၁၃) ဦး၊ စစ်ကိုင်းတိုင်း (၁ဝ)ဦး၊ ချင်းပြည်နယ် (၃) ဦး၊ မကွေးတိုင်း (၃) ဦး၊ ပဲခူးတိုင်း (၅) ဦး၊ ကရင်ပြည်နယ် (၃) ဦး၊ မွန်ပြည်နယ် (၃) ဦး၊ ရခိုင်ပြည်နယ် (၂) ဦး၊ ဧရာဝတီတိုင်း (၄) ဦးနဲ့ တနင်္သာရီတိုင်း (၁) ဦးတို့ဖြစ်တယ်လို့ မြန်မာ့အမျိုးသမီးသမဂ္ဂ (BWU) ရဲ့ ထုတ်ပြန်ချက်မှာ ဖော်ပြထားပါတယ်။

ရှမ်းပြည်နယ်မြောက်ပိုင်းကို စစ်ကောင်စီဟာ အောက်တိုဘာလအတွင်းမှာ အကြိမ် ၃၀ နဲ့အထက် လေကြောင်းကနေ ဗုံးကြဲချတိုက်ခိုက်ခဲ့တာကြောင့် အမျိုးသမီးသေဆုံးမှု များပြားခဲ့ရတာဖြစ်တယ်လို့ မြန်မာ့အမျိုးသမီးသမဂ္ဂ (BWU) က ဆိုထားပါတယ်။

ပြီးခဲ့တဲ့အောက်တိုဘာလအတွင်းမှာ ထူးခြားဖြစ်စဥ်အနေနဲ့ အောက်တိုဘာလ ၆ ရက်နေ့၊ ညနေ ၈ နာရီခန့်မှာ မုံရွာနဲ့ ချောင်းဦးမြို့နယ်အစပ်၊ ချောင်းဦးမြို့နယ်မြောက်ခြမ်းတစ်နေရာမှာ မြန်မာ့ရိုးရာသီတင်းကျွတ်ပွဲတော် ဆီမီးထွန်းသပိတ် ပြုလုပ်နေသူတွေကို စစ်ကောင်စီတပ်က ပါရာမော်တာစက်တပ်လေထီးကို အသုံးပြုပြီး ၁၂၀ မမ လက်နက်ကြီးဗုံးနှစ်လုံး ကြဲချတိုက်ခိုက်ခဲ့တာကြောင့် သေဆုံးသူ (၂၂) ဦးနဲ့ ထိခိုက်ဒဏ်ရာရရှိသူ (၅၅) ဦးအထိ ရှိခဲ့တာလည်း ဖြစ်ပါတယ်။

သေဆုံးခဲ့ရတဲ့ အမျိုးသမီး ၇၀ ဦးမှာ လေကြောင်းတိုက်ခိုက်မှုကြောင့် (၅၆) ဦး၊ လက်နက်ကြီးပစ်ခတ်ခံရမှုကြောင့် (၈) ဦး၊ မတရားသတ်ဖြတ်ခံရမှုကြောင့် (၅) ဦး၊ မြေမြှုပ်မိုင်းနင်းမိတာကြောင့် (၁) ဦးတို့ဖြစ်ကြပြီး သေဆုံးသူတွေထဲမှ ၁၄ ဦးဟာ အသက် ၁၈ နှစ် အောက်တွေဖြစ်ကြတယ်လို့လည်း သိရပါတယ်။

ထိခိုက်ဒဏ်ရာရရှိသူ (၈၀) ဦးကတော့ လေကြောင်းတိုက်ခိုက်ခံရမှုကြောင့် (၆၇) ဦး၊ လက်နက်ကြီးပစ်ခတ်ခံရမှုကြောင့် (၅) ဦး၊ မတရားသတ်ဖြတ်ခံရမှုကြောင့် (၁) ဦး၊ မြေမြှုပ်မိုင်းနင်းမိတာကြောင့် (၃) ဦးနဲ့ လိင်ပိုင်းဆိုင်ရာအကြမ်းဖက်ခံရမှုကြောင့် (၄) ဦး တို့ဖြစ်ကြပါတယ်။

စစ်ကောင်စီတပ်ဟာ ၂၀၂၁ ခုနှစ်၊ ဖေဖော်ဝါရီလမှစတင်ကာ အာဏာသိမ်းပြီးတဲ့နောက်ပိုင်း (၅) နှစ်တာနီးပါးကာလအတွင်းမှာ စစ်ရာဇဝတ်မှုတွေနဲ့ လူသားမျိုးနွယ်တွေအပေါ် အမျိုးမျိုးသောရာဇဝတ်မှုတွေ၊ လူ့အခွင့်အရေးချိုးဖောက်မှုတွေကို နည်းမျိုးစုံနဲ့ကျူးလွန်နေတယ်လို့ မြန်မာ့အမျိုးသမီးသမဂ္ဂ (BWU) က ထုတ်ပြန်ပြောဆိုထားပါတယ်။

ပဲခူးတိုင်း၊ ဖြူးမြို့နယ်၊ မန်းကျည်းကုန်းတောင်ကျေးရွာကို တိုက်ပွဲဖြစ်ပွားတာမရှိဘဲ အရပ်သားပြည်သူတွေကို ဗုံးကြဲသတ်ဖြတ်ပြီးပြန်လာတဲ့ စစ်ကောင်စီရဲ့ Gyrocopter ရဟတ်ယာဉ် ၂ စီးအနက် ၁ စီးဟာ အပြန်လမ်းမှာပျက်ကျတာကြောင့် စစ်ကောင်စီတပ်သား ၂ ဦး သေဆုံးခဲ့တယ်လို့ ပဲခူးတိုင်းစစ်ဌာနက ထုတ်ပြန်ထားပါတယ်။

ဒီကနေ့ နိုဝင်ဘာလ ၆ ရက်၊ မနက် ၁၁ နာရီ ၅၅ မိနစ်မှာ စစ်ကောင်စီတပ်ရဲ့ အသေခံဒရုန်းတစ်စီးအပါအဝင် မုန်းမြို့အခြေစိုက် ခမရ (၅၉၀) တပ်ရင်းမှ ၁၂၀ မမ တို့နဲ့ အရပ်သားပြည်သူတွေ နေထိုင်ရာနေရာတွေကို ရည်ရွယ်ချက်ရှိရှိ ပစ်ခတ်တိုက်ခိုက်ခဲ့တာလည်း ဖြစ်ပါတယ်။

ဒါ့အပြင် နိုဝင်ဘာလ ၆ ရက်၊ နေ့လယ် ၁ နာရီ ၃၀ မိနစ်အချိန်မှာလည်း စစ်ကောင်စီဟာ မန်းကျည်းကုန်းတောင်ကျေးရွာမှ ပြည်သူလူထုတွေနေထိုင်တဲ့ နေအိမ်တွေကို Gyrocopter ရဟတ်ယာဉ် ၂ စီးနဲ့ ဗုံးသီး ၂ လုံး ကြဲချတိုက်ခိုက်ခဲ့တယ်လို့လည်း သိရပါတယ်။

အဆိုပါ ဗုံးကြဲချတိုက်ခိုက်မှုကြောင့် မန်ကျည်းကုန်းတောင်ကျေးရွာမှ ဦးမောင်ငယ် (၅၅) နှစ်မှာ ဗိုက်ပွင့်ထွက်၍ သေဆုံးခဲ့ရပြီး နေအိမ်အဆောက်အဦ (၆) လုံးလည်း ပျက်စီးသွားတယ်လို့ ပဲခူးတိုင်းစစ်ဌာနက ဆိုပါတယ်။

မန်းကျည်းကုန်းတောင်ကျေးရွာကို လာရောက်ဗုံးကြဲချတိုက်ခိုက်ခဲ့တဲ့ စစ်ကောင်စီတပ်ရဲ့ Gyrocopter ရဟတ်ယာဉ် ၂ စီးအနက် ၁ စီးဟာ အပြန်လမ်းမှာ ပျက်ကျသွားပြီး စစ်ကောင်စီတပ်သား ၂ ဦးသေဆုံးသွားတယ်လို့ ပဲခူတိုင်းစစ်ဌာနရဲ့ ထုတ်ပြန်ချက်မှာ ဖော်ပြထားပါတယ်။

အဆိုပါ စစ်ကောင်စီတပ်ရဲ့ ပျက်ကျသွားတဲ့ Gyrocopter ရဟတ်ယာဥ် ၁ စီးနဲ့ တပ်ဖွဲ့ဝင် ၂ ဦးကိုတော့ စစ်ကောင်စီတပ်ဖွဲ့ဝင်တွေက လိုက်လံရှာဖွေနေကြတယ်လို့လည်း သိရပါတယ်။

Photo-social media

အာရက္ခတပ်တော် AA နဲ့ ပူးပေါင်းမဟာမိတ်တပ်တွေ သိမ်းပိုက်ထားတဲ့ ပွိုင့် ၆၆၆ စခန်းကုန်းဘက်သို့ ထိုးစစ်ဆင်တိုက်ခိုက်ဖို့အတွက် စစ်ကောင်စီဟာ ပဲခူးတိုင်း၊ ပန်းတောင်းမြို့နယ်ရှိ ကာကွယ်ရေးပစ္စည်းစက်ရုံ (ကပစ ၁၆)မှာ အင်အားတွေပြန်လည်စုဖွဲ့နေတယ်လို့ စစ်ရေးသတင်းရင်းမြစ်တွေဆီက သိရပါတယ်။

လက်ရှိ ကပစ ၁၆ စက်ရုံအနီးဝန်းကျင်မှာ နှစ်ဖက်တိုက်ပွဲတွေ ငြိမ်သက်နေတာကြောင့် စစ်ကောင်စီတပ်က အင်းအားတွေပြန်လည်စုဖွဲ့ပြီး ထိုးစစ်ဆင်တိုက်ခိုက်ဖို့ ပြင်ဆင်နေတာဖြစ်သလို ကပစ ၁၆ စက်ရုံမှ စက်ပစ္စည်းတစ်ချို့ကိုလည်း ပြောင်းရွှေ့ထားတယ်လို့ သိရပါတယ်။

စစ်ကောင်စီတပ်ဟာ ကပစ ၁၆ စက်ရုံရဲ့ ကာကင်းစခန်းတစ်ခုဖြစ်တဲ့ ပွိုင့် (၆၆၆) စခန်းကုန်းကို သိမ်းပိုက်ခံရပြီးနောက် မသုန်ချောင်းရဲ့ တစ်ဖက်ခြမ်းရှိ မြောက်ဘက်ကုန်းကျေးရွာအနီးမှာလည်း လက်နက်ကြီးစခန်းတွေ ပြုလုပ်ပြင်ဆင်နေတာလည်း ဖြစ်ပါတယ်။

အဆိုပါ မသုန်ချောင်းကျေးရွာအနီးမှာ တိုက်ပွဲဖြစ်သံတွေ ကြားနေရပြီး စစ်ကောင်စီတပ်ကလည်း လေကြောင်းမှ Y-12 လေယာဥ်တွေနဲ့ ကင်းထောက်ကာ ဗုံးကြဲတိုက်ခိုက်မှုတွေလည်း ရှိနေတယ်လို့ စစ်ရေးသတင်းရင်းမြစ်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ ရခိုင်ရိုးမတောင်တန်းတစ်လျှောက်မှာ တိုက်ပွဲတွေဖော်ဆောင်ခဲ့တာဖြစ်ပြီး လက်ရှိမှာတော့ ရခိုင်ရိုးမအောက်ကိုဆင်းလာကာ စစ်ကောင်စီရဲ့ ကပစ ၆ နဲ့ ကပစ ၁၆ စက်ရုံတို့ကို ဖိအားပေးတိုက်ခိုက်လာနေတာဖြစ်တယ်လို့ သိရပါတယ်။

“ကပစ ၆ နဲ့ ၁၆ ဖက်မှာတော့ တိုက်ပွဲတွေ ငြိမ်သက်နေပါသေးတယ်၊ ရိုးပေါ်တိုက်ပွဲ ညောင်ကျိုးဖက်မှာ မဟုတ်တော့ပဲ ကပစ ၆ နဲ့ ၁၆ စက်ရုံရှိတဲ့ ရိုးအောက်ဖက်ကို ဆင်းလာပါတယ်၊ စပ်တပ်ကလည်း ကပစ ၁၆ ကနေပြန်ပြီးတော့ ထိုးစစ်ဆင်တိုက်ခိုက်ဖို့အတွက် စုဖွဲ့မှုတွေ ပြန်ပြီးတော့ ပြုလုပ်နေတာရှိပါတယ်၊ ပွိုင့် ၆၆၆ နဲ့ ကပစ ၁၆ ကြားထဲက မသုန်ကြားထဲမှာတော့ ထိတွေ့တိုက်ပွဲတွေ ပြင်းပြင်းထန်ထန် ရှိလာနိုင်တဲ့ အနေအထားမျိုး ဖြစ်ပါတယ်၊ လက်ရှိမှာ တိုက်ပွဲဖြစ်တာတွေတော့ မရှိသေးပါဘူး၊ နှစ်ဖက်အခြေအနေ ကြည့်နေကြတဲ့ အနေအထားမျိုး ဖြစ်ပါတယ်” လို့ CDM ဗိုလ်ကြီး ဇင်ယော်က BBM ကို ပြောပါတယ်။

လက်ရှိ အာရက္ခတပ်တော် AA နဲ့ ပူးပေါင်းမဟာမိတ်တပ်တွေ ထိုးစစ်ဆင်တိုက်ခိုက်နေတဲ့ ကပစ ၁၆ စက်ရုံဟာ ထိုးစစ်အမြန်ရောက်ဖို့ နီးကပ်တာကြောင့် စစ်ကောင်စီတပ်ကလည်း အင်အားအများအပြားနဲ့ တန်ပြန်ထိုးစစ်ဆင်တိုက်ခိုက်လာနေတယ်လို့ သိရပါတယ်။

ပြီးခဲ့တဲ့ ရက်ပိုင်းအတွင်းမှာ ကပစ ၁၆ စက်ရုံကို စစ်ကောင်စီတပ်က ကားကြီးတွေနဲ့ စစ်အင်အား ၂၀၀ ကျော် ထပ်မံဖြည့်တင်းထားတယ်လို့လည်း AA နဲ့နီးစပ်တဲ့ စစ်ရေးသတင်းရင်းမြစ်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ ကပစ ၁၆ စက်ရုံရဲ့ ကာကင်းစခန်းတစ်ခုဖြစ်တဲ့ မသုန်ကျေးရွာအနီးက ကာကင်းစခန်းတစ်ခုကိုလည်း ပြီးခဲ့တဲ့ အောက်တိုဘာလ ၂၄ ရက်မှာ ထပ်မံသိမ်းပိုက်ရရှိခဲ့တယ်လို့ တော်လှန်းရေးတပ်ဖွဲ့ဝင်တွေဆီက သိရပါတယ်။

မသုန်ကျေးရွာဟာ ကပစ ၁၆ စက်ရုံနဲ့ ၄ မိုင်ခန့်သာ ကွာဝေးတော့တာကြောင့် စစ်ကောင်စီတပ်က မသုန်ကျေးရွာအနီးအနားနေရာတွေမှာ ကာကင်းစခန်းတွေ ဆောက်လုပ်နေတယ်လို့ သိရပါတယ်။

“မသုန်ကျေးရွာအနီးက ကာကင်းစခန်းတွေ တစ်ချို့ကို AA က သိမ်းပိုက်ရရှိထားတာ ရှိပါတယ်၊ အဲဒီတော့ စစ်ကောင်စီဟာ မသုန်ကျေးရွာနဲ့ အနီးအနားတွေမှာ ကာကင်းစခန်းတွေ ဆောက်လုပ်နေတယ်လို့ ကြားရပါတယ်၊ ကပစ ၁၆ စက်ရုံအနီးအနားက ဒေသခံတွေကိုလည်း အပြင်ထွက်ခွင့်မပေးပဲ ပိတ်လှောင်ထားပါတယ်” လို့ တော်လှန်ရေးတပ်ဖွဲ့ဝင် တစ်ဦးက ပြောပါတယ်။

ကပစ ၁၆ စက်ရုံအနီးမှာတော့ မသုန်၊ ကျားခြေရာ၊ ဖလုံ၊ ကျောက်ဇကွဲ၊ တောင်မောက်၊ ကမြိုင် စတဲ့ကျေးရွာတွေ တည်ရှိနေတာလည်း ဖြစ်ပါတယ်။

ပဲခူးတိုင်း၊ ပန်းတောင်းမြို့နယ်၊ ဥသျှစ်ပင်မြို့မှာတော့ ကပစ ၅၊ ၆၊ ၉ နဲ့ ၁၆ စက်ရုံတို့ တည်ရှိနေတာဖြစ်ပြီး ကပစ ၁၆ စက်ရုံဟာ ထိုးစစ်အမြန်ရောက်ဖို့ နီးကပ်တာကြောင့် AA နဲ့ ပူးပေါင်းတပ်တွေဟာ ကပစ ၆ စက်ရုံအနီးကို စစ်ကြောင်းတစ်ကြောင်းနဲ့ ကပစ ၁၆ စက်ရုံအနီးကို စစ်ကြောင်းတစ်ကြောင်း စစ်မျက်နှာ ၂ ခု ဖွင့်ပြီး ထိုးစစ်ဆင်တိုက်ခိုက်လျက်ရှိတယ်လို့ သတင်းရရှိပါတယ်။

ပဲခူးတိုင်း၊ ပန်းတောင်းမြို့နယ်က စစ်ကောင်စီတပ်ရဲ့ကာကွယ်ရေးပစ္စည်းစက်ရုံ (ကပစ-၁၆) အနီးမှာ စစ်ကောင်စီတပ်နဲ့ အာရက္ခတပ်တော် AA ၊ ပူးပေါင်းမဟာတပ်တွေဟာ တိုက်ပွဲတွေပြင်းထန်စွာ ဖြစ်ပွားနေကြပြီး စစ်ကောင်စီတပ်ကလည်း လေကြောင်းကနေ ဗုံးအဆက်မပြတ် ကြဲချတိုက်ခိုက်နေတယ်လို့ စစ်ရေးသတင်းရင်းမြစ်တွေဆီက သိရှိရပါတယ်။

ကပစ ၁၆ စက်ရုံရဲ့ ကာကင်းစခန်းတစ်ခုဖြစ်တဲ့ ပွိုင့် (၆၆၆) စခန်းကုန်းကို အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ ပြီးခဲ့တဲ့ အောက်တိုဘာလ (၁၄) ရက်မှာ သိမ်းပိုက်ရရှိခဲ့ပြီးနောက် စစ်ကောင်စီဟာ မသုန်ချောင်းရဲ့ တစ်ဖက်ခြမ်းက မြောက်ဘက်ကုန်းကျေးရွာအနီးမှာ လက်နက်ကြီးစခန်းတွေ ပြုလုပ်ပြင်ဆင်နေပြီး လက်ရှိမှာတော့ မသုန်ကျေးရွာအနီးမှာ တိုက်ပွဲတွေပြင်းထန်စွာ ဖြစ်ပွားနေကြတာလည်း ဖြစ်ပါတယ်။

လက်ရှိ အာရက္ခတပ်တော် AA နဲ့ ပူးပေါင်းမဟာမိတ်တပ်တွေ ထိုးစစ်ဆင်တိုက်ခိုက်နေတဲ့ ကပစ ၁၆ စက်ရုံဟာ ထိုးစစ်အမြန်ရောက်ဖို့နီးကပ်တာကြောင့် စစ်ကောင်စီတပ်ကလည်း အင်အားအများအပြားနဲ့ တန်ပြန်ထိုးစစ်ဆင်တိုက်ခိုက်လာနေတယ်လို့လည်း သိရပါတယ်။

“စစ်ကောင်စီတပ်ဟာ ပွိုင့် ၆၆၆ စခန်းကုန်းကျပြီးနောက် မသုန်ချောင်းရဲ့တစ်ဖက်မှာ အမြောက်စခန်းတွေ၊ လက်နက်ကြီးစခန်းတွေ ချထားပါတယ်။ အဲဒီကနေပြီးတော့မှ မသုန်ရွာအနီးကို စစ်ကောင်စီတပ်က စစ်ကြောင်းထိုး ထိုးစစ်ဆင်လာတယ်လို့ သိရပါတယ်။ အဲဒီကျေးရွာအနီးအနားမှာပဲ တိုက်ပွဲတွေပြင်းထန်နေကြတာဖြစ်ပါတယ်” လို့ AA နဲ့ နီးစပ်တဲ့စစ်ရေး သတင်းရင်းမြစ်တစ်ဦးက BBM ကို ပြောပါတယ်။

စစ်ကောင်စီတပ်ဟာ လက်ရှိတိုက်ပွဲတွေ ပြင်းထန်နေတဲ့ မသုန်ကျေးရွာအနီးကို လေကြောင်းကနေ ဂျက်ဖိုက်တာ၊ Y-12၊ Y-Y8 စတဲ့ တိုက်ခိုက်ရေး လေယာဥ်တွေနဲ့ ဗုံးအဆက်မပြတ်လာရောက်ကြဲချ တိုက်ခိုက်မှုတွေရှိနေတယ်လို့ အဆိုပါ စစ်ရေးသတင်းရင်းမြစ်က ဆက်ပြောပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေက ကပစ ၁၆ စက်ရုံအနီးကို ထိုးစစ်ဆင်လာတာကြောင့် စစ်ကောင်စီတပ်ကလည်း ကပစ ၁၆ စက်ရုံကို အင်အား ၂၀၀ ကျော် ဖြည့်တင်းကာ ခုခံကာကွယ်ဖို့အတွက် တပ်ပြန်လည်ဖွဲ့စည်း ပြောင်းလဲနေတယ်လို့လည်း သိရပါတယ်။

ပြီးခဲ့တဲ့ အောက်တိုဘာလ ၂၄ ရက်နေ့မှာလည်း အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ ကပစ ၁၆ စက်ရုံရဲ့ ကာကင်းစခန်းတစ်ခုဖြစ်တဲ့ မသုန်ကျေးရွာအနီးက ကာကင်းစခန်းတစ်ခုကိုလည်း သိမ်းပိုက်ရရှိခဲ့တယ်လို့လည်း တော်လှန်းရေးတပ်ဖွဲ့ဝင်တွေဆီက သိရပါတယ်။

“မသုန်ကျေးရွာရဲ့ ရှေ့က ကာကင်းစခန်းတစ်ခုကို AA နဲ့ ပူးပေါင်းတပ်တွေက ထပ်မံသိမ်းပိုက်နိုင်ခဲ့တယ်လို့ သိရပါတယ်။ အဲဒီစခန်းကျသွားတော့ AA နဲ့ ပူးပေါင်းတပ်တွေရဲ့ ထိုးစစ်ဟာ မသုန်ကျေးရွာအနီးကို ရောက်ရှိလာတာပါ။ မသုန်ကျေးရွာနဲ့ဆိုရင် ကပစ ၁၆ စက်ရုံဟာ သိပ်မဝေးတော့ပါဘူး။ အဲဒီ မသုန်ရွာအနီးက စစ်ကောင်စီရဲ့ ခံစစ်စခန်းတွေကိုသာ သိမ်းပိုက်နိုင်ခဲ့ရင် ကပစ ၁၆ စက်ရုံကို လက်နက်ကြီးတွေနဲ့ ပစ်ခတ်ခြိမ်းခြောက်နိုင်တဲ့ အနေအထားမျိုး ဖြစ်ပါတယ် ” လို့ တော်လှန်ရေးတပ်ဖွဲ့ဝင် တစ်ဦးက BBM ကို ပြောပါတယ်။

ပဲခူးတိုင်း၊ ပြည်ခရိုင်၊ ပန်းတောင်းမြို့နယ် ဥသျှစ်ပင်မြို့မှာတော့ စစ်ကောင်စီတပ်နဲ့ အာရက္ခတပ်တော် AA တို့ဟာ ညောင်းကျိုးကျေးရွာနဲ့ ဆင်လန်းကျေးရွာရှိ ကာကင်းစခန်းတွေမှာ တိုက်ပွဲတွေပြင်းထန်စွာ ဖြစ်ပွားနေကြတာဖြစ်ပြီး စစ်ကောင်စီတပ်ကလည်း AA သိမ်းထားတဲ့ ညောင်ကျိုးစခန်းကို ပြန်လည်သိမ်းပိုက်နိုင်ဖို့အတွက် တန်ပြန်ထိုးစစ်ဆင်လာနေတယ်လို့လည်း သိရပါတယ်။

နှစ်ဖက်တိုက်ပွဲ ဖြစ်ပွားနေတဲ့ ဆင်လန်းကျေးရွာရဲ့ အနောက်ဖက်မှာတော့ ၇ မိုင်ခန့်ကွာဝေးတော့တဲ့ ညောင်ခြေထောက်ကျေးရွာအနီးမှာ ကပစ ၆ စက်ရုံတည်ရှိနေတာဖြစ်ပြီး စစ်ကောင်စီတပ်ကလည်း အဆိုပါစက်ရုံကို ကာကွယ်ဖို့အတွက် ဆင်လန်းကျေးရွာနဲ့ ညောင်ခြေထောက်ကျေးရွာအနီးမှာ ခံစစ်ဆင့်ဆင့် ပြင်ဆင်ထားတယ်လို့လည်း သိရပါတယ်။

ပဲခူးတိုင်း၊ ပန်းတောင်းမြို့နယ်၊ ဥသျှစ်ပင်မြို့မှာ တော့ ကပစ ၅၊ ၆၊ ၉ နဲ့ ၁၆ စက်ရုံတို့ တည်ရှိနေတာဖြစ်ပြီး ကပစ ၁၆ စက်ရုံဟာ ထိုးစစ်အမြန်ရောက်ဖို့ နီးကပ်တာကြောင့် AA နဲ့ ပူးပေါင်းတပ်တွေဟာ ကပစ ၆ စက်ရုံအနီးကို စစ်ကြောင်းတစ်ကြောင်းနဲ့ ကပစ ၁၆ စက်ရုံအနီးကို စစ်ကြောင်းတစ်ကြောင်း စုစုပေါင်းစစ်ကြောင်းနှစ်ကြောင်းနဲ့အတူ စစ်မျက်နှာ (၂) ခု ဖွင့်ကာ ထိုးစစ်ဆင်တိုက်ခိုက်လာနေတာလည်း ဖြစ်ပါတယ်။

အကြမ်းဖက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ ရွေးကောက်ပွဲမတိုင်ခင် စစ်တပ် အတွင်းမှာ တိုင်းမှူး၊ ဒကစမှူးနဲ့ စစ်တက္ကသိုလ်ကျောင်းအုပ်ကြီး ၃၀ နီးပါးကို ရာထူးတိုးနဲ့ နေရာအပြောင်းအလဲတွေ ပြုလုပ်ထားတယ်လို့ စစ်တပ်နဲ့နီးစပ်တဲ့ သူတွေဆီက သိရပါတယ်။

ရွေးကောက်ပွဲ ကျင်းပခါအနီးမှာ စစ်ကောင်စီဟာ စစ်တက္ကသိုလ် ကျောင်းအုပ်ကြီးတွေကို စစ်တိုင်းမှူး အဖြစ် ရာထူးအပြောင်းအလဲပြုလုပ်ပြီး တပ်မမှူးမဖြစ်သေးတဲ့ သူတွေကိုလည်း တပ်မမှူးဖြစ်လာအောင် စစ်ခေါင်းဆောင် မင်းအောင်လှိုင်က စတုတ္ထမျိုးဆက်ကို ချပြနေတာဖြစ်တယ်လို့ CDM ဗိုလ်ကြီး ဇင်ယော်က သုံးသပ်ပါတယ်။

“ရွေးကောက်ပွဲမတိုင်ခင် စစ်တပ်မှာနေရာချတာပါပဲ။ ဒီလူတွေလည်း အပြီးသတ်နေရာချတာတော့ မဟုတ်သေးဘူးဗျ။ နောက်ထပ်လည်း ရာထူးအပြောင်းအလဲ ပြုလုပ်လာဖို့ ရှိပါတယ်။ လက်ရှိ စစ်တက္ကသိုလ် ကျောင်းအုပ်ကြီးတွေ ဖြစ်နေတဲ့သူတွေက စစ်တိုင်းမှူးတွေ ဖြစ်သွားမယ်ပေါ့။ တပ်မမှူး မဖြစ်သေးတဲ့သူတွေကလည်း တပ်မမှူးတွေဖြစ်လာမယ်။ ဒါက စစ်ခေခါင်းဆောင်ရဲ့ စတုတ္ထမျိုးဆက် အမှန်ကိုချပြတာနေတာ ဖြစ်ပါတယ်” လို့ CDM ဗိုလ်ကြီး ဇင်ယော်က BBM ကို ပြောပါတယ်။

စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ဟာ စစ်တက္ကသိုလ်ကျောင်းအုပ်ကြီး ဗိုလ်မှူးချုပ် စိုးမြတ်ထွဋ် (DSA 40) ကို အရှေ့အလယ်ပိုင်းတိုင်းစစ်ဌာနချုပ် တိုင်းမှူးအဖြစ် ရာထူးတိုးပြောင်းရွှေ့လိုက်ပြီး ကရင်ပြည်နယ်၊ ကော့ကရိတ်အခြေစိုက် အမှတ် ၁၂ စစ်ဆင်ရေးကွပ်ကဲရေးဌာနချုပ်မှူး ဗိုလ်မှူးကြီး သူရဗျားလေး (DSA 42) ကို စစ်တက္ကသိုလ်ကျောင်းအုပ်ကြီး အဖြစ်ရာထူးတိုးပြောင်း ရွှေ့ခန့်အပ်လိုက်တယ်လို့ သိရပါတယ်။

အလားတူ ရှမ်းပြည်နယ်၊ အရှေ့ပိုင်းတိုင်းစစ်ဌာနချုပ်တိုင်းမှူး ဗိုလ်ချုပ် နိုင်ဇော်ဦးကို ရာထူးက ဖယ်ရှား ဖမ်းဆီးလိုက်ပြီးတော့ အရှေ့ပိုင်းတိုင်းစစ်ဌာနချုပ် တိုင်းမှူးအသစ်အဖြစ် ဗိုလ်မှူးချုပ် ကျော်နိုင်ဦး (DSA 40) ကို ရာထူးတိုးခန့်အပ်လိုက်ပြီး ဗိုလ်မှူးချုပ် ကျော်နိုင်ဦးမှာ အရင်က မကွေးအခြေစိုက် တပ်မ ၈၈ တပ်မှူးဖြစ်ခဲ့တယ်လို့လည်း သိရပါတယ်။

ဒါ့အပြင် အင်းတိုင်အခြေစိုက် တပ်မ ၁၁ ရဲ့ ဒုတိယတပ်မမှူး ဗိုလ်မှူးကြီး မြင့်ဟိဏ်းကို တပ်မ ၈၈ မကွေးရဲ့ တပ်မမှူးအဖြစ် လည်းကောင်း၊ မော်လိုက် အခြေစိုက်အမှတ် ၁၀ စစ်ဆင်ရေးကွပ်ကဲ မှုဌာနချုပ်ရဲ့ ဌာနချုပ်မှူး ဗိုလ်မှူးချုပ် အောင်ဌေးကို တမာတောရှိ တပ်မတော် နည်းပညာတက္ကသိုလ် ကျောင်းအုပ်ကြီး အဖြစ်လည်းကောင်း၊ ကော့သောင်း စစ်ဗျူဟာမှူး ဗိုလ်မှူးကြီး ဟန်လင်းကို မော်လိုက်အခြေစိုက် အမှတ် ၁၀ စစ်ဆင်ရေးကွပ်ကဲမှု ဌာနချုပ်ရဲ့ ဌာနမှူးအဖြစ်လည်းကောင်း၊ အင်းမအခြေစိုက် တပ်မ ၆၆ ရဲ့ တပ်မမှူး ဗိုလ်မှူးချုပ် ကျော်စိုးလင်းကို တပ်မတော် သူနာပြုနဲ့ ဆေးဖက်ပညာတက္ကသိုလ်ကျောင်းအုပ်ကြီးအဖြစ်လည်းကောင်း ပြောင်းရွှေ့ခန့် အပ်လိုက်တယ်လို့လည်း သိရပါတယ်။

“စစ်ခေါင်းဆောင် မင်းအောင်လှိုင်ဟာ ရွေးကောက်ပွဲကာလအတွင်း သူယုံကြည်ရတဲ့သူတွေကို ရာထူးတွေ အပြောင်းအလဲလုပ်နေတာပါ။ နောက်ထပ်ရွေးကောက်ပွဲ ပြီးတဲ့ကာလမှာလည်း အခုစစ်တက္ကသိုလ် ကျောင်းအုပ်ကြီးတွေ ဖြစ်နေကြတဲ့သူတွေဟာ တိုင်းမှူးတွေ ဆက်ပြီးတော့ ဖြစ်လာမဲ့ အနေအထားမျိုးပါဗျ။ စစ်ခေါင်းဆောင်က လူစပြီးတော့ ရွေးချယ်တာပေါ့။ ဒါက နောက်ဆုံးရွေးချယ်ထားတဲ့ သူတွေပေါ့။ နောက်ဆုံးရွေးချယ်ထားတဲ့သူတွေအထဲမှာလည်း အပြစ်ရှိတဲ့သူ၊ ကြည့်မရတဲ့သူ၊ သူစိတ်တိုင်းမကျတဲ့သူတွေကို ဖြုချအုန်းမှာဖြစ်ပါတယ်” လို့ CDM ဗိုလ်ကြီး ဇင်ယော်က ဆက်ပြောပါတယ်။

စစ်ခေါင်းဆောင် မင်းအောင်လှိုင်ဟာ အမှတ် ၁၉ စစ်ဆင်ရေးကွပ်ကဲမှု ဌာနချုပ်ရဲ့ ဒုတိယဌာနချုပ်မှူး ဗိုလ်မှူးချုပ် ကောင်းဇော်မြင့်ကို တပ်မ ၆၆ တပ်မမှူးအဖြစ် လည်းကောင်း၊ အမှတ် ၂၀ စစ်ဆင်ရေးကွပ်ကဲမှု ဌာနချုပ်ရဲ့ ဌာနချုပ်မှူး ဗိုလ်မှူးချုပ် ဇေယျာလင်းကိုလည်း ဗထူးတပ်မတော်ကြည်း တိုက်ခိုက်ရေးသင်တန်းကျောင်းရဲ့ ကျောင်းအုပ်ကြီးအဖြစ်လည်းကောင်း၊ စစ်ရာထူးခန့်ချုပ်ရုံးက ဗိုလ်မှူးချုပ် ရဲခေါင်ကိုလည်း အမှတ် ၂၀ စစ်ဆင်ရေးကွပ်ကဲမှု ဌာနချုပ်ရဲ့ ဌာနချုပ်မှူးအဖြစ်လည်း ကောင်း ပြောင်းရွှေ့အပ်လိုက်တာလည်း ဖြစ်ပါတယ်။

ဒါ့အပြင် အမှတ် ၁၂ စစ်ဆင်ရေးကွပ်ကဲမှု ဌာနချုပ်က စကခမှူး ဗိုလ်မှူးချုပ် မင်းသီဟကို ဗထူးတပ်မတော် ဗိုလ်သင်တန်းကျောင်းရဲ့ ကျောင်းအုပ်ကြီးအဖြစ်လည်းကောင်း၊ ပဲခူးအခြေစိုက် တပ်မ ၇၇ ရဲ့ ဒုတိယတပ်မမှူး ဗိုလ်မှူးကြီး ရဲဝင်းအောင်ကိုလည်း အမှတ် ၁၃ စစ်ဆင်ရေးကွပ်ကဲမှု ဌာနချုပ်ရဲ့ စကခမှူးအဖြစ်လည်းကောင်း၊ စစ်တွေအခြေစိုက် ဒေသကွပ်ကဲမှု စစ်ဌာနချုပ်က ဒကစမှူး ဗိုလ်မှူးချုပ် နေမျိုးအောင်ကိုလည်း တပ်မတော် အုပ်ချုပ်ရေးမှုကျောင်း ပြင်ဦးလွင်ရဲ့ ကျောင်းအုပ်ကြီးအဖြစ်လည်းကောင်း၊ စစ်ဦးစီးတက္ကသိုလ်က ကျောင်းအုပ်ကြီး ဗိုလ်မှူးချုပ် ဇော်ထိုက်လတ်ကို စစ်တွေအခြေစိုက် ဒေသကွပ်ကွဲမှု စစ်ဌာနချုပ်ရဲ့ ဒကစမှူးအဖြစ်လည်းကောင်း အသီးသီးပြောင်းရွှေ့ခန့်အပ်လိုက် တာလည်း ဖြစ်ပါတယ်။

နောက်ထပ်လည်း အမှတ် ၁၇ စစ်ဆင်ရေးကွပ်ကဲမှုဌာနချုပ်က စကခမှူး ဗိုလ်မှူးချုပ် ကျော်စွာလင်းကို မှော်ဘီ ဗိုလ်သင်တန်းကျောင်းရဲ့ ကျောင်းအုပ်ကြီးအဖြစ်လည်းကောင်း၊ တပ်မ ၅၅ က ဒုတိယတပ်မမှူး ဗိုလ်မှူးကြီး မျိုးမြင့်ဦးကိုလည်း အမှတ် ၁၇ စစ်ဆင်ရေးကွပ်ကွဲမှုဌာနချုပ်ရဲ့ စကခမှူးအဖြစ်လည်းကောင်း၊ နိုင်ငံတော်ကာကွယ်ရေးတက္ကသိုလ် နည်းပြချုပ်မှူး ဗိုလ်မှူးချုပ် ကျော်ဇေဝင်းကို ကျိုက်ထိုအခြေစိုက် တပ်မ ၄၄ တပ်မမှူးအဖြစ်လည်းကောင်း ပြောင်းလဲလိုက်ခန့်အပ်လိုက်တယ်လို့လည်း သိရပါတယ်။

စစ်ဦးစီးတက္ကသိုလ်က ဗိုလ်မှူးချုပ် ကျော်ထင်ငြိမ်းကို အမှတ် ၃ တပ်မဟာ မိုးကောင်းရဲ့ တပ်မမှူးအဖြစ် လည်းကောင်း၊ စစ်ဦးစီးတက္ကသိုလ်က ဗိုလ်မှူးကြီး နေမျိုးကိုလည်း အရှေ့တောင်ပိုင်းတိုင်းစစ်ဌာနချုပ်ရဲ့ ဒုတိယတိုင်းမှူးအဖြစ်လည်းကောင်း၊ မိုင်းတုံအခြေစိုက် စစ်ဗျူဟာမှူး ဗိုလ်မှူးချုပ်ကျော်ထင်ကိုလည်း အရှေ့မြောက်တိုင်း စစ်ဌာနချုပ်ရဲ့ တိုင်းစစ်ဦးစီးချုပ်အဖြစ်လည်းကောင်း၊ ဘောလခဲအခြေစိုက် စစ်ဗျူဟာ အခြေချစခန်းက ဗျူဟာမှူး ဗိုလ်မှူးချုပ် အောင်ဇော်လွင်ကို အနောက်မြောက်ပိုင်းတိုင်း စစ်ဌာနချုပ်ရဲ့ တိုင်းစစ်ဦးစီးချုပ်အဖြစ်လည်းကောင်း အသီးသီးပြောင်းရွှေ့ထားတယ်လို့လည်း သိရပါတယ်။

ပြီးခဲ့တဲ့ လကလည်း စစ်ခေါင်းဆောင် မင်းအောင်လှိုင်ဟာ သူယုံကြည်စိတ်ချရတဲ့ ဗိုလ်ချုပ်တွေကို ရာထူးတိုးပေးပြီးတော့ ဒုတိယဗိုလ်ချုပ်ကြီး ကစထ ၂ မှူး ဒုတိယဗိုလ်ချုပ်ကြီး နိုင်နိုင်ဦး (DSA – 35)နဲ့ ကစထ ၃ မှူး ဒုတိယ ဗိုလ်ချုပ်ကြီး တေဇကျော် (ဗသက ၇၃) ကိုလည်း ရာထူးကနေ ဖြုတ်ချကာ အရန်အင်အားကို ပြောင်းရွှေ့လိုက်တာလည်း ဖြစ်ပါတယ်။

ဧရာဝတီတိုင်း၊ ရေကြည်မြို့နယ်၊ စပြင်ကျေးရွာကို စစ်ကောင်စီတပ်က လေကြောင်းဗုံးကြဲချတိုက်ခိုက်မှုကြောင့် ဒေသခံ ၂၄ ဦး သေဆုံးခဲ့ပြီးတော့ ၂၀ ကျော်မှာလည်း ထိခိုက်ဒဏ်ရာရရှိသွားတယ်လို့ ဒေသခံတွေဆီက သိရပါတယ်။

ပြီးခဲ့တဲ့ အောက်တိုဘာလ ၂၃ ရက်နေ့၊ နံနက် ၁၁ နာရီ ၃၀ မိနစ်အချိန်မှာ စစ်ကောင်စီတပ်က ဂျက်ဖိုက်တာတစ်စီးနဲ့ ပေါင် ၅၀၀ ဗုံး ၂ လုံး၊ ပေါင် ၂၅၀ ဗုံး ၁ လုံးစုစုပေါင်းဗုံး ၃ လုံး တို့ကို ပထမအကြိမ်အဖြစ် ကြဲချတိုက်ခိုက်ခဲ့ပါတယ်။

အလားတူ အဲဒီနေ့ နေလည် ၁ နာရီ ၂၀ မိနစ် အချိန်မှာလည်း စစ်ကောင်စီတပ်ဟာ နောက်ထပ်ဂျက်ဖိုက်တာ တစ်စီးနဲ့ ပေါင်၂၅၀ ဗုံး ၂ လုံး စပြင်ကျေးရွာကို ထပ်မံလာရောက်ကြဲချတိုက်ခိုက်ခဲ့တာလည်း ဖြစ်ပါတယ်။

“အဲဒီစပြင်ကျေးရွာမှာ တိုက်ပွဲဖြစ်ပွားတာလည်း မရှိပါဘူး။ စစ်ကောင်စီတပ်က သက်သက်ကို စစ်ရာဇဝတ်မှုကျူးလွန်တာပါ။ တစ်နေ့တည်းမှာပဲ ဗုံး ၅ လုံး ကြဲချတိုက်ခိုက်ခဲ့တာပါ။ သေဆုံးတာကတော့ ၂၄ ယောက်သေဆုံးပါတယ်။ အဲဒီအထဲမှာ ကလေးငယ် ၄ ယောက်ပါ ပါတယ်” လို့ ဧရာဝတီတိုင်း၊ ရေကြည်ဒေသခံတစ်ဦးက BBM ကို ပြောပါတယ်။

စစ်ကောင်စီတပ်က လေကြောင်းကနေ ဗုံးကြဲချတိုက်ခိုက်မှုကြောင့် စပြင်ကျေးရွာက အမျိုးသမီး ၃ ဦး၊ အမျိုးသား ၁၇ ဦးနဲ့ ကလေးသူငယ် ၄ ဦး စုစုပေါင်း ၂၄ ဦးတို့မှာ ဗုံးစထိမှန်ကာ သေဆုံးသွားခဲ့ရပြီး အမျိုးသမီး ၃ ဦးနဲ့ အမျိုးသား ၁၇ ဦး စုစုပေါင်း ၂၀ ဦး တို့မှာလည်း ထိခိုက်ဒဏ်ရာရရှိသွားကြတယ်လို့ သိရပါတယ်။

လက်ရှိမှာ ဒဏ်ရာရရှိသူတွေကို အရေးပေါ်ဆေးကုသမှု ခံယူဖို့အတွက် နီးစပ်ရာဆေးရုံတွေကို ပို့ဆောင်ထားရတယ်လို့လည်း သိရပါတယ်။

စစ်ကောင်စီတပ်က ဗုံးကြဲချတိုက်ခိုက်မှုကြောင့် စပြင်ကျေးရွာက လူနေအိမ် ၁၇ ဆောင်မှာလည်း ဗုံးစထိမှန်ကာ ပြိုကျပျက်စီးသွားတယ်လို့လည်း ရေကြည်ဒေသခံတွေဆီက သိရပါတယ်။

ဧရာဝတီတိုင်းအတွင်းမှာ စစ်ကောင်စီတပ်နဲ့ အာရက္ခတပ်တော် AA ၊ ပူးပေါင်းမဟာမိတ်တပ် PDF တို့ဟာ ငသိုင်းချောင်း၊ လေးမျက်နှာ၊ မြန်အောင်နဲ့ အင်္ဂပူ စတဲ့ မြို့နယ်တွေမှာ တိုက်ပွဲတွေပြင်းထန်စွာ ဖြစ်ပွားနေကြတာလည်း ဖြစ်ပါတယ်။

ရခိုင်ပြည်၊ မောင်တောမြို့နယ်တောင်ပိုင်း၊ ကင်းချောင်းကျေးရွာ အနီးမှာ နွားကျောင်းနေတဲ့ အမျိုးသမီးငယ်တစ်ဦးအပါအဝင် ဒေသခံအရပ်သားပြည်သူ ၃ ဦး မူဆလင်လက်ကိုင် ARSA အဖွဲ့က ဖမ်းဆီးခေါ်ဆောင်သွားတယ်လို့ သိရပါတယ်။

ဒီကနေ့ အောက်တိုဘာလ ၂၄ ရက်နေ့၊ နံနက် ၇ နာရီကျော်အချိန်မှာ ကင်းချောင်းကျေးရွာရဲ့ အရှေ့ဖက် မေယုတောင်တန်းအနီးမှာ အမျိုးသမီးငယ်တစ်ဦးအပါအဝင် အရပ်သားပြည်သူ ၆ ဦးတို့ဟာ ဖြန့်ကျဲကာ နွားကျောင်းနေကြစဥ်က မူဆလင်လက်နက်ကိုင် ARSA အဖွဲ့က သူတို့ကိုလာရာ လမ်းကနေကြိုစောင့်ကာ ဖမ်းဆီးခဲ့တာဖြစ်တယ်လို့လည်း ကင်းချောင်းဒေသခံတစ်ဦးက ပြောပါတယ်။

နွားကျောင်းနေကြသူ ၆ ဦးအနက် တစ်ဦးမှာ ARSA အဖွဲ့ရဲ့ ဖမ်းဆီးမှုရန်က ကင်းချောင်းကျေးရွာကို ထွက်ပြေးလွတ်မြောက်လာခဲ့ပြီး ကျန်တဲ့သူတွေကိုလည်း ကျေးရွာသားတွေက လိုက်လံရှာဖွေခဲ့ရာ နောက်ထပ် ၂ ဦးကိုလည်း ပြန်လည်ရှာတွေ့ခဲ့ပြီး အမျိုးသမီးငယ်တစ်ဦးနဲ့ ကျန် ၂ ဦးတော့ လက်ရှိအချိန်ထိ ရှာမတွေ့သေးဘူးလို့လည်း သိရပါတယ်။

“မနက်ပိုင်းက ရွာသား ၆ ယောက် နွားကျောင်းဖို့သွားကြတာပါ။ နွားကျောင်းတာကတော့ မေယုတောင်တန်းတကြောမှာ ပုံမှန်အတိုင်း နွားကျောင်းနေကြတာလို့ သိရပါတယ်။ ဒီနေ့မှာပဲ ARSA အဖွဲ့က သူတို့ လာရာလမ်းကနေ စောင့်ပြီးတော့ ဖမ်းဆီးသွားကြတာ ဖြစ်ပါတယ်။ ၆ ယောက်မှာ သုံးယောက်ကိုတော့ တွေ့ပါပြီ။ ကျန်တဲ့သုံးယောက်ကတော့ ပျောက်နေပါတယ်။ လက်ရှိမှာတော့ လိုက်လံရှာဖွေနေကြပါတယ်” လို့ ကင်းချောင်းဒေသခံတစ်ဦးက ပြောပါတယ်။

ထွက်ပြေးလွတ်မြောက်လာသူတစ်ဦးမှာ ကိုကျော်ခိုင်ဖြစ်ပြီး၊ ရွာသားတွေရှာဖွေရာမှာ ပြန်လည်တွေ့ရှိသူ ၂ ဦးကတော့ ဦးပန်းချေ (၅၂) နှစ်နဲ့ ဦးဘထွန်း (၅၆) နှစ်တို့ ဖြစ်ကြပါတယ်။

ပျောက်ဆုံးနေသူ ၃ ဦးမှာတော့ မမိစန္ဒာ (၁၆) နှစ်၊ ဦးမောင်ဘထွန်း (၄၁) နှစ်နဲ့ ကိုမောင်ထွန်းအေး (၂၀) နှစ်တို့ ဖြစ်ကြပါတယ်။

ပြီးခဲ့တဲ့ အောက်တိုဘာလ ၂၂ ရက်နေ့ကလည်း ရသေ့တောင်မြို့နယ်၊ စေတီပြင်ကျေးရွာကနေ မောင်တောမြို့နယ်၊ ကျောက်ပန္ဒူကျေးရွာကို ဆန်၊ ဆီ၊ ဆား၊ ငရုတ်သီး စတဲ့ကုန်ပစ္စည်းတွေကို ဝယ်ယူပြီးပြန်လာတဲ့ ခရီးသည်တွေကို ARSA မူဆလင် လက်နက်ကိုင်အဖွဲ့က ခြုံခိုပစ်ခတ်မှုကြောင့် အမျိုးသမီး ၂ ဦး သေဆုံးပြီးတော့ ၂ ဦးမှာ ထိခိုက်ဒဏ်ရာ ရရှိခဲ့တာလည်း ဖြစ်ပါတယ်။

ပြီးခဲ့တဲ့ အောက်တိုဘာလ ၂၁ ရက်နေ့ကလည်း မောင်တောမြို့နယ်၊ သာယာကုန်းကျေးရွာအထွက် မီတာ ၈၀၀ ခန့်အကွာအဝေးလောက်မှာ ARSA မူဆလင်လက်နက်ကိုင်အဖွဲ့ရဲ့ ခြုံခိုတိုက်ခိုက်မှုကြောင့် ဘူးသီးတောင်မြို့နယ်၊ ပြင်ရှည်ရွာက ကိုကျော်စိုးဝင်း (၂၅နှစ်) မှာ သေဆုံးသွားခဲ့ရတာလည်း ဖြစ်ပါတယ်။

ARSA၊ RSO မူဆလင် လက်နက်ကိုင်အဖွဲ့တွေဟာ ရခိုင် – ဘင်္ဂလားဒေ့ရှ် နယ်စပ်ဒေသက အပြစ်မဲ့အရပ်သားပြည်သူတွေရဲ့ အသက်အိုးအိမ်၊ စည်းစိမ်တွေကို ခြိမ်းခြောက်နေတာကြောင့် နယ်စပ်ရှိ မိဘပြည်သူများအနေနဲ့လည်း တောတောင်ထဲနဲ့ လူပြတ်သောနေရာတွေကို တစ်ဦးတည်း (သို့) လူအနည်းစုနဲ့ သွားလာကြတာကို အတတ်နိုင်ဆုံး မပြုလုပ်ကြဖို့နဲ့ကျန်းမာရေးကိစ္စအပါအဝင် မဖြစ်မနေသွားလာရမဲ့အရေးကြီးကိစ္စတွေ ရှိပါကလည်း အာရက္ခတပ်တော် AA ရဲ့ အုပ်ချုပ်ရေးနဲ့ လုံခြုံရေးတပ်ဖွဲ့ဝင်တွေရှိတဲ့ အနီးစပ်ဆုံးနေရာတွေမှာ သတင်းပေးပို့ပြီးမှ သွားလာကြဖို့ကိုလည်း AA က မနေ့က အောက်တိုဘာလ ၂၃ ရက်နေ့မှာ ထပ်မံသတိပေးထားပါတယ်။