Richard

နိုင်ငံတစ်ဝှမ်းမှာ စစ်ကောင်စီက နေ့ရော ညပါ ပေါ်တာဆွဲဖမ်းဆီးနေတာတွေကြောင့်အခြေခံလူတန်းစားလူငယ်လူရွယ်တွေဟာ အလုပ်လုပ်ကိုင်နိုင်ခြင်းမရှိတော့ဘဲ စစ်ကောင်စီအတွက် စစ်မှုမထမ်းဆောင်ချင်ပေမဲ့ စား၀တ်နေရေးကြောင့် မိဘတွေကိုယ်တိုင်က လက်မှတ်ထိုးပေးပြီး စစ်ကောင်စီဖွင့်လှစ်တဲ့ စစ်မှုထမ်းသင်တန်းတွေကို တက်ရောက်နေရတယ်လို့ BBM ကစုံစမ်းသိရှိရပါတယ်။

ပဲခူးတိုင်း၊ ဖြူးမြို့နယ်မှာ စစ်ကောင်စီရဲ့ နေ့ရော ညပါ ပေါ်တာဆွဲဖမ်းဆီးမှုတွေကြောင့် လူငယ်တွေဟာ အလုပ်လုပ်ကိုင်နိုင်ခြင်းမရှိတော့ဘဲ စစ်မှုထမ်း ဖို့အတွက် စစ်ကောင်စီပေးတဲ့ သိန်း၅၀၊ ၁၀၀ကို မက်မောပြီး မိဘတွေကိုယ်တိုင်က ကျောက်တံခါးရုံးချုပ်မှာ လက်မှတ်ထိုးပေးပြီး စစ်ထဲဝင်ခိုင်းနေတယ်လို့ မိသားစုနဲ့ နီးစပ်သူတစ်ဦးက BBMကိုပြောပါတယ်။

“ကျွန်တော့်ညီ၀မ်းကွဲကိုယ်တိုင်တောင် ၀င်သွားတယ်ပေါ့နော်။ စစ်ကောင်စီကို အားပေးလို့တော့မဟုတ်ဘူး။ ဖားစာ၊ငါးစာတောင် ထွက်ရှာလို့ မရတော့တဲ့အခြေအနေဆိုတော့ မဟုတ်လည်းပေါ်တာပါမှာပဲဆိုပြီး သူတို့ပေးတဲ့ သိန်း၅၀၊ ၁၀၀ပဲယူပြီးတော့ ၀င်ကုန်ကြတော့တာပေါ့။ ကျွန်တော်လည်း ဖျောင်းဖျတယ်။ ဒါပေမဲ့ မရဘူး”

လို့ မိသားစုတစ်ဦးက BBMကိုပြောပါတယ်။ ဒါ့အပြင် ဧရာ၀တီတိုင်း၊ မော်ကျွန်းမြို့နယ် ဘုရားဒေါင့်ကျေးရွာအုပ်စုတွင် အုပ်ချုပ်ရေးမှုး စောစေးမူးက စစ်မှုမထမ်းဆောင်ချင်ပါက တစ်လလျှင် ၆သောင်း ပေးဆောင်ရမယ်လို့ ခြိမ်းခြောက်ကောက်ခံနေတယ်လို့ BBMက စုံစမ်းသိရှိရပါတယ်။

“မော်ကျွန်းမြို့နယ်၊ ဘုရားဒေါင့်အုပ်စုမှာပေါ့။ သူတို့က ပိုက်ဆံကောက်မယ်ပြောတာတော့ကြာပြီ။ အရင်လကမှ စကောက်တာ”

လို့ ဒေသခံတစ်ဦးက BBMကိုပြောပါတယ်။မန္တလေးတိုင်း၊ ချမ်းအေးသာစံအနောက်ပိုင်း တွင်လည်း ၂၀၂၄ခုနှစ် ဖေဖော်ဝါရီလ ၁၀ရက်နေ့ကစစ်ကောင်စီရဲ့ ပြည်သူ့စစ်မှုထမ်းဥပဒေထုတ်ပြန်ပြီး လပိုင်းအတွင်းမှာပင် စစ်မှုမထမ်းဆောင်လိုပါက တစ်လ ၂သိန်းကျပ်ပေးဆောင်ရမယ်လို့ ရပ်ကွက်အုပ်ချုပ်ရေးမှုးတွေက တောင်းခံနေတယ ဒီနေ့အထိပဲလို့ ‌မြို့ခံတစ်ဦးက BBMကိုပြောပါတယ်။

“ဒီသူတို့ စစ်မှုထမ်းဥပဒေထုတ်ပြီး သိပ်မကြာဘူး အစည်းအဝေးဆိုပြီး လူငယ်လူရွယ်ရှိတဲ့အိမ်တွေကို လိုက်ခေါ်တာ။ မဲနှိုက်မလား။ အစားထိုးမလားပေါ့။ အစားထိုးချင်ရင် တစ်လ ၂သိန်းပေးရမယ်ပြောတယ်။ ဘယ်တတ်နိုင်မလဲဗျာ။ သူတို့လက်ခုပ်ထဲကဘ၀တွေပဲ။ ပေးထားရတာပေါ့”

လို့ ဒေသခံတစ်ဦးက BBMကိုပြောပါတယ်။စစ်ကောင်စီဟာ နိုင်ငံအနှံ့ စစ်မျက်နှာပေါင်းများစွာဖွင့်ထားရပြီးတော့ လူအင်အားမလုံလောက်တော့တာကြောင့် အခုလို ပြည်သူလူထုကိုပါ စစ်တိုက်ခိုင်းရန် ခြိမ်းခြောက်လာတာ ၁နှစ်ခွဲထဲ ၀င်လာပါပြီ။

စစ်ကိုင်းတိုင်း၊ ရွှေ့ဘိုမြို့ပေါ်မှာ စစ်ကောင်စီက ပုံစံမျိုးစုံနဲ့ ပေါ်တာဆွဲလိုက်လံဖမ်းဆီးနေပြီးတော့ အိမ်စီးကားတွေနဲ့ပါ ပေါ်တာဆွဲနေတယ်လို့ ဇူလိုင်လ ၁၂ရက်နေ့က ရွှေဘိုမြို့ခံ တော်လှန်ရေးတပ်ဖွဲ့တစ်ခုက BBMကိုပြောပါတယ်။

ရွှေဘိုမြို့ပေါ်မှာ စစ်ကောင်စီတပ်သားတွေဟာ ဆိုင်ကယ်တွေကားတွေကို စစ်ဆေးနေစဉ်အတွင်း မထင်ရင်မထင်သလို လူငယ်တွေကို ပေါ်တာ‌ဆွဲဖမ်းဆီးတွေရှိနေပြီး အိမ်စီးကားတွေနဲ့ပါ ပတ်နေတယ်လို့ သိရပါတယ်။

“သူတို့က မဖမ်းတာဆိုလို့ ဒီမိန်းမသားတွေ သက်ကြီးရွယ်အိုတွေပဲ ရှိတယ်ဗျ။ လူငယ်ပိုင်းတွေ လူလတ်ပိုင်းတွေဆို တော်တော်လေးကို ဆွဲတယ်ဗျ”

လို့ မြေပြင်စစ်ရေးသတင်းရင်းမြစ်က BBMကိုပြောပါတယ်။ ဒါ့အပြင် စစ်ကောင်စီဟာ ဆိုင်ကယ်တွေကို တားစစ်သလိုနဲ့ ပေါ်တာဆွဲနေတာတွေရှိပြီး အိမ်စီးကားတွေနဲ့လည်းပတ်ကာ ဆွဲနေတာမျိုးတွေလည်းရှိတယ်လို့ သိရပါတယ်။

“မြို့ပေါ်တွေမှာတော့ ဆိုင်ကယ် without တွေဖမ်း၊ ဦးထုပ်တွေဖမ်းပြီး လူငယ် လူရွယ်တွေဆို မထင်ရင်မထင်သလို ဖမ်းဆီးတာမျိုးတွေရှိတယ်။ ပြီးတော့ ဒီ အိမ်စီးကားတွေနဲ့ကလည်း မြို့တွင်းကို တော်တော်လေးပတ်တယ်ဗျ။ အနည်းဆုံး ၇စီးလောက်နဲ့ပတ်တယ်ဗျ။ အရပ်၀တ်တွေနဲ့ရောပါတယ်၊ ဖောင်းတွေနဲ့ရော ပါတယ်ဗျ”

လို့ ဒေသခံတစ်ဦးက BBMကိုပြောပါတယ်။ အခုလိုစစ်ကောင်စီရဲ့မထင်ရင်မထင်သလို ပေါ်တာဆွဲ ဖမ်းဆီးနေတာတွေကြောင့် ရွှေဘိုမြို့ပေါ်ရှိ လူငယ်တွေဟာ တော်လှန်ရေးတပ်ဖွဲ့တွေနဲ့ချိတ်ဆက်တာတွေရှိသလို ဘေးကင်းရာကို တိမ်းရှောင်နေကြတာတွေလည်းရှိတယ်လို့ သိရပါတယ်။

တစ်ဖက်တွင်လည်း စစ်ကောင်စီဟာ တော်လှန်ရေးတပ်ဖွဲ့တွေ နယ်မြေစိုးမိုးမှုရရှိထားတဲ့နေရာတွေကို စစ်ကြောင်းမထိုးတာ နှစ်နဲ့ချီနေပြီလို့ သိရပါတယ်။

ချင်းပြည်နယ်စပ် ကလေးမြို့ကနေ ချင်းပြည်၊ တီးတိန်မြို့နယ်ထဲကို စစ်ကြောင်းထိုးတဲ့ စစ်ကောင်စီစစ်ကြောင်းဟာ ၁လခွဲကြာတဲ့အထိ ရှေ့ဆက်တိုးနိုင်ခြင်းမရှိသေးဘူးလို့ ဒေသတွင်းသတင်းရင်းမြစ်တွေဆီက သိရပါတယ်။

ချင်းပြည်နယ်စပ်၊ စစ်ကိုင်းတိုင်း၊ ကလေးမြို့ကနေ ချင်းပြည်နယ်၊ တီးတိန်မြို့နယ်ထဲကို အင်အားရာဂဏန်းနဲ့ စစ်ကောင်စီက ပြီးခဲ့တဲ့ မေလ ၁၈ ရက်နေ့ကစ စစ်ကြောင်းထိုးခဲ့တာဖြစ်ပါတယ်။

“အင်အားက အများကြီးတော့ မဟုတ်ဘူးဗျ။ ၁၀၀ရာကျော်၊ ၂၀၀ရာကျော်
ဟာ မိုင်ကုန်ပဲ”

လို့ စစ်ကြောင်းကို မြင်လိုက်ရတဲ့ ကလေးဒေသခံတစ်ဦးက ပြောပါတယ်။ ကလေးမြို့ကနေ ချင်းပြည်၊ တီးတိန်မြို့နယ်ထဲကို စစ်ကြောင်းထိုးလာတဲ့ စစ်ကောင်စီစစ်ကြောင်းကို ဒေသခံချင်းကာကွယ်ရေးပူးပေါင်းတပ်တွေက မေ ၂၁ ရက်နေ့ကစ ခုခံတိုက်ခိုက်ခဲ့ကြပြီး အထိနာတဲ့ စစ်ကောင်စီစစ်ကြောင်းဟာ ကလေးမြို့နဲ့ ဆယ့်ငါးမိုင်အကွာ မွာလ်ပီးကျေးရွာဝန်းကျင်ကနေ ရှေ့ဆက်မတိုးနိုင်သေးဘူးလို့ ဒေသတွင်းသတင်းရင်းမြစ်တွေဆီကနေ သိရပါတယ်။

မေ ၁၈ ရက်နေ့မှာ ကလေးမြို့ ကနေ ချင်းပြည်နယ်ကို စတင်ဝင်လာတဲ့ စစ်ကောင်စီစစ်ကြောင်းကို မေ ၂၁ ရက်နေ့ကစ ချင်းကာကွယ်ရေးပူးပေါင်းတပ်တွေက ခုခံတိုက်ခိုက်ခဲ့ကြတာဖြစ်ပါတယ်။

မေ ၂၁ ရက်နေ့က ချင်းပြည်နယ်ကို စစ်ကြောင်းထိုးတဲ့ စစ်ကောင်စီစစ်ကြောင်းက စစ်ကောင်စီအဖွဲ့ဝင် ၆ ဦးဟာ သေနတ် ၂ လက်ယူဆောင်ပြီး ကလေးမြို့ပြ ပျောက်ကြားစီမံချက် UG အဖွဲ့ထံ ဆက်သွယ်အလင်းဝင်ခဲ့တယ်လို့ သိရပါတယ်။

ချင်းပြည်နယ်ကို စစ်ကြောင်းထိုးလာတဲ့ စစ်ကောင်စီစစ်ကြောင်းကနေ လက်ရှိအချိန်ထိ စစ်ကောင်စီအဖွဲ့ဝင် ၁၀ ဦးထက်မနည်း အရှင်ဖမ်းမိပြီး ၊ လက်နက်တွေပါသိမ်းဆည်းရမိခဲ့တာကို ဒေသတွင်းသတင်းဖော်ပြချက်တွေအရသိရပါတယ်။

စစ်ကောင်စီစစ်ကြောင်းမှာ စစ်ကောင်စီအဖွဲ့ဝင်တွေ ထိခိုက်သေဆုံးမှုတွေ ရှိနေပြီး ထိခိုက်သေဆုံးတဲ့ အရေအတွက်ကိုတော့ အသေးစိတ်သိရှိရ ခြင်း မရှိသေးပါဘူး။

ချင်းပြည်နယ်၊ တီးတိန်မြို့နယ်ထဲက စစ်ကောင်စီစစ်ကြောင်းကို ကလေးမြို့ ကိုးမိုင်ကနေ လက်နက်ကြီးတွေနဲ့ ပစ်ကူပေးနေတယ်လို့ ကလေးဒေသခံတစ်ဦးက ပြောပါတယ်။

“ညတွေပစ်တဲ့အခါတော့ တဒိန်းဒိန်းပဲ ။ နေ့ဆိုရင်တော့ အသံကတိုးတယ်”

လို့ ကလေးဒေသခံ အမျိုးသားတစ်ဦးက ပြောပါတယ်။ ချင်းပြည်၊ တီးတိန်မြို့နယ် တိုက်ပွဲအတွင်း ချင်းကာကွယ်ရေး ပူးပေါင်းတပ်ဘက်ကလည်း ထိခိုက်ကျဆုံးတာတွေရှိတယ်လို့ သိရပါတယ်။

ဇွန် ၂၆ ရက်နေ့ တိုက်ပွဲမှာ CNA ရဲဘော် ၁ ဦးနဲ့ CDF CDM – Siyin က ရဲဘော် ၁ ဦးကျဆုံးပြီး ၁၀ ဦးဝန်းကျင် ထိခိုက်ဒဏ်ရာရရှိခဲ့တယ်လို့ သိရပါတယ်။

ကလေးမြို့ကနေ တီးတိန်မြို့နယ်ထဲကို တက်လာတဲ့ စစ်ကောင်စီစစ်ကြောင်းကို CDF CDM Siyin ၊ CNA ၊ CDF – KKG၊ ကလေးပြည်သူ့ကာကွယ်ရေးတပ်ဖွဲ့ နဲ့ ချင်းညီနောင်အဖွဲ့ဝင် PDF – Zoland ၊ CNDF တို့က ပူးပေါင်းတိုက်ခိုက်နေကြတာဖြစ်ပါတယ်။

ချင်းပြည်နယ်မှာ ချင်းပြည်တောင်ပိုင်းက စစ်ကောင်စီကင်းစင်နယ်မြေဖြစ်လာခဲ့ပြီး ချင်ပြည်နယ်မြောက်ပိုင်းက ထန်တလန်၊ ဟားခါး၊ တီးတိန်မြို့ တွေမှာသာ စစ်ကောင်စီတပ်တွေ ရှိတော့တာဖြစ်ပါတယ်။

ကရင်နီပြည်နယ်၊ ဘော်လခဲခရိုင်၊ဖားဆောင်းမြို့နယ်၊ ခဲမဖြူကျေးရွာအနီးမှာ ပျက်ကျခဲ့တဲ့ လေယာဉ်ဖြစ်စဉ်နဲ့ပက်သက်ပြီးတော့ ဒုချုပ်စိုး၀င်းက ကာကွယ်ရေးဦးစီးချုပ်(လေ)ကို ဒေါသတကြီး ခေါ်ယူကြိမ်းမောင်းခဲ့ပြီး လေယာဉ်ပျက်ကျရာမှာ တာ၀န်ရှိတဲ့သူတွေကို စုံစမ်းစစ်ဆေးရေးခုံရုံးကို ခေါ်ယူပြီး အရေးယူမှာဖြစ်တယ်လို့ တပ်တွင်းအရင်းအမြစ်က BBM ကိုပြောပါတယ်။

ဇူလိုင်လ၃ရက်နေ့က ခမဖြူကျေးရွာအနီးမှာ ပျက်ကျခဲ့တဲ့ FTC2000G လေယာဉ်ဖြစ်စဉ်နဲ့ ပက်သက်ပြီးတော့ ပျက်ကျခဲ့တဲ့နေ့မှာပဲ ဒုချုပ်စိုး၀င်းက ကာကွယ်ရေးဦးစီးချုပ်(လေ)ကို ဒေါသတကြီး ကြိမ်းမောင်းဆဲဆိုခဲ့ပြီးတော့ ‌လေယာဉ်ပျက်ကျတဲ့ ဖြစ်စဉ်နဲ့ပက်သက်တဲ့ တာ၀န်ရှိသူတွေကိုလည်း စစ်ကောင်စီရဲ့ စုံစမ်းစစ်ဆေးရေးခုံရုံးမှာ အပြစ်ပေး ‌အရေးယူမယ်လို့ သိရပါတယ်။

“မနေ့က စိုး၀င်းက လေချုပ်ကို ခေါ်တွေ့တယ်။ အဓိကကတော့ သတိပေးဆုံးမ‌မှု လုပ်ဖို့ပေါ့နော်။ ‌‌ လေယာဉ်ကိစ္စမှာ သူ့အောက်က တာ၀န်ရှိတဲ့သူတွေကို စုံခုံသက်ချုပ် ရေးဖို့ ပြောရရင် အပြစ်ပေးအရေးယူဖို့ ညွှန်ကြားထားတယ်။ လေချုပ်ကို မကျေမနပ်ဆဲဆိုနေတာတွေရှိတယ်။ ပြီးတော့ လေယာဉ်စစ်ဆေးမှု ပေါ့လျော့မှုကြောင့် လေချုပ်ကနေစပြီးတော့ အောက်ခြေအဆင့်ထိ ရှုံ့ချတယ်လို့ပြောတာလည်းသိရတယ်”

လို့ တပ်တွင်းအရင်းအမြစ်ရဲ့ ပြောကြားချက်အရသိရပါတယ်။ ၂၀၂၄ခုနှစ်၊ မေလ၆ရက်နေ့ကလည်း ကရင်နီပြည်နယ်၊ ဘော်လခဲနဲ့ ဖားဆောင်းမြို့နယ်ကြားရှိ ချိကွဲ့-နန့်‌နောက်အနီးမှာ စစ်ကောင်စီရဲ့ MI-17 တိုက်ခိုက်ရေးလေယာဉ်ပျက်ကျသွားခဲ့ပြီး စစ်ကောင်စီတပ်ဖွဲ့၀င် ၈ဦးသေဆုံးကာ ၃ဦးဒဏ်ရာရရှိခဲ့ပါသေးတယ်။

ဒီလိုအရေးယူမှုတွေကြောင့် စစ်ကောင်စီတပ်အတွင်းမှာ စည်းရုံမှုတွေပိုမိုပြိုကွဲလာနိုင်ချေရှိပြီး အကြီးပိုင်းအရာရှိတွေထိ သွေးကွဲမှုတွေပိုမိုများပြားလာနိုင်တယ်လို့ တပ်CDMအသိုင်းအဝိုင်းက BBMကိုပြောပါတယ်။

“ဒီ စကစ အသိုင်းအဝိုင်းထဲမှာ စည်းရုံးမှုတွေပိုပြီးတော့ပြိုကွဲလာနိုင်တယ်။ သွေးကွဲမှုတွေက အကြီးပိုင်းအဆင့်တွေထိ ရောက်လာနိုင်တယ်”

လို့ BBMကိုပြောပါတယ်။

စစ်ကိုင်းတိုင်း၊ ကလေးမြို့မှာ စစ်ကောင်စီအဖွဲ့ဝင်တွေနဲ့ ပျူစောထီးတွေဟာ လူငယ်တွေကို လမ်းမကြီးပေါ်၊ စားသောက်ဆိုင်၊ ရပ်ကွက်ထဲတွေထိ လိုက်လံဖမ်းဆီးနေတာကြောင့် ဖမ်းဆီးခံရတဲ့ လူအရေအတွက်ကိုတောင် သိဖို့ခက်ခဲလာတယ်လို့ ဒေသခံတွေဆီက သိရပါတယ်။

“ဒီလထဲမှာဆို ကျနော်သိတာ ၂၂ ယောက်အဖမ်းခံရတယ်။ ဒီထက်များမှာတော့သေချာတာပေါ့။ ဘယ်နှယောက်ပြန်လွတ်လဲဆိုတာတော့ သိဖို့မဖြစ်နိုင်သလောက်ပဲ။ လွတ်လာတဲ့သူတွေကလည်း ကြောက်ပြီးမပြောရဲကြဘူး”

လို့ ဒေသခံ အမျိုးသားတစ်ဦးက ပြောပါတယ်။စစ်ကောင်စီတပ်ဖွဲ့ဝင်တွေနဲ့ ပျူစောထီးတွေဟာ စစ်မှုထမ်းဖို့သာမက သူတို့အကျိုးစီးပွားအတွက်ပါ လူငယ်တွေကို ဖမ်းဆီးနေတာဖြစ်တယ်လို့ ဒေသခံတွေကပြောပါတယ်။

“ဖမ်းမိပြီးလို့ကတော့ အနည်းဆုံးသိန်းဆယ်ဂဏန်းမကုန်ဘဲနဲ့ ပြန်မလွတ်ဘူး။ သူတို့က ဖမ်းရင်ကို ပိုက်ဆံရတော့တာ။ စစ်မှုထမ်းအတွက် အရေအတွက်ပြည့်ပြီး ကျန်တဲ့လူတွေဆီကနေ ငွေရတာပေါ့”

လို့ ပျူစောထီးကျေးရွာနဲ့ နီးစပ်တဲ့ ကလေးဒသခံ အမျိုးသားတစ်ဦးက BBM ကို ပြောပါတယ်။ ဇွန် ၃၀ ရက်နေ့မှာ ကလေးမြို့အနောက်ပိုင်း၊ စမ်းမြို့ရပ်ကွက်က ဘီယာဆိုင်မှာ ဘီယာထိုင်သောက်နေတဲ့ လူငယ် ၄ ဦးနဲ့ ကြို့သုံးပင်ရပ်ကွက်က လူငယ် ၁ ဦးကို စစ်ကောင်စီနဲ့ ပျူစောထီးအဖွဲ့တွေက အရပ်ဝတ်နဲ့ ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

” သူတို့က အိမ်စီးကားတွေ၊ အရပ်ဝတ်တွေနဲ့ ရပ်ကွက်တွေထဲ လှည့်ဖမ်းနေတာကြာပြီ။ ရပ်ကွက်လမ်းထောင့်တွေမှာလည်း အရပ်ဝတ်နဲ့ လာရပ်နေတာမျိုးတွေလည်းရှိတယ်”

လို့ ကလေးမြို့ ဒေသခံ အမျိုးသမီးတစ်ဦးက ပြောပါတယ်။ ကလေးမြို့နယ်တောင်ပိုင်းက စစ်ကောင်စီစခန်းတွေဖြစ်တဲ့ ကမ်းပါးနီ၊ မှန်တော၊ အောင်သာယာ၊ ကြံသာ ကျေးရွာစခန်းတွေကို တော်လှန်ရေးပူးပေါင်းတပ်တွေက ၂၀၂၅ ခုနှစ် ဖေဖော်ဝါရီလကစ ထိုးစစ်ဆင်တိုက်ခိုက်ခဲ့ပြီး ဧပြီ ၁၁ ရက်နေ့မှာ ကလေး – ဂန့်ဂေါ ကားလမ်းပေါ်က ကလေးမြို့နယ်တောင်ပိုင်း အစွန်ဆုံးက ကြံသာကျေးရွာစခန်းကို သိမ်းပိုက်ခဲ့ပါတယ်။

လက်ရှိအချိန် ကလေးမြို့စစ်ကောင်စီတပ်ဟာ ကလေးမြို့နဲ့ နယ်မြေချင်းထိစပ်နေတဲ့ ချင်းပြည်နယ်၊ တီးတိန်မြို့နယ်ထဲကိုလည်း မေ ၁၈ ရက်နေ့ကစ အင်အားရာဂဏန်းနဲ့စစ်ကြောင်းထိုးခဲ့ပြီး အဆိုပါစစ်ကြောင်းဟာ ချင်းကာကွယ်ရေးပူးပေါင်းတပ်ဖွဲ့ရဲ့ တိုက်ခိုက်မှုကြောင့် သေဆုံးတာ၊ အရှင်ဖမ်းမိတာတွေနဲ့ အထိနာနေတယ်လို့ ဒေသခံသတင်းရင်းမြစ်တွေဆီက သိရပါတယ်။

၂၀၂၅ ခုနှစ်ဆန်းပိုင်းကစ ပြီးတော့ ကလေးမြို့ဝန်းကျင်မှာ စစ်ရေးအရရှုံးနိမ့်နေတဲ့ စစ်ကောင်စီတပ်ဟာ လူအင်အားလိုအပ်ချက်ကြောင့် မြို့ပေါ်ကလူငယ်တွေကို ပေါ်တာဆွဲဖမ်းဆီးတာတွေ အများအပြားလုပ်ဆောင်ခဲ့တယ်လို့ ဒေသခံတွေက ဆိုပါတယ်။