Richard

တနင်္သာရီတိုင်း၊ ရေဖြူမြို့ပေါ်ရှိ စစ်ကောင်စီ လက်အောက်ခံ တပ်ရင်းတွေ၊ ဂိတ်စခန်းတွေနဲ့ ဌာနဆိုင်ရာရုံးတွေကို ဝင်ရောက်စီးတိုက်ခိုက်ခဲ့တဲ့ ရုပ်သံမှတ်တမ်းကို Tavoy People Liberation Force – TPLF က ဒီနေ့ ထုတ်ပြန်ထားပါတယ်။

ဒီဇင်ဘာလ ၁၂ရက်နေ့မှာ ရေဖြူမြို့ရှိ ရွေးကောက်ပွဲကျင်းပဖို့ပြင်ဆင်နေတဲ့ မြို့နယ်အထွေထွေအုပ်ချုပ်ရေးဦးစီးဌာနနဲ့ မြို့မရဲစခန်းကို စတင်တိုက်ခဲ့တာဖြစ်တယ်လို့ သိရပါတယ်။

တပြိုင်နက်တည်းမှာပဲ စစ်ကောင်စီရဲ့ ခမရ (၄၀၆)၊ ခမရ (၄၀၇)၊ အမတ (၃၀၄)၊ ရေဖြူမြို့ တံတားစစ်ဆေးရေးဂိတ်၊ ရေဖြူမြို့ ရပ်တော်မူဘုရားအတွင်းမှ စစ်ကောင်စီ ယာယီစခန်းတို့ကို ဒရုန်းနဲ့ ဗုံးသီးချတိုက်ခိုက်တာ၊ လက်နက်ကြီးနဲ့ ပစ်ခတ်တာတွေ လုပ်ဆောင်ခဲ့တယ်လို့ ဆိုပါတယ်။

အခုလို တော်လှန်ရေးပူးပေါင်းတိုက်ခိုက်ခဲ့တဲ့ စစ်ဆင်ရေးအတွင်း စစ်ကောင်စီဘက်မှ ထိခိုက်သေဆုံးမှု အသေးစိတ်အခြေအနေတွေကို အတိအကျမသိရသေးဘူးလို့ ဆိုထားပါတယ်။

အဆိုပါ တိုက်ခိုက်မှုအတွင်း ရေဖြူမြို့ကို ခေတ္တထိန်းချုပ်နိုင်ခဲ့တာကြောင့် စစ်ကောင်စီတပ်က လက်နက်ကြီးနဲ့ ပြည်သူလူထုရှိရာ နေရာတွေကို ပစ်မှတ်ထားပြီး ရည်ရွယ်ချက်ရှိရှိ ပစ်ခတ်တိုက်ခိုက်ခဲ့တယ်လို့လည်း သိရပါတယ်။

အဲဒီလို ပစ်ခတ်တိုက်ခိုက်မှုတွေကြောင့် တော်လှန်ရေးပူးပေါင်းတပ်တွေက ရေဖြူမြို့ အုပ်ချုပ်ရေးဦးစီးဌာနရုံး၊ ရွေးကောက်ပွဲကော်မရှင်ရုံး၊ အုပ်ချုပ်ရေးယန္တရားအဆောက်အအုံတွေနဲ့ ရဲစခန်းအတွင်းရှိ နေရာတချို့ကို မီးရှို့ရှင်းလင်းဖျက်ဆီးခဲ့တယ်လို့ အသိပေးထားပါတယ်။

အဆိုပါ စီးနင်းတိုက်ခိုက်မှုအတွင်း တော်လှ‌န်‌ရေး ပူးပေါင်းတပ်တွေဘက်မှ အထိအခိုက်မရှိ အောင်မြင်စွာ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

နောက်နောင်မှာလည်း တော်လှန်ရေးပူးပေါင်းတပ်တွေအနေနဲ့ စစ်ကောင်စီကို စဉ်ဆက်မပြတ် တွန်းလှန်တိုက်ခိုက်သွားမှာ ဖြစ်သလို အသိအမြင်မှန်ရပြီး အလင်းဝင်ရောက်လာမဲ့ စစ်ကောက်စီတပ်ဖွဲ့ဝင်တွေကိုလည်း ဆက်လက်ကြိုဆိုလက်ခံသွားမှာ ဖြစ်တယ်လို့ ဆိုပါတယ်။

အဆိုပါ စီးနင်းတိုက်ခိုက်မှုကို ထားဝယ်ပြည်သူ့လွတ်မြောက်ရေးတပ်-TPLF ၊ ပြည်သူ့ကာကွယ်ရေးတပ်မတော်-ထားဝယ်ခရိုင် အမှတ်(၁) တပ်ရင်း၊ ဗျူဟာ (၃၃) ဒေါနစစ်ကြောင်း (၃) KBDF၊ ဗျူဟာ (၃၃) ဒေါနတပ်ခွဲ-၆ (ဝေဟင်တပ်ဖွဲ့)၊ ရေဖြူ ပကဖ၊ Ba Htoo Army ၊ ချိုးဖြူပြောက်ကျားတပ်ဖွဲ့ – DGF၊ ထားဝယ်အရှေ့တောတပ်ဖွဲ့ DEFPDF ၊ ထားဝယ်ခရိုင် ပြည်သူ့ကာကွယ်ရေးတပ်ဦး – DDPDF ၊ A ဒင်မှူး၊ DNU ၊ နဂါးနီပြောက်ကျားတပ်ဖွဲ့နဲ့ ဒေါနတပ်ရင်းချေမှုန်းရေးတပ်ခွဲ(၇) LPF တို့က ပါ၀င်တိုက်ခိုက်ခဲ့တာဖြစ်တယ်လို့ သိရပါတယ်။

Video-ထားဝယ်ပြည်သူ့လွတ်မြောက်ရေးတပ်

မကွေးတိုင်း၊ ကံမမြို့နယ်၊ ရေနံ့သာရဲကင်းစခန်းကနေ ထွက်လာတဲ့ စစ်ကောင်စီစစ်ကြောင်းကို ၂ ကြိမ်တိုင်တိုင် မိုင်းဆွဲပစ်ခတ်တိုက်ခိုက်ခဲ့ရာ စုစုပေါင်း ၁၆ ဦးသေဆုံးခဲ့တယ်လို့ သရက်ခရိုင် အမှတ် ၄ တပ်ရင်းရဲ့ တာ၀န်ခံက ကိုမြတ်က BBM ကိုပြောပါတယ်။

ဒီဇင်ဘာလ ၁၂ ရက်နေ့မှာ ရွေးကောက်ပွဲအတွက်နယ်မြေချဲ့လာတဲ့ သရက်မြို့မှ အင်အား (၃၀)ပါ စစ်ကောင်စီစစ်ကြောင်းနဲ့ ရေနံ့သာရဲကင်းစခန်းမှ ထွက်လာတဲ့ အင်အား (၄၀)ပါ ပူးပေါင်းစစ်ကြောင်းဟာ သရက်-ကံမ လမ်းပိုင်းအတိုင်း နှစ်ဘက်ညှပ် စစ်ကြောင်းထိုးလာခဲ့တယ်လို့ ဆိုပါတယ်။

မနက် ၉ နာရီ၀န်းကျင်မှာ ကံမရေနံသာစခန်းမှ ထွက်လာတဲ့ အင်အား ၄၀ ခန့်ပါ စစ်ကြောင်းကို ကံမမြို့နယ် နတ်မီးတောက်ကျေးရွာအနီးမှာ စောင့်ကြိုပစ်ခတ်တိုက်ခိုက်ခဲ့ရာ ၅ မိနစ်ခန့်တိုက်ပွဲဖြစ်ပွားပြီး စစ်ကောင်စီဘက်မှ မိုင်းကွင်းထဲဝင်လာတဲ့ ၆ ဦးခန့် သေဆုံးခဲ့တယ်လို့ ဆိုပါတယ်။

“ရေနံ့သာဘက်ကလာတဲ့ အင်အား ၄၀ ပါစစ်ကြောင်းပေါ့၊ အဲ့ကနေ ရှေ့ပွိုင့်ထွက်လာတဲ့ စခတွေဒီမိုင်းကွင်းထဲကို ၀င်လာတဲ့အချိန်မှာ မိုင်းဆွဲတိုက်ခိုက်ခဲ့တာပါ၊ ထွက်လာတဲ့ ၆ ကောင်လုံး အတုံးအရုံးပဲဗျ၊ နောက်ကကျန်တဲ့စခတွေကိုတော့ လက်နက်ငယ်‌တွေနဲ့ ပစ်ခတ်ခဲ့ပါတယ်”လို့ တာ၀န်ခံ ကိုမြတ်က ဆက်ပြောပါတယ်။

အထိနာသွားတဲ့ စစ်ကောင်စီစစ်ကြောင်းဟာ လက်ကျန် အင်အား ၃၀ ခန့်နဲ့ သရက်-ကံမ လမ်းပိုင်းအတိုင်း ဆက်လက်စစ်ကြောင်းထိုးလာပြီး ထန်းဖြူကျေရွာနဲ့ ရေတွင်းကြီးကျေးရွာမှ ဒေသခံပြည်သူ နေအိမ်တွေကို ဖောက်ထွင်းမွှေနှောက်ခိုးယူပြီး ထွက်ခွာလာခဲ့တယ်လို့ ဆိုပါတယ်။

“ဒီကောင်တွေထုံးစံအတိုင်းပေါ့၊ စစ်ကြောင်းထိုးလာရင် အနည်းဆုံးတော့ ခိုးတာပဲ၊ အခုလည်း မွှေသွားတယ်ကြားတယ်ဗျ”လို့ ဆိုပါတယ်။

အဆိုပါစစ်ကြောင်းဟာ သရက်မြို့နယ် စက်တောင်ကျေးရွာအနီးအရောက် နေ့လယ် ၁၂ နာရီမှာ ထပ်မံပြီး အနီးကပ် စောင့်ကြိုပစ်ခတ်တိုက်ခိုက်ရာ စစ်ကောင်စီဘက်မှ ၁၀ ဦး ထပ်မံသေဆုံးခဲ့တယ်လို့ဆိုပါတယ်။

“အဲ့ဘက်ကျတော့ မိုင်းကွင်းမရှိဘူး၊ ဒီကောင်တွေ ထိုးလာတာကို ကြိုရထားတော့ အသင့်ကြိုစောင့်ပြီးတိုက်ခိုက်တာပေါ့၊ နာရီ၀က်လောက်ကြာတယ်ဗျ၊ အဲ့ဒီချိန်မှာ အနီးကပ်ဆိုတော့ ဒီကောင်တွေဘက်က အထိအခိုက်များသွားတယ်”လို့ ဆိုပါတယ်။

တိုက်ခိုက်ခံလိုက်ရတဲ့ သရက်မြို့မှ ထွက်လာတဲ့ စစ်ကြောင်းနဲ့ ပူပေါင်းမိပြီး သရက်မြို့နယ်၊ စက်တောင်ကျေးရွာ ဘုန်းကြီးကျောင်းအနီးမှာ လက်နက်ကြီးတပ်ဆင်ကာ တိုက်ပွဲဖြစ်ပွားရာ အနီးတဝိုက်ကို ရမ်းသမ်းပစ်ခတ်မှုတွေ ရှိတယ်လို့ ဆိုပါတယ်။

ဒါ့ကြောင့် တိုက်ပွဲထပ်မံဖြစ်ပွားနိုင်တာ ကြောင့် သရက်-ကံမလမ်းပိုင်းကို အသုံးပြုသွားလာကြမဲ့ ပြည်သူတွေအနေနဲ့ သတိပြုသွားလာကြပါဖို့ သရက်ခရိုင် တပ်ရင်း ၄ က အသိပေးထားပါတယ်။

ရှမ်းပြည်နယ်မြောက်ပိုင်း မိုးကုတ်ခရိုင်၊ မိုးမိတ်မြို့နယ်၊ မြစ်ဆုံကျေးရွာကို စစ်ကောင်စီတပ်က လေကြောင်းကနေ ဗုံးကြဲချတိုက်ခိုက်မှုကြောင့် ကလေးငယ်တွေအပါအဝင် အပြစ်မဲ့အရပ်သားပြည်သူ ၁၁ ဦး သေဆုံးသွားတယ်လို့ TNLA က ဒီကနေ့ ဒီဇင်ဘာလ ၈ ရက်နေ့မှာ ထုတ်ပြန်ထားပါတယ်။

ပြီးခဲ့တဲ့ ဒီဇင်ဘာလ ၆ ရက်နေ့၊ နံနက် ၉ နာရီအချိန်မှာ စစ်ကောင်စီတပ်က ဂျက်ဖိုက်တာ ၂ စီးနဲ့ မိုးမိတ်မြို့နယ်၊ မြစ်ဆုံကျေးရွာကို လာရောက်ဗုံးကြဲချတိုက်ခိုက်မှုကြောင့် ကလေးငယ် ၂ ဦး၊ အမျိုးသား ၇ ဦးနဲ့ အမျိုးသမီး ၂ ဦး စုစုပေါင်း ၁၁ ဦး တို့မှာထိခိုက်ဒဏ်ရာ ရရှိခဲ့တာလည်း ဖြစ်ပါတယ်။

အဆိုပါ စစ်ကောင်စီတပ်က ဗုံးကြဲချတိုက်ခိုက်မှုကြောင့် နေအိမ် ၁ လုံးမှာလည်း ဗုံးစတွေထိမှန်ကာ ပျက်စီးသွားတယ်လို့လည်း သိရပါတယ်။

ပြီးခဲ့တဲ့ အောက်တိုဘာ ၂၇ ရက်နေ့ကလည်း စစ်ကောင်စီတပ်ဟာ မိုးမိတ်မြို့နယ်၊ မန်ကျည်းပင်ကျေးရွာကို ပေါင် ၅၀၀ ဗုံး ၁ လုံး နဲ့ ပေါင် ၂၅၀ ဗုံး ၁ လုံးတို့ လာရောက်ကြဲချ တိုက်ခိုက်ခဲ့တာကြောင့် အရပ်သားပြည်သူ နေအိမ်တစ်လုံးမှာလည်း ဗုံးစတွေထိမှန်ကာ ပျက်စီးသွားခဲ့ရတာလည်း ဖြစ်ပါတယ်။

ဒါကြောင့် အရပ်သားပြည်သူတွေအနေနဲ့ စစ်ကောင်စီတပ်ရဲ့ ဗုံးကြဲချတိုက်ခိုက်မှုတွေကို ရှောင်ရှားနိုင်ဖို့အတွက် စစ်ရေးသတိအမြဲရှိကြဖို့ လိုအပ်ပြီး လေကြောင်းရန်ကနေ ကာကွယ်နိုင်ဖို့အတွက်လည်း ကာကွယ်ရေးဆိုင်ရာနည်းလမ်းတွေကို လိုက်နာဆောင်ရွက်ဖို့ လိုအပ်တယ်လို့ တအာင်းတပ် TNLA က သတိပေး ပြောဆိုထားပါတယ်။

ပြီးခဲ့တဲ့ အောက်တိုဘာလ ၂၉ ရက်နေ့က စစ်ကောင်စီတပ်နဲ့ တအာင်းတပ် TNLA တို့ဟာ တရုတ်ရဲ့ကြားဝင်ညှိနှိုင်းမှုနဲ့ အပစ်အခတ်ရပ်စဲရေးအတွက် သဘောတူလက်မှတ်ရေးထိုးခဲ့ကြပြီး၊ မိုးမိတ်နဲ့ မိုးကုတ်မြို့နယ်တွေက TNLA ဆုတ်ခွာပေးဖို့နဲ့ နှစ်ဖက်တပ်တွေ ထိုးစစ်ရောက်တဲ့နေရာမှာ ရပ်ဆိုင်းထားကြဖို့ စတဲ့အချက်အလက်တွေလည်း ပါဝင်ခဲ့တာဖြစ်ပါတယ်။

လက်ရှိမှာတော့ မိုးကုတ်နဲ့ မိုးမိတ်မြို့နယ်တွေအနီးမှာ စစ်ကောင်စီတပ်နဲ့ NUG လက်အောက်ခံ တော်လှန်ရေးတပ်တွေ တိုက်ပွဲတွေဖြစ်ပွားနေကြပြီး စစ်ကောင်စီတပ်ကလည်း မိုးကုတ်၊ မိုးမိတ်မြို့နယ်တွေကို လေကြောင်းကနေ ဗုံးကြဲချတိုက်ခိုက်နေတာလည်း ဖြစ်ပါတယ်။

စစ်ကောင်စီတပ်ဖွဲ့၀င် ၅ ယောက် သေဆုံးကာ လမ်းတစ်လျှောက်က အမျိုးသမီးတွေ အပါအဝင် ပြည်သူ၁၁ ‌ဦးကို ပေါ်တာဆွဲသွား

မန္တလေးတိုင်း၊ တောင်သာမြို့နယ်၊ တမိုက်သာကျေးရွာမှာ တပ်စွဲထားတဲ့ စစ်ကောင်စီစခန်းကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာကြောင့် စစ်ကောင်စီတပ်သား ၅ ဦး သေဆုံးခဲ့တယ်လို့ မြင်းခြံခရိုင်အမှတ် ၃ တပ်ရင်းမှ တာဝန်ရှိသူ ဗိုလ်မူတူးက BBMကိုပြောပါတယ်။

နိုဝင်ဘာလ ၇ ရက်နေ့ မနက် ၅ နာရီ ခွဲ၀န်းကျင်အချိန်ခန့်က တောင်သာမြို့နယ်၊ မြင်းခြံ – ပုဂံ-ညောင်ဦးလမ်းမ ဘေး တမိုက်သာကျေးရွာမှာ ခဏ၀င်ရောက်နားနေတဲ့ အင်အား ၆၀ ခန့်ပါ စစ်ကြောင်းကို တိုက်ခိုက်ခဲ့တာကြောင့် စစ်ကောင်စီတပ်သား ၅ ဦးသေဆုံးကာ ၅ ဦး အပြင်း အထန်ဒဏ်ရာရရှိပြီး ဆေးရုံကို ပို့ဆောင်လိုက်တယ်လို့ သိရပါတယ်။

တိုက်ပွဲဖြစ်ပွားချိန် ၁နာရီခွဲကြာခဲ့ပြီး တော်လှန်ရေးတပ်ဖွဲ့တွေ ဆုတ်သွားမှ မြင်းခြံနဲ့ ကြာပို့ဆေးရုံကို သေနတ်တွေ ဖောက်ပြီး ပို့ဆောင်ပါတယ်လို့ ဆိုပါတယ်။

“တိုက်ပွဲကြာချိန်ကတော့၁ နာရီခွဲကြာတယ်ဗျ။ အခြေအနေဆိုးတဲ့ ၅ ကောင်ကိုတော့ မြင်းခြံ ဆေးရုံကို ပို့ထားတယ်လို့ကြားရတယ်။ မစိုးရိမ်ရတဲ့ ၃ကောင်ကိုတော့ ကြာပို့ဆေးရုံ ကိုပို့ပါတယ်။ ၈ ယောက်ကတော့ ထိခိုက်ဒဏ်ရာရခဲ့ပါတယ်။ တိုက်ပွဲဖြစ်ပြီး ကျွန်‌တော်တို့ ဆုတ်သွားတော့မှ ကြာပို့ဆေးရုံကိုသေနတ်ဖောက်ပြီး ‌ပို့တယ်လို့သိရပါတယ်”လို့ ဗိုလ်မူတူးက ဆက်ပြောပါတယ်။

ခွာစစ်ဆင်ချိန်မှာ စစ်ကောင်စီတပ်သားတွေ သေနေတာကို မျက်မြင်တွေ့ရှိခဲ့ရပေမဲ့ မြေပြင်အနေအထားအရ လက်နက်ကောက် ယူနိုင်ခြင်းမရှိဘူးလို့ ဆိုပါတယ်။

စစ်ကောင်စီတပ်ဟာ အခုလို တိုက်ခိုက်ခံခဲ့ရတာကြောင့် ကြာပို့ကျေးရွာကို သေနတ်များပစ်ဖောက်ပြီး လက်ဖက်ရည်ဆိုင်၊ မုန့် ဟင်းခါးဆိုင်‌ေတွက လူငယ် ၆ ယောက်နဲ့ မင်းကြိုကျေးရွာမှလည်း အမျိုးသမီးတွေအပါအဝင် ပြည်သူ ၅ ယောက် ကို ပေါ်တာဆွဲဖမ်းဆီးသွားတယ်လို့ သိရပါတယ်။

အဆိုပါတိုက်ခိုက်မှုကို မြင်းခြံခရိုင်အမှတ် ၃ တပ်ရင်းမှ တိုက်ခိုက်ခဲ့တာဖြစ်ပြီးတော့ ပြည်သူ့ကာကွယ်ရေး တပ်ဖွဲ့ဝင်တွေ အထိအခိုက်မရှိ ပြန်လည် ဆုတ်ခွာနိုင်ခဲ့တယ်လို့ ဆိုပါတယ်။

Video-မြင်းခြံခရိုင် တပ်ရင်း၃တပ်ရင်း

စစ်ကိုင်းတိုင်း၊ မုံရွာခရိုင်၊ အရာတော်မြို့မှာ စစ်ကောင်စီရဲ့ စစ်ဆေးရေးဂိတ်စခန်းကို တော်လှန်ရေးပူးပေါင်းတပ်တွေ ဝင်ရောက်တိုက်ခိုက်ခဲ့ရာ စစ်ကောင်စီတပ်သားတွေ စခန်းစွန့်ခွာထွက်ပြေးသွားတယ်လို့ ဒီပဲယင်းမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

နိုဝင်ဘာလ ၅ ရက်၊ မနက်ပိုင်းမှာ အရာတော်မြို့ အမှတ် (၂)ကျောင်းမှာ တပ်စွဲထားတဲ့ စစ်ဆေးရေးဂိတ်စခန်းကို တော်လှန်ရေးတပ်တွေက စီးနင်းတိုက်ခိုက်ခဲ့ရာ စစ်ကောင်စီတပ်သားတွေ ဝရုန်းသုန်းကားထွက်ပြေးသွားတယ်လို့ သိရပါတယ်။

စခန်းကို ၀င်ရောက်ရှင်းလင်းခဲ့ရာ ၇.၆၂ ကျည် ၅၁၁ တောင့်၊ ၅.၅၆ ကျည် ၄၀၀ တောင့်၊ Icon ၄လုံး၊ ငွေ ၂၉၄၆၀၀ ကျပ်၊ စစ်သုံးခရာ ၁ လုံး၊ ကျည်ကာဦးထုပ် ၁ လုံး၊ စစ်သုံးလွယ်အိတ် ၄ လုံး၊ ဆိုင်ကယ် ၃ စီး၊ ခမောက်ဝိုင်း ၁ လုံး၊ Equipment ၁ စုံနဲ့ စစ်အသုံးအဆောင်ပစ္စည်းအချို့ သိမ်းဆည်းရရှိခဲ့တယ်လို့ သိရပါတယ်။

တိုက်ပွဲဖြစ်ပွားချိန်ဟာ ၁၅ မိနစ်ခန့်ကြာခဲ့ပြီး စစ်ကောင်စီတပ်ဖွဲ့ဝင်တွေရဲ့ သေဆုံးထိခိုက်မှုကို စိစစ်နေဆဲဖြစ်ကြောင်းနဲ့ တော်လှန်ရေးရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

အဆိုပါ ပူးပေါင်းစစ်ဆင်ရေးကို အရာ‌တော်မြို့နယ် ပကဖ ၊ ဒီပဲယင်းမြို့နယ် ပကဖ နဲ့ ကျားသစ်နက် ပြောက်ကျားတပ်ဖွဲ့ (LDF) အဖွဲ့တို့က ပူးပေါင်းတိုက်ခိုက်ခဲ့တာဖြစ်တယ်လို့ သိရပါတယ်။

Video-ပြည်သူ့ကာကွယ်ရေးအဖွဲ့ ဒီပဲယင်းမြို့နယ်

မန္တလေးတိုင်း၊ မြင်းခြံမြို့နယ်မှာ စစ်ကောင်စီထိုးစစ်ဆင်လာတဲ့ ၂ လတာအတွင်း စနိုက်ပါနဲ့ ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်ဖွဲ့၀င် ၃၃ ဦးသေဆုံးခဲ့တယ်လို့ ဇီးရိုးပြောက်ကျားတပ်ဖွဲ့ရဲ့ တပ်ရင်းမှူး ကိုသက်ကြီးက နို၀င်ဘာလ ၈ ရက်‌မှာ BBM ကိုပြောပါတယ်။

ဩဂုတ်လပိုင်းမှစပြီး မြင်းခြံမြို့နယ်ရဲ့ အရှေ့ဘက်၊ မြောက်ဘက်နဲ့ အရှေ့မြောက်ဘက်ကို စစ်ကြောင်းထိုးလာတဲ့ စစ်ကောင်စီစစ်ကြောင်းတွေကို စနိုက်ပါနဲ့ ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်ဖွဲ့၀င် ၃၃ ဦးသေဆုံးခဲ့တယ်လို့ ကိုသက်ကြီးက အတည်ပြုပြောကြားခဲ့တာပါ။

“၈ လပိုင်းကနေစပြီးတော့ ၁၀ လပိုင်းအထိ စုစုပေါင်း စခ ၃၃ ကောင်ကို ဇီးရိုးက စနိုက်ဘာတပ်စိတ်က ရှင်းလင်းနိုင်ခဲ့ပါတယ်”လို့ ကိုသက်ကြီးက BBM ကိုပြောပါတယ်။

ဇီးရိုးပြောက်ကြားတပ်ဖွဲ့ရဲ့ စနိုက်ဘာတပ်စိတ်ခေါင်းဆောင် ရဲဘော် မော်ကြီးက ဦးဆောင်တိုက်ခိုက်ခဲ့တာဖြစ်ပြီး အဆိုပါစနိုက်ဘာတပ်စိတ်ကြောင့် စစ်ကောင်စီစစ်ကြောင်း ရှေ့ဆက်မတိုးနိုင်ဘဲ ဟန့်တားနိုင်ခဲ့ပါတယ်လို့ ဆိုပါတယ်။

“ကလေးတွေကို စနစ်တကျသင်ပေးထားပါတယ်၊ စနိုက်ဘာ Team ရဲ့ ခေါင်းဆောင် မော်ကြီးဆိုတာ သိပ်ကောင်းတာ၊ သူစိတ်ပါရင် တစ်ကောင်ပြီးတစ်ကောင်ပဲ၊ Headshot တွေလည်းပါသလို အစုံပဲ၊ တခါတလေ ရွေ့လျားကျတော့လည်း နေရာစုံထိတာပေါ့”လို့ တပ်ရင်းမှူး ကိုသက်ကြီးက ဆက်ပြောပါတယ်။

အဆိုပါ စနိုက်ဘာတပ်စိတ်ကြောင့် စစ်ကောင်စီစစ်ကြောင်းတွေ ရှေ့ကိုဆက်မတိုးရဲဘဲ လေးငါးရက်ကြာအောင် ထိန်းထားနိုင်တဲ့အနေအထားရှိတယ်လို့လည်း သိရပါတယ်။

“ကခဲ့တဲ့ပွဲတွေကတော့ ‌ဆက်တိုက်လိုပါပဲ၊ တောက်လျှောက်ဖြစ်နေတာပါ၊ မနားတမ်းကနေရတာပါဗျ၊ ဒီစနိုက်ဘာကြောင့် စခ စစ်ကြောင်းတွေ လေးငါးရက်ကို မတိုးရဲဘဲ တန့်နေတာမျိုးတွေရှိတယ်၊ ကျွန်တော်တို့ ကလေးတွေက အကွာအဝေးတစ်ခုအထိကို ပိုင်ပိုင်နိုင်နိုင်ပစ်နိုင်တယ်”လို့ ကိုသက်ကြီးက ဆက်ပြောပါတယ်။

စစ်ကောင်စီအနေနဲ့ အင်အားဘယ်လောက်ပဲသုံးသုံး၊ လက်နက်ဘယ်လောက်ပဲ ကောင်းကောင်း ဆက်လက်ခုခံတော်လှန်နေမှာ ဖြစ်ကြောင်း ကိုသက်ကြီးက အသိပေးပြောကြားပါတယ်။

“ကျွန်တော်တို့ကတော့ သူတို့(စခ)တွေ ဘယ်လိုပဲ အင်အားသုံးသုံး၊ ထုထည်ပဲပါပါ၊ လက်နက်ပဲဘယ်လောက်ကောင်းကောင်း ကျွန်တော်တို့ ဇီးရိုးတွေ၊ ညီနောင်တွေအနေနဲ့ တွန်းလှန်နေပါတယ်ဗျ”လို့ ကိုသက်ကြီးက ဆက်လက်ပြောပါတယ်။

ပြီးခဲ့တဲ့ နိုဝင်ဘာလ ၄ ရက်၊ နေ့လယ်ပိုင်းမှာလည်း မြင်းခြံမြို့နယ်၊ လယ်သစ်ကျေးရွာရှိ စစ်ကောင်စီ စုပေါင်းဂိတ်ကို လက်နက်ငယ်တွေအပြင် ရဲဘော် ပေါ့ဘာက ရဲရင့်စွာ လမ်းပေါ်အထိတက်ပြီး ဘန်ကာထဲသို့ RPG နဲ့ ပစ်ခတ်ခဲ့တာကြောင့် စစ်ကောင်စီဘက်မှ ၈ ဦးသေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့တယ်လို့ မြင်းခြံခရိုင် တပ်ရင်း ၇ Zero ပြောက်ကျားတပ်ဖွဲ့က ထုတ်ပြန်ထားပါတယ်။

အလောင်းများတစ်စစီဖြစ်ပွါးတာမို့ မိသားစုကိုပင် ဓာတ်ပုံမပြဘဲ ချက်ချင်းသင်္ဂြိုလ်

အာရက္ခတပ်တော် AAကိုတိုက်ခိုက်ရန်အတွက် ကျောက်ဖြူမြို့ပေါ်မှ စစ်ကောင်စီတွေအနေနဲ့ ဒရုန်းဗုံးသီးများကို ကားပေါ်မှအတင်အချပြုလုပ်ကာပြင်ဆင်နေစဥ် ပေါက်ကွဲမှုဖြစ်ပွါးခဲ့ပြီး စစ်ကောင်စီဘက်မှတပ်ကြပ်ကြီး(၂)ဦးအပါစစ်သည်(၅)ဦး ပွဲချင်းပြီးသေဆုံးကာ အမြောက်အများထိခိုက်ဒဏ်ရာရခဲ့တယ်လို့ သိရပါတယ်။

ပြီးခဲ့တဲ့အောက်တိုဘာလ၁၇ရက်နေ့က ကျောက်ဖြူမြို့ပေါ်မှာရှိတဲ့ စစ်ကောင်စီတပ်ဖွဲ့ဝင်တွေအနေနဲ့ အာရက္ခတပ်တော် AAနဲ့ ဖြစ်ပွါးနေနဲ့ တိုက်ပွဲတွေအတွင်း အသုံးပြုဖို့အတွက် ဒရုန်းဗုံးသီးအချို့ကို လက်နက်ခဲယမ်းသိုလှောင်ရေးမှတဆင့် ရှေ့တန်းတွေဆီကို ပို့ဆောင်ဖို့အတွက် ထောက်ပို့ကားတွေနဲ့အတူ ဗုံးသီးအတင်အချတွေပြုလုပ်ခဲ့တယ်လို့ သိရပါတယ်။

အဆိုပါဗုံးသီးတွေကို ကားပေါ်ကိုတင်ရန် စစ်ကောင်စီတပ်ဖွဲ့ဝင် အယောက်(၂၀)ခန့်ဖြင့် လုပ်ဆောင်နေစဥ် ၎င်းတို့အဖွဲ့ထဲမှ စစ်ကောင်စီတပ်သားတစ်ဦးရဲ့လက်ထဲမှ ဗုံးသီးလွတ်ကျခဲ့ပြီး ပေါက်ကွဲမှုဖြစ်ပွါးခဲ့တယ်လို့ သိရပါတယ်။

ပေါက်ကွဲမှု ဖြစ်စဥ်အတွင်း အနီးအနားမှာရှိတဲ့ ဒရော့ဗုံးသီးတွေပါ ဆက်လက်ထိခိုက်ပေါက်ကွဲခဲ့တာကြောင့် အနီးအနားမှာရှိနေတဲ့ စစ်ကောင်စီတပ်သား(၅)ဦးပွဲချင်းပြီးသေဆုံးခဲ့ရသလို အမြောက်အများ ထိခိုက်ဒဏ်ရာရရှိခဲ့တယ်လို့ သိရပါတယ်။

“ဖြစ်စဥ်က ၁၇ရက်နေ့ကဖြစ်တာပါ ခါတိုင်းလို ဗုံးသီးပို့ဖို့ လုပ်အားပေးထုတ်တော့ ခုသေတဲ့သူတွေအပါ အယောက်(၂၀)နီးပါးလောက်ကို လုပ်အားပေးထုတ်တယ်၊ အဲ့မှာ သူတိူ့လက်ထဲက ဗုံးသီးက လွတ်ကျပြီးကွဲတော့ အနီးဆုံး(၅)ယောက်ကတော့ ပွဲချင်းပြီးသေတာပဲ ကျန်တဲ့သူတွေလည်း ဒဏ်ရာရတာတွေရှိတယ်”ဟု ကျောက်ဖြူတပ်တွင်းသတင်းရင်းမြစ်တစ်ဦးက BBM ကိုပြောပါတယ်။

အဆိုပါဖြစ်စဥ်အတွင်းသေဆုံးခဲ့ရတဲ့ စစ်ကောင်စီတပ်သား(၅)ဦးအနက် (၂)ဦးမှာ တပ်ကြပ်ကြီး ဟမ်းထက်သူရနဲ့ တပ်ကြပ်ကြီး ရဝေထက်တို့ဖြစ်ပြီး ကျန်(၃)ဦးကိုတော့ အတည်ပြုနိုင်ဖို့စုံစမ်းနေဆဲဖြစ်တယ်လို့ အဆိုပါသတင်းရင်းမြစ်ကဆက်ပြောပါတယ်။

“သေတာ(၅)ယောက် အဲ့ထဲက (၂)ယောက်ကိုတော့ အတည်ပြုလို့ရပါတယ်၊ တပ်ကြပ်ကြီး ဟမ်းထက်သူရနဲ့ တပ်ကြပ်ကြီးရဝေထက်တို့ပါ၊ ဟိုပုံးဆင်းတပ်ကြပ်ကြီးတွေ အသက်ငယ်ငယ်လေးပဲရှိသေးတယ်”

ဒါ့အပြင် ပေါက်ကွဲမှုဖြစ်စဥ်အတွင်းသေဆုံးခဲ့ရတဲ့ စစ်ကောင်စီတပ်သားတွေရဲ့ရုပ်အလောင်းတွေဟာ ဒရုန်းဗုံးသီးရဲ့ယမ်းအားအရှိန်ကြောင့် တစ်စစီစုတ်ပျက်သွားခဲ့ရတာမို့ မိသားစုကိုအကြောင်းကြားပြီး နောက်နေ့ချက်ချင်းသင်္ဂြိုလ်ခဲ့တယ်လို့လည်း သိရပါတယ်။

ဒါတင်မက အဆိုပါရုပ်အလောင်းတွေနဲ့ပတ်သတ်ပြီး မိသားစုကိုလည်း ဓာတ်ပုံတွေပင်ပေးပို့ခြင်းမရှိတဲ့အပြင် စစ်ဆင်ရေးအခြေအနေဖြစ်တာမို့ သတင်းမပေါက်ကြားရေးအတွက် အထူးတားမြစ်ပိတ်ပင်ခဲ့တယ်လို့လည်း သိရပါတယ်။

“ရုပ်အလောင်းတွေကတော့ ဒရုန်းဗုံးသီးအနီးကပ်ကွဲတာဆိုတော့ စုတ်ပြတ်သွားတာပဲ၊ တချို့ဆို တစ်စစီပဲ၊ အဲ့တာမိသားစုကိုတော့ အကြောင်းကြားပြီး နောက်နေ့ချက်ချင်း တပ်ကသင်္ဂြိုလ်လိုက်တယ်၊ ဒီကိစ္စ လိုင်းပေါ်မပျံ့ဖို့အတွက်လည်း တပ်က မိသားစုကိုကော ကျန်သူတွေကိုကော သတိပေးထားတယ်ဗျ”

ကျောက်ဖြူမြို့နယ်အတွင်း စစ်ကောင်စီနဲ့အာရက္ခတပ်တော်AAတို့ကြား တိုက်ပွဲပြင်းထန်စွာဖြစ်ပွါးနေတာ လအနည်းငယ်ကြာမြင့်လာနေပြီဖြစ်ပြီး အာရက္ခတပ်တော်ဘက်မှ စကစရဲ့ အမှတ်(၃၂)ရဲတပ်ရင်း ကာကင်းစခန်းအများစုကို သိမ်းပိုက်ထားနိုင်သလို တိုက်ပွဲတွေအတွင်းမှာလည်း စစ်ကောင်စီရဲ့ဗိုလ်မှူးချုပ်အဆင့်တွေအပါ စစ်သည်အမြောက်အများကို သုတ်သင်ရှင်းလင်းမှုတွေပြုလုပ်ထားနိုင်တယ်လို့ သိရပါတယ်။

Photo-ပထမပုံ တပ်ကြပ်ကြီးဟမ်းထက်သူရ၊ ဒုတိယပုံ တပ်ကြပ်ကြီး ရဝေထက်(တပ်တွင်းသတင်းရင်းမြစ်)