ပြည်တွင်းသတင်း

မြိုင်မြို့နယ် ပကဖ က ဦးစီးပြုလုပ်တဲ့ အခြေခံစစ်သင်တန်း(၄/၂၀၂၅)၊ သင်တန်းဆင်းပွဲကို ဒေသတွင်းတစ်နေရာမှာ ပြုလုပ်ကျင်းပခဲ့တယ်လို့ မြိုင်မြို့နယ် ပကဖ က ဒီဇင်ဘာလ ၁၄ ရက်မှာ ထုတ်ပြန်ခဲ့ပါတယ်။

အဆိုပါအခြေခံစစ်ပညာသင်တန်းကို မြိုင်မြို့နယ် ပကဖ မှ တပ်ဖွဲ့ဝင်တွေသာမကပဲ အခြားတပ်ပေါင်းစုတွေက သင်တန်းသားတွေလည်း တက်ရောက်ခဲ့ကြပြီး သင်တန်းကာလ ၂ လနီးပါးအချိန်အတွင်း အခြေခံစစ်ပညာတွေကို သင်တန်းသား ၇၀ ကျော် တက်ရောက်ခဲ့ကြတယ်လို့ သိရပါတယ်။

သင်တန်းမှာ ဒေါင်းရင်သွေး (မြစ်ခြေ)၊ Joker ပြောက်ကျားတပ်ဖွဲ့(မြိုင်)၊ လရောင်ပြောက်ကျားတပ်ဖွဲ့(မြိုင်)၊ Burma Federal Colum (BFC)တို့မှ သင်တန်းသားတွေ တက်ရောက်ခဲ့ကြတယ်လို့ ဆိုပါတယ်။

သင်တန်းဆင်းပွဲကို မြိုင် ပကဖ၊ မကွေးတိုင်းပြည်သူ့ကာကွယ်ရေးတပ်မတော် (PDF – Magway) နဲ့ သက်ဆိုင်ရာတာဝန်ရှိပုဂ္ဂိုလ်တွေ တက်ရောက်ခဲ့ကြတယ်လို့ သိရပါတယ်။

စစ်အာဏာရှင်အမြစ်ဖြတ်ချေမှုန်းရေး၊ ဒေသတွင်းစည်းလုံးညီညွတ်ရေးနဲ့ စစ်ရေးဖော်ဆောင်နိုင်ရေးတို့ကို စဥ်ဆက်မပြတ်ကြိုးစားနေကြောင်း မြိုင်မြို့နယ် ပကဖ က အသိပေးထုတ်ပြန်ထားပါတယ်။

မြို့ပေါ် စာသင်ကျောင်းမှာ စစ်ကောင်စီက အင်အားအသင့်ပြင်နေပြီး လက်နက်ကြီးများ ဖြန့်ခွဲတပ်ဆင်နေ

မိုးကုတ်မြို့နယ်အတွင်း တော်လှန်ရေးအင်အားစုတွေနဲ့ စစ်ကောင်စီတို့ တိုက်ပွဲများပြင်းထန်နေပြီး တော်လှန်ရေးအင်အားစုတွေက မိုးကုတ်မြို့ရှိ စစ်ကောင်စီဗျူဟာကုန်းအထိပါ ဒရုန်းနဲ့ တိုက်ခိုက်နိုင်ခဲ့တယ်လို့ သိရပါတယ်။

၁၀၂၇ စစ်ဆင်ရေးဒုတိယအပိုင်းမှာ တော်လှန်ရေးတပ်ဖွဲ့တွေ သိမ်းပိုက်နိုင်ခဲ့တဲ့ မိုးကုတ်မြို့ကို ပြီးခဲ့တဲ့ နိုဝင်ဘာလအကုန်မှစပြီး စစ်ကောင်စီက ပြန်လည်ဝင်ရောက်လာခဲ့တာကြောင့် မိုးကုတ်မြို့နယ်အတွင်း တိုက်ပွဲတွေ တဖန်ပြန်လည်ဖြစ်ပွားခဲ့ရတယ်လို့ သိရပါတယ်။

မိုးကုတ်မြို့နယ်တိုက်ပွဲတွေဟာ နွေဦးတော်လှန်ရေးအင်အားစုတွေ အားကောင်းရာ မိုးကုတ်မြို့နယ် အနောက်ပိုင်းမှာသာမက တွင်းငယ်၊ မိုးမိတ်ကိုလည်း သွားနိုင်တဲ့ မိုးကုတ်မြို့အရှေ့ပိုင်း ဆက်အင်းပြန့်ရွာတစ်ဝိုက်မှာလည်း တိုက်ပွဲပြင်းထန်စွာဖြစ်ပွားနေတယ်လို့ သိရပါတယ်။

ဒါ့အပြင် ဒီဇင်ဘာလ ၁၃ ရက်မှာလည်း မိုးကုတ်မြို့အရှေ့ပိုင်းအတွင်း တနေကုန်နီးပါး တိုက်ပွဲပြင်းပြင်းထန်ထန်ဖြစ်ပွားခဲ့ပြီး တော်လှန်ရေးအင်အားစုတွေက မိုးကုတ်မြို့အရှေ့ပိုင်းရှိ စစ်ကောင်စီဗျူဟာကုန်းကိုပါ ဒရုန်းနဲ့ တိုက်ခိုက်ခဲ့တာတွေရှိတယ်လို့ သိရပါတယ်။

“မနေ့က နေ့ခင်းလောက်ကတည်းက တနေကုန်တိုက်ပွဲတွေဖြစ်နေတာ၊ လက်နက်ကြီး၊လက်နက်ငယ်အသံတွေကတော့ ခပ်အုပ်အုပ်ကြားရတယ်၊ ပြီးတော့ အရှေ့ပိုင်းကဗျူဟာကုန်းကိုလည်း ဒရုန်း(၂)လုံးလာချလို့ ပေါက်ကွဲသံကြားရတယ်ဗျ၊ အဲတာတော့ အတော်ကျယ်ကျယ်ပဲ”လို့ ဒေသခံတစ်ဦးက BBM ကိုပြောပါတယ်။

တော်လှန်ရေးအင်အားစုတွေ ဒရုန်းဗုံးသီးလာချခဲ့တဲ့ အဆိုပါဗျူဟာကုန်းဟာ မြို့အနီးအနားမှာတင်ရှိနေတာကြောင့် တိုက်ပွဲတွေဟာ မြို့နဲ့တဖြည်းဖြည်းနီးကပ်လာနေဟန်ရှိတယ်လို့လည်း မြို့ခံတွေထံမှ သိရပါတယ်။

ဒါ့အပြင် နေ့စဥ်ဖြစ်ပွားနေတဲ့ မိုးကုတ်မြို့နယ် တိုက်ပွဲတွေအတွင်း စစ်ကောင်စီဘက်မှ ထိခိုက်သေဆုံးမှုတွေများပြားတာကြောင့် မိုးကုတ်အနောက်ပိုင်းရှိ နာရေးကူညီမှုအသင်းမှ ဝန်ထမ်းတွေကိုပါ အကူအညီတောင်းပြီး သင်္ဂြိုဟ်နေရတာတွေရှိတယ်လို့ သိရပါတယ်။

မိုးကုတ်မြို့ပေါ်ရှိ အထက(၁)ကျောင်းထဲမှာလည်း စစ်ကား(၅)စီးအပြည့် အသင့်အနေအထားနဲ့ စစ်ကောင်စီဘက်က ပြင်ဆင်ထားသလို လက်နက်ကြီးတွေကိုလည်း ရှမ်းကျောင်းနဲ့ မစိုးရိမ်ဘုန်းကြီးကျောင်းတို့မှာ ဖြန့်ခွဲ့တပ်ဆင်ထားတယ်လို့ သိရပါတယ်။

“ကျောင်းကြီး(ထ၁)က မိုးကုတ်မှာအကြီးဆုံးပဲဗျ၊ အဲ့မှာ သံပြားကာကား(၅)စီးစာ အင်အားအသင့်ရှိတယ်၊ ပြီးတော့ လက်နက်ကြီးတွေကိုလည်း ရှမ်းကျောင်းကော၊ မစိုးရိမ်မှာပါ ခွဲပြီးဆင်ထားတယ်လို့သိရတယ်ဗျ၊ ခုတိုက်ပွဲတွေက မြို့နားထိနီးနေပြန်တော့ သူတို့ပြန်ဆင်နေတာနေမယ်”လို့ သူက ဆက်ပြောပါတယ်။

မိုးကုတ်မြို့နဲ့ မိုးမိတ်မြို့နဲ့ပတ်သက်ပြီး NUG အစိုးရ၊ ကာကွယ်ရေးဝန်ကြီးဌာနကလည်း PDFတွေ၊ ပကဖ တွေကို အမိန့်ပေးစီးဆင်းမှုတစ်ခုတည်းအောက်မှာထားကာ ကွပ်ကဲနေပြီးစစ်ကောင်စီတွေကို တိုက်ထုတ်မယ်လို့ တရားဝင်ထုတ်ပြန်ကြေငြာထားပါတယ်။

စစ်ကောင်စီစစ်ကြောင်းက ကျဆုံးရဲဘော် ၂ ဦးရဲ့ ဂူဗိမာန်ကိုပါ ဖျက်ဆီးသွား

မကွေးတိုင်း၊ ပခုက္ကူခရိုင်၊ မြိုင်မြို့နယ်မှာ အခြေစိုက်တဲ့ Burma Revolution Rangers အဖွဲ့ရဲ့တပ်စခန်းကို စစ်ကောင်စီက စစ်ကြောင်းထိုးဝင်ရောက်စီးနင်းမှုကြောင့် ရဲဘော်တစ်ဦး ကျဆုံးခဲ့ပြီး စခန်းကိုလည်းမီးရှို့ဖျက်ဆီးသွားတဲ့အပြင် ကျဆုံးသွားတဲ့ ရဲဘော် ၂ ဦးရဲ့ ဂူဗိမာန်တွေကိုပါ ဖျက်ဆီးသွားတယ်လို့ သိရပါတယ်။

မနေ့က ဒီဇင်ဘာလ ၈ ရက်မှာ ပခုက္ကူအခြေစိုက် စစ်ကောင်စီရဲ့ တပ်မ ၁၀၁ မှထွက်လာတဲ့ အင်အား ၁၀၀ ကျော်ပါ စစ်ကြောင်းဟာ Burma Revolution Rangers အဖွဲ့တွေ နေရာယူထားတဲ့ စခန်းအနီးကို စစ်ကြောင်းထိုးလာတာကြောင့် တိုက်ပွဲတွေဖြစ်ပွားခဲ့တာ ဖြစ်တယ်လို့ Burma Revolution Rangers အဖွဲ့ရဲ့ ပြန်ကြားရေးတာဝန်ခံ ကိုဒီမိုက BBM ကို ပြောပါတယ်။

“မနေ့က ၈ ရက်နေ့၊ မနက်ပိုင်းလောက်က ပခုက္ကူအခြေစိုက် ၁၀၁ တပ်ရင်းကနေ ထွက်လာတဲ့စစ်ကြောင်းက ၇ ရက်နေ့လောက်မှာ ထွက်လာပါတယ်၊ အဲဒီလိုထွက်လာတော့ ဘုန်းကန်ပျူရွာနဲ့ ကျောက်ဆက်ကန်ဆိုတဲ့ ရွာတွေကိုဝင်ပါတယ်၊ အဲဒီမှာ ညအိပ်ပြီးတော့ ကျနော်တို့ စခန်းရှိတဲ့နေရာဘက်ကို ဦးတည်ပြီးထွက်လာတာ ဖြစ်ပါတယ်၊ ထွက်လာတဲ့အခါ သတင်းတွေအရ ကျနော်တို့က လူအင်အား၊ လက်နက်အင်အားတွေနဲ့ ကာကွယ်တာပေါ့၊ စစ်ကောင်စီဘက်ကလည်း အင်အားတွေများပါတယ်၊ သူတို့ကတော့ လက်နက်ကြီး၊ RPG ၊ ၆၀ မမ၊ ၄၀ မမ တွေနဲ့ ပစ်ခတ်တာရှိပါတယ်၊ အင်အားကလည်း မမျှတော့ စစ်ကူလာတဲ့ ရဲဘော်တစ်ယောက်လည်း လက်နက်ကြီးကျည် ထိသွားပါတယ်” လို့ Burma Revolution Rangers အဖွဲ့ရဲ့ ပြန်ကြားရေးတာဝန်ခံ ကိုဒီမိုက ပြောပါတယ်။

စစ်ကောင်စီက အခုလို အင်အားအလုံးအရင်းနဲ့ စစ်ကြောင်းထိုးလာတာကြောင့် Burma Revolution Rangers အဖွဲ့ရဲ့ စခန်းတစ်ခုလုံး မီးလောင်ပျက်ဆီးသွားသလို ကား ၂ စီး၊ ဆိုင်ကယ်နဲ့ လက်နက်ခဲယမ်းရိက္ခာတွေလည်း ဆုံးရှုံးသွားခဲ့ရပြီး စစ်ဘေးရှောင်နေအိမ် ၁၀ လုံးကျော်ကိုလည်း မီးရှို့ဖျက်ဆီးသွားတယ်လို့ သိရပါတယ်။

“အဖွဲ့မှာက အကုန်လုံးပေါင်းမှ ရဲဘော် ၂၀ ကျော် ၃၀ လောက်ပဲရှိပါတယ်၊ အင်အားကလည်း အဖွဲ့မှာက အရမ်းကိုနည်းပါတယ်၊ အင်အားမမျှတော့ အကုန်လုံးပြန်ဆုတ်ရတာပေါ့၊ အဲဒီအချိန်မှာ စစ်ကောင်စီတပ်ဖွဲ့တွေက စခန်းအနီးကို ဝင်ရောက်လာတာပါ၊ ဝင်ရောက်လာတော့ စခန်းမှာကျန်ရှိခဲ့တဲ့ ပစ္စည်းတွေ၊ အဆောက်အအုံတွေ၊ ဘန်ကာတွေအကုန်လုံးကို ဖျက်ဆီးခဲ့တာရှိပါတယ်၊ ပြီးတော့ ကျဆုံးရဲဘော်တွေရဲ့ ဂူဗိမာန် ၂ ခုကိုလည်း ဖျက်ဆီးသွားတာရှိပါတယ်” လို့ ကိုဒီမိုက ဆက်ပြောပါတယ်။

လက်ရှိမှာတော့ အဆိုပါ စစ်ကောင်စီစစ်ကြောင်းဟာ ကျောက်ဆက်ကန်ကျေးရွာအနီးမှာ တပ်စွဲနေရာယူထားပြီး ထိတွေ့တိုက်ပွဲတွေ ဖြစ်ပွားတာမရှိသေးဘူးလို့လည်း သိရပါတယ်။

ပခုက္ကူမြို့နယ် ပြည်သူ့ကာကွယ်‌ရေးအဖွဲ့ – Burma Revolution Rangers (BRR)တပ်ဟာ ပခုက္ကူ၊ မြိုင်နဲ့ ပေါက်မြို့နယ်အတွင်းမှာ စစ်ရေးလှုပ်ရှားမှုတွေရှိနေတာဖြစ်ပြီး အခုနှစ် ဧပြီလမှာ ပခုက္ကူ PDF နဲ့ ပူးပေါင်းပြီး စစ်တပ်ရဲ့ ပါရာမော်တာတစ်စီးကို ပထမဆုံးဖျက်ဆီးနိုင်ခဲ့တဲ့ တော်လှန်ရေးအဖွဲ့တစ်ခုလည်း ဖြစ်ပါတယ်။

Photo-BRR

မကွေးတိုင်း၊ အမ်း – ပဒါန်းလမ်းပိုင်းရှိ နတ်ရေကန်လေကြောင်းရန်ကာကွယ်ရေးစခန်း ဗျူဟာကုန်းအနီးမှ AA နဲ့ ပူးပေါင်းတပ်တွေ သိမ်းထားတဲ့ ကာကင်းစခန်းတွေကို စစ်ကောင်စီက လက်နက်ကြီး၊ လေကြောင်း၊ ဒရုန်းတွေနဲ့ ဗုံးကြဲချတိုက်ခိုက်နေတယ်လို့ တော်လှန်ရေးတပ်ဖွဲ့ဝင်တွေနဲ့ နီးစပ်တဲ့သူတွေဆီက သိရပါတယ်။

AA နဲ့ ပူးပေါင်းတပ်တွေဟာ နတ်ရေကန်ဗျူဟာကုန်းရှိ စခန်းတွေအကုန်လုံးနီးပါးကို သိမ်းပိုက်ထိန်းချုပ်ထားတာဖြစ်ပြီး လက်ကျန်စခန်းဖြစ်တဲ့ ခမောက်တောင်စခန်းတစ်ခုကိုသာ သိမ်းပိုက်ဖို့ ကျန်ရှိတော့တာလည်း ဖြစ်ပါတယ်။

ဒါကြောင့် အာရက္ခတပ်တော် AA နဲ့ ပူးပေါင်းတပ်တွေဟာ နတ်ရေကန်ဗျူဟာကုန်းရှိ ခမောက်တောင်စခန်းကို သိမ်းပိုက်ဖို့အတွက် ထိုးစစ်ဆင်တိုက်ခိုက်နေပြီး စစ်ကောင်စီတပ်ကလည်း AA နဲ့ ပူးပေါင်းတပ်တွေသိမ်းထားတဲ့ စခန်းနေရာတွေကို လေကြောင်း၊ ဒရုန်းတွေနဲ့ ဗုံးကြဲချတိုက်ခိုက်တာ၊ လက်နက်ကြီးတွေနဲ့ ပစ်ခတ်တာတွေ နေ့စဥ်နဲ့အမျှ ပြုလုပ်နေတယ်လို့ AA နဲ့ နီးစပ်တဲ့တော်လှန်ရေးတပ်ဖွဲ့ဝင်တစ်ဦးက ပြောပါတယ်။

“နတ်ရေကန်ဗျူဟာကုန်းကတော့ အမ်း – ပဒါန်းလမ်းပိုင်းအတွက် အရေးပါတဲ့ စခန်းတစ်ခုဖြစ်ပါတယ်၊ ဒါကို စစ်တပ်ဘက်ကလည်း ကောင်းကောင်းကြီး သိပါတယ်၊ အဲဒီစခန်းသာ တော်လှန်ရေးတပ်တွေက ရသွားရင် ပဒါန်းတပ်နယ်အတွင်းက စခန်းတွေ၊ ကပစ စက်ရုံတွေကို ခြိမ်းခြောက်လာနိုင်တော့မှာပါ၊ ဒါကြောင့် စစ်တပ်က ဗျူဟာကုန်းမကျရောက်ရေးအတွက် လေကြောင်း၊ ဒရုန်း၊ လက်နက်ကြီးတွေကို အသုံးပြုပြီး အသည်းအသန် ခုခံကာကွယ်နေတာပါ” လို့ တော်လှန်ရေးတပ်ဖွဲ့ဝင် တစ်ဦးက BBM ကို ပြောပါတယ်။

စစ်ကောင်စီတပ်ဟာ အမ်း – ပဒါန်းလမ်းပိုင်းက နတ်ရေကန်ဗျူဟာကုန်းနဲ့ ၆ မိုင်အကွာမှ ပျင်းဝစစ်ဆေးရေး ဂိတ်မှာလည်း ကာကင်းစခန်းတွေ၊ လက်နက်ကြီးစခန်းတွေကို တိုးချဲ့ဆောက်လုပ်ထားပြီး အဲဒီလက်နက်ကြီး စခန်းတွေကလည်း လက်နက်ကြီးတွေ ဗျူဟာကုန်းအနီးကို အဆက်မပြတ် ပစ်ခတ်နေတာရှိတယ်လို့လည်း သိရပါတယ်။

နတ်ရေကန်ဗျူဟာကုန်းမှာ ကျန်ရှိနေသေးတဲ့ ခမောက်တောင်စခန်းမှာ စစ်ကောင်စီတပ်ဖွဲ့ဝင်အင်အား ၃၀၀ ဝန်းကျင်သာရှိတော့တာဖြစ်ပြီး ဗျူဟာကုန်းကို စစ်ကူအင်အားလာပို့နိုင်တဲ့ မြေပြင်ကုန်းလမ်းကြောင်းတွေ အကုန်လုံးနီးပါးကိုလည်း AA နဲ့ ပူးပေါင်းတပ်တွေက ပိတ်ဆို့ဖြတ်တောက်ထားတာ ဖြစ်ပါတယ်။

ဒါကြောင့် စစ်ကောင်စီတပ်ဟာ မြေပြင်ကနေ စစ်ကူအင်အား၊ စစ်လက်နက်ခဲယမ်းပစ္စည်းတွေကို ပို့ဆောင်လို့မရတာကြောင့် လေကြောင်းကနေ ပို့ဆောင်ပေးမှုတွေရှိနေပြီး တချို့စားနပ်ရိက္ခာပစ္စည်းတွေကိုလည်း AA နဲ့ ပူးပေါင်းတပ်တွေက ရရှိနေတယ်လို့ သိရပါတယ်။

နတ်ရေကန်ဗျူဟာကုန်းဟာ အခုနှစ်မကုန်ခင် တော်လှန်ရေးတပ်ဖွဲ့တွေဆီမှာ ကျရောက်နိုင်တာကြောင့် ပဒါန်းတပ်နယ်အတွင်းမှာလည်း စစ်ကောင်စီတပ်က စစ်အင်အားတွေဖြည့်တင်းနေကာ ဆုံကုန်း၊ ပျင်းဝ စစ်ဆေးရေးဂိတ်တွေကို ပို့ဆောင်ပေးနေတယ်လို့လည်း သိရပါတယ်။

“ပဒါန်းတပ်နယ်အတွင်းကို စစ်အင်အားတွေ ရောက်တာရှိပါတယ်၊ အဲဒီစစ်အင်အားတွေကို ဆုံကုန်းတို့ ပျင်းဝ စစ်ဆေးရေးဂိတ်တွေကို ပို့ပေးနေတာရှိပါတယ်၊ အဓိကတော့ ကပစ ၁၄ စက်ရုံ ခုခံမဲ့သဘောအတွက် ကာကွယ်နေတာဖြစ်ပါတယ်” လို့ AA နဲ့ နီးစပ်တဲ့စစ်ရေးသတင်းရင်းမြစ်တစ်ဦးက ဆိုပါတယ်။

အာရက္ခတပ်တော် AA ဟာ ရခိုင်မှ မြို့နယ် ၁၄ ခုကို အပြီးသတ်သိမ်းပိုက်ထိန်းချုပ်လိုက်ပြီးနောက် အခုနှစ် ၂၀၂၅၊ နှစ်ဆန်းပိုင်းမှစတင်ပြီး မကွေးတိုင်း၊ ပဲခူးတိုင်း၊ ဧရာဝတီတိုင်းတွေကို ထိုးစစ်ဆင်တိုက်ခိုက်ခဲ့ရာ ၁၀ လကျော်ကြာတိုက်ခိုက်မှုအတွင်းမှာ ရခိုင်ရိုးမအစပ်မှ စစ်ကောင်စီတပ်စခန်း ၅ ခုနဲ့ ကျေးရွာ ၃ ရွာကို AA နဲ့ ပူးပေါင်းတပ်တွေက သိမ်းပိုက်ထိန်းချုပ်ထားတယ်လို့ ISP Myanmar ရဲ့ ဒီဇင်ဘာလ ၁ ရက်နေ့ ထုတ်ပြန်တဲ့အစီရင်ခံစာအရ သိရပါတယ်။

AA နဲ့ ပူးပေါင်းတပ်တွေ ထိုးစစ်ဆင်တိုက်ခိုက်နေတဲ့ မကွေးတိုင်းမှာ စစ်ကောင်စီတပ်ရဲ့ စစ်လက်နက်ပစ္စည်းထုတ်လုပ်ရေး ကပစ စက်ရုံ ၁၅ ရုံ ရှိနေတာဖြစ်ပြီး အထက်မင်းလှမြို့နယ်မှာ ကပစ ၂ ၊ ၁၀ နဲ့ ၁၃၊ ဆင်ပေါင်ဝဲ မြို့နယ်မှာ ကပစ ၈၊ သရက်မြို့နယ်မှာ ကပစ ၁၂၊ ပွင့်ဖြူမြို့နယ်မှာ ကပစ ၁၄၊ အောင်လံမြို့နယ်မှာ ကပစ ၁၅ နဲ့ ၁၇၊ တောင်တွင်းကြီးမြို့နယ်မှာ ကပစ ၁၈၊ စေတုတ္တရာမြို့နယ်မှာ ကပစ ၂၀၊ ဆိတ်ဖြူမြို့နယ်မှာ ကပစ ၂၁ နဲ့ ၂၂၊ ကျောမြို့နယ်မှာ ကပစ ၂၃၊ ပေါက်မြို့နယ်မှာ ကပစ ၂၄၊ လောင်းရှည်မြို့နယ်မှာ ကပစ ၂၅ စက်ရုံတို့ ရှိနေကြတာလည်း ဖြစ်ပါတယ်။

စစ်ကောင်စီစစ်ကြောင်းက ပြည်သူ ၂ ဦးကို ပစ်သတ်ခဲ့ပြီး ၃ ဦးကို ဖမ်းဆီးသွားဟုဆို

မကွေးတိုင်း၊ မင်းဘူးမြို့နယ်မှာ အင်အား ၁၂၀ ကျော်နဲ့ စစ်ကြောင်းထိုးခဲ့ပြီး ပြည်သူတွေကို ဖမ်းဆီးသတ်ဖြတ်လာတဲ့ စစ်ကောင်စီစစ်ကြောင်းကို ကြားဖြတ်တိုက်ခိုက်ခဲ့ရာ စစ်ကောင်စီတပ်သား ၄ ဦးသေဆုံးပြီး အများအပြား ထိခိုက်ဒဏ်ရာရခဲ့တယ်လို့ မင်းဘူးခရိုင် အမှတ် ၆ တပ်ရင်းက ယမန်နေ့၊ ညပိုင်းမှာ ထုတ်ပြန်ပါတယ်။

ပြီးခဲ့တဲ့ ဒီဇင်ဘာလ ၅ ရက်၊ နေ့လယ် ၁ နာရီခန့်မှာ အဆိုပါစစ်ကောင်စီစစ်ကြောင်းကို ကုတင်ကုန်းရွာအနီးမှာ မင်းဘူးခရိုင် တပ်ရင်း ၆ မှ ကြားဖြတ်တိုက်ခိုက်ခဲ့ရာ စစ်ကောင်စီတပ်သား ၄ ဦးသေဆုံးပြီး တပ်ကြပ်ကြီး ၁ ဦးအပါအဝင် အများအပြား ဒဏ်ရာရခဲ့တယ်လို့ ဖော်ပြထားပါတယ်။

အဲဒီနောက်မှာ ကုတင်ကုန်းရွာထဲကို လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့တာကြောင့် ပြည်သူ့နေအိမ်အချို့ ပျက်စီးခဲ့ပြီး ပြည်သူ ၂ ဦးကိုလည်း ဖမ်းဆီးသွားတယ်လို့ ဆိုပါတယ်။

အဆိုပါစစ်ကြောင်းဟာ ဒီဇင်ဘာလ ၃ ရက်မှစပြီး မန်းချောင်းအနောက်ဘက်ရှိ စကုမြို့အနောက်ပိုင်း၊ ခံကုန်းရွာမှ ရွှေစက်တော်ဘုရားသို့ စစ်ကြောင်းထိုးခဲ့ပြီးနောက် ဒီဇင်ဘာလ ၄ ရက်မှာ ရွှေကြောင်းရွာမှ အသက် ၄၀ ‌ကျော် အမျိုးသားတစ်ဦးကို သေနတ်နဲ့ ပစ်သတ်ခဲ့တဲ့အပြင် လူငယ် ၁ ဦးကိုလည်း ဖမ်းဆီးသွားခဲ့တယ်လို့ သိရပါတယ်။

ဒါ့အပြင် ဒီဇင်ဘာလ ၅ ရက်မှာ ကူရွာမှ အသက် ၅၀ အရွယ်အမျိုးသား ၁ ဦးကိုလည်း အဆိုပါစစ်ကောင်စီစစ်ကြောင်းက ပစ်သတ်ခဲ့သေးတယ်လို့ ဆိုပါတယ်။

ဒီဇင်ဘာလ ၆ ရက်မှာ လက်ပတောရွာရဲစခန်းသို့ ရောက်ရှိလာတဲ့ စစ်ကောင်စီစစ်ကြောင်းကို မင်းဘူးခရိုင် တပ်ရင်း ၄၊ ၆၊ မဟာမိတ်တွေနဲ့ မင်းဘူးမြို့နယ် ပကဖ တို့က ဒရုန်းဗုံးသီး ၆ လုံးနဲ့ တိုက်ခိုက်ခဲ့ရာ စစ်ကောင်စီတပ်သား ၄ ဦးထိခိုက်ဒဏ်ရာရခဲ့တယ်လို့ သိရပါတယ်။

မင်းဘူးမြို့နယ်အတွင်းရှိ ပြည်သူတွေအနေနဲ့ စစ်ကောင်စီ စစ်သား၊ ရဲ ၊ ပျူစောထီးတွေနဲ့ ဝေးရာမှာ နေထိုင်ကြဖို့ကိုလည်း မင်းဘူးခရိုင် တပ်ရင်း ၆ က တိုက်တွန်းထားပါတယ်။

Photo – မင်းဘူးခရိုင်တပ်ရင်း ၆

မကွေးတိုင်း၊ ကံမမြို့နယ်၊ ရေနံ့သာရဲကင်းစခန်းကနေ ထွက်လာတဲ့ စစ်ကောင်စီစစ်ကြောင်းကို ၂ ကြိမ်တိုင်တိုင် မိုင်းဆွဲပစ်ခတ်တိုက်ခိုက်ခဲ့ရာ စုစုပေါင်း ၁၆ ဦးသေဆုံးခဲ့တယ်လို့ သရက်ခရိုင် အမှတ် ၄ တပ်ရင်းရဲ့ တာ၀န်ခံက ကိုမြတ်က BBM ကိုပြောပါတယ်။

ဒီဇင်ဘာလ ၁၂ ရက်နေ့မှာ ရွေးကောက်ပွဲအတွက်နယ်မြေချဲ့လာတဲ့ သရက်မြို့မှ အင်အား (၃၀)ပါ စစ်ကောင်စီစစ်ကြောင်းနဲ့ ရေနံ့သာရဲကင်းစခန်းမှ ထွက်လာတဲ့ အင်အား (၄၀)ပါ ပူးပေါင်းစစ်ကြောင်းဟာ သရက်-ကံမ လမ်းပိုင်းအတိုင်း နှစ်ဘက်ညှပ် စစ်ကြောင်းထိုးလာခဲ့တယ်လို့ ဆိုပါတယ်။

မနက် ၉ နာရီ၀န်းကျင်မှာ ကံမရေနံသာစခန်းမှ ထွက်လာတဲ့ အင်အား ၄၀ ခန့်ပါ စစ်ကြောင်းကို ကံမမြို့နယ် နတ်မီးတောက်ကျေးရွာအနီးမှာ စောင့်ကြိုပစ်ခတ်တိုက်ခိုက်ခဲ့ရာ ၅ မိနစ်ခန့်တိုက်ပွဲဖြစ်ပွားပြီး စစ်ကောင်စီဘက်မှ မိုင်းကွင်းထဲဝင်လာတဲ့ ၆ ဦးခန့် သေဆုံးခဲ့တယ်လို့ ဆိုပါတယ်။

“ရေနံ့သာဘက်ကလာတဲ့ အင်အား ၄၀ ပါစစ်ကြောင်းပေါ့၊ အဲ့ကနေ ရှေ့ပွိုင့်ထွက်လာတဲ့ စခတွေဒီမိုင်းကွင်းထဲကို ၀င်လာတဲ့အချိန်မှာ မိုင်းဆွဲတိုက်ခိုက်ခဲ့တာပါ၊ ထွက်လာတဲ့ ၆ ကောင်လုံး အတုံးအရုံးပဲဗျ၊ နောက်ကကျန်တဲ့စခတွေကိုတော့ လက်နက်ငယ်‌တွေနဲ့ ပစ်ခတ်ခဲ့ပါတယ်”လို့ တာ၀န်ခံ ကိုမြတ်က ဆက်ပြောပါတယ်။

အထိနာသွားတဲ့ စစ်ကောင်စီစစ်ကြောင်းဟာ လက်ကျန် အင်အား ၃၀ ခန့်နဲ့ သရက်-ကံမ လမ်းပိုင်းအတိုင်း ဆက်လက်စစ်ကြောင်းထိုးလာပြီး ထန်းဖြူကျေရွာနဲ့ ရေတွင်းကြီးကျေးရွာမှ ဒေသခံပြည်သူ နေအိမ်တွေကို ဖောက်ထွင်းမွှေနှောက်ခိုးယူပြီး ထွက်ခွာလာခဲ့တယ်လို့ ဆိုပါတယ်။

“ဒီကောင်တွေထုံးစံအတိုင်းပေါ့၊ စစ်ကြောင်းထိုးလာရင် အနည်းဆုံးတော့ ခိုးတာပဲ၊ အခုလည်း မွှေသွားတယ်ကြားတယ်ဗျ”လို့ ဆိုပါတယ်။

အဆိုပါစစ်ကြောင်းဟာ သရက်မြို့နယ် စက်တောင်ကျေးရွာအနီးအရောက် နေ့လယ် ၁၂ နာရီမှာ ထပ်မံပြီး အနီးကပ် စောင့်ကြိုပစ်ခတ်တိုက်ခိုက်ရာ စစ်ကောင်စီဘက်မှ ၁၀ ဦး ထပ်မံသေဆုံးခဲ့တယ်လို့ဆိုပါတယ်။

“အဲ့ဘက်ကျတော့ မိုင်းကွင်းမရှိဘူး၊ ဒီကောင်တွေ ထိုးလာတာကို ကြိုရထားတော့ အသင့်ကြိုစောင့်ပြီးတိုက်ခိုက်တာပေါ့၊ နာရီ၀က်လောက်ကြာတယ်ဗျ၊ အဲ့ဒီချိန်မှာ အနီးကပ်ဆိုတော့ ဒီကောင်တွေဘက်က အထိအခိုက်များသွားတယ်”လို့ ဆိုပါတယ်။

တိုက်ခိုက်ခံလိုက်ရတဲ့ သရက်မြို့မှ ထွက်လာတဲ့ စစ်ကြောင်းနဲ့ ပူပေါင်းမိပြီး သရက်မြို့နယ်၊ စက်တောင်ကျေးရွာ ဘုန်းကြီးကျောင်းအနီးမှာ လက်နက်ကြီးတပ်ဆင်ကာ တိုက်ပွဲဖြစ်ပွားရာ အနီးတဝိုက်ကို ရမ်းသမ်းပစ်ခတ်မှုတွေ ရှိတယ်လို့ ဆိုပါတယ်။

ဒါ့ကြောင့် တိုက်ပွဲထပ်မံဖြစ်ပွားနိုင်တာ ကြောင့် သရက်-ကံမလမ်းပိုင်းကို အသုံးပြုသွားလာကြမဲ့ ပြည်သူတွေအနေနဲ့ သတိပြုသွားလာကြပါဖို့ သရက်ခရိုင် တပ်ရင်း ၄ က အသိပေးထားပါတယ်။

ရှမ်းပြည်နယ်မြောက်ပိုင်း မိုးကုတ်ခရိုင်၊ မိုးမိတ်မြို့နယ်၊ မြစ်ဆုံကျေးရွာကို စစ်ကောင်စီတပ်က လေကြောင်းကနေ ဗုံးကြဲချတိုက်ခိုက်မှုကြောင့် ကလေးငယ်တွေအပါအဝင် အပြစ်မဲ့အရပ်သားပြည်သူ ၁၁ ဦး သေဆုံးသွားတယ်လို့ TNLA က ဒီကနေ့ ဒီဇင်ဘာလ ၈ ရက်နေ့မှာ ထုတ်ပြန်ထားပါတယ်။

ပြီးခဲ့တဲ့ ဒီဇင်ဘာလ ၆ ရက်နေ့၊ နံနက် ၉ နာရီအချိန်မှာ စစ်ကောင်စီတပ်က ဂျက်ဖိုက်တာ ၂ စီးနဲ့ မိုးမိတ်မြို့နယ်၊ မြစ်ဆုံကျေးရွာကို လာရောက်ဗုံးကြဲချတိုက်ခိုက်မှုကြောင့် ကလေးငယ် ၂ ဦး၊ အမျိုးသား ၇ ဦးနဲ့ အမျိုးသမီး ၂ ဦး စုစုပေါင်း ၁၁ ဦး တို့မှာထိခိုက်ဒဏ်ရာ ရရှိခဲ့တာလည်း ဖြစ်ပါတယ်။

အဆိုပါ စစ်ကောင်စီတပ်က ဗုံးကြဲချတိုက်ခိုက်မှုကြောင့် နေအိမ် ၁ လုံးမှာလည်း ဗုံးစတွေထိမှန်ကာ ပျက်စီးသွားတယ်လို့လည်း သိရပါတယ်။

ပြီးခဲ့တဲ့ အောက်တိုဘာ ၂၇ ရက်နေ့ကလည်း စစ်ကောင်စီတပ်ဟာ မိုးမိတ်မြို့နယ်၊ မန်ကျည်းပင်ကျေးရွာကို ပေါင် ၅၀၀ ဗုံး ၁ လုံး နဲ့ ပေါင် ၂၅၀ ဗုံး ၁ လုံးတို့ လာရောက်ကြဲချ တိုက်ခိုက်ခဲ့တာကြောင့် အရပ်သားပြည်သူ နေအိမ်တစ်လုံးမှာလည်း ဗုံးစတွေထိမှန်ကာ ပျက်စီးသွားခဲ့ရတာလည်း ဖြစ်ပါတယ်။

ဒါကြောင့် အရပ်သားပြည်သူတွေအနေနဲ့ စစ်ကောင်စီတပ်ရဲ့ ဗုံးကြဲချတိုက်ခိုက်မှုတွေကို ရှောင်ရှားနိုင်ဖို့အတွက် စစ်ရေးသတိအမြဲရှိကြဖို့ လိုအပ်ပြီး လေကြောင်းရန်ကနေ ကာကွယ်နိုင်ဖို့အတွက်လည်း ကာကွယ်ရေးဆိုင်ရာနည်းလမ်းတွေကို လိုက်နာဆောင်ရွက်ဖို့ လိုအပ်တယ်လို့ တအာင်းတပ် TNLA က သတိပေး ပြောဆိုထားပါတယ်။

ပြီးခဲ့တဲ့ အောက်တိုဘာလ ၂၉ ရက်နေ့က စစ်ကောင်စီတပ်နဲ့ တအာင်းတပ် TNLA တို့ဟာ တရုတ်ရဲ့ကြားဝင်ညှိနှိုင်းမှုနဲ့ အပစ်အခတ်ရပ်စဲရေးအတွက် သဘောတူလက်မှတ်ရေးထိုးခဲ့ကြပြီး၊ မိုးမိတ်နဲ့ မိုးကုတ်မြို့နယ်တွေက TNLA ဆုတ်ခွာပေးဖို့နဲ့ နှစ်ဖက်တပ်တွေ ထိုးစစ်ရောက်တဲ့နေရာမှာ ရပ်ဆိုင်းထားကြဖို့ စတဲ့အချက်အလက်တွေလည်း ပါဝင်ခဲ့တာဖြစ်ပါတယ်။

လက်ရှိမှာတော့ မိုးကုတ်နဲ့ မိုးမိတ်မြို့နယ်တွေအနီးမှာ စစ်ကောင်စီတပ်နဲ့ NUG လက်အောက်ခံ တော်လှန်ရေးတပ်တွေ တိုက်ပွဲတွေဖြစ်ပွားနေကြပြီး စစ်ကောင်စီတပ်ကလည်း မိုးကုတ်၊ မိုးမိတ်မြို့နယ်တွေကို လေကြောင်းကနေ ဗုံးကြဲချတိုက်ခိုက်နေတာလည်း ဖြစ်ပါတယ်။

ဖားကန့်ဗျူဟာကုန်းမှ လက်နက်ကြီး၊ လက်နက်ငယ်၊ စက်သေနတ်တွေနဲ့ ရမ်းသမ်းပစ်ခတ်နေ

ကချင်ပြည်နယ်၊ ဖားကန့်မြို့ပေါ်ကို စစ်ကောင်စီလက်‌အောက်ခံ ရဲတပ်ရင်း(၃၀)မှ အင်အား ၁၀၀ ကျော် ရောက်ရှိလာပြီး နှစ်ဘက်ပစ်ခတ်မှုတွေဖြစ်ပွားခဲ့တဲ့အပြင် ဖားကန့်ဗျူဟာကုန်းမှလည်း လက်နက်ကြီး၊ လက်နက်ငယ်နဲ့ စက်သေနတ်တွေ ဆက်တိုက်ပစ်ခတ်နေတယ်လို့ သိရပါတယ်။

အခုရက်ပိုင်းအတွင်း ဖားကန့်မြို့ကို မိုးကောင်းအခြေစိုက် ရဲတပ်ရင်း(၃၀)မှ အင်အား ၂၅၀ ခန့်ဟာ ယာဥ်တန်းတွေနဲ့ အင်အားဖြည့်ဖို့ တက်လာခဲ့တယ်လို့ သိရပါတယ်။

အဆိုပါ အင်အား ၂၅၀ ထဲမှ ပထမအသုတ်အဖြစ် အင်အား ၁၀၀ ကျော်ပါတဲ့ ရဲတပ်ရင်း(၃၀)မှ ရှေ့ပြေးအဖွဲ့ဟာ နိုဝင်ဘာလ ၈ ရက်၊ မနေ့က ဖားကန့်အဝင် လယ်ပြင်၊ လုံးခင်းအနီးသို့ ရောက်ရှိလာတာကြောင့် တော်လှန်ရေးအင်အားစုတွေက ဒရုန်းနဲ့ တိုက်ခိုက်တာအပြင် မိုင်းဆွဲတိုက်ခိုက်မှုတွေ ပြုလုပ်ခဲ့တယ်လို့ သိရပါတယ်။

“ဖားကန့်ကို ဒီရက်ပိုင်းအတွင်း ၁ ရက် ၂ ရက်အတွင်းမှာ ရဲတပ်ရင်း(၃၀)က အင်အား ၂၅၀၊ ၃၀၀ လောက် တက်လာတယ်လို့ ကျွန်တော်တို့သိရတယ်၊ စုံစမ်းလို့ရတယ်၊ အဲ့ရဲတပ်ရင်းက တက်လာတော့ မနေ့ကမနက်ပိုင်းလောက်မှာပဲ အင်အား ၁၀၀ လောက်က ဒီဖားကန့်အဝင် လယ်ပြင်ဆိုတာရှိတယ်၊ အဲ့ကိုရောက်လာတယ်လို့ သိရတယ်၊ အဲ့ကိုရောက်လာတဲ့နောက်ပိုင်းမှာပဲ ပစ်တဲ့ခတ်တဲ့ဟာတွေ၊ လယ်ပြင်၊ လုံးခင်းကနေ ဖားကန့်ကိုသွားမှာပဲ ပုံမှန်အရဆိုရင် အဲ့လိုရောက်လာပြီဆိုရင် ဒီမှာရှိတဲ့ ဒေသကာကွယ်ရေးအဖွဲ့ KIA နဲ့ KPDF တို့က အဲ့တာကိုလိုက်ပြီးတော့ တားတာ စီးတာ ပစ်တာပေါ့ ” လို့ ဖားကန့်ဒေသခံတစ်ဦးက BBM ကိုပြောပါတယ်။

အဆိုပါရဲတပ်ဖွဲ့တွေကို တော်လှန်ရေးအင်အားစုတွေက လမ်းတစ်လျှောက် တိုက်ခိုက်မှုတွေပြုလုပ်ခဲ့တာကြောင့် စစ်ကောင်စီလက်အောက်ခံ ရဲအချို့ထိခိုက်မှုတွေရှိတယ်လို့လည်း သိရပါတယ်။

ဒီလိုထိခိုက်မှုတွေရှိခဲ့တာကြောင့် ဖားကန့်ဗျူဟာကုန်းပေါ်မှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက တော်လှန်ရေးအင်အားစုတွေရှိမယ်လို့ ယူဆရတဲ့နေရာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်ရှင်းလင်းတာတွေကို အဆက်မပြတ် ပြုလုပ်ခဲ့တယ်လို့ သိရပါတယ်။

ဒီနေ့မနက်ပိုင်းမှာလည်း အဆိုပါဖားကန့်ဗျူဟာကုန်းမှ လက်နက်ကြီးတွေနဲ့သာမက စက်သေနတ်တွေပါသုံးပြီး ရမ်းသမ်းပစ်ခတ်မှုတွေ လုပ်နေတာကြောင့် ပြည်သူတွေအနေနဲ့ အပြင်ထွက်သွားလာရာမှာ သတိထားနေရတယ်လို့လည်း ဆိုပါတယ်။

“အဲ့လိုဖြစ်ပြီးတော့ မနေ့ညကတော့ တစ်လျှောက်လုံး၊ တစ်ညလုံး ဒရုန်းတွေချတယ်၊ အခုနေ့ခင်းပိုင်းလည်း ဒရုန်းတွေချတယ်၊ အဲ့လိုတွေဖြစ်တာ၊ မနေ့ညကဆိုရင်လည်း ဖားကန့်ဗျူဟာကုန်းကနေ လက်နက်ကြီးတွေပစ်တယ်၊ ခါတိုင်းထက်ထူးခြားတာက လက်နက်ငယ်တွေပါ ပစ်တာ၊ စက်သေနတ်တွေပစ်ဆွဲပစ်တယ်၊ အဲ့အခြေအနေပါဗျ၊ ပုံမှန်ဆို နည်းနည်းငြိမ်နေတာကနေ ရဲတပ်ရင်း(၃၀)ရောက်လာပြီးနောက်ပိုင်းမှာ လက်နက်ကြီးပစ်တယ်၊ လက်နက်ငယ်ပစ်တယ်၊ ဒရုန်းတွေချတယ် အဲ့လိုကြုံနေရပါတယ်ဗျ” လို့ အဆိုပါဒေသခံက ဆက်ပြောပါတယ်။

အဲဒီလို နှစ်ဘက်တပ်တွေရဲ့ ဒရုန်း၊ လက်နက်ကြီး၊ မိုင်းတွေနဲ့ တိုက်ခိုက်မှုတွေကြောင့် နေအိမ်အချို့ ထိခိုက်မှုတွေရှိခဲ့သလို ဒီနေ့မနက်ပိုင်းမှာလည်း ဖားကန့်နေပြည်သူတစ်ဦး ထိခိုက်သေဆုံးခဲ့ရတယ်လို့လည်း သိရပါတယ်။

“ဒီမနက် အဲ့ရဲကားတွေရဲ့နောက်ကနေ ဆိုင်ကယ်နဲ့ပါလာတဲ့ မိန်းကလေးတစ်ယောက် ဒရုန်းမှန်ပြီးသေတာအတည်ပြုလို့ရပါတယ်၊ နောက်ထပ် လူသေတာမျိုးတော့ မကြားပေမဲ့ လူနေအိမ်တွေ၊ ဘုန်းကြီးကျောင်းတွေ ထိခိုက်ပျက်ဆီးတာမျိုးတွေရှိပါတယ်ဗျ” လို့ ဒေသခံက ဆက်လက်ပြောပါတယ်။

စစ်ကောင်စီဟာ ပြီးခဲ့တဲ့လပိုင်းမှာ ဖားကန့်မြို့ရှိ မိုးကောင်းအခြေစိုက် စကခ(၃) အင်အားတွေကို ထုတ်နှုတ်သွားခဲ့သော်လည်း လက်ရှိမှာ မိုးကောင်းမြို့မှ ရဲတပ်ရင်း(၃၀)မှ အင်အားတွေနဲ့ ဖားကန့်ကို ပြန်လည်ဖြည့်တင်းတာတွေ ပြုလုပ်လာတာ ဖြစ်ပါတယ်။

Photo-ပုံဟောင်း