သတင်း

မကွေးတိုင်း၊ နတ်မောက်မြို့နယ်၊ တက်ဝန်ကျေးရွာမှာ အခြေစိုက်ထားတဲ့ ပျူစောထီးအဖွဲ့ရဲ့ စခန်းကို တော်လှန်ရေးတပ်ဖွဲ့ဝင်တွေက ဝင်ရောက်တိုက်ခိုက်ခဲ့ရာ ပျူစောထီး ၅ ဦးသေဆုံးပြီး လက်နက်ခဲယမ်းအချို့ကိုလည်း သိမ်းဆည်းရမိထားတယ်လို့ သရက်ခရိုင် အမှတ် (၃) တပ်ရင်း ငါးပြေမပြောက်ကျားတပ်ဖွဲ့က ဒီကနေ့မှာ ထုတ်ပြန်ထားပါတယ်။

သရက်ခရိုင် အမှတ် (၃) ငါးပြေမတပ်ရင်းရဲ့ မြေပြန့်ကျားတပ်ခွဲက ဦးဆောင်ကာ မဟာမိတ်တပ်ဖွဲ့တွေနဲ့အတူ ပျုစောထီးခေါင်ဆောင် ဘိုထွန်းနဲ့ ပျူစောထီးတွေကို ဒီကနေ့ နံနက် ၅ နာရီ ၁၀ မိနစ်အချိန်မှာ ဝင်ရောက်တိုက်ခိုက်ခဲ့တာဖြစ်ပြီး တိုက်ပွဲအချိန်မှာလည်း ၄၀ မိနစ်ခန့်ကြာမြင့်ခဲ့တယ်လို့ သရက်ခရိုင် အမှတ် (၃) တပ်ရင်း ငါးပြေမပြောက်ကျားတပ်ဖွဲ့ရဲ့ တာဝန်ရှိသူက BBM ကို ပြောပါတယ်။

အဲဒီတိုက်ပွဲအတွင်းမှာ ပျူစောထီးခေါင်းဆောင် ဘိုထွန်းအပါအဝင် ပျူစောထီး ၅ ဦး သေဆုံးသွားတယ်လို့ သိရပါတယ်။

“သေဆုံးသွာတာက ၅ ယောက်ပါ။ ဒဏ်ရာရရှိသူတွေလည်း မရှိပါဘူး။ အကုန်လုံးသေဆုံးသွားတာပါ။ သူတို့ကတော့ ဒေသခံပြည်သူတွေကို ဒုက္ခပေးနေတဲ့ သူတွေပါဗျ ”

လို့ သရက်ခရိုင် အမှတ် (၃) တပ်ရင်းငါးပြေမပြောက်ကျားတပ်ဖွဲ့ရဲ့ တာဝန်ရှိသူတစ်ဦးက BBM ကို ပြောပါတယ်။ အဲဒီတိုက်ပွဲအတွင်းမှာ ပျူစောထီးအဖွဲ့ဝင်တွေရဲ့ ကားတစ်စီးပျက်စီးနိုင်ခဲ့ကာ ပွိုင့် ၂၂ လက်လုပ် ပစ္စတို ၁ လတ်၊ M1 ကာဘိုင် ၅ လတ်၊ ကာဘိုင်ကျည် ၉၅ တောင့် ၊ပြောင်းချောသေနတ် ၂ လတ် ၊ ပြောင်းချောကျည် ၃၀ တောင့် ၊ လက်ပစ်ဗုံး ၂ လုံး၊ ငွေသား ၁ သိန်းကျပ်၊ စစ်ဝတ်တန်ဆာတွေ၊ ဖုန်း ၄ လုံးနဲ့ နဲ့ စစ်မှုထမ်းစာအုပ်တစ်အုပ် တို့ကို သိမ်းဆည်းရမိခဲ့တယ်လို့ သိရပါတယ်။

အဆိုပါတိုက်ပွဲကို သရက်ခရိုင် အမှတ် ၃ ငါးပြေမတပ်ရင်းရဲ့ မြေပြန်ကျားတပ်ခွဲက ဦးဆောင်ပြီး ရေနံချောင်း ပ၊ က၊ ဖ၊ မင်းဘူးခရိုင်စစ်ဌာန ပြည်သူလုံခြုံရေးတပ်ဖွဲ့၊ Chauk Revolutionary Army(CRA)နဲ့ ဒေါင်းစစ်သည်ပြောက်ကျားတပ်ဖွဲ့တို့က ပူးပေါင်းပါဝင်တိုက်ခိုက်ခဲ့တာလည်း ဖြစ်ပါတယ်။

လက်ရှိ တိုက်ပွဲပြင်းထန်နေတဲ့ ရခိုင်ပြည် ကျောက်ဖြူမြို့နယ်မှာ စစ်ဘေးတိမ်းရှောင်သူဦးရေ ၅ သောင်းကျော်အထိ တိုးလာနေတယ်လို့ စစ်ဘေးရှောင်အရေး ကူညီဆောင်ရွက်နေသူတွေက BBM ကို ပြောပါတယ်။

ကျောက်ဖြူမြို့မှာ စစ်ကောင်စီတပ်က အရပ်တွေနေထိုင်တဲ့ ကျေးရွာတွေကို တိုက်ပွဲဖြစ်ပွားတာမရှိဘဲ ရေကြောင်း၊ လေကြောင်းကနေ ဗုံးကြဲတိုက်ခိုက်မှုတွေ ရှိလာနေတာကြောင့် ဒေသခံတွေမှာ ဘေးလွတ်ရာကို ထွက်ပြေးတိမ်းရှောင်နေရတာလည်း ဖြစ်ပါတယ်။

ကျောက်ဖြူမြိုနယ်က မင်းပြင်၊ ရေနံတောင်၊ ကျောက်ကလေး၊ သစ်ပုတ်တောင်၊ စိုင်းခြုံ၊ ကညင်တော၊ ကုလားဘာတောင်၊ ငလပွေ့၊ နှမ်းဖဲတောင်၊ ရှောက်ချောင်းစတဲ့ ကျေးရွာတွေက စစ်ဘေးရှောင် ၅ သောင်းကျော်မှာ AA ထိန်းထားတဲ့နေရာတွေကို စစ်ဘေးတိမ်းရှောင်နေကြရတာလည်း ဖြစ်ပါတယ်။

အဆိုပါ စစ်ဘေးရှောင်တွေဟာ လက်ရှိမှာ နေရာထိုင်ခင်း၊ စားဝတ်နေရေး၊ ကျန်းမာရေးစတဲ့အခက်အခဲတွေကို ရင်ဆိုင်နေရတယ်လို့လည်း ကျောက်ဖြူမြို့နယ်က စစ်ဘေးရှောင်အရေးဆောင်ရွက်နေသူတွေက BBM ကို ပြောပါတယ်။

“အခု စစ်ဘေးရှောင်နေကြတဲ့သူတွေမှာ စားဝတ်နေရေးက အရမ်းကို ခက်ခဲနေကြပါတယ်။ စုစုပေါင်း စစ်ဘေးရှောင်ဦးရေဆိုရင် ၅ သောင်းကျော်ရှိလာပါပြီး။ ကျောက်ဖြူက စစ်ဘေးရှောင်တွေဟာ နေရာတစ်ခုတည်းမှာ တိမ်းရှောင်နေတာမဟုတ်ဘဲ နေရာအသီးသီးကို ရောက်သွားကြပါတယ်။ ပိုဆိုးတာက ကျန်းမာရေးအခက်တွေလည်း ရှိကြပါတယ်။ အကူအညီကလည်း သိပ်ရရှိတာမရှိသေးပါဘူး”

လို့ ကျောက်ဖြူမြို့နယ်က စစ်ဘေးရှောင်အရေး ဆောင်ရွာက်နေသူ တစ်ဦးက ပြောပါတယ်။ လက်ရှိ ကျောက်ဖြူမြို့နယ်က စစ်ဘေးရှောင်တွေမှာ အလုပ်အကိုင်ရှားပါတာ၊ တစ်နေ့လုပ်မှတစ်နေ့စားသောက်ရတာကြောင့် အခက်အခဲတွေရှိနေကြတယ်လို့လည်း သိရပါတယ်။

ငွေကြေးတတ်နိုင်တဲ့ စစ်ဘေးရှောင်တွေဟာ အိမ်ငှားပြီးနေထိုင်နိုင်မဲ့ ငွေကြေးမတတ်နိုင်တဲ့သူတွေမှာ အဝေးကားလမ်းမတွေနဲ့ တောင်ကုန်းတောင်တန်းတွေမှာ တဲထိုးကာနေထိုင်နေကြရတယ်လို့လည်း ကျောက်ဖြူမြို့နယ်က စစ်ဘေးရှောင်တစ်ဦးက BBM ကို ပြောပါတယ်။

“ကျောက်ဖြူက စစ်ဘေးရှောင်တွေဟာ နေရာအသီးသီးကို တိမ်းရှောင်နေရပါတယ်။ အလုပ်အကိုင်ကလည်း မရှိတော့ စားဝတ်နေရေးက ကျပ်တည်းနေပါတယ်။ လူတွေပေးမှ ထမင်းစားသောက်နေကြရတဲ့သူတွေလည်း ရှိပါတယ်။ အကုန်လုံးက ခက်ခဲ့နေကြတာပါ။ ဇင်ချောင်းဖက် အခြမ်းက စစ်ဘေးရှောင်တွေ အကုန်လုံးက စစ်ဘေးရှောင်နေကြရတာဖြစ်ပါတယ်”

လို့ ကျောက်ဖြူမြို့နယ်က စစ်ဘေးရှောင် အမျိုးသမီးတစ်ဦးက ပြောပါတယ်။ ကျောက်ဖြူမြို့မှာ စစ်ကောင်စီတပ်နဲ့ အာရက္ခတပ်တော် AA တို့ ပြီးခဲ့တဲ့ ဖေဖော်ဝါရီလအတွင်းမှာ တိုက်ပွဲစတင်ဖြစ်ပွားခဲ့တာဖြစ်ပြီး လက်ရှိမှာ ၆ လကျော်အထိ ကြာမြင့်နေပြီးလည်း ဖြစ်ပါတယ်။

ကျောက်ဖြူမြို့နယ်မှာ အာရက္ခတပ်တော် AA က ကျေးရွာတွေကို အကုန်လုံးကို ထိန်းချုပ်ထားနိုင်တာဖြစ်ပြီး စစ်ကောင်စီတပ်က အဆိုပါကျေးရွာတွေကို ရေကြောင်းကနေ လက်နက်ကြီးတွေနဲ့ နေ့စဥ်နဲ့အမျှပစ်ခတ်တိုက်ခိုက်နေတာ လည်း ဖြစ်ပါတယ်။

ကျောက်ဖြူမြို့နယ်အတွင်းက အာရက္ခတပ်တော် AA ထိန်းချုပ်ထားတဲ့ နေရာတွေကို စစ်ဘေးတိမ်းရှောင်လျှင်လည်း လူတစ်ဦးကို ကားစရိတ်၊ စက်လှေစရိတ်အနေနဲ့ အနည်းဆုံး ငွေကျပ်တစ်သိန်းခွဲကျော် ကုန်ကျမှုတွေရှိတယ်လို့လည်း စစ်ဘေးရှောင်တွေက ဆိုပါတယ်။

တစ်ချို့ကျောက်ဖြူဒေသခံတွေမှာ စစ်ဘေးတိမ်းရှောင်ဖို့အတွက် လမ်းစရိတ်တွေကြီးမားတာကြောင့် မိမိကျေးရွာမှာ စစ်ဘေးမရှောင်ပဲ နေထိုင်နေကြတဲ့သူတွေလည်း များစွာရှိနေတယ်လို့လည်း သိရပါတယ်။

လက်ရှိကျောက်ဖြူမြို့နယ်မှာ အမှတ် ၃၂ ရဲတပ်ရင်းအနီးက နှမ်းဖဲတောင်၊ မင်းတပ်တောင်စတဲ့နေရာအနီးတဝိုက်မှာ စစ်ကောင်စီတပ်နဲ့ အာရက္ခတပ်တော် AA တို့ တိုက်ပွဲ ပြင်းထန်စွာ ဖြစ်ပွားနေတာလည်း ဖြစ်ပါတယ်။

ပဲခူးတိုင်းဒေသကြီး၊ ပြည်ခရိုင်၊ ဥသျှစ်ပင်မြို့နယ်ရှိ အမှတ်(၆) ကာကွယ်ရေးပစ္စည်းစက်ရုံ(ကပစ -၆ )အနီးရှိ ကာကင်းစခန်းတွေမှာ အာရက္ခတပ်တော် AA၊ ပူးပေါင်းမဟာမိတ်တပ် PDF တို့နဲ့ စစ်ကောင်စီတပ်တို့ တိုက်ပွဲပြင်းထန်စွာ ဖြစ်ပွားနေတယ်လို့ AA နဲ့ နီးစပ်တဲ့ စစ်ရေးသတင်းရင်းမြစ်တွေဆီက သိရပါတယ်။

အာရက္ခတပ်တော် AA၊ ပူးပေါင်းမဟာမိတ်တပ် PDF တို့ဟာ ကပစ – ၆ စက်ရုံအနီးရှိ ရှေ့ကာကင်းစခန်းတွေ ဖြစ်တဲ့ ဆင်လန်းကာကင်းစခန်းနဲ့ လေသာတောင် ကာကင်းစခန်းတွေကို ပြီးခဲ့တဲ့ သြဂုတ်လ လကုန်ပိုင်းလောက်က စတင်ထိုးစစ်ဆင်တိုက်ခိုက်ခဲ့တာဖြစ်ပြီး ဒီနေ့အချိန်ထိလည်း တိုက်ပွဲတွေ ပြင်းထန်နေတာ ဖြစ်ပါတယ်။

အဆိုပါကာကင်းစခန်းတွေကို စစ်ကောင်စီတပ်တွေကလည်း စစ်ကားတွေနဲ့ အင်အားဖြည့်တင်းနေပြီး AAနဲ့ PDF အဖွဲ့တွေရဲ့ လက်နက်ကြီးပစ်ခတ်မှုကြောင့် ဒဏ်ရာရရှိတဲ့ စစ်ကောင်စီတပ်သားတွေကိုလည်း ဥသျှစ်ပင်မြို့ကနေပြီးတော့ ရွှေတောင်ရှိ ကုတင် ၁၀၀ ဆံတဲ့ ဆေးရုံကြီးကို ပို့ဆောင်နေရတယ်လို့လည်း သိရပါတယ်။

“တိုက်ပွဲကတော့ ဒီနေ့အထိလည်း လက်နက်ကြီးပစ်ခတ်မှုတွေရှိနေပါတယ်။ အပြန်အလှန်ပစ်ခတ်မှုတွေရှိပါတယ်။ ကပစ ၆ စက်ရုံကိုထိုးဖောက်ဝင်ရောက်ဖို့အတွက် AA နဲ့ PDF အဖွဲ့တွေကလည်း ထိုးစစ်ဆင်လာနေတာပါ။ စစ်ကောင်စီကတော့ ထုံးစံအတိုင်းပဲ စစ်အင်အားတွေ ဖြည့်တင်းနေပါတယ် ”

လို့ AA နဲ့ နီးစပ်တဲ့ စစ်ရေးသတင်းရင်းမြစ်တစ်ဦးက BBM ကို ပြောပါတယ်။ AAနဲ့ ပူးပေါင်းမဟာမိတ်တပ် PDF တို့ဟာ တောင်ကုတ် – ပန်းတောင်းလမ်းပိုင်းရှိ ရခိုင်ရိုးမပေါ်က ကာကင်းစခန်းတွေနဲ့ ညောင်ကျိုးကျေးရွာအနီးက ကာကင်းစခန်းတွေကို ပြီးခဲ့တဲ့ ဧပြီလအတွင်းက သိမ်းပိုက်ထိန်းချုပ်ထားတာလည်းဖြစ်ပါတယ်။

လက်ရှိမှာ ညောင်ကျိုးကျေးရွာကနေ ၄ မိုင်ခန့်ကွာဝေးပြီး စစ်ကောင်စီတပ်တို့ အခိုင်အမာခံစစ်ပြင်ဆင်ထားတဲ့ ဆင်လန်ကျေးရွာက ကာကင်းစခန်းတွေကို AA နဲ့ PDF တပ်ဖွဲ့တွေက ထိုးစစ်ဆင်တိုက်ခိုက်လာနေတာလည်း ဖြစ်ပါတယ်။

ကပစ ၆ စက်ရုံ တည်ရှိတဲ့ညောင်ခြေထောက် ကျေးရွာနဲ့လက်ရှိတိုက်ပွဲ ဖြစ်ပွားနေတဲ့ ဆင်လန်းကျေးရွာဟာလည်း ၇ မိုင်ခန့်သာ ကွာဝေးတော့တာလည်း ဖြစ်ပါတယ်။

ရခိုင်ပြည်၊ ကျောက်ဖြူမြို့နယ်မှာ စစ်ကောင်စီတပ်က အမှတ် ၃၂ ရဲတပ်ရင်းကနေပြီး အာရက္ခတပ်တော် AA သိမ်းထားတဲ့ နှမ်းဖဲတောင်၊ မင်းတက်တောင်ကျေးရွာတွေကို ထိုးစစ်ဆင်စစ်ကြောင်းထိုးလာစဥ် AA ကလည်း အမှတ် ၃၂ ရဲတပ်ရင်းကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

မနေ့က စက်တင်ဘာလ၂ ရက်နေ့မှာ စစ်ကောင်စီဟာ အင်အားအများအပြား စစ်ကြောင်းနဲ့အတူ နှမ်းဖဲတောင်၊ မင်းတက်တောင်အနီးရှိ စခန်းတွေကိုထိုးစစ်ဆင်လာကာ AA နဲ့ထိတွေ့ တိုက်ပွဲဖြစ်ပွားခဲ့တယ်လို့ သိရပါတယ်။

အဲဒီလို တိုက်ပွဲဖြစ်နေစဥ်အတွင်းမှာ အာရက္ခတပ်တော် AA ကလည်း စစ်ကာင်စီရဲ့ စစ်အင်အားတွေဖြည့်တင်းထားတဲ့ အမှတ် ၃၂ ရဲတပ်ရင်းကို လက်နက်ကြီးတွေနဲ့ လှမ်းပစ်ခတ်တိုက်ခိုက်ခဲ့တယ်လို့ သိရပါတယ်။

“စစ်ကောင်စီက နှမ်းဖဲတောင်နဲ့ မင်းတပ်တောင်တို့ကို စစ်ကြောင်းထိုးလာတဲ့အချိန်မှာ AA က ၃၂ ရဲတပ်ရင်းကို လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ ကြားရပါတယ်။ နောက်ပြီး AA က စနိုက်ဘာတွေနဲ့ တောက်လျှောက်ပစ်နေပါတယ် ”

လို့ AA နဲ့ နီးစပ်တဲ့ စစ်ရေးသတင်းရင်း မြစ်တစ်ဦးက ပြောပါတယ်။ အလားတူ အာရက္ခတပ်တော် AA ဟာ ကျောက်ဖြူမြို့နယ်က ဂုံးချွိန်တိုက်နယ်ရှိ ခမရ ၅၄၂၊ ခမရ ၅၄၃ တပ်ရင်းတို့ကိုလည်း လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

အာရက္ခတပ်တော် AA သိမ်းထားတဲ့ နှမ်းဖဲတောင်နဲ့ မင်းတက်တောင် ကျေးရွာအနီးရှိစခန်းတွေကို အမှတ် ၃၂ ရဲတပ်ရင်းနဲ့ မလကျွန်းကျေးရွာရှိသဘာဝဓာတ်ငွေ့လက်ခံ သိုလှောင်ပို့ဆောင်ရုံ (OGT) စက်ရုံအနီးက စစ်ကောင်စီတပ်တွေက ထိုးစစ်ဆင်လာနေတာလည်း ဖြစ်ပါတယ်။

စစ်ကောင်စီ စစ်ကြောင်းထိုးနေတဲ့နေရာတွေကို လေကြောင်းက ဗုံးကြဲချမှုအပါအဝင် သံဇစ်မြစ်အတွင်းက စစ်ရေးလှုပ်ရှားနေတဲ့ နေဗီတွေကလည်း လက်နက်ကြီးတွေ အဆက်မပြတ် ပစ်ခတ်နေတယ်လို့လည်း သိရပါတယ်။

စစ်ကောင်စီနဲ့ အာရက္ခတပ်တော် AA ဟာ ပျားတဲ၊ ကြတ္တိန်၊ သပြုတောင်၊ ကပ်သပြေ၊ ကုလာဘာကျေးရွာအနီးမှာလည်း တိုက်ပွဲတွေပြင်းထန်နေပြီး ဓညဝတီရေတပ်ဌာနချုပ်ကနေ လက်နက်ကြီးတွေ အဆက်မပြတ် ပစ်ခတ်တိုက်ခိုက်နေတယ်လို့လည်း သိရပါတယ်။

ကျောက်ဖြူမြို့တိုက်ပွဲအတွင်းမှာ မြို့ပေါ်နဲ့ ကျေးရွာတွေက စစ်ဘေးတိမ်းရှောင်သူဦးရေ ငါးသောင်း(၅၀,၀၀၀) ကျော်အထိ ရှိလာနေပြီးလည်း ဖြစ်ပါတယ်။

ပုံ-AA Info Desk

#BBM#News#UpdateNews#AA#ArakanArmy#Junta

စကစ တပ်ဖွဲ့၀င် ဗိုလ်ကြီး ၁ဦးအပါအ၀င် ၈ဦးသေဆုံးပြီး ထိခိုက်ဒဏ်ရာရရှိသူများပြား လက်နက်ငယ် (၇)လက်၊ RPG (၁)လက် ၊ခဲယမ်းတွေနဲ့ စစ်သုံးပစ္စည်းအချို့ကို သိမ်းဆည်းရရှိ

ပဲခူးတိုင်း၊ ကျောက်ကြီးမြို့နယ်ထဲကို စစ်ကောင်စီတပ်ဖွဲ့၀င်တွေနဲ့ ပျူစောထီးတွေအပါအ၀င် အင်အား ၁၀၀ကျော်ရှိ စစ်ကြောင်းဟာ ၀င်ရောက်လာခဲ့ရာ တော်လှန်ရေးပူးပေါင်းတပ်ဖွဲ့တွေက ပစ်ခတ်တိုက်ခိုက်ခဲ့တာကြောင့် စစ်ကောင်စီ ဗိုလ်ကြီး ၁ဦးအပါအ၀င် ၈ဦးသေဆုံးပြီး အများအပြားထိခိုက် ဒဏ်ရာရရှိကာ လက်နက်ခဲယမ်းတွေလည်း သိမ်းဆည်းရမိတယ်လို့ပြည်သူ့ကာကွယ်ရေးတပ်မတော်၊အမှတ်(၂)စစ်ဆင်ရေးနယ်မြေ၊ သတင်းနှင့်ပြန်ကြားရေးတာဝန်ခံ

စောဒိုရှင်း က BBMကိုပြောပါတယ်။

စက်တင်ဘာလ၂ရက်နေ့က ကျောက်ကြီးမြို့နယ်အတွင်းက ရွာတွေကို စစ်ကြောင်းထိုးလာတဲ့ အင်အား၁၀၀ပါ စစ်ကောင်စီစစ်ကြောင်းနဲ့ တော်လှန်ရေးပူးပေါင်းတပ်ဖွဲ့တွေ ၄နာရီကြာ တိုက်ပွဲဖြစ်ပွားခဲ့ပြီး စစ်ကောင်စီ ဗိုလ်ကြီး ၁ဦးအပါအ၀င် ၈ဦးသေဆုံးပြီး အများအပြားသေဆုံးပြီး လက်နက်ငယ် (၇)လက်၊ RPG (၁)လက် နဲ့ ခဲယမ်းတွေနဲ့ စစ်သုံးပစ္စည်းအချို့ကို သိမ်းဆည်းရရှိ သိမ်းဆည်းရမိထားတယ်လို့ ပြည်သူ့ကာကွယ်ရေးတပ်မတော်၊အမှတ်(၂)စစ်ဆင်ရေးနယ်မြေ၊ သတင်းနှင့်ပြန်ကြားရေးတာဝန်ခံ

စောဒိုရှင်းက ဆက်‌လက်ပြောကြားပါတယ်။

“ရန်သူ့ဘက်က ဒီကျွန်တော်တို့စိုးမိုးထားတဲ့ ကျောက်ကြီးမြို့နယ်အတွင်းက ရွာတွေကို စစ်ကြောင်းထိုးလာတာပါ။ စစ်ကောင်စီတပ်ဖွဲ့၀င်နဲ့ ပျူစောထီးတွေအပါအ၀င် အင်အား၁၀၀ကျော်ပါပါတယ်။ ကျွန်တော်တို့ တိုက်ပွဲဖြစ်တဲ့အခါမှာလည်း ဗိုလ်ကြီး အဆင့်အပါအ၀င် အခြားအဆင့် ၈ယောက်ရဲ့ Dead Bodyတွေ ကောက်ယူရရှိခဲ့ပါတယ်”လို့ တာ၀န်ခံ စောဒိုရှင်းက ပြောကြားထားပါတယ်။

တိုက်ပွဲဖြစ်ပွားချိန် ၄နာရီကျော်ကြာခဲ့ပြီး စစ်ကောင်စီဘက်က လေကြောင်းပစ်ကူအပါအ၀င် လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ ဆက်လက်ဖြေကြားပါတယ်။

“တိုက်ပွဲကတော့ လေးနာရီလောက်ကြာပြီးတော့ ဒီ ရန်သူဘက်ကနေပြီးတော့ လေကြောင်းကနေ ပေါင် ၁၀၀ဗုံးကြဲတယ်။လက်နက်ကြီးနဲ့ပစ်တယ်။ ၈၁တို့ ၆၀မမတို့နဲ့ ပစ်တယ်ဗျ”လို့ တာ၀န်ခံ စောဒိုရှင်းက ဆက်လက်ဖြေကြားထားပါတယ်။

တိုက်ပွဲအတွင်း တော်လှန်ရေးပူးပေါင်းတပ်ဖွဲ့တွေက လက်နက်ငယ် (၇)လက်၊ RPG (၁)လက် နဲ့ ခဲယမ်းတွေနဲ့ စစ်သုံးပစ္စည်းအချို့ကို သိမ်းဆည်းရရှိခဲ့တယ်လို့ သိရပါတယ်။

တိုက်ပွဲဖြစ်ပွားပြီးနောက် စစ်ကောင်စီဘက်က အထိနာကာ တပ်ဆုတ်သွားလို့ သိရပါတယ်။

အဲ့ဒီပစ်ခတ်တိုက်ခိုက်မှုကို အမှတ်(၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ(၂၄)၊ နဂါးနီတပ်ရင်း(P-29903)၊ အမှတ်(၃၅၀၂) တပ်ရင်း နှင့် KNLA တပ်ရင်း(၈) ပူးပေါင်းတပ်ဖွဲ့တို့က ပူပေါင်းတိုက်ပွဲဖော်ဆောင်ခဲ့တာပဲဖြစ်ပါတယ်

ပုံ-အမှတ်၂ စစ်ဆင်ရေးနယ်မြေ

#BBM#News#UpdateNews#junta#Battle#Peopledefenseforce#Bago#ပြည်သူ့ကာကွယ်ရေးတပ်မတော်

စက်တင်ဘာလ ၂ရက်၊ မနေ့က မနက်ပိုင်းက စစ်ကောင်စီတပ်သားတွေနဲ့ ပျူစောထီးပူးပေါင်းစစ်ကြောင်းဟာ နွားထိုးကြီးမြို့နယ်၊ သူစိုးရွာအတွင်းမှ ပြည်သူ့နေအိမ်တွေကို ဝင်ရောက်ဖောက်ထွင်းခိုးယူပြီးနောက် သူစိုးရွာကို မီးတင်ရှို့နေတယ်လို့ သိရပါတယ်။

ဩဂုတ်လ ၃၁ရက်နေ့ကစလို့ မလည်ကျေးရွာကို ရောက်ရှိလာတဲ့ စစ်ကြောင်းဟာ မလည်ကျေးရွာကို ရွာလုံးကျွတ်မီးရှို့ဖျက်ဆီးခဲ့ပါတယ်။

အဲ့ဒီနောက် စက်တင်ဘာလ ၂ရက်နေ့မှာ သူစိုးရွာဘက်ကို ရောက်ရှိလာခဲ့ပြီး ပြည်သူ့အိမ်များကို တစ်အိမ်ချင်းဖောက်ထွင်းခိုးယူခဲ့ပြီး မနက် ၁၀နာရီမှာ တစ်ကြိမ်၊ ညနေ ၃နာရီခန့်မှာ တကြိမ် မီးရှို့ဖျက်ဆီးခဲ့တယ်လို့ သိရပါတယ်။

“မြင်းခြံက သီတာယုမွန်ပျူတွေ ကန်ဆင့်ရွာဘက်ကနေ ကားနှစ်စီးနဲ့ ခိုးရာပါပစ္စည်းသယ်ဖို့ ထပ်ရောက်လာတယ်။ သူတို့(စစ်ကောင်စီစစ်ကြောင်း)က တွေ့သမျှလူအကုန် ပစ်သတ်နေတာဆိုတော့ ပြည်သူတွေ ထွက်ပြေးနေကြရတာပေါ့။ ဒီလိုပြေးနေကြရတာကို အခွင့်ကောင်းယူပြီး လူမရှိတဲ့အိမ်တွေကို ဝင်ဖောက်ကြတာ”

ဟု သူစိုးရွာမှ စစ်ဘေးရှောင်အမျိုးသားတစ်ဦးက ပြောပါတယ်။ ဇူလိုင်လ ၃၁ရက်နေ့ကစလို့ မြင်းခြံနယ်နဲ့ နွားထိုးကြီးနယ်ဘက်ကို စစ်ကြောင်းထိုးနေတဲ့ စစ်ကောင်စီနဲ့ ဒေသခံမြင်းခြံပျူစောထီးတွေဟာ သူတို့ရောက်ရှိရာ ကျေးရွာတွေမှာ မဲမဲမြင်ရာပစ်ခတ်သတ်ဖြတ်လေ့ရှိတာကြောင့် ဒေသခံပြည်သူလူထု‌တွေဟာ စစ်ဘေးရှောင်နေရတာဖြစ်ပြီး လက်ရှိအချိန်ထိ ကျေးရွာအချို့မှာ စစ်ဘေးရှောင်နေရဆဲဖြစ်ပါတယ်။

“မီးခိုးတွေတက်လာတာမြင်လို့ ထန်းပင်ပေါ်တက်ကြည့်တော့ ပျူစောထီးတွေက ရွာထဲကအိမ်တွေကို တအိမ်ချင်း မီးလိုက်ရှို့ရင်း‌ ဖောက်ထွင်းခိုးယူနေတာ မြင်ရပါတယ်။ နှစ်ကြိမ်ခွဲပြီး မီးရှို့တာမှာ သူစိုးရွာ တစ်ရွာလုံးနီးပါး မီးလောင်ပျက်စီးခဲ့ပါတယ်။ မီးရှို့တဲ့နေရာမှာ တစ်အိမ်ချင်းကို ပတ်ရှို့နေတာ။ ပျူစောထီးတွေက ကားနှစ်စီးနဲ့ သူတို့ခိုးထားတဲ့ပစ္စည်းတွေ လာသယ်သွားပါတယ်။ အကုန်စစ်ဘေးရှောင်နေကြပါတယ်။ ရွာထဲမှာ လူမကျန်ခဲ့ပါဘူး”

ဟု ဒေသခံအမျိုးသမီးတစ်ဦး BBMကို ပြောပါတယ်။ အဆိုပါ စစ်ကြောင်းဟာ သူစိုးရွာကိုမီးရှို့ဖျက်ဆီးပြီးနောက် သူစိုးရွာရဲ့ အနောက်တောင်ဘက်ကို ထွက်ခွာသွားတယ်လို့ ဒေသခံတွေက တဆင့် သိရပေမယ့် BBMအနေနဲ့ သီးခြားအတည်ပြုနိုင်ခြင်းမရှိပါဘူး။

မြင်းခြံမြို့ပေါ်က သီတာယုမွန်ဦးဆောင်တဲ့ ပျူစောထီးတွေကို စစ်ကောင်စီက လစာသီးသန့်ပေးထားခြင်းမရှိဘဲ မြို့အဝင်ဂိတ်‌တွေမှာ ဂိတ်ကြေးကောက်ခြင်း၊ စီးပွားရေးလုပ်ငန်းရှင်များထံမှ ဆက်ကြေးကောက်ခြင်း၊ ကျေးရွာတွေကို စစ်ကြောင်းထိုးပြီးတော့ ပစ္စည်းတွေ ခိုးယူခြင်းဖြင့် ရပ်တည်နေကြတယ်လို့လည်း သိရှိရပါတယ်။

ပုံ-CJ

#BBM#News#UpdateNews#Myingyan#Junta

စစ်ကောင်စီ ရှေ့ပြေးစစ်ကြောင်းအချို့လည်း နောင်ပိန်ရွာကိုကျော်နေသလို၊ ကျောက်မဲအနီးထိ စကစ ဒရုန်းရောက်ရှိနေ

စစ်ကောင်စီတပ်ဖွဲ့တွေအနေနဲ့ နောင်ချိုမြို့နယ်နဲ့ ကျောက်မဲမြို့နယ်တို့ကို ဆက်သွယ်ထားတဲ့ ဂုတ်ထိပ်တံတားကို သိမ်းပိုက်ရရှိပြီးနောက် အဆိုပါတံတားကိုပြုပြင်ကာ ကျောက်မဲမြို့ထိုးစစ်အတွက်ပြင်ဆင်နေတယ်လို့ သိရပါတယ်။

ပြီးခဲ့တဲ့ သြဂုတ်လ၃၀ရက်နေ့က TNLA ထိန်းချုပ်ထားတဲ့ ဂုတ်ထိပ်တံတားကို ရရှိပြီလို့ ကြေငြာပြီးတဲ့နောက် စစ်ရေးဆိုင်ရာထောက်ပံ့ပို့ဆောင်မှုတွေပိုမိုပြုလုပ်နိုင်ရန်အတွက် စစ်

ကောင်စီမှ အဆိုပါတံတားကို ပြုပြင်ခဲ့ပြီး ရက်ပိုင်းအတွင်းပြီးစီးကာ လူအင်အားနဲ့စစ်လက်နက်ပစ္စည်းဖြည့်တင်းဖို့အတွက် ပြင်ဆင်ပြုလုပ်လာနေတယ်လို့ ဒေသခံစစ်ရေးသတင်းရင်းတွေအရသိရပါတယ်။

” လက်ရှိ အခြေအနေမှာ စကစက ကျောက်မဲကိုထိုးဖို့ ဂုတ်တွင်း တံတားပြင်ဆင်တာ ပြီးခါနီးပြီခင်ဗျာ၊ စစ်သုံးတံတားမျိုးပါ၊ အင်အား နဲ့ခဲယမ်း ရိက္ခာတွေ ထောက်ပံ့ပို့ဆောင်ဖို့ရည်ရွယ်ဟန်တူတယ်၊ ပြီးရင်တော့ ကျောက်မဲမှာတိုက်ပွဲ ပြင်းထန်လာလောက်တယ်ဗျ”

ဟု ဒေသခံစစ်ရေးသတင်းရင်းမြစ်တစ်ဦးမှ BBM ကိုပြောပါတယ်။ နောင်ချိုမြို့နယ်ကို စစ်တပ်မှသိမ်းပိုက်ပြီးတဲ့နောက် ကျောက်မဲမြို့နယ်နဲ့ နောင်ချိုမြို့နယ်အစပ်မှာရှိတဲ့ ဂုတ်ထိပ်တံတားသာမက ကျောက်မဲမြို့နယ်တွင်းက နောင်ပိန်ကျေးရွာတို့ကို ထိုးစစ်ဆင်ရန် ထန်းတနးပင်ကျေးရွာမှတဆင့် စစ်ကောင်စီစစ်ကြောင်းများဝင်ရောက်လာကာ တိုက်ပွဲဖြစ်ပွါးခဲ့တယ်လို့ သိရပါတယ်။

သြဂုတ်လ နောက်ဆုံးအပတ်အတွင်း ကျောက်မဲမြို့နယ်အတွင်း စစ်ကောင်စီတပ်ဖွဲ့နဲ့ TNLA တို့ကြားတိုက်ပွဲဖြစ်ပွါးပြီးတဲ့နောက် ဂုတ်ထိပ်တံတားကိုသာမက ကျောက်မဲမြို့နယ်တွင်းက နောင်ပိန်ကျေးရွာတို့ကိုပါ စစ်တပ်က ထပ်မံရရှိခဲ့တယ်လို့ သိရပါတယ်။

နောင်ပိန်ကျေးရွာနဲ့ဂုတ်ထိပ်ကို ရရှိပြီးနောက် စစ်ကောင်စီစစ်ကြောင်းများဟာ အနည်းငယ်တန့်နေသလို ရှိခဲ့ပေမဲ့လည်း ယခုအခါမှာတော့ ဂုတ်ထိပ်တံတားပြင်ဆင်မှုဟာလည်း ပြီးခါနီးအခြေအနေမျိုးထိရောက်နေတဲ့အပြင် စစ်ကောင်စီရှေ့ပြေးစစ်ကြောင်းအချို့ဟာလည်း နောင်ပိန်ရွာကို ကျော်ကာ ကျောက်မဲမြို့ဘက် ဆက်လက်ထိုးစစ်ဆင်နေတယ်လို့ သိရပါတယ်။

စစ်ကောင်စီယခုသိမ်းပိုက်လိုက်တဲ့ နောင်ပိန်ကျေးရွာနဲ့ ကျောက်မဲမြို့ကြား စခန်းသာ၊ ခိုက်တုန်ဟုန်း၊ နားအိုက်ခန်း၊ ခိုမုန်း ရွာတွေအပါကျေးရွာ(၆)ရွာသာ ကျန်ရှိပြီး စစ်ကောင်စီစစ်ကြောင်းအချို့သာမက ဒရုန်းပျံဝဲမှုအချို့ကိုလည်း နားအိုက်ခန်းကျေးရွာနားတစ်ဝိုက်အထိ ရောက်ရှိလာနေတယ်လို့ အဆိုပါစစ်ရေးသတင်းရင်းမြစ်မှ ဆက်ပြောပါတယ်။

“စစ်ကောင်စီရဲ့ရှေ့ပြေးစစ်ကြောင်းတွေက နောင်ပိန်ကျော်သွားပါပြီ၊ စခန်းသာရွာဘက်မှာ ထိတွေ့မှုတွေ စနေပြီလို့လည်းသိထားရတယ်၊ ဒရုန်းနဲ့လက်နက်ကြီးဆိုလည်း အခုက နားအိုက်ခန်နဲ့အကျော် ကျောက်မဲမြို့အစပ်မရောက်တရောက်အထိကို စကစ ဒရုန်းပျံတာတွေ တွေ့နေရတယ်”

ဒါ့အပြင် စစ်ကောင်စီရဲ့ စစ်ကြောင်းတွေအနေနဲ့က ကျောက်မဲမြို့ကို နောင်ပိန်ဘက်ကလမ်းကြောင်းတွေကသာမကဘဲ မိုင်းတင်းကျေးရွာဘက်မှလည်းစစ်ကြောင်း(၂)ကြောင်းပုံစံ

ပိတ်ဆို့တိုက်ခိုက်နိုင်ဖို့အတွက် ထိုးစစ်ဆင်နေတာရှိပြီး မိုင်းတင်းကျေးရွာကို သွားရာလမ်းတစ်လျှောက် TNLA နဲ့ တိုက်ပွဲ ပြင်းထန်စွာ ဖြစ်ပွါးနေတယ်လို့ သိရပါတယ်။

အဆိုပါမိုင်းတင်းကျေးရွာဟာ ကျောက်မဲမြို့နဲ့ မိုင်းလုံမြို့ကြားမှာတည်ရှိနေတဲ့ကျေးရွာဖြစ်တာကြောင့် မိုင်းတင်းကျေးရွာကိုသာ စစ်တပ်ကထပ်ရသွားမယ်ဆိုရင် ကျောက်မဲကို စစ်ကြောင်း(၂)ကြောင်းဖြင့် ဖိအားပေးခံရနိုင်တဲ့အခြေအနေရှိနေသလို မိုင်းလုံမြို့ကိုလည်း ခြိမ်းခြောက်နိုင်တဲ့အနေအထားမျိုးထိပိုင်ဆိုင်သွားနိုင်တယ်လို့လည်း ဒေသခံစစ်ရေးသတင်းရင်းမြစ်တွေကပြောပါတယ်။

“နောင်ပစ်လမ်းခွဲကနေ မိုင်းတင်းရွာသွားတဲ့လမ်းဘက်မှာလည်း တိုက်ပွဲတွေဖြစ်နေပါတယ်။ မိုင်းတင်းရွာကိုရသွားရင် ကျောက်မဲကို မိုင်းလုံ သွားလမ်းကဖြတ်ပိတ်သလိုဖြစ်ပြီ၊ မိုင်းတင်းရွာဘက် စကစ ရောက်သွားရင်က မိုင်းလုံမြို့ကောကျောက်မဲမြို့ကော ပိတ်သွားမှာစိုးလို့ မိုင်းတင်းရွာကိုသွားရာလမ်းတစ်လျှောက် နောင်ပစ်လမ်းခွဲ ကနေစပြီး အသည်းအသန်းကို TNLAက ခုခံနေပါတယ်”

သြဂုတ်လနောက်ဆုံးအပတ်ကစတင်ခဲ့တဲ့ကျောက်မဲမြို့နယ်အတွင်းက စစ်ကောင်စီထိုးစစ်တွေကြောင့် ဒေသခံပြည်သူတစ်သောင်းထက်မနည်း စစ်ဘေးရှောင်နေရပြီး တိုက်ပွဲအတွင်း၊ လက်နက်ကြီး၊လက်နက်ငယ်တွေကြောင့် သေဆုံးမှုအချို့ ရှိတယ်လို့လည်း သိရပါတယ်။

ဧရာဝတီတိုင်း၊ ပုသိမ်ခရိုင်၊ သာပေါင်းမြို့နယ်က အာရက္ခတပ်တော်(AA) နဲ့ ပူးပေါင်းမဟာမိတ်တပ် PDF တို့ သိမ်းပိုက်ထိန်းချုပ်ထားတဲ့နေရာကို စစ်ကြောင်းသွားထိုးတဲ့ စစ်ကောင်စီတပ်ရဲ့ ခလရ (၆၃) တပ်ရင်းက ဒုတပ်ရင်းမှူး သက်နိုင်ထွန်းဟာ မြေမြှုပ်မိုင်းနင်းမိတဲ့အတွက် သေဆုံးသွားတယ်လို့ သိရပါတယ်။

ခလရ (၆၃) တပ်ရင်းက ဒုတပ်ရင်းမှူး သက်နိုင်ထွန်းဟာ ပြီးခဲ့တဲ့ သြဂုတ်လ ၂၈ ရက်နေ့က သာပေါင်းမြို့နယ်၊ သဲဖြူရွာနဲ့ ကျားခေါင်းရွာဘက်ကို စစ် ကြောင်းထိုးလာခဲ့တာဖြစ်ပြီး သဲဖြူရွာရှေ့တန်း စစ် မျက်နှာကိုအရောက်မှာ စစ်ကောင်စီတပ်က ကိုယ်တိုင်ထောင်ထားတဲ့ မြေမြှုပ်မိုင်းကို နင်းမိပြီး ခြေဖနောင့်ပြတ်ထွက်ကာ ဒဏ်ရာရရှိသွားတယ်လို့ ဧရာဝတီတိုင်းက စစ်ရေးသတင်းရင်းမြစ်တစ်ဦးက ပြောပါတယ်။

“ခလရ ၆၃ က ဒုတပ်ရင်းမှူး သက်နိုင်ထွန်းက AA နဲ့ PDF တွေ သိမ်းထားတဲ့နေရာကို စစ်ကြောင်းထိုးလာခဲ့တာပါ။ အဲဒီမှာ သူတို့ စကစ ကိုယ်တိုင်ထောင်ထားတဲ့ မိုင်းကိုနင်းမိပြီးတော့ သွေးထွက်လွန်ကာ သေဆုံးသွားပါတယ်”

လို့ အဆိုပါ စစ်ရေးသတင်းရင်းမြစ်က BBM ကို ပြောပါတယ်။ ဒုတပ်ရင်းမှူး သက်နိုင်ထွန်း မိုင်းနင်းမိပြီး ဒဏ်ရာရအချိန်မှာ ဆေးမှူးမရှိတာကြောင့် သွေးထွက်လွန်ကာ ပုသိမ်မြို့ အနောက်တောင်တိုင်း စစ်ဌာနချုပ် မဆရ (၄) ကို ပို့ဆောင်စဉ်မှာ သေဆုံးသွားတာလည်း ဖြစ်ပါတယ်။

ဒုတပ်ရင်းမှူး သက်နိုင်ထွန်းရဲ့ ရုပ်အလောင်းကို ပြီးခဲ့တဲ့ သြဂုတ်လ (၃၀)ရက်နေ့မှာ ရွှေမြင်တင် မီးသင်္ဂြိုလ်စက်ကို ပို့ဆောင်ထားခဲ့ပြီး ဒီကနေ့ စက်တင်လာလ (၂) ရက်နေ့မှာ မီးသင်္ဂြိုလ်မှာ ဖြစ်တယ်လို့လည်း သိရပါတယ်။

အဆိုပါတပ်ရင်းမှူးဟာ ဧရာဝတီတိုင်းက သာပေါင်းမြို့နယ်သာမကပဲ ရခိုင်ရိုးမ တစ်ဖက်ကမ်းက အာရက္ခတပ်တော် AA သိမ်းထားတဲ့ ဂွမြို့နယ်အထိကိုပါ စစ်ကြောင်းထိုး ချီတက်ဖို့အတွက် ကြွေးကြော်ထားတဲ့သူတစ်ဦးလည်း ဖြစ်တယ်လို့လည်း စစ်ရေးသတင်းရင်းမြစ်တွေ ဆီကသိရပါတယ်။