မန္တလေးတိုင်းဒေသကြီး၊ ကျောက်ပန်းတောင်းမြို့မှာ နေအိမ်တစ်လုံး မီးလောင်မှုဖြစ်ပွားခဲ့ပြီး စိတ်ကျန်းမာရေးကြောင့် ကြိုးတုပ်ချုပ်နှောင်ထားရသူ အမျိုးသားတစ်ဦးသေဆုံးသွားကြောင်းသိရပါတယ်။

ဩဂုတ်လ(၂၅)ရက်နေ့ မနက်ပိုင်းက ကျောက်ပန်းတောင်းမြို့၊ လွတ်လပ်ရေးရပ်ကွက်၊ မဉ္ဇူသကလမ်းအတွင်းမှ နေအိမ်တလုံးမှာ မီးလောင်ကျွမ်းမှု ဖြစ်ပွားခဲ့တာဖြစ်ပြီး မီးလောင်ကျွမ်းမှုအတွင်း စိတ်ကျန်းမာရေးမကောင်းသူ အမျိုးသားတစ်ဦး သေဆုံးခဲ့တယ်လို့ သိရပါတယ်။

အဆိုပါ သေဆုံးသူ အမျိုးသားဟာ ကိုအောင်ဖြိုးမင်း(အသက် ၃၇နှစ်)ဆိုသူ ဖြစ်ပြီး ၎င်းရဲ့အိမ်မှာ အခြားသူများ မရှိစဉ် နေအိမ်ထရံကို မီးခြစ်နဲ့ မီးညှိရာကနေ မီးကူးစက်လောင်ကျွမ်းခဲ့တာ ဖြစ်ပါတယ်။

“သေဆုံးသူရဲ့ မိဘတွေ၊ မိသားစုတွေ မရှိတဲ့အချိန် မီးခြစ်ကိုယူသုံးရာကနေ မီးလောင်မှု ဖြစ်ခဲ့တာပါ။ အရင်ရက်တွေမှာ ဒီလို မီးခြစ်ယူကိုင်တာတွေ ပြုလုပ်ခဲ့ဖူးတာကြောင့် စောင့်ကြည့်တာ၊ ချုပ်နှောင်တာတွေ လုပ်ခဲ့ဖူးပြီး ဒီတခေါက်ကတော့ မီးလောင်ချိန်မှာ သံကြိုးခတ်လျက်သားဖြစ်နေတာကြောင့် မီးထဲပါသွားတာပါ။ သေဆုံးသူက စိတ်ကျန်းမာရေးမကောင်းသူတစ်ဦးပါ”

ဟု ကျောက်ပန်းတောင်းမြို့၊ ပြည်တော်သာရပ်ကွက်နေ ပြည်သူတစ်ဦးက BBMကို ပြောပါတယ်။ မီးလောင်မှုကြောင့် ထရံကာနေအိမ်တစ်လုံး(ကာလတန်ဖိုး ၁၀သိန်းခန့်) ဆုံးရှုံးပျက်စီးခဲ့ပြီး သေဆုံးသူအမျိုးသားရဲ့ အလောင်းကို‌တော့ နေ့ချင်း သင်္ဂြိုလ်လိုက်တယ်လို့ သိရပါတယ်။

၂၀၂၂၊ ဖေဖော်ဝါရီလ ၁ရက်နေ့ကလည်း ကျောက်ပန်းတောင်မြို့နေ သံပန်းလုပ်ငန်းလုပ်ကိုင်သူ ကိုအောင်အောင်ဆိုသူဟာ ကျောက်ပန်း‌တောင်းမြို့၊ လျှပ်စစ်ရုံးရှေ့မှာ “၂၄နာရီလုံး အများပြည်သူ+ပြည်သား မီးလင်းပါစေ။ ၂၀၀၁+၂၀၀၂ကို ပြန်မသွား” စာသားကို ကိုင်ဆောင်ပြီး ကိုယ့်ကိုယ်ကို မီးရှို့ ဆန္ဒပြမှုတစ်ခု ဖြစ်ပွားခဲ့ပါသေးတယ်။

BBM #News #Fire #Mandalay

ရှမ်းပြည်နယ်တောင်ပိုင်း၊ တောင်ကြီးမြို့ကို စစ်ကောင်စီက ကုန်ပစ္စည်းအဝင်အထွက် ကန့်သတ်လိုက်ပြီး နိုင်ငံခြားကနေတင်သွင်းတဲ့ ကုန်ပစ္စည်းတွေကို တောင်ကြီးမြို့သို့ သယ်ဆောင်ခွင့် ပိတ်ပင်လိုက်တာ ဖြစ်ပါတယ်။

ဩဂုတ်လ တတိယပတ်ကစလို့ ရှမ်းပြည်နယ်တောင်ပိုင်းရဲ့မြို့တော်၊ တောင်ကြီးမြို့ကို ကုန်အဝင်အထွက် ကန့်သတ်လိုက်တာဖြစ်ပြီး ဆိုင်ကယ်/ကား တာယာ၊ ကျွတ်၊ ဆေးဝါး၊ ပဲနို့၊ ထိုင်းခေါက်ဆွဲခြောက်၊ ဂျုံမှုန့်၊ အာဟာရဖြည့်စွက်စာများ၊ ဓာတုပစ္စည်း၊ စီးကရက်၊ ကွန်ပျူတာ၊ ဖုန်း၊ အီလက်ထရောနစ်ပစ္စည်းများ၊ စိုက်ပျိုးရေးသုံးပစ္စည်းများ၊ ဘတ္ထရီ၊ ဖိနပ်၊ စားသောက်ကုန်ပစ္စည်းမျိုးစုံတို့ကို တင်သွင်းခွင့်ကန့်သတ်လိုက်တာ ဖြစ်ပါတယ်။

“ဒီလိုကန့်သတ်လိုက်တာကြောင့် တောင်ကြီးမှာ Mevius ဆေးလိပ်တစ်ဘူးကို ၁၀၀၀၀ထိ ဈေးပေါက်နေပါတယ်။ တခြားကုန်ပစ္စည်းတွေလည်း ဈေးတက်နေပါတယ်။”

ဟု တောင်ကြီးမြို့မှ ဒေသခံတစ်ဦးကပြောပါတယ်။

“လူကြီးအာဟာရဖြည့်စွက်စာ(Ensure)ဘူးတွေလည်း ဈေးအဆမတန်တက်နေတာကြောင့် မဖြစ်မနေ လိုအပ်သူတွေက ဝယ်ယူစုဆောင်းတာတွေ ဖြစ်ပေါ်နေပါတယ်။ ဘူးအသေးတစ်ဘူးကို တစ်သိန်းဝန်းကျင်အထိ ဈေးတက်နေပါတယ်”

လို့ တောင်ကြီးမြို့ ကျောင်းကြီးစုရပ်ကွက်မှ ‌ဆေးဆိုင်ပိုင်ရှင်တစ်ဦးကလည်း BBM ကိုပြောပါတယ်။ ဒီလိုပိတ်ပင်တဲ့နေရာမှာ အလုံးအရင်းတင်ပို့မှုတွေကို ပိတ်ပင်တဲ့အပြင် အသေးစား Delivery Service တွေက တဆင့် ပို့ဆောင်မှုတွေကိုပါ ပိတ်ပင်လိုက်တာ ဖြစ်ပါတယ်။

ပြီးခဲ့တဲ့ရက်ပိုင်းက စစ်ကောင်စီဟာ နိုင်ငံခြားငွေ ကုန်ကျမှု လျှော့ချနိုင်ဖို့ ပြည်ပAir Cargo ပိတ်ပင်မှုတွေ ပြုလုပ်ခဲ့ပြီးမြေပြင်ကုန်သွယ်ရေးမှာလဲ ကန့်သတ်မှုတွေ ပြုလုပ်ခဲ့ပါတယ်။

အခုလိုပိတ်ပင်မှုတွေနဲ့ ပတ်သက်လို့ စစ်ကောင်စီက တစုံတရာ ထုတ်ပြန်ပြောဆိုတာမျိုး မရှိသေးပါဘူး။
ပုံ-ကျွဲတပ်ဆုံဂိတ်မှာ စစ်ဆေးခံဖို့ တန်းစီနေကြတဲ့ ကားများကိုတွေ့ရစဉ်။(ပုံအဟောင်း)

BBM #News #UpdateNews #TaungGyi #Myanmar #Junta

မန္တလေးတိုင်းဒေသကြီး၊ မြင်းခြံမြို့ခရိုင်အတွင်းမှာ အကြမ်းဖက်စစ်ကောင်စီက ရွေးကောက်ပွဲကျင်းပနိုင်ရန် ဖြတ်လေးဖြတ်ပြုလုပ်ခြင်းများကြောင့် မြို့ပေါ်နေပြည်သူများ ဆိုးရွားစွာ ဒုက္ခရောက်နေတယ်လို့သိရပါတယ်။

အကြမ်းဖက်စစ်ကောင်စီဟာ ဩဂုတ်လ ၁၈ရက်နေ့မှ စတင်၍ မြင်းခြံခရိုင်အတွင်းမြို့နယ်များကို ကုန်ပစ္စည်းအဝင်အထွက်များ ကန့်သတ်ခဲ့ခြင်းကြောင့် မြင်းခြံမြို့ပေါ်ရှိ ဈေးများအတွင်း စားသုံးကုန် ကုန်စိမ်းများ စတင်ပြတ်လပ်လာနေပြီဖြစ်ကြောင်းသိရပါတယ်။

အကြမ်းဖက်စစ်ကောင်စီက မြင်းခြံမြို့ပေါ်မှ အဝင်အထွက် ဂိတ်များတွင် စစ်ဆေးရေးများ တင်းကြပ်ထားပြီး ကုန်ပစ္စည်းများ တင်ဆောင်လာသော ကားများပေါ်မှ ပစ္စည်းများကိုလည်း မြင်းခြံမြို့အထွက်ဂိတ်မှ ပျူသောထီးများက လုယူခဲ့ကြောင်း ဇဂျမ်းရွာနှင့် အေးရွာတို့မှ ကိုယ်တိုင်ကြုံတွေ့ခဲ့ရသူ ပြည်သူများထံမှ သိရပါတယ်။

ဩဂုတ်လ ၁၈ရက်နေ့နှင့် ၁၉ရက်နေ့များတွင် မြင်းခြံမြို့အဝင်အထွက် ဂိတ်များက စစ်ကောင်စီတပ်သားများက လာသမျှကားများပေါ်မှ ကုန်ပစ္စည်းများကို လုယူခဲ့ခြင်းဖြစ်ကြောင်းသိရပါတယ်။

အေးကျေးရွာမှ ဘုန်းကြီးကျောင်းကား ပင်လျှင်မချန် လုယူခြင်းခံခဲ့ရပြီး အခြားကားများကိုတော့ ဆဲဆိုရမ်းကားခြင်းများ ပြုလုပ်ခဲ့တယ်လို့ သိရပါတယ်။

“ဒီဘက် သံမဏိစက်ရုံ တောင်ဘက်ခြမ်းကရွာတွေ၊ တောင်သာဘက်အခြမ်းက ရွာတွေကို ပစ္စည်းသယ်ခွင့် ပိတ်လိုက်ပြီ။ ဘာပစ္စည်းမှ သယ်လို့မရတော့ဘူး။ နောက်ဆိုရင် လူပါလာခွင့် မပြုတော့ဘူးလို့ မြင်းခြံဒီဂရီကောလိပ်နားက ဂိတ်စောင့် ပျူစောထီးတွေပြောပါတယ်”

လို့ ဇဂျမ်းကျေးရွာမှ အသက် ၃၀အရွယ် ဒေသခံ အမျိုးသားတစ်ဦးက BBM ကို ပြောပါတယ်။ ယခင်ရက်ပိုင်းကလည်း မြင်းခြံမြို့ပေါ်မှ ရဲများနှင့် ယာဉ်ထိန်းရဲများပူးပေါင်းပြီး ဆိုင်ကယ်စီးပြည်သူများအား ဖမ်းဆီးငွေညှစ်မှုများ ပြုလုပ်ခဲ့ကြောင်း သိရပါတယ်။

“ဆိုင်ကယ်က လိုင်စင်လည်းပါတယ်။ ယာဉ်မောင်းလိုင်စင်လဲပါတယ်။ ဦးထုပ်လဲဆောင်းတယ်။ အဲ့ဒါကို ဆိုင်ကယ်မောင်းရင်း ဖုန်းပြောတယ်လို့ စွပ်စွဲပြီးငွေညှစ်ခံခဲ့ရတယ်”

လို့ မြင်းခြံမြို့လယ်ခေါင် ကေဒါလက်ဖက်ရည်ဆိုင်အနီးမှာ ကိုယ်တိုင်ငွေညှစ်ခံခဲ့ရသူ ပြည်သူတစ်ဦးက BBMကို ပြောပါတယ်။ ဩဂုတ်လဆန်းပိုင်းက မြင်းခြံမြို့နယ်အရှေ့ခြမ်းကျေးရွာတွေကို စစ်ကြောင်းထိုးခဲ့တဲ့ အကြမ်းဖက်စစ်ကောင်စီနှင့် ၎င်းတို့ရဲ့လက်အောက်ခံ ပျူစောထီးများဟာ ဒီနေ့မနက်ပိုင်းမှာပဲ မြင်းခြံမြို့ပေါ်ကို ကားအသေး ၁၅စီး၊ ဖောကား ၃စီးဖြင့် ပြန်လည်ရောက်ရှိလာခဲ့ပြီး သေနတ်ပစ်ဖောက်ခြင်း၊ ခိုးရာပါ ပစ္စည်းများအား ဝေစုခွဲခြင်းများ ပြုလုပ်နေကြတယ်လို့ သိရပါတယ်။ စစ်ကြောင်းထိုးစဉ်က မြင်ခြံမြို့နယ် သူစိုး၊ မလည်ကျေးရွာများအတွင်း ပြည်သူ့နေအိမ်များမှ ပစ္စည်းများကို ခိုးယူရုံတင်မက စားနပ်ရိက္ခာများကိုလည်း တမင်ဖျက်ဆီးမှုများ ပြုလုပ်ခဲ့ကြောင်းကိုလည်း သိရပါတယ်။

အဆိုပါ စစ်ကြောင်းပြန် ပျူစောထီးများဟာ မြင်းခြံမြို့၏ အဓိကလမ်းမကြီးဖြစ်‌သော ဗိုလ်ချုပ်လမ်းတလျှောက် သောက်စားမူရူးနေပြီး ထွေအုပ်ရုံး(ဒေသအခေါ် ကျောက်ရုံးကြီး)အနီးတွင် ၎င်းတို့ခိုးရာပါငွေကြေးများထဲမှ ၅၀၀တန်၊ ၂၀၀တန် ငွေစက္ကူများကြဲချခဲ့ကြောင်းသိရပါတယ်။

အဲ့ဒီစစ်ကြောင်းဟာ မြင်းခြံမြို့နယ်အရှေ့ခြမ်း ကျေးရွာတွေနဲ့ နွားထိုးကြီးမြို့နယ်အတွင်းက ကျေးရွာတွေကို စစ်ကြောင်းထိုး ဝင်ရောက်စဉ်အတွင်း ပြည်သူ ၃၀ဝန်းကျင်ခန့်ကို သတ်ဖြတ်ခဲ့တာကြောင့် မြို့နေပြည်သူလူထုများက ၎င်းတို့ပြန်လည်ရောက်ရှိလာခြင်းအပေါ် စိုးရိမ်ထိတ်လန့်နေတယ်လို့သိရပါတယ်။
ပုံ-သူစိုး/မလည် ကျေးရွာများအတွင်းစားနပ်ရိက္ခာ(ဆန်)များကို ပျူစောထီးများက ဖျက်ဆီးခဲ့ကြသည့် မြင်ကွင်း။

BBM #News #UpdateNews #MyinGyan

🟥စစ်ကောင်စီ တပ်ဖွဲ့၀င် ၆ဦးသေဆုံးပြီး အရာရှိနေအိမ်နဲ့ လူပျိုဘားတိုက် မီးလောင်ပျက်စီးခဲ့ပြီး ၄ဦးထိခိုက်ဒဏ်ရာရရှိ

ပဲခူးတိုင်း၊ ကေတုမတီမြို့ အခြေစိုက် စစ်ကောင်စီရဲ့‌တောင်ပိုင်းတိုင်းစစ်ဌာနချုပ်ကို B.W.M အဖွဲ့နဲ့ တော်လှန်ရေးမဟာမိတ်အဖွဲ့တွေက ၁၀၇မမ ရှော့တိုက်ဒုံး ၅လုံးနဲ့ ပစ်ခတ်တိုက်ခိုက်ခဲ့ရာ ၄လုံးကျရောက်ပေါက်ကွဲခဲ့ပြီး အရာရှိနေအိမ်၁လုံးနဲ့ လူပျိုဘားတိုက် တစ်ခြမ်းမီးလောင်သွားကာ စစ်ကောင်စီ တပ်ဖွဲ့၀င် ၆ဦးသေဆုံးပြီး ထိခိုက်ဒဏ်ရာရရှိသူ၄ဦးရှိတယ်လို့ တပ်တွင်းသတင်းရင်းမြစ်က BBM ကိုပြောပါတယ်။

ဩဂုတ်လ ၂၆ရက်နေ့က စစ်ကောင်စီရဲ့ ကေတုမတီမြို့အခြေစိုက် တောင်ပိုင်းတိုင်းစစ်ဌာနချုပ်ကို B.W.M အဖွဲ့နဲ့ တော်လှန်ရေးမဟာမိတ်အဖွဲ့တွေက ၁၀၇မမ ရှော့တိုက်ဒုံး ၅လုံးနဲ့ပစ်ခတ်တိုက်ခိုက်ခဲ့ရာ စစ်ကောင်စီတပ်ဖွဲ့၀င် ၆ဦးသေဆုံးပြီး ၄ဦးထိခိုက်ဒဏ်ရာရရှိကာ အဆောက်အအုံတွေပျက်စီးသွားတယ်လို့ စုံစမ်းသိရှိရပါတယ်။

“ကနဦးသိရသလောက်တော့ အရာရှိနေအိမ်၁လုံးနဲ့ လူပျိုဘားတိုက် တစ်ခြမ်းမီးလောင်သွားတယ်။ အရာရှိစစ်သည်အပါအ၀င် အားလုံး ၆ယောက်သေတယ်။ ထိခိုက်ဒဏ်ရာရရှိတဲ့သူတွေလည်း ရှိတယ်”

လို့ တပ်တွင်းသတင်းရင်းမြစ်က BBMကိုပြောပါတယ်။ အဲ့ဒီနေ့မှာပဲ သံတောင်ကြီးမှာရှိတဲ့ ဘုရင့်နောင် တိုက်ခိုက်ရေး သင်တန်းကျောင်းကို ရှော့တိုက်ဒုံး ၉လုံးနဲ့ အောင်မြင်စွာပစ်ခတ်တိုက်ခိုက်ခဲ့ရာ သင်တန်းသား အရာရှိ ၄ဦးနဲ့ သန္ဓေစစ်သည် ၉ဦးထက်မနည်းသေဆုံးခဲ့တယ်လို့ Brave Warriors For Myanmar(B.W.M)ရဲ့ တာ၀န်ရှိသူက BBMကို ဖြေကြားထားပါတယ်။

အဆိုပါ တိုက်ခိုက်မှုကို Brave Warriors For Myanmar(B.W.M)အဖွဲ့နဲ့အတူ Mountain Knight Civilian Defense Forces(MKCDF)နဲ့ Anti-Coup People’s Liberation Force(ACPLF)၊ KNLA တပ်မဟာ၂၊ တပ်ရင်း၅တို့မှ ပူးပေါင်းတိုက်ခိုက်ခဲ့တာဖြစ်တယ်လို့ သိရပါတယ်။

BBM #News #BWM #BraveWarriorsForMyanmar #Bago #Myanmar

ပြည်သူ၁၅ ဦးသေဆုံးပြီး ၂၁ ဦးထိခိုက်ဒဏ်ရာရ

ရခိုင်ပြည်၊ မြောက်ဦးမြို့နယ်၊ အောင်တပ်အုပ်စု၊ ဒိုင်းကျီကျေးရွာရဲ့ကို စစ်ကောင်စီက ဗုံးကြဲချတိုက်ခိုက်မှုကြောင့် ဒေသခံ ၁၅ ဦးသေဆုံးပြီး ၂၁ ဦးထိခိုက်ဒဏ်ရာရရှိသွားတယ်လို့ ဒေသခံတွေဆီက သိရပါတယ်။

မနေ့က သြဂုတ်လ ၂၅ ရက်နေ့၊ ညနေ ၁၁ နာရီ ခွဲအချိန်မှာ စစ်ကောင်စီတပ်က ဂျက်ဖိုက်တာနဲ့ ပေါင် ၅၀၀ ဗုံးတစ်လုံး မြောက်ဦးမြို့နယ်၊ ဒိုင်ကျီကျေးရွာရှိ၊ စိုက်ပျိုးရေးဂိုဒေါင်ဖက်ကို လာရောက်ဗုံးကြဲချခဲ့တာလည်း ဖြစ်ပါတယ်။

” မြောက်ဦးမြို့၊ ဒိုင်ကျီကျေးရွာဖက်ကို မနေ့က ညနေ ၁၁ နာရီခွဲမှာ ဂျက်ဖိုက်တာနန့် ပေါင် ၅၀၀ ဗုံးတစ်လုံးကြဲချတိုက်ခိုက်ခဲ့တာပါ။ လူအထိအခိုက်တွေ များတယ်လို့ ကြားရပါတယ်။ နေအိမ်တွေလည်း မီးလောင်သွားတယ်လို့သိရပါတယ်”

လို့ မြောက်ဦးဒေသခံတစ်ဦးက BBM ကို ပြောပါတယ်။ အခုလို စစ်ကောင်စီတပ်ရဲ့ ဗုံးကြဲချတိုက်ခိုက်မှုကြောင့် ထိခိုက်ဒဏ်ရာရရှိသူတွေကို အရေးပေါ်ဆေးကုသမှုခံယူဖို့ ပို့ဆောင်ထားရတယ်လို့လည်း သိရပါတယ်။

“ဒဏ်ရာရရှိသူတွေကို ဆေးကုသမှုခံယူနေကြပါတယ်။ မနေ့ကဆိုရင် ချက်ချင်းလူနာတင်ကားတွေရောက်နိုင်သေးတော့ ထိခိုက်သွားတဲ့ သူတွေကို မကယ်တင်နိုင်ဘူးဖြစ်နေပါတယ်။ အိမ်တစ်အိမ်တည်းကနေ လူ ၆ ယောက်ခန့်လည်းထိသွားပါတယ်”

လို့လည်း မြောက်ဦးဒေသခံတစ်ဦးက BBM ကို ဆက်ပြောပါတယ်။ စစ်ကောင်စီဟာ အဆိုပါ ပေါင် ၅၀၀ ဗုံးကြဲချပြီးနောက် မိနစ်အနည်းငယ်ခန့် ကြာတဲ့တိုင်အောင် မြောက်ဦးမြို့ပေါ်မှာ ဝဲနေခဲ့တယ်လို့လည်း သိရပါတယ်။

#BBM#News#UpdateNews#Rakine#Junta

မန္ဆလေးတိုင်း၊ မိုးကုတ်မြို့ကို စစ်ကောင်စီက ထပ်မံဗုံးကြဲတိုက်ခိုက်ခဲ့တာကြောင့် လူနေအိမ်၄လုံး ပျက်စီးသွားပြီး မစိုးရိမ်ရတဲ့ ထိခိုက်ဒဏ်ရာရရှိတဲ့သူ ၁ယောက် ရှိတယ်လို့ သတင်းရင်းမြစ်၁ဦးက BBM ကိုပြောပါတယ်။

ဩဂုတ်လ ၂၅ရက်၊ည ၁၀နာရီ ၅၅မိနစ်အချိန်ခန့်က မိုးကုတ်မြို့ အရှေ့ပိုင်း၊ စည်ပင်သာယာ ဂေါ်ရခါးဘုရားကျောင်းအနီး စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် လူနေအိမ်၄လုံးပျက်စီးသွာပြီး မစိုးရိမ်ရ ထိခိုက်ဒဏ်ရာ ရရှိတဲ့သူ ၁ယောက်ရှိတယ်လို့ သိရပါတယ်။

“မနေ့ည ၁၁နာရီ၀န်းကျင်လောက်က ဂျက်ဖိုက်တာနဲ့ ကြဲသွားတာ။ ဂေါ်ရခါးဘုရားကျောင်းနားက ခြံထဲကို ကျတယ်။ ”

လို့ သတင်းရင်းမြစ်တစ်ဦးက BBMကိုပြောပါတယ်။ ပြီးခဲ့တဲ့ ဩဂုတ်လ ၁၈ရက်နေ့ကလည်း စစ်ကောင်စီက ကျပ်ပြင်ဈေးနားကို ဗုံး၂လုံးကြဲချတိုက်ခိုက်ခဲ့တာကြောင့် ပြည်သူ၁ဦး ထပ်မံထိခိုက်ဒဏ်ရာ ရရှိခဲ့ပါသေးတယ်။

စစ်ကောင်စီဟာ ဩဂုတ်လ တစ်လထဲအတွင်း ၁ရက်နေ့မှ ၂၅ရက်နေ့အထိ လေကြောင်းတိုက်ခိုက်မှု ၅ကြိမ်ပြုလုပ်ခဲ့ပြီးတော့ ပြည်သူ ၃၈ဦးထက်မနည်းသေဆုံးကာ ၆၀ကျော် ထိခိုက် ဒဏ်ရာရရှိခဲ့တယ်လို့ သိရှိရပါတယ်။

စစ်ကောင်စီဟာ လက်ရှိမှာ စစ်အုပ်ချုပ်ရေး ကြေညာထားတဲ့ ၆၃မြို့နယ်ကို လေကြောင်းကနေ ခပ်စိတ်စိတ် ဗုံးကြဲတိုက်ခိုက်လာနေတာဖြစ်ပြီးတော့ မိုးကုတ်၊ ရှမ်းမြောက်ကို အဓိကထားကြဲနေပြီး အခုဆို ရခိုင်ဘက်ကိုပါ လေကြောင်းတိုက်ခိုက်မှုတွေ ဆက်တိုက်လုပ်ဆောင်လာနေတာပဲဖြစ်ပါတယ်။

Video-Local Resident

#BBM#News#UpdateNews#Airstrike#Junta

စစ်ကောင်စီတပ်သား ၁၀ ဦးသေဆုံးပြီး လက်နက်ခဲယမ်းအချို့ သိမ်းဆည်းရရှိ

မန္တ‌လေးတိုင်း၊ နွားထိုးကြီးမြို့နယ်မှာ ရွာပေါင်း ၂၀ ကျော် စစ်ကြောင်းထိုးမီးရှို့လာတဲ့ စစ်ကောင်စီနဲ့ ပျူခေါင်းဆောင် သီတာယုမွန် လက်အောက်ခံ ပူးပေါင်းအဖွဲ့ကို တိုက်ခိုက်ခဲ့ရာ စစ်ကောင်စီတပ်သား ၁၀ ဦးသေဆုံးပြီး လက်နက်ခဲယမ်းအချို့ သိမ်းဆည်းရရှိခဲ့တယ်လို့ နွားထိုးကြီး ပကဖ က ယမန်နေ့၊ ညပိုင်းမှာ ထုတ်ပြန်ပါတယ်။

ဩဂုတ်လ လဆန်းပိုင်းမှစပြီး မြင်းခြံမြို့နယ်မှ စတင်စစ်ကြောင်းထိုးလာတဲ့ စစ်‌ကောင်စီနဲ့ ပျူ ပူးပေါင်းအင်အား ၃၀၀ ခန့်စစ်ကြောင်းကို မာန်လည်ရွာသို့ စစ်ကြောင်းထိုးလာစဉ် ဩဂုတ်လ ၂၀ ရက်မှာ တိုက်ခိုက်ခဲ့ရာ စကစတပ်သား ၁၀ ဦးမျက်မြင်သေဆုံးပြီး ၈ ဦးခန့်အပြင်းအထန်ဒဏ်ရာရခဲ့တယ်လို့ ဖော်ပြထားပါတယ်။

“ရွာပေါင်း ၂၀ ကျော် ဗလုံတို့ ဘာတို့မှာ မီးရှို့ထားတဲ့ စစ်ကြောင်းပေါ့၊ အဓိကကတော့ သီတာယုမွန် လက်အောက်ခံ ပျူစောထီးတွေလဲပါတယ်၊ အင်အားက ၃၀၀ ခန့်ဝန်းကျင်၊ ဩဂုတ်လ ၁၈ ရက်မှာ မာန်လည်ကိုရောက်တယ်၊ ၃ ရက်အကြာမှာ တော်လှန်ရေးတပ်ဖွဲ့တွေနဲ့ တိုက်ပွဲဖြစ်တယ်၊ စခ ဘက်ကနေ မျက်မြင် ၁၀ ယောက်အထိ ကျရှုံးတယ်၊ အထိအခိုက်က ၈ ယောက်အထက်မှာပဲရှိတယ်”

လို့ နွားထိုးကြီး ပကဖ သတင်းနဲ့ပြန်ကြားရေး တာဝန်ခံက BBM ကိုပြောပါတယ်။ တိုက်ပွဲအတွင်း MA11 ၂ လက်၊ Drone Shooter ၁ လက်၊ ငါးကြင်းမြီးပြောင်း ၁ ချောင်း၊ လက်ပစ်ဗုံး ၃ လုံး၊ Starlink ၁ လုံး၊ ငွေသားအချို့၊ ကျည်ဘောက် ၂ ခုနဲ့အတူ ကျည်အချို့ကိုပါ သိမ်းဆည်းရရှိခဲ့တယ်လို့ ဆိုပါတယ်။

စစ်ကောင်စီစစ်ကြောင်းဟာ ပြည်သူလူထု နေအိမ်တွေကို မီးရှို့ဖျက်ဆီးခဲ့သလို ကျေးရွာတွေရှိ ပြည်သူတွေကိုလည်း သတ်ဖြတ်မှုတွေ ရှိခဲ့ကြောင်းနဲ့ မာန်လည်တိုက်ပွဲမှာလည်း လေကြောင်းပစ်ကူ၊ ဟောင်ဝစ်ဇာ လက်နက်ကြီး ပစ်ကူတွေ များစွာပေးပြီး တိုက်ခိုက်ခဲ့တယ်လို့ သိရပါတယ်။

“မာန်လည်မှာတော့ သူတို့ တပ်ချထာစဉ်မှာ မီးရှို့ခဲ့တာတွေရှိတယ်၊ အိမ်ခြေ ၁၀၀ ဝန်းကျင်ရှိတယ်၊ သတ်ဖြတ်ခံရတာဆိုရင် တံစိုး အဲဒီ ၂ ရွာပါဗျ၊ ပြီးတော့ မြင်းခြံနယ်ထဲက ဗလွန်ရယ်၊ ၅ ယောက်ပါဗျ အသတ်ခံရတာ၊ လက်ဝဲက ၁ ယောက်၊ စုစုပေါင်း ၆ ယောက်”

လို့ နွားထိုးကြီး ပကဖ သတင်းနဲ့ပြန်ကြားရေး တာဝန်ခံက ဆက်လက်ပြောဆိုပါတယ်။ မာန်လည်ရွာတိုက်ပွဲကို နွားထိုးကြီးမြို့နယ် ပြည်သူ့ကာကွယ်ရေးအဖွဲ့ (ပကဖ) နဲ့အတူ မြင်းခြံခရိုင် တပ်ရင်းတပ်ဖွဲ့တွေ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီစစ်ကြောင်းဟာ မြင်းခြံဘက်သို့ ပြန်လည်ဆုတ်ခွာသွားပြီဖြစ်တယ်လို့ သတင်းရရှိပါတယ်။

#BBM#News#UpdateNews#Jumta#PeopledefenseForce#Natogyi#Myingyan

ရခိုင်မြို့သိမ်းတိုက်ပွဲကာလတုန်းက ဖမ်းဆီးရမိထားတဲ့ စစ်သုံ့ပန်းနဲ့ ရဲသုံ့ပန်း မိသားစုဝင်တွေကို ပလက်ဝခရိုင်မှာ အာရက္ခတပ်တော် AA က မနေ့က သြဂုတ် ၂၅ ရက်နေ့မှာ ပြန်လည်လွှတ်ပေးခဲ့တယ်လို့လည်း သိရပါတယ်။

မနေ့က သြဂုတ်လ ၂၅ ရက်၊ နေ့လည် ၁ နာရီအချိန်က စစ်သုံ့ပန်း၊ ရဲသုံ့ပန်း အိမ်ထောင်စု ၁၅ စုက မိသားစုဝင် ၄၄ ယောက်ကို အာရက္ခတပ်တော် AA က (၉) ကြိမ်မြောက်အဖြစ် လွတ်ငြိမ်းချမ်းသာခွင့် အခမ်းအနားတွေပြုလုပ်ကာ လွှတ်ပေးလိုက်တာဖြစ်တယ်လို့ သိရပါတယ်။

“မြို့သိမ်းတိုက်ပွဲတုန်းက ဖမ်းဆီးရမိတဲ့ သုံ့ပန်းတွေကို လွှတ်ပေးလိုက်တာပါ။ ပလက်ဝမြို့မှာလွှတ်ပေးလိုက်တာဖြစ်ပါတယ်။ မိသားစုဝင်အယောက် ၄၀ ကျော်ကို လွှတ်ပေးလိုက်တာပါ”

လို့ AA နဲ့ နီးစပ်တဲ့ စစ်ရေး သတင်ရင်းမြစ်တစ်ဦးက ပြောပါတယ်။ အာရက္ခတပ်တော် AA ဟာ ရခိုင်က မြို့နယ် ၁၄ ခုနဲ့ ချင်းပြည်နယ်၊ ပလက်ဝမြို့နယ်တွေကို သိမ်းပိုက်ထိန်းချုပ်ထားပြီး ထောင်နဲ့ချီတဲ့ စစ်သုံ့ပန်းတွေကိုလည်း ဖမ်းဆီးရမိထားတာ ဖြစ်ပါတယ်။

တိုက်ပွဲကာလအတွင်းမှာ ဖမ်းဆီးရမိထားတဲ့ စစ်သုံ့ပန်းနဲ့ မိသားစုဝင်တွေကို အာရက္ခတပ်တော် AA က စစ်သုံ့ပန်းဆိုင်ရာ ဥပဒေနဲ့အညီစောင့်ရှောက်ထားပြီး လက်ရှိမှာ (၉) ကြိမ်မြောက်အဖြစ် ပြန်လည်လွှတ်ပေးနေတာလည်း ဖြစ်ပါတယ်။

ပြီးခဲ့တဲ့ သြဂုတ်လ ၉ ရက်နေ့ကလည်း တောင်ကုတ်မြို့၊ စကခ ၅ ဌာနချုပ်က ဖမ်းဆီးရမိခဲ့တဲ့ စစ်သုံ့ပန်း မိသားစုဝင် ၁၄၄ ဦးကို အာရက္ခတပ်တော် AA က ပြန်လည် လွှတ်ပေးခဲ့ပါတယ်။

အာရက္ခတပ်တော် AA ဟာ အခုနှစ်ကာလအတွင်းမှာ ဖမ်းဆီးရမိထားတဲ့ စစ်သုံ့ပန်းမိသားစုဝင် ၁၈၀၀ နီးပါးကို လမ်းစရိတ်တွေပေးကာ လွတ်ငြိမ်းချမ်းသာခွင့်နဲ့ လွှတ်ပေးခဲ့ပြီးလည်း ဖြစ်ပါတယ်။

#BBM#News#UpdateNews#AA#ArakanArmy#prisonerofwars