သတင်း

စစ်ကိုင်းတိုင်း၊ချောင်းဦးမြို့နယ်အတွင်း ကင်းပုန်းဝပ်ရန်ထွက်လာတဲ့ စစ်ကောင်စီတပ်သား(၄)ဦးကို တော်လှန်ရေးအင်အားစုတွေဘက်က အသင့်စောင့်ကြိုတိုက်ခိုက်ခဲ့ပြီး စကစတပ်သား(၄)ဦးစလုံးသေဆုံးခဲ့တယ်လို့ Brave Heart Army-BHA အဖွဲ့ထံမှ သိရပါတယ်။

၂၀၂၅ခုနှစ်၊ ဇူလိုင်လ၂၃ရက် မနက် ၅နာရီခွဲလောက်မှာ ကင်းပုန်းဝပ်ရန်အတွက် ချောင်းဦးမြို့ပေါ်မှ စစ်ကောင်စီတပ်သား(၄)ဦးဟာ လက်နက်အပြည့်အစုံဖြင့် မုံရွာ-မန္တလေးကားလမ်းမအတိုင်းထွက်လာစဥ် ချောင်းဦးမြို့၊ဆည်မြောင်းရုံးအနီးမှာ တော်လှန်ရေးအင်အားစုတွေက အသင့်စောင့်ကြိုတိုက်ခိုက်ခဲ့တယ်လို့ သိရပါတယ်။

“သတင်းကြိုရထားလို့စောင့်တွယ်လိုက်တာဗျ။ ကျနော်တို့ပစ်တဲ့အချိန်တော့ သူတို့ဘာမှကိုပြန်မပစ်နိုင်ဘဲ တန်းလျှောကျတာပါ”ဟု BHAအဖွဲ့တာဝန်ခံမှ BBM ကိုပြောပါတယ်။

အဆိုပါတိုက်ခိုက်မှုအတွင်း စစ်ကောင်စီတပ်သား(၄)ဦးယူဆောင်လာတဲ့ ဆိုင်ကယ်(၂)စီး၊ MA-3(၁လက်)၊ MA-11(၃လက်)၊ လက်ပစ်ဗုံး(၃လုံး)၊ ဖုန်း၂လုံး၊ ၅.၅၆ကျည် အတောင့်(၄၀၀) တို့ကိုလည်း သိမ်းဆည်းရရှိခဲ့တယ်လို့သိရပါတယ်။

ဒါ့အပြင် စစ်ကောင်စီအနေနဲ့ ၎င်းတပ်သားများ တိုက်ခိုက်ခံရတာကြောင့် ဇူလှိုင်လ၂၄ရက်(ယမန်နေ့)က ချောင်းဦးအနီးမှာရှိတဲ့ ကျေးရွာတွေကို အင်အား၇၀လောက်နဲ့စစ်ကြောင်းထိုး မီးရှို့တာတွေပြုလုပ်ခဲ့တယ်လို့လည်း သိရပါတယ်။

“တိုက်ခံရပြီး ချောင်းဦးမြို့အနီးနားကရွာတွေကိုတော့စစ်ကြောင်းထိုးပါတယ်ခန့်မှန်းအင်အား 70လောက်နဲ့ထိုးတာပါနေအိမ်တွေလဲမီးရှို့သွားတယ်လို့သိရပါတယ်”ဟု BHAတာဝန်ခံမှဆက်ပြောပါတယ်။

အဆိုပါတိုက်ခိုက်မှုကို Brave Heart Army-BHAအဖွဲ့နဲ့အတူ ချောင်းဦးမြို့နယ် ပကဖ အမှတ်(၁)တိုက်နယ် တိုက်ခိုက်ရေးတပ်စိပ်တို့မှ ပူးပေါင်းဆောင်ရွက်ခဲ့ခြင်းဖြစ်တယ်လို့ သိရပါတယ်။

မန္တလေးတိုင်း၊ သပိတ်ကျင်းမြို့တိုက်ပွဲများပြင်းထန်နေပြီး တော်လှန်ရေးအင်အားစုတွေဘက်မှ သပိတ်ကျင်းရှိ ၄မိုင်၊၅မိုင်၊၆မိုင်နေရာများနဲ့ အခြားနေရာတချို့ကို ပြန်လည်လက်လွှတ်ထားရတယ်လို့ ဒေသခံစစ်ရေးသတင်းရင်းမြစ်တွေထံမှ သိရပါတယ်။

သပိတ်ကျင်းမြို့ကို ၁၀၂၇ စစ်ဆင်ရေးအတွင်း မန္တလေးPDFနဲ့ တော်လှန်ရေးပူးပေါင်းတပ်များက တိုက်ခိုက်ခဲ့တာဖြစ်ပြီး ၂၀၂၄ ခုနှစ် သြဂုတ်လမှာတော့ မြို့ရဲ့နေရာအတော်များများကို ထိန်းချုပ်စိုးမိုးနိုင်ခဲ့ပါတယ်။

စစ်ကောင်စီတပ်ဖွဲ့ဝင်တွေအနေနဲ့ တော်လှန်ရေးတပ်ဖွဲ့တွေရဲ့တိုက်ခိုက်မှုတွေအတွင်း သပိတ်ကျင်းမြို့နယ်အနီးရှိ ၇ မိုင်ကျေးရွာအထိ ဆုတ်ခွါခဲ့ရပြီး ထိုမှတဆင့် အင်အားတွေဖြည့်တင်းကာ သပိတ်ကျင်းမြို့ကို တိုက်ခိုက်လာခဲ့ခြင်းဖြစ်တယ်လို့လည်း သိရပါတယ်။

“၄မိုင် ၅မိုင် ၆မိုင်နဲ့ သပိတ်ကျင်းရဲ့အချို့နေရာတွေကို ကျွန်တော်တို့အဖွဲ့တွေပြန်ဆုတ်ထားရတယ် တိုက်ပွဲတွေကတော့ ပြင်းထန်နေတုန်းပါပဲ တပ်ဖွဲ့တွေ အကောင်းဆုံး ကြိုးစားနေကြပါတယ်”

ဟု ဒေသခံစစ်ရေးအရင်းအမြစ်တစ်ဦးမှ BBM ကိုပြောပါတယ်။ သပိတ်ကျင်းမြို့ဟာ တော်လှန်ရေးအင်အားစုတွေ ထိန်းချုပ်ထားတဲ့ မိုးကုတ်၊မတ္တရာ၊ စဥ့်ကူးမြို့တို့နဲ့ တစ်တန်းတည်းရှိနေပြီး ဧရာဝတီမြစ်ကြောင်းအတိုင်း အထက်ကိုဆန်တက်ရာတွင်လည်း ဖြတ်သန်းသွားရတဲ့မြို့ဖြစ်တာကြောင့် စစ်ရေးဗျူဟာအရ အရေးပါတယ်လို့ သိရပါတယ်။

စစ်ကောင်စီထောက်ခံသူ ဝါဒဖြန့်ချန်နယ်တွေကတော့ သပိတ်ကျင်းမြို့ကို စစ်တပ်မှပြန်လည်ရရှိသွားပြီဆိုပြီး ပုံတွေနဲ့တကွရေးသားဖော်ပြနေပေမဲ့ စစ်ကောင်စီအနေနဲ့ အခုချိန်ထိ တရားဝင်ထုတ်ပြန်တာတွေပြုလုပ်ခြင်းမရှိသေးဘူးလို့လဲ သိရပါတယ်။

တစ်ဖက်မှာလည်း စစ်တပ်အနေနဲ့ ဇူလိုင်လအတွင်းမှာပဲ နောင်ချို၊မိုးဗြဲတို့ကို ပြန်လည်သိမ်းပိုက်နိုင်ခဲ့သလို ဖားကန့်မြို့ပတ်ချာလည်ကို စိုးမိုးနိုင်အောင်အတွက်လည်း ထိုးစစ်ဆင်တိုက်ခိုက်နေတာမျိုး ပြုလုပ်နေတာတွေ့ရပါတယ်။

၂၀၂၅ခုနှစ် နှစ်ကုန်ပိုင်းအတွင်း ရွေးကောက်ပွဲပြုလုပ်မယ်လို့ စစ်ခေါင်းဆောင်ဘက်က တရားဝင်ထုတ်ပြောလာခဲ့တဲ့နောက်ပိုင်း စစ်တပ်အနေဖြင့် ဒရုန်းအပါအဝင် လေကြောင်းတိုက်ခိုက်မှုတွေကို အလွန်အကျွံသုံးပြီး ၎င်းတို့ဆုံးရှုံးထားတဲ့နယ်မြေတွေပြန်လည်ရရှိအောင် ပိုမိုလုပ်ဆောင်လာနေတယ်လို့ မြေပြင်တော်လှန်ရေးအင်အားစုတွေဘက်က ထောက်ပြပြောဆိုတာတွေရှိနေပါတယ်။

စစ်ကောင်စီဘက်မှ အရာရှိ၁ဦးအပါအဝင် ၁၁ဦးသေဆုံး

မန္တလေးတိုင်း၊ တမိုက်သာကျေးရွာမှ မြင်းခြံ-ပုဂံညောင်ဦးလမ်းအတိုင်းထွက်ခွာလာတဲ့ စစ်ကောင်စီတပ်သားအင်အား ၁၅ဦးပါ Alphardကား ၂စီးကို မြင်းခြံခရိုင် အမှတ်(၃)တပ်ရင်းမှ မြင်းခြံ-ပုဂံညောင်ဦးလမ်းဘေး ကားလမ်းတစ်လျှောက်တွင် ကင်းပုန်းဝပ်ပြီးတော့ ခြုံခို ပစ်ခတ်တိုက်ခိုက်ခဲ့ရာ စစ်ကောင်စီဘက်မှ အရာရှိ၁ဦး၊ တပ်သား၂ဦး သေဆုံးပြီး ၂ဦး ဒဏ်ရာရရှိခဲ့ကာ ဒဏ်ရာရ စစ်ကောင်စီတပ်သားတွေနဲ့ သေဆုံး စစ်ကောင်စီတပ်သားအလောင်းတွေ ကိုမြင်းခြံ ဆေးရုံကို ပို့ဆောင်ခဲ့တယ်လို့ သိရှိရပါတယ်။

ဇူလိုင်လ ၁၉ရက်နေ့က တိုက်ခိုက်မှုဖြစ်စဉ်နဲ့ ပတ်သက်ပြီးတော့ တိုက်ခိုက်မှုဖြစ်ပွားခဲ့ရာနေရာကို မြင်းခြံမှ‌ စစ်ကောင်စီရဲ့ သီတာယုမွန်ဦးဆောင်တဲ့ စစ်ကောင်စီတပ်သားတွေနဲ့ ပျူ‌စောထီးအင်အား ၁၅၀ လာရောက်ခဲ့ရာ ဇူလိုင်လ ၂၀ရက် နံနက်၈နာရီအချိန်တွင် မြင်းခြံခရိုင်တပ်ရင်း(၃)လက်ရုံး ဒရုန်းတပ်ဖွဲ့မှ MultiRotor Drone 2 စီးဖြင့် Drop Bomb ၃၄လုံးကြဲချတိုက်ခိုက်ခဲ့ပြီး သီတာယုမွန်ဦးဆောင်စစ်ကြောင်းဘက်မှ ပြန်လည်တိုက်ခိုက်ဖို့ ဒရုန်းဆင်နေတဲ့ နေရာအားကို တိတိကျကျထိမှန်ခဲ့တာကြောင့် စစ်‌ကောင်စီတပ်သားတွေနဲ့ ပျူ ၈ဦးထပ်မံသေဆုံးခဲ့ပြီး ဒရုန်းတွေလည်းပျက်စီးသွားတယ်လို့သိရပါတယ်။

အဲ့ဒီတိုက်ခိုက်မှုဖြစ်စဉ်အပြီး မြေပြင်မှာလည်း တိုက်ပွဲဆက်လက်ဖြစ်ပွားခဲ့ပြီး နံနက်၁၁နာရီ ခွဲအချိန်မှာ သီတာယုမွန်စစ်ကြောင်းဟာ မြင်းခြံဘက်ကိုပြန်လည် ဆုတ်ခွာခဲ့တယ်လို့ သိရှိရပါတယ်။

တိုက်ခိုက်ခံရတဲ့ စစ်ကောင်စီတပ်သားတွေဟာ တစ်မိုက်သာရွာမှာ တပ်စွဲစဉ်အတွင်း ဇူလိုင်လ ၃ ရက်နေ့ကလည်း အပြစ်မဲ့ပြည်သူတစ်ဦးကို သတ်ဖြတ်ခဲ့ပါသေးတယ်။

အဲ့ဒီ တိုက်ခိုက်မှုတွေနဲ့စပ်လျဉ်းပြီးတော့ တောင်သာ ပကဖ တာဝန်ခံ တစ်ဦးကို ဆက်သွယ်မေးမြန်းခဲ့ရာ “ဇူလိုင် ၁၉ ရက်အာဇာနည်နေ့နဲ့ ၊ ဇူလိုင်၂၀ရက်တွေမှာ မြင်းခြံ-ညောင်ဦးလမ်းပိုင်းက အကြမ်းဖက်စခတွေနဲ့ ကျွန်တော်တို့ တော်လှန်ရေးတပ်ဖွဲ့တွေကြား စစ်ရေးတင်းမာထိတွေ့မှုတွေရှိခဲ့ပါတယ်။၁၉ရက်နေ့က တမိုက်သာမှာတပ်စွဲထားတဲ့ စ‌စ်ခွေးနဲ့ပျူခွေးအင်အား ၁၅ယောက်ခန့်ပါတဲ့ Alphard နှစ်စီး မြင်းခြံဘက်ကိုထွက်သွားတယ်လို့ သတင်းရတဲ့အတွက် မြင်းခြံ-ညောင်ဦး လမ်းပိုင်းမှာလှုပ်ရှားနေတဲ့ စစ်ကောင်စီတပ်တွေကို မြင်းခြံခရိုင်အမှတ်(၃)တပ်ရင်းနဲ့ ကျွန်တော်တို့မိတ်ဖက်အင်အားစုတွေ ကင်းပုန်းဝပ် ပျောက်ကြားတိုက်ခိုက်ခဲ့တာပါ။သူတို့ဘက်က တိုက်ခိုက်ခံရတာကို မကျေနပ်လို့ အဲ့နေရာကို သီတာယုမွန်ဦးဆောင်တဲ့ စစ်‌ေ ခွးတွေနဲ့ပြည်သူ့စစ် ပူးပေါင်းပြီး အင်အား ၁၅၀ လောက်နဲ့ပြန်လာတဲ့အတွက် ကျွန်တော်တို့တော်လှန်ရေးအဖွဲ့တွေနဲ့ နှစ်ရက်ဆက်တိုက်ပွဲဖြစ်ပွားခဲ့တာပါ” လို့ BBM ကိုပြောပါတယ်။

၂ရက်တာတိုက်ပွဲအတွင်း စစ်ကောင်စီဘက်မှ အရာရှိတစ်ဦးအပါအဝင် ၁၁ဦးသေဆုံးပြီး ၉ဦးထိခိုက်ဒဏ်ရာ ရရှိခဲ့ပါတယ်။

အဲ့ဒီ တိုက်ခိုက်မှု့မှာ မြင်းခြံခရိုင်တပ်ရင်း(၃)လက်ရုံး ဒရုန်းတပ်ဖွဲ့နဲ့အတူ တောင်သာ ပကဖ၊ မလှိုင် ပကဖတို့ပူးပေါင်းပါဝင်ခဲ့တယ်လို့ မြင်းခြံခရိုင် တပ်ရင်း(၃) ဘက်ကနေလည်း သတင်းထုတ်ပြန်ထားပါတယ်။

အနီးအနားရှိ လေထိုးဆိုင်ရှေ့မှာ ဂိတ်ချပြီး ကုန်တင်ကားနဲ့ လိုင်းကားများကို ဆက်ကြေးတောင်းခံနေ

မန္တလေးတိုင်း‌ဒေသကြီး၊ ညောင်ဦးမြို့နယ်ရှိ စစ်ကောင်စီရဲ့ တောင်ဇင်းစခန်းကို သံချပ်ကာကား ၃စီးနဲ့ စစ်ကား ၃စီး ထပ်မံအင်အား ဖြည့်တင်းထားတယ်လို့ ဒေသခံတစ်ဦးက BBMကိုပြောပါတယ်။

၂၀၂၅ခုနှစ်၊ ဇူလိုင်လ ၂၁ရက်နေ့ မနက် ၁၁နာရီ၀န်းကျင်မှာ ညောင်ဦးမြို့နယ်ရှိ စစ်ကောင်စီရဲ့ တောင်ဇင်းစခန်းကို သံချပ်ကာကား ၃စီးနဲ့ စစ်ကား ၃ စီးထပ်မံအားဖြည့်ထားပြီး အဲ့ဒီရဲစခန်းမြောက်ဘက်မှာရှိတဲ့ ၁ဖာလုံခန့်ရှိတဲ့ လေထိုးဆိုင်အရှေ့မှာ ကုန်တင်ကားတွေနဲ့ လိုင်းကားတွေကို စစ်ကောင်စီ တပ်သားတွေက ဆက်ကြေးတောင်းခံနေတယ်လို့ သိရပါတယ်။

“မနက် မနက်ဆို သူတို့ ဒီ စခန်းရဲ့ မြောက်ဘက် ၁ဖာလုံလောက်ရှိတဲ့ နေရာမှ ဂိတ်ချပြီးတော့ မနေ့က ပိုက်ဆံတွေတောင်းတယ်။ ဒီနေ့လည်း တောင်းတယ်ပေါ့နော်”

လို့ ဒေသခံ၁ဦးက BBMကို ပြောပါတယ်။ လက်ရှိအချိန်မှာ စစ်ကောင်စီဟာ နိုင်ငံနဲ့အဝှမ်း နည်းမျိုးစုံနဲ့ပြည်သူလူထုကို ဒုက္ခပေးနေပြီး ကားဂိတ်တွေမှာ ဆက်ကြေးတောင်းခံတာမျိုးတွေ၊ မထင်ရင် မထင်သလို ပေါ်တာဆွဲတာမျိုးတွေ လုပ်ဆောင်လျက်ရှိနေပါတယ်။

စစ်မှုထမ်းတပ်သားသစ်တွေကိုလည်း ရှေ့ဆုံးမှ အသေခံတိုက်ခိုင်း

ပဲခူးတိုင်း၊သာယာဝတီခရိုင်အတွင်းရှိ မင်းလှမြို့နယ်အပိုင်ထဲမှ တော်လှန်ရေးတပ်ဖွဲ့တွေရှိရာ ခါချဥ်တောင် စခန်းကုန်းကို စစ်ကောင်စီမှ ဒရုန်း(၃)စီးနဲ့ ဗုံးသီးအလွန်အကျွံသုံးကာ တိုက်ခိုက်ခဲ့တယ်လို့ သာယာဝတီခရိုင် တပ်ရင်း၃၈၀၂၊ တပ်ခွဲ၅ ထံမှ သိရပါတယ်။

၂၀၂၅ခုနှစ်၊ ဇူလိုင်လ ၁၄ရက် မနက်၇နာရီခွဲလောက်မှာ အင်အား ၄၀၀ ခန့်နဲ့ စစ်ကောင်စီဘက်မှ ခါချဥ်တောင်စခန်းကို လာရောက်တိုက်ခိုက်ခဲ့ပြီး ညနေ(၄)နာရီလောက်ထိ တိုက်ပွဲပြင်းထန်ကာ စစ်ကောင်စီရဲ့ ဒရုန်းဗုံးသီး၊ လက်နက်ကြီး အဆမတန်အသုံးပြုမှုတွေကြောင့် တော်လှန်ရေးအင်အားစုတွေဘက်က တစ်ယောက်ကျဆုံးခဲ့ပြီး အဆိုပါစခန်းမှဆုတ်ခွါခဲ့ရတယ်လို့သိရပါတယ်။

“စစ်ကောင်စီရဲ့ ဒရုန်းကတော်တော်လေးကောင်းလာတယ်၊ လက်နက်ကြီးကို ကျွန်တော်တို့မမှုဘူး ၊ ခုက ဒရုန်း(၃)စီးနဲ့အပေါ်စီးကနေကို ဗုံးကြဲတာ၊ အဲ့ဒရုန်းကြောင့် ကျွန်တော်တို့ဘက်က ရဲဘော်ဗျတ္တကျဆုံးခဲ့ရတာ”

ဟု သာယာဝတီခရိုင် တပ်ရင်း၃၈၀၂၊တပ်ခွဲ(၅)မှ တာဝန်ရှိသူတစ်ဦးမှ BBM ကိုပြောပါတယ်။ စစ်ကောင်စီ အင်အား၄၀၀ခန့်နဲ့ ထိုးလာတဲ့အဆိုပါတိုက်ပွဲအတွင်း စစ်တပ်ဘက်မှလည်း ထိခိုက်သေဆုံးမှုတွေများခဲ့ပြီး တော်လှန်ရေးတပ်ဖွဲ့တွေထပ်မံလာတိုက်မှာစိုးရိမ်တာကြောင့် အဆိုပါခါချဥ်တောင်စခန်းမှ ဇူလိုင်လ၁၆ရက်နေ့ညပိုင်းမှာပြန်လည်ဆုတ်ခွါသွားခဲ့တယ်လို့လည်း သိရပါတယ်။

ဒါ့အပြင် အဆိုပါခါချဥ်တောင်စခန်းတိုက်ပွဲအတွင်း စစ်ကောင်စီအနေနဲ့ စစ်မှုထမ်းဆင်းသင်တန်းသားတွေကိုရှေ့ဆုံးမှအဓိကထားတက်ခိုင်းပြီး အတင်းဝင်လုံးခိုင်းခဲ့တာကြောင့် စကစဘက်မှ သေဆုံးမှုစာရင်းထဲ စစ်မှုထမ်းဆင်းသင်တန်းသားအများစုဖြစ်ခဲ့တယ်လို့လည်း အဆိုပါတာဝန်ရှိသူမှ ဆက်ပြောပါတယ်။

“စခန်းရပေမဲ့ ၁၆ရက်နေ့ညမှာပဲ ဘန့်ဘွေးရွာကိုပြန်ဆုတ်သွားတယ်၊ အတိုက်ခံရမှာစိုးလို့ စခန်းမချရဲဘူး၊ ပြီးတော့သူတို့ဘက်က တိုက်ပွဲထဲအတင်းဝင်လုံးတာ၊ စစ်မှုထမ်းတပ်သားသစ်တွေကိုရှေ့ကနေ အသေခံတက်ခိုင်းတာ၊ပစ်နေတဲ့ကြားက တက်ချလာကြတာတွေ၊ အဲ့ကြောင့်အသေများတာ”

စစ်ကောင်စီအနေနဲ့ယခုနောက်ပိုင်း အဆင့်မြင့်ဒရုန်းတွေကို ဖောဖောသီသီအသုံးပြုလာသလိုစစ်မှုထမ်းသင်တန်းဆင်း တပ်သားသစ်တွေကိုလည်း ရှေ့မှအသေခံတက်ခိုင်းတဲ့နည်းဗျူဟာမျိုး မကြာခဏလုပ်ဆောင်နေတယ်လို့ တော်လှန်ရေးအင်အားစုတွေဘက်က ပြောဆိုမှုတွေရှိနေပါတယ်။

ရှမ်းပြည်နယ်မြောက်ပိုင်းရှိ သိန္နီမြို့ ဈေးဟောင်း နေရာမှာ MNDAA က ဆေးရုံသစ်ကြီး ဆောက်လုပ်ဖို့ ပြင်ဆင် နေပြီဖြစ်ကြောင်း ဒေသခံတွေဆီက သိရပါတယ်။

“ဈေးသစ် ပြန်လုပ်မယ်။ ဆေးရုံပြန်ဆောက်မယ်လို့ သိရတယ်။ ဆေးရုံသစ်က ဈေးဟောင်းနေရာမှာ လုပ်မယ်ကြားတယ်။ ဆေးရုံသစ်ကတော့ ‌ပရောဂျက် ဆွဲပြီးပြီ။ ဈေးသစ် စီမံကိန်း စနေကြတယ်။”

လို့ ဒေသခံ အမျိုးသား တစ်ဦးက ပြောပါတယ်။ လက်ရှိ ဈေးသစ်ကို နမ့်စလပ်ဘက် သွားလမ်း မြို့အထွက်ဘက်မှာ ယာယီ လုပ်ပေးထားတယ်။

မိုင်းလီနား‌ရယ်၊ သိန္နီမြို့ဝန်းကျင်ရယ်၊ မြို့အဝင် ကြာကန်နား တွေမှာရယ် မြေနေရာ တော်တော်များများ အဆောက်အဦးကြီးတွေ ဆောက်ဖို့ မြေပြင်နေကြတယ်လို့ သူက ပြောပါတယ်။

“သိန္နီမြို့ ဈေးဟောင်းကို သိန္နီ ဆေးရုံဆောက်မယ်တဲ့။ ဆောက်တော့မယ်။ အလယ်မှာက ကားပါကင်၊ ပတ်ပတ်လည်က ဆေးရုံ။”

လို့ ဒေသခံ အမျိုးသမီး တစ်ဦးက ပြောပါတယ်။ သိန္နီမြို့နယ်မှာ လက်ရှိ အခြား လုပ်ငန်း‌တွေ အများအပြား လုပ်မယ့် သဘောရှိပြီး။အခြေခံ အဆောက်အဦးတွေ ပြုလုပ်ဖို့ ပြင်ဆင်နေတာတွေလည်း ‌တွေ့နေရတယ်လို့ ဒေသခံတွေက ပြောပါတယ်။

သိန္နီမြို့ မြို့မဈေး ဟောင်းကို ပြီးခဲ့တဲ့ ၂၀၂၄ ဇူလိုင်လ ၁၈ ရက်နေ့မှာ စစ်ကောင်စီက ဗုံးကြဲ ဖျက်ဆီးခဲ့တာ ဖြစ်ပါတယ်။

သိန္နီမြို့ကို ပြီးခဲ့တဲ့ ၂၀၂၄ ခုနှစ် ဇန်နဝါရီလက MNDAA နဲ့ ပူးပေါင်း တပ်ဖွဲ့က သိမ်းပိုက်ထိန်းချုပ်ခဲ့တာ ဖြစ်ပါတယ်။