သတင်း

အဆိုပါစခန်းကို တော်လှန်ရေးအင်အားစုတွေကပိတ်ဆို့ထားပြီး စစ်တပ်မှလည်း လေကြောင်းပစ်ကူတွေပေးနေ

ကရင်ပြည်နယ်၊တပ်မဟာ(၆)နယ်မြေအတွင်း ထိုင်း-မြန်မာနယ်စပ်အနီးရှိ စစ်ကောင်စီရဲ့ဝေါလေဗျူဟာတပ်စခန်းမှ လက်နက်တိုက်ကို Force For Federal Democracy-FFD ဒရုန်းတပ်ဖွဲ့နဲ့ တပ်မဟာ(၆) ဒရုန်းတပ်ဖွဲ့တို့ပူးပေါင်းကာ တိုက်ခိုက်ဖောက်ခွဲနိုင်ခဲ့တယ်လို့ FFD အဖွဲ့မှထုတ်ပြန်ထားပါတယ်။

KNU တပ်မဟာ(၆)နယ်မြေအတွင်းရှိ အဆိုပါစစ်စခန်းကို တော်လှန်ရေးအင်အားစုတွေဘက်က ပိတ်ဆို့တိုက်ခိုက်မှုတွေပြုလုပ်နေပြီး စစ်ကောင်စီဘက်မှလည်း စခန်းမကျစေရေးအတွက် လေကြောင်းပစ်ကူတွေပေးနေတယ်လို့ သိရပါတယ်။

“ဝေါလေကိုက ဝိုင်းပိတ်ထားတုန်းပါ၊ စကစ ဘက်က လေကြောင်းဗုံးကျဲတာတွေလုပ်ပါတယ်၊ ဒီမနက်ပဲတစ်ခေါက်လာကြဲတယ်”

ဟု မြေပြင်ရဲဘော်တစ်ဦးမှ BBM ကိုပြောပါတယ်။ KNLA ဦးဆောင်တဲ့တော်လှန်ရေးအင်အားစုတွေအနေနဲ့ တပ်မဟာ(၆)နယ်မြေအတွင်းရှိစစ်ကောင်စီတပ်စခန်းတွေကို မေလလောက်မှစတင်ပြီး ဆက်တိုက်တိုက်ခိုက်သိမ်းပိုက်ခဲ့ရာ စကစ တပ်စခန်း(၈)ခုအထိ သိမ်းပိုက်နိုင်ခဲ့ပြီလို့လည်းသိရပါတယ်။

အဆိုပါစခန်းသိမ်းတိုက်ပွဲတွေအတွင်းစစ်ကောင်စီတပ်သားအချို့ကို သုံ့ပန်းအဖြစ်ဖမ်းဆီးရရှိခဲ့သလို စစ်လက်နက်ပစ္စည်းအမြောက်အများကိုလည်း သိမ်းဆည်းနိုင်ခဲ့တယ်လို့ မြေပြင် တော်လှန်ရေးတပ်ဖွဲ့တွေရဲ့ထုတ်ပြန်ချက်အရ သိရပါတယ်။

ရခိုင်ပြည်နယ်၊ မောင်တောမြို့မြောက်ပိုင်းမှာ ဝင်ရောက်နေရာယူနေကြတဲ့ ARSA လက်နက်ကိုင် အဖွဲ့တွေကို အခုရက်ပိုင်းမှာ အာရက္ခတပ်တော် AA က လိုက်လံရှင်းလင်းနေတယ်လို့ AA နဲ့ နီးစပ်တဲ့ စစ်ရေးသတင်းရင်းမြစ်တွေဆီက သိရပါတယ်။

မွတ်ဆလင်လက်နက်ကိုင်တပ်ဖွဲ့ ARSA အဖွဲ့ဟာ မောင်တောမြို့မြောက်ပိုင်း ဘင်္ဂလားဒေရ်ှ့နယ်စပ်ဒေသတွေ ဖြစ်တဲ့ မီးတိုက်၊ နံ့သာတောင်၊ ကျီးကန်း စတဲ့ ကျေးရွာအနီးအနားတွေမှာ စခန်းချနေထိုင်မှုတွေရှိလာတာကြောင့် အာရက္ခတပ်တော် AA က လိုက်လံရှင်းမှုတွေရှိတယ်လို့ AA စစ်ရေးသတင်းရင်းတစ်ဦးက ပြောပါတယ်။

“အရင်တုန်းက မေယုတောင်ကြောတစ်လျှောက်မှာ ARSA အဖွဲ့တွေကို လိုက်လံရှင်းလို့ ကင်းစင်သွားပါပြီ။ အခုတော့ မောင်တောနဲ့ ဘင်္ဂလားဒေရှ့်နယ်စပ်အနီးအနားတွေမှာ ARSA အဖွဲ့တွေက ဝင်ရောက်လာတာတွေရှိတော့ AA က နယ်မြေရှင်းလင်းရေးတွေလုပ်တဲ့အခါ တိုက်ပွဲတွေ ဖြစ်ကြတယ်။ARSA အဖွဲ့တွေက ထွက်ပြေးလွတ်မြောက်မှုတွေလည်း ရှိတယ်”

လို့ AA စစ်ရေးသတင်းရင်းမြစ်က ဆက်ပြောပါတယ်။ အဆိုပါ ARSA အဖွဲ့တွေ ထွက်ပြေးလွတ်မြောက်မှုတွေရှိနေတာကြောင့် မောင်တောမြို့နယ်က ဒေသခံတွေမှာ သွားရေးလာရေး သတိရှိကြဖို့လိုအပ်တယ်လို့လည်း အဆိုပါစစ်ရေးသတင်းရင်းမြစ်တွေက ဆိုပါတယ်။

ARSA, ARA, RSO မွတ်ဆလင်လက်နက်ကိုင်တွေဟာ မောင်တောမြောက်ပိုင်းရှိ မေယုတောင်တန်းနဲ့ ဝေလာတောင်တန်းတစ်လျှောက်မှာ စစ်ရေးလှုပ်ရှားမှုတွေရှိပြီး ဒေသခံအရပ်သားတွေကို ခြုံခိုပစ်ခတ်တာ၊ ဖမ်းဆီးသတ်ဖြတ်တာတွေကို လုပ်ဆောင်လေ့ရှိတယ်လို့ မောင်တော ဒေသခံတွေက ဆိုပါတယ်။

အဲဒီလို မွတ်ဆလင် လက်နက်ကိုင်အဖွဲ့တွေက အရပ်သားပြည်သူတွေကို ဖမ်းဆီးသတ်ဖြတ်တာတွေ လုပ်ဆောင်နေတာကြောင့် ဘင်္ဂလားဒေရှ့်နယ်စပ်နဲ့ ကုန်ရောင်းကုန်ဝယ် လုပ်နေကြတဲ့ ဒေသခံတစ်ချို့မှာ စိုးရိမ်စိတ်တွေနဲ့ ခရီးသွားလာနေကြတယ်လို့လည်း ဆိုပါတယ်။

“ဒီဖက်မှာကတော့ တစ်ရွာနဲ့ တစ်ရွာခရီးသွားမယ်ဆိုရင်လည်း ကြောက်လန့်နေရတယ်။ ဘယ်ကနေပေါ်လာပြီး ပစ်သွားမှာကိုလည်း စိုးရိမ်နေရတယ်။ ဒေသခံတွေကတော့ ပိုပြီးတော့ စိုးရိမ်မှုတွေရှိတာပေါ့။ ကျနော်တို့ကလည်း မောင်တောကနေ ကုန်ပစ္စည်းတွေသွားဝယ်ရင်လည်း လမ်းမှာတစ်ခုခု ဖြစ်မှာကို စိုးရိမ်နေရတယ် ”

လို့ မောင်တောမြို့မှာ ကုန်ရောင်းကုန်ဝယ် လုပ်ကိုင်နေတဲ့ ဘူးသီးတောင် ဒေသခံ တစ်ဦးက ပြောပါတယ်။ အလားတူ ပြီးခဲ့တဲ့ရက်ပိုင်းကလည်း ARSA တပ်ဖွဲ့ဝင်တွေ တပ်စွဲနေရာယူထားတဲ့ ဝေလာတောင်အနီးတဝိုက်က နေရာတွေကို အာရက္ခတပ်တော် AA က လိုက်လံရှင်းလင်းခဲ့ရာ ARSA တပ်ဖွဲ့ဝင် အကုန်လုံး ထွက်ပြေးလွတ်မြောက် သွားကြတယ်လို့ AA စစ်ရေးသတင်းရင်းမြစ်က ပြောပါတယ်။

ARSA, RSO, ARA မွတ်ဆလင် လက်နက်ကိုင် တပ်ဖွဲ့ဝင်တွေဟာ အာရက္ခတပ်တော် AA တိုက်ခိုက်ဖို့အတွက် တစ်ဖက်ဘင်္ဂလားဒေရှ့်နိုင်ငံက ဒုက္ခသည်စခန်းမှာ လူသစ်စုဆောင်းတာတွေ၊ စစ်သင်တန်းပေးတာတွေရှိနေပြီးတော့ လက်ရှိ ARSA တပ်ဖွဲ့ဝင်အင်အားတွေမှာ ၃,၀၀၀ ခန့်ရှိနေပြီးလို့လည်း ရခိုင်နိုင်ငံရေးသမားတွေက သုံးသပ်နေကြပါတယ်။

စခန်းတွင်းရှိစစ်ကောင်စီတပ်သားများထိုင်းဘက်ခြမ်းသို့ထွက်ပြေး

ကရင်ပြည်နယ်၊မြဝတီမြို့အနီးရှိ ထိုင်း-မြန်မာနယ်စပ်အနီးက စစ်ကောင်စီတပ်ထိုင်ထားတဲ့ ဥကရစ်ထစခန်းကို KNLAနဲ့တော်လှန်ရေးမဟာမိတ်

ပူးပေါင်းတပ်တွေက ဒီနေ့ နေ့လယ်ပိုင်းမှာသိမ်းပိုက်ရရှိခဲ့တယ်လို့ ဒေသခံစစ်ရေးသတင်းရင်းမြစ်တွေအရသိရပါတယ်။

KNLA နဲ့တော်လှန်ရေးအင်အားစုတွေကဥကရစ်ထ စခန်းကို ၂၀၂၂ခုနှစ်အတွင်းက ပထမအကြိမ်တိုက်ခိုက်ခဲ့ဖူးပြီး ထိုစဥ်က စခန်းရဲ့နေရာအချို့ကိုသာသိမ်းနိုင်ခဲ့ပေမဲ့ အခုဒုတိယအကြိမ်မှာတော့ စခန်းကုန်းတစ်ခုလုံးသိမ်းပိုက်နိုင်ခဲ့တာဖြစ်တယ်လို့သိရပါတယ်။

“ဥကရစ်ထ ရသွားပြီဆိုတာ ဟုတ်တယ်နော်၊ ကျန်တာက ထုတ်ပြန်လိမ့်မယ်”

ဟု မြေပြင်ရဲဘော်တစ်ဦးမှလည်း BBM ကိုပြောပါတယ်။အဆိုပါ ဥကရစ်ထစခန်းကို တော်လှန်ရေးအင်အားစုတွေက ၂၀၂၅ခုနှစ် ဇွန်လမှာစတင်

တိုက်ခိုက်ခဲ့တာဖြစ်ပြီး စစ်ကောင်စီဘက်မှ လေကြောင်းပစ်ကူအမြောက်အများအသုံးပြုနေတဲ့ကြားမှ ဇူလိုင်လ၁၂ရက်နေ့ နေ့ခင်းမှာအပြီးသတ်သိမ်းနိုင်ခဲ့တာဖြစ်တယ်လို့သိရပါတယ်။

ဒါ့အပြင်အဆိုပါတိုက်ပွဲအတွင်း စစ်ကောင်စီတပ်သားအမြောက်အများ ထိုင်းနိုင်ငံအတွင်းသို့ဝင်ပြေးသွားကြပြီး တော်လှန်ရေးအင်အားစုတွေဘက်က နယ်မြေရှင်းလင်းမှုတွေဆက်လက်လုပ်ဆောင်နေတယ်လို့ ကနဦးသိရှိရပါတယ်။

အဆိုပါဗိုလ်မှူးရဲ့ အီကွေးမန့်နဲ့ MA-5သေနတ်ကိုပါ သူ့လက်အောက်မှဖြုတ်ယူသွားလို့သိရ

စစ်ကိုင်းတိုင်း၊ရွှေဘိုမြို့နယ်ရှိ စစ်ကောင်စီဗျူဟာကုန်း(၃)ကုန်းနဲ့ ပျူရွာတစ်ရွာကိုသိမ်းပိုက်နိုင်ခဲ့တဲ့ တိုက်ပွဲအတွင်း တော်လှန်ရေးတပ်ဖွဲ့တွေဘက်က အရှင်ဖမ်းဆီးရမိခဲ့တဲ့ စစ်ကောင်စီဗိုလ်မှူးမှာ တိုက်ပွဲအတွင်း ဒဏ်ရာရရှိခဲ့တာကြောင့် ၎င်းရဲ့တပ်ဖွဲ့ဝင်များက ချန်ထားခဲ့တာဖြစ်တယ်လို့ သိရပါတယ်။

၂၀၂၅ခုနှစ် ဇူလိုင်လ(၄)ရက်နေ့မနက်ပိုင်းမှာ ရွှေဘိုမြို့နယ်၊ ကျောက်မြောင်းမြို့၊ ဟင်္သာကြီးပျူရွာမှာရှိတဲ့ စစ်တပ်စခန်းကို တော်လှန်ရေးတပ်ဖွဲ့တွေက တိုက်ခိုက်သိမ်းပိုက်နိုင်ခဲ့ကာ အဆိုပါစခန်းမှ ဆုတ်ပြေးသွားတဲ့ စစ်ကောင်စီဗိုလ်မှူး ချမ်းလွင်မောင်ကိုလည်း အရှင်ဖမ်းဆီးနိုင်ခဲ့တယ်လို့ သိရပါတယ်။

“တိုက်ပွဲဖြစ်တော့ ဒီကောင်တွေက ဆုတ်ပြေးတာ၊အဲ့မှာ ခုမိတဲ့ဗိုလ်မှူးက ဒဏ်ရာရထားတယ်၊ ဒဏ်ရာရသွားတော့၊ မြစ်ချောင်းပေါ့၊ ဧရာဝတီမြစ်ပေါက်ကိုကျော်ရမှာ၊ ကျော်ရမှာဆိုတော့ ဒီကောင်က မကျော်နိုင်တာ မကျော်နိုင်တဲ့အခါမှာ သူ့ရဲ့တပည့်က သူ့ရဲ့အီကွေးမန့်ရယ်၊ MA-5ရယ်ကိုယူသွားပြီး ပြန်လာခေါ်လှည့်မယ်လို့ပြီးထားသွားခဲ့တာပါ”

ဟု တိုက်ပွဲအတွင်းပါဝင်သူ ရွှေဘိုခရိုင်၊ အမှတ်(၁၅)တပ်ရင်း၊တပ်ရင်းမှူးဗိုလ်ကောက်ရိုးမှ BBM ကိုပြောပါတယ်။အရှင်ဖမ်းမိခဲ့တဲ့ အဆိုပါဗိုလ်မှူးမှာ တပ်မ(၃၃)လက်အောက်ခံ ၊ ကျောက်မြောင်းမြို့အခြေစိုက် ခမရ(၁၂)မှ ဒုတပ်ရင်းမှူးအဆင့်ရှိသူဖြစ်ပြီး ၎င်းကျူးလွန်ခဲ့တဲ့ ပြစ်မှုအချို့ကိုလည်း တော်လှန်ရေးတပ်ဖွဲ့တွေဘက်က စစ်ဆေးဖော်ထုတ်နေတယ်လို့လည်းသိရပါတယ်။

ဒါ့အပြင် ဒဏ်ရာရပြီး ချောင်းရိုးမှာပုန်းနေတဲ့အဆိုပါဗိုလ်မှူးကို ၎င်းရဲ့လက်အောက်ခံအဖွဲ့တွေက အင်အား(၄၀)ခန့်လောက်ဖြင့် ဇူလိုင်လ(၅)ရက်နေ့က ပြန်လာခေါ်ပေမဲ့ တော်လှန်ရေးတပ်ဖွဲ့တွေရဲ့ တိုက်ခိုက်မှုကြောင့် အဆိုပါစစ်ကြောင်းတစ်ခုလုံးလည်း စစ်ကြောင်းပျက်ကာ ဆုတ်ခွါထွက်ပြေးသွားရတယ်လို့ သိရပါတယ်။

“ဒီဗိုလ်မှူးကို ထားခဲ့တဲ့ သူ့တပည့်တွေက အင်အား(၄၀)လောက်စုပြီးလာခေါ်သေးတယ်၊ ကျွန်တော်တို့နဲ့တိုက်ပွဲဖြစ်တော့ အဲ့အဖွဲ့တွေလည်း ပြန်ပြေးသွားရတယ်၊ အစောက တော်တော်နဲ့သူ့ကိုမတွေ့ဘူး ရှင်းလင်းရေးလုပ်ရင်း ဗေဒါနဲ့ကိုင်းဘုတ်ကြားထဲမှာပုန်းနေရင်း ရေမွန်းလာလို့ ထတဲ့အချိန်မှ တွေ့ပြီးဖမ်းလာတာ”

ဟု ဗိုလ်ကောက်ရိုးမှဆက်ပြောပါတယ်။ ရွှေဘိုမြို့နယ်အတွင်း ဇူလိုင်လ၄ရက်နေ့မှ ၇ရက်နေ့အထိ အဆိုပါဗိုလ်မှူးကိုဖမ်းဆီးနိုင်ခဲ့တဲ့ ဟင်္သာကြီးပျုရွာတိုက်ပွဲအပြင်၊ ဘိုးနတ်တောင်ဗျူဟာစခန်း၊ တောင်လှဗျူဟာစခန်းနဲ့ ဘိုးထွန်းကျော်ဗျူဟာစခန်းတို့ကို ရွှေဘိုခရိုင် တပ်ရင်း(၁၅၊၁၈၊၂၃၊၂၆၊၁၇၀၁၊၉၇၀၆)နဲ့ တိုက်နယ်(၄)ရွှေဘိုကျားကြီး(ပကဖ)တို့ကပူးပေါင်းသိမ်းပိုက်နိုင်ခဲ့ပြီး စစ်လက်နက်ပစ္စည်းအချို့ကိုလည်း သိမ်းဆည်းရရှိခဲ့တယ်လို့ သိရပါတယ်။

🟥လားရှိုးမြို့တွင်းကိုလည်း စစ်အင်အားအလုံးအရင်းပို့ထားပြီး အရေးကြီးနေရာများမှာနေရာယူထား

ရှမ်းပြည်နယ်မြောက်ပိုင်း၊ လားရှိုးမြို့အဝင်၊ ပြည်ထောင်စုလမ်းမကြီးအနီးရှိ ခလရ(၄၁) တပ်ရင်းအတွင်းမှာ စစ်ကောင်စီအနေနဲ့ ဟောင်ဝှစ်ဇာလက်နက်ကြီးများကို ပြန်လည်တပ်ဆင်နေရာချထားတာတွေပြုလုပ်နေတယ်လို့ ဒေသခံစစ်ရေးသတင်းရင်းမြစ်တွေအရ သိရပါတယ်။

ကိုးကန့်တပ်ဖွဲ့ (MNDAA)သိမ်းပိုက်ထားတဲ့ လားရှိုးမြို့ကို တရုတ်ရဲ့ကြားဝင်စေ့စပ်မှုဖြင့်စစ်ကောင်စီဟာ ၂၀၂၅ ခုနှစ်၊ ဧပြီလအတွင်းမှာပြန်လည်ရရှိပြီးနောက် တပ်နေရာချထားတာတွေ၊ စစ်လက်နက်ပစ္စည်းပြန်လည်ဖြည့်တင်းတာတွေပြုလုပ်ခဲ့ပြီး အခုချိန်မှာတော့ ဟောင်ဝှစ်ဇာလက်နက်ကြီးတွေပါ ပြန်လည်တပ်ဆင်နေတယ်လို့ သိရပါတယ်။

ဒါ့အပြင် အဆိုပါဟောင်ဝှစ်ဇာလက်နက်ကြီးတွေဟာ တော်လှန်ရေးအင်အားစုတွေ သိမ်းပိုက်ထိန်းချုပ်ထားတဲ့ ရှမ်းမြောက်ရှိ ကျောက်မဲ၊သီပေါမြို့နယ်တွေဘက်ကို ဦးတည်ချိန်ရွယ်တပ်ဆင်ထားတယ်လို့လည်း သိရပါတယ်။

” ခလရ(၄၁)ထဲမှာ ဟောင်ဝှစ်ဇာတွေပြန်ထောင်ထားတာတွေ့ရတယ်၊ ချိန်ထားတာတော့ ကျောက်မဲ၊သီပေါတစ်ကြောကို ချိန်ထားတာပဲ”

ဟု ဒေသခံစစ်ရေးသတင်းရင်းမြစ်တစ်ဦးမှ BBM ကိုပြောပါတယ်။ ဒါတင်မက စစ်ကောင်စီအနေနဲ့ ၎င်းတို့စစ်အုပ်ချုပ်ရေးတည်ရှိရာ တန့်ယန်းမြို့မှတဆင့် လားရှိုးကိုလည်း မြေပြင်စစ်အင်အားများစေလွှတ်နေပြီး လားရှိုးအတွင်းရှိခလရ(၄၁)၊ ထောက်ပို့(၆၂၆)တပ်၊ စရဖ တပ်တွေမှာ နေရာချထားပေးနေတယ်လို့လည်း သိရပါတယ်။

MNDAAနဲ့မဟာမိတ်တော်လှန်ရေးတပ်ဖွဲ့တွေ တိုက်ခိုက်ခဲ့တဲ့ လားရှိုးမြို့သိမ်းတိုက်ပွဲအတွင်း မြို့တွင်းရှိ စစ်ကောင်စီတပ်စခန်းအတော်များများပျက်စီးခဲ့ရပြီး အခုချိန်ထိပြန်လည်ပြင်ဆင်
နိုင်ခြင်းမရှိသေးဘူးလို့လည်း ဒေသခံသတင်းရင်းမြစ်တွေထံမှသိရပါတယ်။

ဒါ့အပြင် လားရှိုးမြို့ကို စစ်အင်အားဖြည့်တင်းဖို့ရောက်လာတဲ့ စစ်ကောင်စီတပ်သားအများစုဟာ တပ်ရင်း၊တပ်ဖွဲ့တွေရဲ့ဘတ်တံဆိပ်မပါဘဲ မြန်မာနိုင်ငံအလံဘတ်တံဆိပ်သာအဓိကတပ်
ဆင်ထားကြပြီး လားရှိုးရှိ စစ်ရေးအရအရေးပါတဲ့နေရာများမှာလည်း ချက်ချင်းတပ်စွဲနေရာယူထားတာတွေပြုလုပ်နေတယ်လို့ အဆိုပါသတင်းရင်းမြစ်မှဆက်ပြောပါတယ်။

“ခုဝင်လာတဲ့ စကစ အဖွဲ့တွေက တပ်ရင်း၊တပ်ဖွဲ့တွေရဲ့ဘတ်တံဆိပ်မပါဘူး၊ မြန်မာအလံဘတ်ပဲပါကြတာ၊ ဘာအဖွဲ့တွေမှန်းလဲမသိဘူး၊ အကြမ်းဖက်နှိမ်နှင်ရေးအဖွဲ့တွေလားဆိုတော့လဲ မဟုတ်ပြန်ဘူး၊ သူတို့ကရောက်တာနဲ့ အရင်လားရှိုးပြည်သူ့စစ်တွေလုံခြုံရေးယူထားတဲ့ အရေးကြီးနေရာတွေအကုန်ကို နေရာယူတပ်စွဲကြနေတာတော့တွေ့ရတယ်”

လို့ ဒေသခံတစ်ဦးကပြောပါတယ်၊။ စစ်ကောင်စီအနေနဲ့ ၁၀၂၇ စစ်ဆင်ရေးအတွင်း ၎င်းတို့ဆုံးရှုံးလိုက်ရတဲ့ လားရှိုးအပါအဝင် သိန္နီမြို့သာမက မန္တလေး-မူဆယ် လမ်းပိုင်းရှိ တော်လှန်ရေးတပ်ဖွဲ့တွေထိန်းချုပ်ထားတဲ့နေရာတွေအားလုံးကိုတရုတ်အကူအညီဖြင့် MNDAAထံမှ ပြန်လည်တောင်းယူနေတယ်လို့ သိရပြီး ဆွေနွေးညှိနှိုင်းမှုတွေပြုလုပ်နေတယ်လို့လည်း သိရပါတယ်။

🟥တော်လှန်ရေးအင်အားစုတွေဘက်မှ စစ်ရေးနေရာတချို့ကို ခေတ္တလက်လွှတ်ပေးထားရ

ရှမ်း-ကရင်နီနယ်စပ် မိုးဗြဲမြို့တိုက်ပွဲအတွင်း စစ်ကောင်စီအနေနဲ့ ပအိုဝ်အမျိုးသားအဖွဲ့ချုပ် (PNO/PNA)တပ်ဖွဲ့ဝင်တွေနဲ့ ပြည်သူ့စစ်မှုထမ်းသင်တန်းဆင်း တပ်သားတွေကို အမြောက်အများအသုံးချပြီးအတင်းဝင်လုံးတဲ့အပြင် လေကြောင်း၊လက်နက်ကြီးများလည်း အဆမတန်အသုံးပြု တိုက်ခိုက်နေတာကြောင့် တော်လှန်ရေးအင်အားစုတွေအနေနဲ့ မိုးဗြဲမြို့ရှိအချို့နေရာများကို ခေတ္တလက်လွှတ်ပေးထားရတယ်လို့ ဒေသခံသတင်းရင်းမြစ်တွေထံမှသိရပါတယ်။

အဆိုပါ မိုးဗြဲမြို့ကို တော်လှန်ရေးအင်အားစုများက ၂၀၂၃ခုနှစ် နိုဝင်ဘာလအတွင်း တိုက်ခိုက်သိမ်းပိုက်နိုင်ခဲ့တာဖြစ်ပြီး မိုးဗြဲဆည်ဘေးရှိ ခမရ(၄၂၂) ဒေသအခေါ် ဆည်စောင့်တပ် မှလွဲပြီး ကျန်နေရာအားလုံးကိုစိုးမိုးထိန်းချုပ်နိုင်ခဲ့တယ်လို့ သိရပါတယ်။

စစ်ကောင်စီအနေနဲ့ ကလည်း တော်လှန်ရေးအင်အားစုတွေထိန်းချုပ်ထားတဲ့မိုးဗြဲမြို့ကို ၎င်းတို့ရဲ့မဟာမိတ်နယ်မြေကျွမ်းကျင်သူ PNO တပ်ဖွဲ့တွေအပါအဝင် အင်အားအလုံးအရင်းနဲ့၂၀၂၄ခုနှစ် နိုဝင်ဘာလလောက်ကစတင်ထိုးစစ်ဆင်လာပြီး တိုက်ပွဲတွေပြင်းထန်ခဲ့တယ်လိုသိရပါတယ်။

“ခုက ပြည်သူ့စစ်မှုထမ်းဆင်းတွေကော၊ PNO တွေကော အင်အားလဲတော်တော်များတယ်၊ အတင်းဝင်ဝင်လုံးတာ”

ဟု ဒေသခံစစ်ရေးသတင်းရင်းမြစ်တစ်ဦးက BBM ကိုပြောပါတယ်။ ဒါ့အပြင် စစ်ကောင်စီအနေနဲ့ မိုးဗြဲမြို့ပြန်လည်ရရှိရေးအတွက် မြေပြင်စစ်ကြောင်းတွေသာမက လေကြောင်း၊ဒရုန်းနဲ့ လက်နက်ကြီးတွေကိုလည်း အဆမတန်အသုံးပြုတိုက်ခိုက်နေတာကြောင့် မိုးဗြဲမြို့ရှိနေရာတချို့ကို တော်လှန်ရေးအင်အားစုတွေဘက်က ခေတ္တလက်လွှတ်လိုက်ရတယ်လို့လည်း သိရပါတယ်။

” စကစက လက်နက်ကြီးဒရုန်းတွေနဲ့ပစ်တာတွေများတယ်၊ ခု စစ်ရေးနေရာတချို့ကို ပြန်ဆုတ်ပေးထားရတယ်၊ မိုးဗြဲရဲစခန်းအဟောင်းထိလည်း ဒီကောင်တွေထိုးလာနေတယ်”

ဟု အဆိုပါ သတင်းရင်းမြစ်မှဆက်ပြောပါတယ်။ တော်လှန်ရေးအင်အားစုတွေအနေနဲ့ ယခုရက်ပိုင်းအတွင်း မိုးဗြဲမြို့ကနေရာတချို့ကို စွန့်လွှတ်ထားရတာမှန်ပေမဲ့လည်း မြို့တစ်ခုလုံးကို လက်လွှတ်ထားရတာမျိုးတော့မရှိသေးဘူးလို့လည်း BBM မှ ကနဦးစုံစမ်းသိရှိထားရပါတယ်။

မိုးဗြဲမြို့ဟာ ကရင်နီပြည်နယ်မြို့တော်လွိုင်ကော်နဲ့ ကီလိုမီတာအားဖြင့် ၁၃၀ကျော်သာဝေးတဲ့မြို့ဖြစ်တဲ့အပြင် တော်လှန်ရေးအင်အားစုတွေထိန်းချုပ်ထားတဲ့အနီးနားကမြို့တွေကိုလည်း လက်နက်ကြီးဖြင့် ခြိမ်းခြောက်နိုင်တဲ့အနေအထားရှိတာကြောင့် စစ်ကောင်စီအနေနဲ့ အတင်းအကြပ်ထိုးစစ်ဆင်နေခြင်းဖြစ်ပြီး တော်လှန်ရေးအင်အားစုတွေအနေနဲ့ကလည်း မြို့တစ်ခုလုံးလက်မလွှတ်ရရေးအတွက် ဆက်လက်တိုက်ခိုက်နေတယ်လို့သိရပါတယ်။