စစ်ရေး

သတင်း – ခက်ဆစ်

ကရင်ပြည်နယ်၊ ‌ကော့ကရိတ်မြို့နယ်မှာ ၂၈ နှစ်ကြာလက်လွှတ်ခဲ့ရပြီး စစ်ကောင်စီတပ်စွဲထားတဲ့ ထီးကပလယ်စခန်းကို KNLA ၊ KNDO နဲ့ PDF ပူးပေါင်းတပ်တွေက ဇွန်လ ၂၂ ရက်၊ ညနေပိုင်းမှာ တိုက်ခိုက်သိမ်းပိုက်ခဲ့တယ်လို့ KNU ဗဟိုက ဒီနေ့ထုတ်ပြန်ပါတယ်။

မာနယ်ပလော ဌာနချုပ်မှ ဆုတ်ခွာရပြီးနောက် ထီးကပလယ်စခန်းကို ၁၉၉၅ ခုနှစ်၊ မေလမှ စတင်ပြီး KNU ဌာနချုပ် အသစ်အဖြစ် ပြောင်းရွှေ့ထူထောင်ခဲ့သော်လည်း ၂ နှစ်မပြည်ခင် ၁၉၉၇ ခုနှစ် ‌ဖေဖော်ဝါရီလမှာ စစ်‌ကောင်စီက ထပ်မံကျူးကျော်သိမ်းပိုက်ခံခဲ့ရတယ်လို့ ဖော်ပြထားပါတယ်။

ထိုင်း-မြန်မာနယ်စပ်မှာ စစ်ကောင်စီက ၂၈ နှစ်ကြာ ကျူးကျော်တပ်စွဲခဲ့တဲ့ ထီးကပလယ်စခန်းကို ကရင်အမျိုးသားလွတ်မြောက်ရေးတပ်မတော် KNLA ၊ ကရင်အမျိုးသားကာကွယ်ရေးတပ်မတော် KNDO တို့ရဲ့ ဦးဆောင်မှုနဲ့ ပြည်သူ့ကာကွယ်ရေးတပ်မတော် PDF ပူးပေါင်းတပ်ဖွဲ့တွေက ဇွန်လ ၂၂ ရက်မှာ ပြန်လည်သိမ်းပိုက်နိုင်ခဲ့တယ်လို့ သိရပါတယ်။

ထိုင်း-မြန်မာနယ်စပ် တလျှောက်ရှိ စစ်ကောင်စီတပ်စွဲထားတဲ့ စခန်းကြီးငယ်တွေကို KNLA နဲ့ မဟာမိတ်ပူးပေါင်းတပ်တွေက မတ်လမှစတင်ပြီး ဆက်တိုက် တိုက်ခိုက်သိမ်းပိုက်လျက်ရှိရာ နယ်စပ်တလျှောက်မှာ စစ်ကောင်စီရဲ့ ဝေါလေဗျူဟာစခန်း၊ ဥကရစ်ထစခန်းနဲ့ ထီးသဲလယ်စခန်းတွေသာ ကျန်ရှိတော့တာဖြစ်တယ်လို့ သတင်းရရှိပါတယ်။

ပြည်သူ့စစ်မှုထမ်းတပ်သားတွေဖြစ်ပြီး စစ်ကောင်စီကိုပြန်လည်တိုက်ခိုက်သွားမည်ဟုဆို

သတင်း – ခက်ဆစ်

တနင်္သာရီတိုင်း၊ မြိတ်ခရိုင်၊ တနင်္သာရီမြို့အနီး စစ်ကောင်စီရဲ့ ခမရ ၅၅၇ တပ်ရင်းမှ ပြည်သူ့စစ်မှုထမ်းတပ်သား ၂ ဦးက လမ်းကင်းထွက်လာစဉ် လက်နက်တွေနဲ့အတူ ဆက်သွယ်အလင်းဝင်ခဲ့တယ်လို့ တနင်္သာရီမြို့နယ် ပြည်သူ့ကာကွယ်ရေးအဖွဲ့က ယမန်နေ့က ထုတ်ပြန်ခဲ့ပါတယ်။

‌အောက်ကင်းရွာအခြေစိုက် ခမရ ၅၅၇ မှာ တာဝန်ထမ်းဆောင်ခဲ့တဲ့ စစ်မှုထမ်းတပ်သား ၂ ဦးက ဘန်းလမွတ်ရွာနဲ့ ပနပ်ငယ်ရွာကြား လမ်းကင်းတာဝန်ကျစဉ် ထွက်ပြေးလွတ်မြောက်လာပြီး MA3 ၂ လက်၊ ကျည်ဘောက် ၉ ခု၊ ကျည် ၂၄၀ တောင့်တို့နဲ့အတူ ဆက်သွယ်အလင်းဝင်ခဲ့တယ်လို့ သိရပါတယ်။

အဆိုပါတပ်သား ၂ ဦးဟာ ရန်ကုန်တိုက်ကြီး၊ ဂျိုးဖြူ စစ်သင်တန်းကျောင်းမှာ ပြည်သူ့စစ်မှုထမ်းအပတ်စဉ် ၁ နဲ့ အပတ်စဉ် ၉ တက်ရောက်လာသူတွေဖြစ်သလို စစ်ကောင်စီကို ပြန်လည်တိုက်ခိုက်သွားမှာ ဖြစ်တယ်လို့ ‌သိရပါတယ်။

“ကျနော်တို့က ရပ်ရွာထဲမှာ စစ်မှုထမ်းအလှည့်ကျလို့၊ မဲနှိုက်တာပေါက်လို့ ပါသွားတာမဟုတ်ပါဘူး၊ အတင်းအဓမ္မ ဖမ်းဆီး ဆွဲခံရပြီးပါလာကြတာပါ၊ ကျနော်တို့ကတော့ စစ်ကောင်စီကို ပြန်ချမှာပါ” လို့ ပြောဆိုခဲ့ကြောင်း ဖော်ပြထားပါတယ်။

စစ်‌ကောင်စီ အဓမ္မစုဆောင်းခံရတဲ့ စစ်မှုထမ်းတပ်သားတွေ အပါအဝင် စစ်ကောင်စီတပ်ဖွဲ့ဝင်တွေအနေနဲ့ နီးစပ်ရာတော်လှန်ရေးတပ်ဖွဲ့တွေနဲ့ ချိတ်ဆက်ပြီး အလင်းဝင်ရောက်ကြဖို့ တနင်္သာရီမြို့နယ် ပြည်သူ့ကာကွယ်ရေးအဖွဲ့က အသိ‌ပေးတိုက်တွန်းထားပါတယ်။

သတင်း – ခက်ဆစ်

တနင်္သာရီတိုင်း၊ ပု‌လောမြို့နယ်၊ ဘုတ်ခြံအခြေစိုက် ခလရ ၁၇ မှ ပြည်သူ့စစ်မှုထမ်းတပ်သား ၂ ဦးက သေနတ် ၂ လက်နဲ့ခဲယမ်းများ ယူဆောင်အလင်းဝင်ရောက်လာခဲ့တယ်လို့ ပြည်သူ့ကာကွယ်ရေးတပ်မတော်၊ မြိတ်ခရိုင် အမှတ် ၁ တပ်ရင်းက မနေ့က ထုတ်ပြန်ခဲ့ပါတယ်။

စစ်ကောင်စီရဲ့ ခလရ ၁၇ မှ တပ်ကြပ်ကြီး စာရေး အကူ ၁ ဦးနဲ့ ဒုတပ်ကြပ် ၁ ဦးတို့က မြိတ်ခရိုင် အမှတ် ၁ တပ်ရင်းနဲ့ ကရင်အမျိုးသားကာကွယ်ရေးတပ် KNDO တပ်ရင်း ၇ ပူးပေါင်းအဖွဲ့ထံသို့ လက်နက်ခဲယမ်းတွေနဲ့ အလင်းဝင်လာခဲ့တယ်လို့ ဖော်ပြထားပါတယ်။

MA-1 ရိုင်ဖယ် (၁) လက်၊ MA-2 စက်ကလေး (၁) လက်၊ လက်ပစ်ဗုံး (၂) လုံး၊ M-14 နင်းမိုင်း (၁) ခု၊ ကျည်ဘောက် (၁၅)ခု၊ ကပစထုတ် ၅.၅၆ ကျည် (၇၉ဝ) တောင့်တို့ကို ယူဆောင်လာခဲ့တယ်လို့ သိရပါတယ်။

အလင်းဝင်တပ်သားတွေဟာ စစ်ကောင်စီရဲ့ ပြည်သူ့စစ်မှုထမ်းသင်တန်း အပတ်စဉ် (၂)မှာ အတင်းအဓမ္မစုဆောင်းခြင်းခံခဲ့ရပြီးနောက် ခလရ (၁၇) မှာ တာဝန်ချထားတာဖြစ်ပြီးကောင်းမွန်လုံခြုံစွာ စောင့်ရှောက်ထားသလို လိုအပ်တာတွေကို ဆက်လက်လုပ်ဆောင်လျက် ရှိတယ်လို့ ဆိုပါတယ်။

စစ်အောက်စီလက်အောက်မှ ရုန်းထွက်လာသူတိုင်းကို အမြဲလက်ကမ်း ကြိုဆိုလျက်ရှိပြီး စစ်ကောင်စီတပ်သားတွေအနေနဲ့ သတ္တိမွေးပြီး ရုန်းထွက်ခဲ့ကြဖို့ မြိတ်ခရိုင် အမှတ် ၁ တပ်ရင်းက တိုက်တွန်းထုတ်ပြန်ထားပါတယ်။