စစ်ရေး

စစ်ရေးပြင်းထန်နေတဲ့ ရခိုင်ပြည်၊ ကျောက်ဖြူမြို့နယ်မှာ စစ်ကောင်စီက သေနတ်နဲ့ လှမ်းပစ်ခတ်မှုကြောင့် အပြစ်မဲ့ဒေသခံတစ်ဦး ကျည်ထိမှန်ကာ သေဆုံးသွားတယ်လို့ ကျောက်ဖြူဒေသခံတွေဆီက သိရပါတယ်။

ပြီးခဲ့တဲ့ စက်တင်ဘာလ ၅ ရက်နေ့၊ ညနေ ၃ နာရီကျော်အချိန်မှာ ငါးဖမ်းဖို့သွားတဲ့ ကျောက်ဖြူဒေသခံနှစ်ဦးကို စစ်ကောင်စီတပ်က သေနတ်နဲ့ လှမ်းပြီး ပစ်ခတ်ခဲ့တဲ့အတွက် တစ်ဦးမှာ ကျည်ထိမှန်ကာ သေဆုံးသွားတာလည်း ဖြစ်ပါတယ်။

သေဆုံးသွားတဲ့သူမှာ ကျောက်ဖြူမြို့နယ်၊ သပြုတောင်ကျေးရွာက အသက် ၄၁ နှစ်အရွယ် ဦးမောင်သန်းရီလည်း ဖြစ်ပါတယ်။

ဦးမောင်သန်းရီနဲ့အတူ ဦးမောင်ကြည်ဝင်းတို့ နှစ်ဦးဟာ ကျောက်ဖြူမြို့နယ်၊ င/ပုချွိန်ကျေးရွာကနေပြီးတော့ သဖန်ခါးချောင်းကမ်းနားကို လှေငယ်တစ်စီးနဲ့ ငါးဖမ်းဖို့ထွက်လာတဲ့အခါ စစ်ကောင်စီတပ်သားတွေက မြင်ပြီးတော့ သေနတ်နဲ့ပစ်ခတ်ခဲ့တာလည်း ဖြစ်ပါတယ်။

စစ်ကောင်စီတပ်သားတွေက ပစ်ခတ်လိုက်တဲ့ကျည်ဟာ ဦးမောင်သန်းရီရဲ့ဘယ်ဖက်ရင်အုံတည့်တည့်ကို ကျည်ထိမှန်သွားပြီး နေရာမှာပင်ပွဲချင်းပြီး သေဆုံးသွားခဲ့ရတာလည်း ဖြစ်ပါတယ်။

သေဆုံးသွားတဲ့ ဦးမောင်သန်းရီရဲ့ ရုပ်အလောင်းကို သူနဲ့အတူ ပါလာတဲ့ ဦးမောင်ကြည်ဝင်းက ဆွဲယူနေစဥ်အတွင်းမှာလည်း စစ်ကောင်စီတပ်က နောက်ထပ် သေနတ်နဲ့ ၃ ကြိမ် ထပ်မံပစ်ခတ်မှုကြောင့် ဦးမောင်ကြည်ဝင်း ဟာလည်း အဲဒီနေရာကနေ ထွက်ပြေးတိမ်းရှောင်ခဲ့ရတယ်လို့ သိရပါတယ်။

” သူတို့နှစ်ယောက်ဟာ စစ်ကောင်စီတပ်နဲ့ တွေ့ပြီးတော့ ပစ်ခတ်ခံရတာပါ။ စစ်ကောင်စီကတော့ အဲဒီတဝိုက်မှာ စစ်ကြောင်းထိုးတာတွေ ရှိတယ်လို့သိရပါတယ်။ နှစ်ယောက်မှာ တစ်ယောက်တော့ သေဆုံးသွားပါတယ်”

လို့ ကျောက်ဖြူ ဒေသခံတစ်ဦးက ပြောပါတယ်။ ကျောက်ဖြူမြို့နယ် တိုက်ပွဲအတွင်းမှာ စစ်ကောင်စီဟာ အကျအဆုံးတွေများပြားနေတာကြောင့် အပြစ်မဲ့အရပ်သားတွေကို ဦးတည်ကာ ပစ်မှတ်ထား တိုက်ခိုက်လာနေတာလည်း ဖြစ်ပါတယ်။

ပြီးခဲ့တဲ့ သြဂုတ်လ ၂၇ ရက်နေ့၊ ညနေ ၇ နာရီ ကျော် အချိန်မှာလည်း ဇင်ချောင်းကျေးရွာက ပင်လယ်ပြင်မှာ စစ်ရေးအရလှုပ်ရှားသွားလာနေတဲ့ စစ်ကောင်စီနေဗီတစ်စီးဟာ ဇင်ချောင်းကုန်းဘောင်ကြီးကျေးရွာကို လက်နက်ကြီး ၂ လုံး ပစ်ခတ်ခဲ့ပြီး ဇင်ချောင်းကုန်းဘောင်ကြီးကျေးရွာမှာ နေထိုင်နေတဲ့ ဦးမင်းမင်းကြီး (၅၁) နှစ်မှာ ထိခိုက်ဒဏ်ရာ ရရှိသွားပါတယ်။

အလားတူ ပြီးခဲ့တဲ့ သြဂုတ်လ ၁၆ ရက်နေ့ကလည်း အိမ်ခြေ ၇၀ ကျော်ရှိတဲ့ ကျောက်ဖြူမြို့နယ်၊ သပြုတောင်ကျေးရွာကို စစ်ကောင်စီက ဒရုန်းဗုံးကြဲချတိုက်ခိုက်မှု၊ လေကြောင်းပစ်ခတ်မှု၊ ရေကြောင်းကနေ လက်နက်ကြီး ပစ်ခတ်မှုတွေကြောင့် အိမ်ခြေအကုန်လုံးနီးပါးမှာ မီးလောင်ပျက်စီး သွားတယ်လို့ သိရပါတယ်။

ပဲခူးတိုင်းဒေသကြီး၊ ပြည်ခရိုင်၊ ဥသျှစ်ပင်မြို့နယ်ရှိ အမှတ် (၆) ကာကွယ်ရေးပစ္စည်းစက်ရုံ (ကပစ – ၆ ) အနီးကို အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ထိုးစစ်ဆင်တိုက်ခိုက်နေပြီး လက်နက်ကြီး ဟောင်ဝင်ဇာအမြောက်တွေနဲ့ပါ ပစ်ခတ်မှုတွေရှိနေတယ်လို့ စစ်ရေးသတင်းရင်းမြစ်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ် PDF တို့ဟာ ပြီးခဲ့တဲ့ စက်တင်ဘာလ ၃ ရက်နေ့က ကပစ – ၆ စက်ရုံနဲ့ ၇ မိုင်ခန့်လောက်သာ ဝေးကွာတဲ့ ညောင်ကျိုးနဲ့ ညောင်ခြေထောက်ကျေးရွာအကြားက ဆင်လန်းကျေးရွာအနီး ကာကင်းစခန်း ၃ ခုထက်မနည်းကို တိုက်ခိုက်သိမ်းပိုက်နိုင်ခဲ့တာလည်း ဖြစ်ပါတယ်။

အဆိုပါ ဆင်လန်းကျေးရွာက ကာကင်းစခန်းတွေကို သိမ်းပိုက်ထိန်းပြီးနောက် AA နဲ့ ပူးပေါင်းမဟာမိတ်တပ်တွေဟာ ညောင်ခြေထောက်ကျေးရွာရှိ ကပစ – ၆ စက်ရုံကို ထိုးစစ်ဆင်လာနေတာဖြစ်ပြီး မီတာ ၁၀,၀၀၀ သောင်းကျော် အကွာအဝေးက နေပြီးတော့လည်း လက်နက်ကြီးဟောင်ဝင်ဇာအမြောက်တွေနဲ့ ပစ်ခတ်တိုက်ခိုက်မှုတွေ ရှိနေတယ်လို့လည်း သိရပါတယ်။

“ဆင်လန်းကျေးရွာက ကာကင်းစခန်းတစ်ချို့ကိုတော့ AAနဲ့ မဟာမိတ်တပ်တွေက သိမ်းထားပြီဖြစ်ပါတယ်။ အဲဒီအနီးအနား တစ်ချို့စခန်းတွေကိုပဲ သိမ်းဖို့ကျန်ပါတော့တယ်။ ကပစ ၆ စက်ရုံနဲ့ဆိုတော့ အတော်လေး နီးကပ်လာပြီးဖြစ်ပါတယ်။ စစ်ကောင်စီကလည်း အင်အားဖြည့်တင်းတာတွေကို ပုံမှန်လုပ်ဆောင်နေပါတယ်။ AA နဲ့ မဟာမိတ်တပ်တွေကတော့ ကပစ ၆ စက်ရုံအနီးကို လက်နက်ကြီး အမြှောက်တွေနဲ့ပါ ပစ်ခတ်မှုတွေ ရှိနေတယ်လို့ သိရပါတယ် “

လို့ AA နဲ့ နီးစပ်တဲ့ စစ်ရေးသတင်းရင်းမြစ်တစ်ဦးက BBM ကို ပြောပါတယ်။ အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ရခိုင်ရိုးမ အရှေ့ဘက်ခြမ်း ပဲခူးတိုင်းဒေသကို ဒီနှစ် ဇန်နဝါရီလအတွင်းမှာ ထိုးစစ်ဆင်တိုက်ခိုက်လာနေတာဖြစ်ပြီး ပြီးခဲ့တဲ့ ဧပြီလအတွင်းကလည်း တောင်ကုတ် – ပန်းတောင်းလမ်းပိုင်းရှိ ရခိုင်ရိုးမပေါ်က ညောင်ကျိုး ကာကင်းစခန်းတွေနဲ့ ကျေးရွာအနီးက ကာကင်းစခန်းတွေကို သိမ်းပိုက်ထိန်းချုပ်ထားတာလည်း ဖြစ်ပါတယ်။

ညောင်ကျိုးကျေးရွာနဲ့ ၄ မိုင်ခန့်အကွာအဝေးက ဆင်လန်းကျေးရွာက ကာကင်းစခန်းတွေကိုတော့ ပြီးခဲ့တဲ့ သြဂုတ်လ လကုန်းပိုင်းလောက်မှာ စတင်ထိုးစစ်ဆင်တိုက်ခိုက်ခဲ့တာဖြစ်ပြီး AAနဲ့ ပူးပေါင်းမဟာမိတ်တပ်တွေရဲ့ တိုက်ခိုက်မှုကြောင့် ဒဏ်ရာရရှိသွားတဲ့ စစ်ကောင်စီတပ်သားတွေကိုလည်း ဥသျှစ်ပင်မြို့ကနေပြီးတော့ ရွှေတောင်ရှိ ကုတင် ၁၀၀ ဆံတဲ့ ဆေးရုံကြီးကို အဆက်မပြတ် ပို့ဆောင်နေရတယ်လို့လည်း သိရပါတယ်။

ညောင်ခြေထောက်ကျေးရွာမှာရှိတဲ့ ကပစ – ၆ စက်ရုံအနီးအနားမှာ နှစ်ဖက်တိုက်ပွဲတွေ ဖြစ်ပွားတာမရှိသေးပေမဲ့ စစ်ကောင်စီဟာ ကပစ – ၆ စက်ရုံကနေပြီးတော့ လားကောင်တွေနဲ့အတူ စစ်အင်အားတွေ ဖြည့်တင်းမှုတွေ ရှိနေတယ်လို့လည်း သိရပါတယ်။

” ညောင်ခြေထောက်ဖက် ကပစ – ၆ စက်ရုံအနီးမှာ တော့ နှစ်ဖက်တိုက်ပွဲ ဖြစ်ပွားတာတွေ မသိရသေးပါဘူး။ ကပစ – ၆ စက်ရုံကနေ ဆင်လန်းကျေးရွာဖက်ကိုတော့ ရိက္ခာတွေကို လားတွေနဲ့ ပို့နေတာရှိတယ်လို့ သိရပါတယ်။ လားတွေသွားတဲ့ဖက်မှာတော့ တိုက်ပွဲတွေ ဖြစ်နေကြတယ်လို့ သုံးသပ်ရပါမေ။ လားဆိုတာက ၂ ရက်သွား ၁ ရက်နားရပါတယ်။ အဲဒီလိုမျိုး ချီတက်ရတာဆိုတော့ လားစခန်းတွေရှိတဲ့ဖက်မှာပဲ တိုက်ပွဲတွေ ပြင်းထန်နေကြတယ်လို့ သိရပါတယ် ”

လို့ CDM ဗိုလ်ကြီး ဇင်ယော်က သုံးသပ်ပါတယ်။ နောက်ထပ်လည်း စစ်ကောင်စီဟာ ပဲခူးတိုင်း၊ နတ်တလင်မြို့နယ်၊ ပုဇွန်ချောင်းကျေရွာဖက်ကလည်း ရခိုင်ရိုးမပေါ်ရှိ ကာကင်းစခန်းတွေကို စစ်အင်အားတွေ အများအပြား ဖြည့်တင်းမှုတွေ ရှိတယ်လို့လည်း သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ဆင်လန်းကျေးရွာက ကာကင်းစခန်းတွေကို သိမ်းပိုက်ရရှိပြီးနောက် စစ်လက်နက်ပစ္စည်းတွေကို ရွှေပြောင်းဖို့ ခက်ခဲတဲ့ ကပစ ၆ စက်ရုံကို လက်နက်ကြီးတွေနဲ့ ပစ်ခတ်တိုက်ခိုက်နိုင်တဲ့ အနေအထားမျိုးကို ရောက်ရှိနေပြီ ဖြစ်တယ်လို့လည်း CDM ဗိုလ်ကြီးဇင်ယော် ဆက်လက်သုံးသပ်ပါတယ်။

” ကပစ စက်ရုံဆိုတာမျိုးက ဧရိယာကျယ်ဝန်းပြီးတော့ ဘောလုံးကွင်း တစ်ကွင်းစာလောက် ရှိပါတယ်။ အဲဒီတော့ တဖြည်းဖြည်းချင်း ရှေ့တိုးပြီး တိုက်ခိုက်ရေး စွမ်းရည်ကောင်းနေတဲ့ AA ဟာ ရွေ့လျားနေတဲ့ ရေထဲက သင်္ဘောတွေကိုပင် နစ်မြှုပ်နိုင်တယ်။ ကပစ စက်ရုံဆိုတာက မရွေ့လျားနိုင်တဲ့ ပစ်မှတ်တွေဖြစ်ပါတယ်။ ဆိုတော့ အဲဒီပစ်မှတ်တွေကိုလည်း AA က ဖျက်ဆီးနိုင်စွမ်းရှိပါတယ်။ လက်ရှိမှာ မတိုက်ခိုက်နိုင်သေးရင်တောင် လက်နက်ကြီးတွေ ထိုင်ပြီးတော့ အပျင်းပြေ ထိုင်ပစ်နေလို့ရတဲ့ အနေအထားမျိုးကို ဖန်တီးလို့ရပါတယ်”

လို့ CDM ဗိုလ်ကြီး ဇင်ယော်က ပြောပါတယ်။ အာရက္ခတပ်တော် AA နဲ့ ပူးပေါင်းမဟာမိတ်တပ်တွေ ထိုးစစ်ဆင်တိုက်ခိုက်နေတဲ့ ပဲခူးတိုင်းမှာ ကပစ စက်ရုံ ၇ ရုံ ရှိနေတာဖြစ်ပြီး ပြည်မြို့နယ်မှာ ကစပ ၃၊ ၇၊ ၁၉ စက်ရုံတို့ရှိပြီး ဥသျှစ်ပင်မြို့နယ်မှာတော့ ကပစ ၅၊ ၆၊ ၉ နဲ့ ၁၆ စက်ရုံတို့ တည်ရှိနေတာလည်း ဖြစ်ပါတယ်။

လက်ရှိ AA နဲ့ PDF တို့ ထိုးစစ်ဆင်တိုက်ခိုက်နေတဲ့ ကပစ – ၆ စက်ရုံဟာ စစ်ကောင်စီရဲ့စစ်လက်နက် ပစ္စည်းတွေအတွက် အဓိက ကုန်ကြမ်းထုတ်ပေးနေတာဖြစ်ပြီး တခြားသော ကပစစက်ရုံတွေ အကုန်လုံးနဲ့လည်း ဆက်စပ်နေတာ ဖြစ်ပါတယ်။

အာရက္ခတပ်တော် AA ဟာ ၁၀၂၇ စစ်ဆင်ရေး ၁ နှစ်ခွဲကျော် ကာလအတွင်းမှာ ရခိုင်က မြို့နယ် ၁၄ ခုအပါအဝင် ချင်းပြည်နယ်က ပလက်မြို့နယ်တို့ကို သိမ်းပိုက်ထိန်းချုပ်ထားပြီး လက်ကျန်မြို့တွေဖြစ်တဲ့ စစ်တွေနဲ့ ကျောက်ဖြူမြို့နယ်တွေကို ထိုးစစ်ဆင်တိုက်ခိုက်နေပါတယ်။

အလားတူ အာရက္ခတပ်တော် AA ဟာ ရခိုင်ပြည်အစပ်က ရခိုင်ရိုးမပေါ်ရှိ တော်လှန်းရေးတပ်ဖွဲ့ဝင်တွေနဲ့ ပူးပေါင်းကာ ပဲခူးတိုင်း၊ မကွေးတိုင်းနဲ့ ဧရာဝတီတိုင်းတွေကိုလည်း ထိုးစစ်ဆင်တိုက်ခိုက်နေတာဖြစ်ပြီး နယ်စပ်အရအရေးပါတဲ့ ကာကင်းစခန်းတွေကိုလည်း သိမ်းပိုက်ထိန်းချုပ်ထားပါတယ်။

စစ်ကောင်စီအနေနဲ့ ရှမ်းပြည်နယ်မြောက်ပိုင်းမှ နောင်ချိုမြို့အပါ ၎င်းတို့ဆုံးရှုံးသွားတဲ့နယ်မြေအချ်ို့ကို ပြန်လည်သိမ်းပိုက်ပြီးတဲ့နောက် ပြည်သူ့စည်းရုံးရေးလုပ်ငန်းများကို အရင်ကထက်ပိုမိုလုပ်ဆောင်လာနေတယ်လို့ သိရပါတယ်။

ရှမ်းမြောက်က ညီနောင်မဟာမိတ်သုံးဖော် ဦးဆောင်ခဲ့တဲ့ ၁၀၂၇ စစ်ဆင်ရေး ဒုတိယလှိုင်းအတွင်း လက်လွှတ်ခဲ့ရတဲ့နောင်ချိုမြို့နဲ့ သပိတ်ကျဥ်းမြို့တို့ကို ပြီးခဲ့တဲ့ ဇူလိုင်လအတွင်း စစ်တပ်ဘက်မှ ပြန်လည်တိုက်ခိုက်သိမ်းပိုက်ခဲ့ပါတယ်။

နောင်ချိုမြို့ကို စစ်တပ်ဘက်မှ ပြန်လည်သိမ်းပိုက်ပြီးတဲ့နောက် စစ်တပ်အတွင်း ဒုတိယရာထူးအကြီးဆုံးဖြစ်တဲ့ ဒုချုပ်စိုးဝင်းကိုယ်တိုင် ဇူလိုင်လ၂၁ရက်နေ့မှာ နောင်ချိုမြို့ထိသွားရောက်ပြီး ၎င်းရဲ့စစ်သည်တွေကို တစ်ဆင့်တိုးရာထူးချီးမြှင့်တာမျိုးပြုလုပ်ခဲ့ပါတယ်။

ဒါတင်မက စိုးဝင်းအနေနဲ့ နောင်ချိုမြို့ပေါ်က ဒေသခံတွေကိုသာမက မြို့နယ်အတွင်းမှာရှိတဲ့ ဒေသခံတွေအားလုံးကို မဖြစ်မနေ အစည်းအဝေးခေါ်ခဲ့ပြီး ပြည်သူတွေကို စည်းရုံးသိမ်းသွင်းတာမျိုးပြုလုပ်ခဲ့တယ်လို့ ဒေသခံအချို့ရဲ့ပြောဆိုချက်အရသိရပါတယ်။

“နောင်ချိုကိုပြန်ရပြီး ဒုချုပ်စိုးဝင်းက နယ်ခံတွေအကုန် မတက်မနေရနဲ့ခေါ်ပြီး စကားပြောတာရှိတယ်၊ ကျွန်တော်တို့စစ်သားတွေကို ပြည်သူတွေကအရင်လိုပဲပြန်ချစ်ပေးပါ၊ ကျွန်တော့်စစ်သားတွေ မှားတာရှိလည်း ကျွန်တော်ကအနူးအညွှတ်တောင်းပန်ပါတယ် ဆိုပြီးလည်း ပြည်သူကိုပြောသွားသေးတယ်၊ စည်းရုံးသွားတာပေါ့”

ဟု နောင်ချိုမြို့ဒေသခံတစ်ဦးမှ BBM ကိုပြောပါတယ်။ ဒါ့အပြင် နောင်ချိုမြို့နယ်တစ်ခုလုံးကို စစ်တပ်ကရရှိပြီးတဲ့နောက်မှာလည်း နောင်ချို-ပြင်ဦးလွင်လမ်းကြောအတွင်း စစ်ဆေးရေးဂိတ်များ ရှိထားပေမဲ့ အရင်ကလို စစ်ကောင်စီတပ်သားတွေက မောက်မောက်မာမာ ဆက်ဆံခြင်းမရှိဘူးဟုလည်း ဒေသခံပြည်သူအချို့မှပြောပါတယ်။

အထူးသဖြင့် ပြင်ဦးလွင်မြို့နဲ့ နောင်ချိုမြို့နယ်အတွင်းရှိ ဟိုခိုကျေးရွာတို့ကြား စစ်တပ်ဂိတ်စခန်ူပေါင်း(၁၂)ခုထိ ရှိပြီး အများစုမှာ အာဏာသိမ်းကာလအစောပိုင်းကလို ပြည်သူကိုဆက်ဆံခြင်းမရှိဘူးဟုလို့ သိရပါတယ်။

စစ်ကောင်စီရဲ့ ပြည်သူအပေါ် အဆိုပါဆက်ဆံမှုတွေဟာ ရွေးကောက်ပွဲနီးလာတာကြောင့် ချိုချိုသာသာဆက်ဆံခြင်းမျိုးဖြစ်နိုင်တယ်လို့လည်း ဒေသခံပြည်သူတွေမှ ပြောဆိုမှုရှိပါတယ်။

“ခုစစ်တပ်ကပြန်ရသွားတဲ့ ဟိုခိုနဲ့ပြင်ဦးလွင်ကြားဆို စစ်တပ်ဂိတ်က ၁၂ခုထိရှိတယ်၊ ဒါမဲ့အရင်လို မိုက်မိုက်ရိုင်းရိုင်းတော့မဟုတ်တော့ဘူး၊ ပြည်သူကိုဆက်ဆံတာက အဓိက ကတော့ ရွေးကောက်ပွဲနီးလာလို့လဲပါမယ်၊ပြီးတော့ ပြည်သူဘယ်လောက်မုန်းနေလဲဆိုတာသိတော့ ပြန်ပြီးသူတို့ဘက်ပါအောင်လို့စည်းရုံးတာမျိုးလဲဖြစ်မယ်”

ဟု ဟိုခိုရွာဒေသခံတစ်ဦးမှ BBM ကိုပြောပါတယ်။ နောင်ချိုမြို့ကိုသိမ်းပိုက်စဥ်ကလည်း စစ်

ကောင်စီရဲ့ (၁၀၁)ဒုတပ်မမှူး မြင့်ဟိဏ်းကိုယ်တိုင်း ပြည်သူလူထုကို ဒံပေါက်ဝေတာတွေ၊ လိုက်လံစကားပြောတာတွေပြုလုပ်ပြီး စည်းရုံးသိမ်းသွင်းတဲ့ပုံရိပ်တွေကို ၎င်းတို့ဝါဒဖြန့်ချန်နယ်တွေမှတဆင့် ဖြန့်ဝေခဲ့ကြပါတယ်။

စစ်ကောင်စီအနေနဲ့ ယခုနောက်ပိုင်း နောင်ချိုမြို့နဲ့ဟိုခိုကျေးရွာဘက်တွေသာမက မတ္တရာဒေသဘက်က ကျေးရွာအချို့ကို စစ်ကြောင်းထိုးရာမှာလည်း ပြည်သူတွေကို လိုက်လံတွေ့ဆုံတာမျိုးပြုလုပ်ပြီး စစ်တပ်ကိုမကြောက်ဖို့အတွက် စည်းရုံးပြောဆိုနေတာမျိုးတွေရှိတယ်လို့လည်း BBM မှ ထပ်မံစုံစမ်းသိရှိရပါတယ်။

မန္တလေးတိုင်းဒေသကြီး၊ ငါန်းဇွန်မြို့နယ်အတွင်းက ကျေးရွာတွေကို စက်တင်ဘာလ ၂ရက်နေ့မှစ၍ စစ်ကောင်စီက ဝင်ရောက်စစ်ကြောင်းထိုးပြီး ပြည်သူပိုင်ပစ္စည်းများကို ခိုးယူကာ မီးရှို့နေကြောင်း သိရပါတယ်။

စစ်ကောင်စီတပ်စစ်ကြောင်းက ဖောင်းကတောရွာကို ဝင်ရောက်လုယက်၊ မီးရှို့ ပြီးနောက် စက်တင်ဘာလ ၅ရက်နေ့၊ ညပိုင်းမှာ အနီးရှိ သားကျင်ရွာနဲ့ မကျီးကြပ်ရွာကို လေကြောင်းကနေ Y12 စစ်ထောက်ပို့ဗုံးကြဲလေယာဉ်နဲ့ မီးလောင်ဗုံးတွေ ကြဲချတိုက်ခိုက်ခဲ့တာဖြစ်ပါတယ်။

“ဖောင်းကတောမှာ ပစ္စည်းတွေသယ်ထုတ်ခိုးပြီးချိန် ည၈နာရီလောက်မှာ Y-12 နဲ့မီးလောင်ဗုံးတွေလာချတာမှာ သားကျင်ရွာတာဝါတိုင်နားကအိမ်တွေကနေစပြီး မီးလောင်တာ။ ရွာထဲက အိမ်တွေကို အများဆုံးလောင်ပါတယ်။ ဓာတုဗေဒ မီးလောင်ဗုံးဆိုတော့ မီးငြှိမ်းရတာခက်ပါတယ်။ ဘေးနားကရွာမှာ စစ်ကောင်စီစစ်ကြောင်း ရောက်နေတော့ ပြည်သူတွေထွက်ပြေးနေချိန် အခုလို မီးလောင်ဗုံးကျတာဆိုတော့ မီးလောင်ဆူံရှုံးမှုများပါတယ်။ အိမ်ခြေ ၂၀၀ဝန်းကျင်လောက် မီးလောင်သွားပါတယ်။ မကျည်းကြပ်ရွာကတော့ သားကျင်ရွာလောက်မများပါဘူး”

ဒေသခံ စစ်ဘေးရှောင်ပြည်သူတစ်ဦးက BBMကိုပြောပါတယ်။ BBMကစုဆောင်းရရှိထားတဲ့ သတင်းအချက်အလက်တွေအရ စက်တင်ဘာလ ၅ရက်၊ ည ၇နာရီ ၅၆မိနစ်အချိန်မှစ၍ ၈နာရီ ၁၉မိနစ် အချိန်အတွင်း သားကျင်ရွာနဲ့ မကျည်းကြပ်ရွာတွေပေါ်ကို မီး‌လောင်ဗုံးအလုံး(၈၀)ကျော်ဖြင့် ၁၃ကြိမ်ပျံဝဲကြဲချတိုက်ခိုက်ခဲ့တာ ဖြစ်ပါတယ်။

အဆိုပါ Y-12စစ်‌ထောက်ပို့ဗုံးကြဲလေယာဉ် စစ်ကောင်စီရဲ့ မိတ္ထီလာအခြေစိုက် လေတပ်စခန်းကနေ ပျံတက်ခဲ့တဲ့လေယာဉ်ဖြစ်ပါတယ်။

“Phosphorus မီးလောင်ဗုံးတွေဖြစ်နိုင်ပါတယ်။ စစ်ကောင်စီစစ်ကြောင်းက မြေပြင်ကနေ သားကျင်ရွာကို ဝင်ရောက်မီးမရှို့ရဲတာကြောင့် လေကြောင်းကနေ ရည်ရွယ်ချက်ရှိရှိမီးလောင်ဗုံးကြဲချပြီး မီးရှို့ခဲ့တာဖြစ်နိုင်ပါတယ်”

လို့လည်း ငါန်းဇွန်မြို့နယ် ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောပါတယ်။ ငါန်းဇွန်မြို့နယ်အတွင်း စစ်ကြောင်းထိုးနေတဲ့ စစ်ကောင်စီစစ်ကြောင်းဟာ ကုန်တင်ကား ၁၂စီးကျော် ယူဆောင်လာပြီး တစ်ရွာဝင်၊ တစ်ရွာထွက် ပြည်သူပိုင်ပစ္စည်းများ လိုက်လံခိုးယူနေတာ ဖြစ်ပါတယ်။

စစ်ကောင်စီစစ်ကြောင်းဟာ ဖောင်းကတောရွာကို ဝင်ရောက်ဖောက်ထွင်းခိုးယူ၍ သုံးနေရာခွဲမီးရှို့ပြီးနောက် မြောက်ဘက်သို့ ဆက်လက်စစ်ကြောင်းထိုးပြီး မြောက်ရွာဘိုရွာကို ဆက်လက်ဝင်ရောက်ဖောက်ထွင်းနေတယ်လို့ သိရပါတယ်။

စစ်ကောင်စီရဲ့ စစ်ကြောင်းထိုးမှုကြောင့် ငါန်းဇွန်မြို့နယ်အနောက်ခြမ်းက မကျည်းကြပ်၊ ညောင်လေးပင်၊ သကျမ်းကုန်း၊ ရွာဘိုတောင်+မြောက်၊ ကုလား၊ ဆင်တပ်၊ ရဲပဒိုင်း၊ သားကျင်၊ ဆင်ဖြူကုန်း၊ ‌ညောင်ပင်ရိုး၊ သပြေကန်၊ ဆပ်ပြာကျင်း၊ ဆင်တပ်စတဲ့ရွာတွေက ဒေသခံပြည်သူတွေ ထွက်ပြေးတိမ်းရှောင် နေကြရပါတယ်။

မီးလောင်ဗုံးတွေကြဲချတိုက်ခိုက်ခဲ့တာနဲ့ ပတ်သက်ပြီး စစ်ကောင်စီလက်အောက်ခံ တယ်လီဂရမ်လော်ဘီချန်နယ်တွေမှာတော့ ၎င်းတို့ရဲ့လက်ချက်ဖြစ်ကြောင်း အောင်ပွဲခံပြောဆိုမှုတွေရှိနေပါတယ်။

အခုလိုရွာစဉ်လှည့် ခိုးယူ၊မီးရှို့နေတဲ့ စစ်ကောင်စီစစ်ကြောင်းနဲ့ ဒေသခံ ကာကွယ်ရေးတပ်ဖွဲ့တွေကြား ထိတွေ့တိုက်ပွဲဖြစ်ပွားနေတာတွေ ရှိနေတယ်လို့ သိရပေမယ့် အသေးစိတ်ကိုတော့ အတည်ပြုနိုင်ခြင်း မရှိသေးပါဘူး။

#BBM#News#UpdateNews#Junta#AirStrike

စစ်ကောင်စီတပ်ဖွဲ့၀င် ၁၅၀ကျော်သေဆုံးပြီး ဒဏ်ရာရရှိသူများပြားကာ လက်နက်ခဲယမ်းအချို့ သိမ်းဆည်းရရှိ

မကွေးတိုင်း၊ ပွင့်ဖြူမြို့နယ်မှာ အင်အား၂၀၀ပါ စစ်ကောင်စီ စစ်ကြောင်းနဲ့ တော်လှန်ရေးတပ်ဖွဲ့တွေ ထိတွေ့တိုက်ပွဲဖြစ်ပွားခဲ့ရာ ၃ရက်တာ တိုက်ပွဲအတွင်း စစ်ကောင်စီတပ်ဖွဲ့၀င် ၁၅၀နဲ့အထက်သေဆုံးပြီး ဒဏ်ရာရရှိသူတွေနဲ့ ထွက်ပြေးလွတ်မြောက်သွားသူတွေလည်း ရှိတယ်လို့ ဒေသခံ သတင်းရင်းမြစ်က BBM ကိုပြောပါတယ်။

စက်တင်ဘာလ ၄ရက်နေ့မှ ၆ရက်နေ့အတွင်း ပွင့်ဖြူမြို့နယ် ညောင်ပင်ဝိုင်း၊ အင်းကုန်း၊ ကနီ၊ မဒဲ၊ တစ်လျှောက်မှာ တိုက်ပွဲဖြစ်ပွားခဲ့ရာ စစ်ကောင်စီတပ်ဖွဲ့၀င် ၁၅၀နဲ့အထက် သေဆုံးပြီး အများအပြားထိခိုက်ဒဏ်ရာရရှိကာ ထွက်ပြေးလွတ်မြောက်သွားတဲ့သူတွေလည်း ရှိတယ်လို့ ဒေသခံ သတင်းရင်းမြစ်ရဲ့ပြောကြားချက်အရသိရပါတယ်။

“မနေ့(စက်တင်ဘာ ၅ရက်)‌က တစ်နေကုန်တိုက်ပွဲဖြစ်တာ။ စခတွေ တော်တော်သေတယ်။ နည်းနည်းပဲကျန်တဲ့ကောင်တွေက ထွက်ပြေးသွားတယ်။ ပုန်းနေကြတဲ့ကောင်တွေလည်းရှိတယ်။ အင်အား၂၀၀က ဘယ်လောက်မှ မကျန်တော့ဘူး။ အလောင်းတောင် မကောက်နိုင်ကြဘူး”

လို့ အဆိုပါဒေသခံက ဆက်လက်ပြောကြားပါတယ်။ ၃ရက်တာ တိုက်ပွဲအတွင်း ပထမရက်မှာ မုန်းချောင်းရဲ့ မြောက်ဘက်ကနေ တောင်ဘက်ကို စစ်ကြောင်းထိုးပြီး မုန်းချောင်းတောင်ဘက်အရောက်မှာ မိုင်းဆွဲခံရပြီး စစ်ကောင်စီ တပ်ဖွဲ့၀င် တစ်စုသေပြီး ရွာကိုလည်း မီးရှို့သွားတယ်လို့ ပြောပါတယ်။

နောက်တစ်ရက်မှာ ကနီနဲ့ အင်းကုန်းရွာကြားမှာ မိုင်းဆွဲခံထိပြီး စစ်ကောင်စီတပ်သား ၃၀ထပ်သေပြီး မနေ့ကတိုက်ပွဲမှာ ၅ဝလောက်သေတယ်လို့ ‌အဆိုပါဒေသခံက ဆက်လက်ပြောကြားပါတယ်။

လက်ရှိမှာ စစ်ကောင်စီဟာ ပြည်သူ့စစ်တွေနဲ့ အများဆုံး စစ်ကြောင်းထိုးနေတာဖြစ်ပြီးတော့ တိုက်ရည်ခိုက်ရည်လည်း မရှိတာ့ဘူးလို့ သူကဆက်လက်ပြောကြားပါတယ်။

“အခုက ဒီကောင်တွေဘက်က ဘာဗျူဟာမှ မရှိတော့ဘူး။ ရွာထဲ၀င် ရွာသားတွေကိုပေါ်တာဆွဲ၊ မိုင်းနင်းခိုင်း၊ ပစ္စည်းဥစ္စာယူ အဲ့လိုတွေချည်းပဲ။ မနေ့ညက တိုက်ပွဲ မဖြစ်ခင်မှာ ထွက်ပြေးတဲ့သူတွေလည်းရှိတယ်”

လို့ ဒေသခံတစ်ဦးက ဆက်လက်ပြောကြားပါတယ်။ စစ်ကောင်စီဟာ အရင်ကလည်း အဆိုပါကျေးရွာတွေကို စစ်ကြောင်းထိုတာမျိုးရှိပေမဲ့ အခုတစ်ခါကတော့ ပိုဆိုးတယ်လို့ဆိုပါတယ်။

အဲ့ဒီတိုက်ခိုက်မှုကို မင်းဘူးခရိုင်အမှတ်၇ တပ်ရင်း၊ အမှတ်၄တပ်ရင်း၊ ပြည်သူ့ကာကွယ်ရေးတပ်ဖွဲ့ပွင့်ဖြူနဲ့ ‌ပူးပေါင်းမဟာမိတ်တပ်ဖွဲ့တွေက တိုက်ခိုက်ခဲ့တယ်လို့ သိရပါတယ်။

ကရင်အမျိုးသား လွတ်မြောက်ရေးတပ်မတော် KNLA ရဲ့ တိုက်ခိုက်မှုကြောင့် သေဆုံးသွားတဲ့ ဘုတ်ပြင်းအခြေစိုက် အမှတ် ၁၃ စစ်ဆင်ရေးကွပ်ကဲမှုဌာန ချုပ်က ဒုတိယစကခမှူး ဗိုလ်မှူးကြီး မျိုးသန့်ကို စစ်ကောင်စီက သေဆုံးပြီးမှ ဗိုလ်ချုပ်ရာထူးကို တိုးပေးလိုက်တယ်လို့ စစ်ဖက်ရေးရာ သတင်းရင်းမြစ်တွေဆီက သိရပါတယ်။

တနင်္သာရီတိုင်း၊ ဘုတ်ပြင်းမြို့ကနေ လေညာမြို့ဘက်ကို နယ်မြေစစ်ဆေးရေးအတွက် ကွင်းဆင်းလာတဲ့ ဘုတ်ပြင်အခြေစိုက် အမှတ် ၁၃ စစ်ဆင်ရေးကွပ်ကဲမှုဌာနချုပ်က ဒုတိယစကခမှူး ဗိုလ်မှူးကြီး မျိုးသန့်ဟာ KNLA ရဲ့ တိုက်ခိုက်မှုကြောင့် ပြီးခဲ့တဲ့ သြဂုတ်လ၂၅ ရက်နေ့မှာ သေဆုံးခဲ့ရပါတယ်။

ပြီးခဲ့တဲ့ သြဂုတ်လ ၂၅ ရက်နေ့၊ မွန်းတည့် ၁၂ နာရီ ၁၅ မိနစ်အချိန်မှာ ဗိုလ်မှူးကြီး မျိုးသန့်ဟာ စစ်ကား ၃ စီးနဲ့ လေညာမြို့နယ်ဘက်ကို စစ်ဆင်ရေးကွင်းဆင်းလာစဥ်အတွင်းမှာ KNLA က တိုက်ခိုက်မှုကြောင့် ဒုတိယ စကခမှူး ဗိုလ်မှူးကြီး မျိုးသန့် အပါအဝင် စစ်သား ၂၀ ဦးထက်မနည်း သေဆုံးခဲ့ရတယ်လို့ သိရပါတယ်။

” စကစ ၁၃ က ဒုတိယစကခမှူး ဗိုလ်မှူးကြီး မျိုးသန့်ဟာ စစ်တက္ကသိုလ်အပတ်စဥ် ၄၀ က ဖြစ်ပါတယ်။ သူသေသွားမှ ရာထူးတိုးပေးတာကို တွေ့ရတယ်။ ဒီလိုမျိုးဖြစ်စဥ်ဟာ ရခိုင်မှာဆိုရင်လည်း နညျူဗြူးဟာမှူးတဈယောကျကို ရာထူးတိုးပေးတာရှိပါတယ်။ စစ်တပ်မှာတော့ ကျောင်းဆင်းပြီးရင် ဒုဗိုလ် ဒါမှမဟုတ် ဗိုလ်တို့ဆိုရင် စစ်ဆင်ရေးကာလအတွင်းမှာ အကျုံဝင်တဲ့သေဆုံးမှုတွေဆိုရင် ဗိုလ်ကြီးအဆင့်တိုးပေးတာ ရှိပါတယ်။ ဒါကတော့ ထုံစံအတိုင်းပေါ့ဗျ။ အခုနောက်ပိုင်းမှာတော့ အကြီးပိုင်းတွေ ဗိုလ်မှူးကြီး အဆင့်ရှိတဲ့သူတွေက သေဆုံးမှုတွေရှိလာတဲ့အခါ ဗိုလ်မှူးချုပ်အဆင့်တိုးပေးလိုက်တာဖြစ်ပါတယ်”

လို့ CDM ဗိုလ်ကြီး ဇင်ယော်က ပြောပါတယ်။ အမှတ် ၁၃ စစ်ဆင်ရေးကွပ်ကဲမှုဌာနချုပ်က စကခမှူးဗိုလ်မှူးချုပ် မင်းသီဟဟာ ကြာအင်းဆိပ်မြို့နယ်ဖက်ကို ရောက်ရှိနေတာကြောင့် ဒုတိယစကခမှူး ဗိုလ်မှူးကြီး မျိုးသန့်ဟာ အဲဒီဌာနချုပ်အတွင်းမှာအကြီးဆုံး ပုံစံနဲ့တာဝန်ယူခဲ့ရတာလည်း ဖြစ်ပါတယ်။

ဗိုလ်မှူးကြီး မျိုးသန့်ဟာ စစ်အင်အား ၁၀ဝ ပါဝင်တဲ့ စစ်ကားသုံးစီးနဲ့ တနင်္သာရီတိုင်း၊ ဘုတ်ပြင်းမြို့ကနေ လေညာမြို့ဘက်ကို လျှိုဝှက်သွားပေမဲ့လည်း အခုလို့ တိုက်ခိုက်ခံရတာ ဖြစ်တယ်လို့ CDM ဗိုလ်ကြီး ဇင်ယော်က သုံးသပ်ပါတယ်။

“ဗိုလ်မှူးကြီး မျိုးသန့် နယ်မြေစစ်ဆင်ရေး ကွင်းဆင်းလာစဥ်မှာ ယာဥ်တန်း ၃ စီး၊ အင်အား ၁၀၀ နဲ့ကွင်းဆင်းလာခဲ့တာပါ။ အရင်တုန်းကဆိုရင် စီနီယာ ကပ်ပတိန် လုပ်သက်ရင့် ဗိုလ်ကြီး၊ တပ်ခွဲမှူးအဆင့်တွေတောင်မှ အင်အား ၁၀၀ နဲ့ကွင်းဆင်းတာပါ။တပ်ရင်းမှူးတစ်ယောက်တောင်မှ ယာဥ်တန်းနဲ့သွားရင် ကား ၆ စီးလောက်နဲ့ သွားရတာပါ။ အခုသူအနေအထားက ကား ၃ စီးလောက်နဲ့ဆိုတော့ ခိုးရှောင်ခိုးဝှက်သွားရတာပေါ့။ သူကိုလုံလောက်တဲ့ အစောင့်အရှောက်မပါတဲ့အတွက် ကျဆုံးသွားတဲ့ အနေအထားမျိုးကိုတွေ့ရပါတယ်။ ဒါကြောင့်ကျန်ရစ်တဲ့ မိသားစုဝင်တွေကို နှစ်သိမ့်တဲ့အနေနဲ့ အဆင့်မြင့်ရာထူးတိုးပေးလိုက်တာလည်း ဖြစ်ပါတယ် ”

လို့ ဗိုလ်ကြီး ဇင်ယော်က ဆိုပါတယ်။ ဗိုလ်မှူးကြီး မျိုးသန့် ကွင်းဆင်းလာတဲ့ ကားယာဥ်တန်းဟာ KNLA တပ်ဖွဲ့ရဲ့ တိုက်ခိုက်မှုကို ခံရပြီးနောက် ဗိုလ်မှူးကြီး မျိုးသန့်ရဲ့ ရုပ်အလောင်းအပါအဝင် ကျန်တဲ့စစ်သည်တွေရဲ့ ရုပ်အလောင်းတွေကို ကောက်ယူကာ ဘုတ်ပြင်းမြို့နယ်ဖက်ကို ပြန်လည်ဆုတ်ခွာခဲ့တာလည်း ဖြစ်ပါတယ်။

သေဆုံးသွားတဲ့ ဗိုလ်မှူးကြီး မျိုးသန့်ရဲ့ အလောင်းကိုတော့ ပြီးခဲ့တဲ့ ဩဂုတ်လ ၂၇ ရက်နေ့မှာ စစ်တပ်ကဗိုလ်မှူးချုပ်ရာထူးကို တိုးပေးကာဖြစ်ပြီး မိသားစုဝင်တွေကလည်း သဂြိုလ်ခဲ့ကြတယ်လို့လည်း သိရပါတယ်။

စကခ ၁၃ ရဲ့ ဒုတိယ စကခမှူး ဗိုလ်မှူးကြီး မျိုးသန့် သေဆုံးချိန်မှာ အသက် ၄၉ နှစ် ရှိနေတာဖြစ်ပြီး စစ် တက္ကသိုလ် အပတ်စဉ် ၄၀ ကျောင်းဆင်း တစ်ဦးလည်း ဖြစ်ပါတယ်။

အဆိုပါ ဗိုလ်မှူးကြီး မျိုးသန့် သေဆုံးတာနဲ့ပတ်သက်ပြီးတော့ စစ်ကောင်စီက စကခ (၁၃) စကခမှူး ဗိုလ်မှူးချုပ် မင်းသီဟကိုလည်း စစ်ခုံရုံးဖွဲ့ကာ စစ်ဆေးမှုတွေ လုပ်ဆောင်နေတယ်လို့လည်း သိရပါတယ်။

ရခိုင်ပြည်နယ်၊ မောင်တောမြို့နယ်မှာ အာရက္ခတပ်တပ်တော် AA က စက်တင်ဘာလ ၅ ရက်နဲ့ ၆ ရက် ၂ ရက်အတွင်းမှာ စစ်ကောင်စီတပ်က ထောင်ထားခဲ့တဲ့ မြေမြှုပ်မိုင်း ၁၂၈ လုံးကို ရှင်းလင်းနိုင်ခဲ့တယ်လို့ သိရပါတယ်။

စက်တင်ဘာလ ၅ ရက်နေ့မှာ မောတောင်မြို့နယ်၊ သစ်တောရွာအနီးက ကားလမ်းမှာ စစ်ကောင်စီထောင်ထားခဲ့တဲ့ မြေမြှုပ်မိုင်း ၈၅ လုံးကို ရှင်းလင်းနိုင်ခဲ့ပြီး စက်တင်ဘာလ ၆ ရက်နေ့မှာလည်း မောင်တောမြို့နယ်၊ လေးမိုင်စခန်းက ကားလမ်းဘေးမှာလည်း စစ်ကောင်စီထောင်ထားခဲ့တဲ့ မြေမြှုပ်မိုင်း ၄၃ လုံးကို အာရက္ခတပ်တော် AA က ထပ်မံရှင်းလင်းနိုင်ခဲ့တယ်လို့ သိရပါတယ်။

စစ်ကောင်စီဟာ မောင်တောမြို့နယ်၊ လေးမိုင်ခွဆုံဝန်းကျင်အနီးမှာလည်း မြေမြှုပ်မိုင်းအများအပြားထောင်ခဲ့ပြီးတော့ အာရက္ခတပ်တော် AA ကလည်း မိုင်းရှင်းလင်းရေး လုပ်ဆောင်တဲ့အခါ မြေမြှုပ်မိုင်း အများအပြားရရှိထားပေမဲ့ နောက်ထပ်လည်း အဆိုပါ အနီးအဝန်းကျင်တစ်လျှောက်မှာ မြေမြှုပ်မိုင်းတွေ ရှိနေတဲ့အတွက် ဒေသခံပြည်သူတွေအနေနဲ့ အထူးသတိထား သွားလာကြဖို့လိုအပ်တယ်လို့လည်း AA ရဲ့ တာဝန်ရှိတဲ့သူတွေက ဆိုထားပါတယ်။

မောင်တောမြို့ တိုက်ပွဲကာလအတွင်းမှာ စစ်ကောင်စီဟာ သူတို့တပ်စွဲနေထိုင်ခဲ့တဲ့နေရာတွေ၊ တပ်ဆုတ်ကာထွက်ပြေးသွားတဲ့ တော၊ တောင်တွေ၊ ယာခင်း၊ လယ်ကွင်းတွေမှာလည်း မြေမြှုပ်မိုင်းတွေကို ရည်ရွယ်ချက်ရှိရှိ ထောင်ထားခဲ့သလို စစ်ကျန်လက်နက်ပစ္စည်းတွေကိုလည်း မဆင်မခြင်စွန့်ပစ်ထားခဲ့တယ်လို့ သိရပါတယ်။

စစ်ကောင်စီရဲ့ လူမဆန်တဲ့လုပ်ရပ်တွေကြောင့် ဝမ်းရေးအတွက် မှီခိုအားထားနေရတဲ့ ဒေသခံတွေဟာ ထင်းခုတ်၊ ဟင်းရှာသွားကြတဲ့အခါ မြေမြှုပ်မိုင်းနင်းမိပြီးတော့ သေဆုံး၊ ထိခိုက်ဒဏ်ရာ ရရှိတဲ့ဖြစ်စဥ်တွေလည်း ရှိခဲ့ပါတယ်။

အာရက္ခတပ်တော် AA ဟာ ရခိုင်ပြည်ရှိ မြို့နယ်တိုင်းမှာ မိုင်းအန္တရာယ်ဆိုင်ရာ အသိပညာပေး ဟောပြောပွဲပြုလုပ်တာ၊ မိုင်းအသိပညာပေး လမ်းကမ်းစာစောင်တွေ ဖြန့်ဝေတာတွေကို လုပ်ဆောင်ပေးနေတယ်လို့လည်း သိရပါတယ်။

Photo-အာရက္ခတပ်တော်မှမိုင်းရှင်းလင်းနေခြင်း

တိုက်ပွဲအတွင်းဖားကန့်ဗျူဟာကုန်းမှ ရမ်းသမ်းပစ်ခတ်မှုတွေလုပ်တာကြောင့် သံဃာ၁ပါးသေဆုံးကာ ပြည်သူ၄ဦးဒဏ်ရာရ

ကချင်ပြည်နယ်၊ ဖားကန့်မြို့ရှိ ဆန်းကြွယ်ကျေးရွာ အတွင်း စစ်တပ်နဲ့တော်လှန်ရေးအင်အားစုတို့ တိုက်ပွဲပြင်းထန်စွာ ဖြစ်ပွါးခဲ့ပြီး စစ်တပ်ဘက်မှ (၂၀)ယောက်ခန့်သေဆုံးခဲ့တယ်လို့ သိရပါတယ်။

ပြီးခဲ့တဲ့ စက်တင်ဘာလ(၆)ရက်နေ့ မနက်၄နာရီလောက်မှာ စစ်ကောင်စီစစ်ကြောင်းတွေဟာ ဖားကန့်မြို့နယ်အတွင်းမှာရှိတဲ့ မမုံ-ဖားပြင်ကျေးရွာနဲ့ မှော်တောင်း-ဆန်းကြွယ်ကျေးရွာတို့ကို စစ်ကြောင်းထိုးဝင်ရောက်လာခဲ့တယ်လို့သိရပါတယ်။

စစ်ကောင်စီရဲ့အဆိုပါစစ်ကြောင်းတွေနဲ့တော်လှန်ရေးအင်အားစုတို့ ဆန်းကြွယ်ကျေးရွာအတွင်း စက်တင်ဘာလ၆ရက် မနက်အစောပိုင်းမှစတင်ကာ တိုက်ပွဲပြင်းထန်စွာဖြစ်ပွါးခဲ့တယ်လို့ သိရပါတယ်။

“မနက်(၄)နာရီလောက်ကတည်းက စထိုးလာတာ ၊ စစချင်း စကစ ဘက်က ရှေ့က (၃)ယောက်တန်းကျတာပဲ ၊ နေ့လယ်ထိ မကောက်နိုင်သေးဘူး”

ဟု ဒေသခံ စစ်ရေးသတင်းရင်းမြစ်တစ်ဦးမှ BBM ကိုပြောပါတယ်။ အဆိုပါမနက်ပိုင်းတိုက်ခိုက်မှုအတွင်းမှာပင် စစ်ကောင်စီဘက်မှ (၃)ယောက်ခန့်သေဆုံးပြီး တိုက်ပွဲပြင်းထန်တာကြောင့် စစ်တပ်ဘက်မှ အလောင်းကိုပြန်မကောက်နိုင်သလို တော်လှန်ရေးအင်အားစုတွေဘက်မှလည်း စစ်တပ်ဒရုန်းကြောင့် လက်နက်သွားရောက်ကောက်ယူနိုင်ခြင်းမရှိဘူးဟုလည်းသိရပါတယ်။

ဒါ့အပြင် အဆိုပါတိုက်ပွဲဖြစ်ပွါးနေချိန် မြေပြင်စစ်ကြောင်းများသာမက စစ်ကောင်စီရဲ့ဖားကန့်ဗျူဟာကုန်းမှလည်း လက်နက်ကြီး၊ ဒရုန်းများဖြင့် တော်လှန်ရေးတပ်ဖွဲ့များကို တိုက်ခိုက်မှုတွေပြုလုပ်ခဲ့တယ်လို့လည်း အဆိုပါသတင်းရင်းမြစ်မှ ဆက်ပြောပါတယ်။

” ဗျူဟာကုန်းက ဒရုန်းနဲ့ ဖိနေလို့ အလက်တွေက သွားကောက်လို့မရဘူး၊ စကစ ဘက်ကလည်း သူ့လူတွေရဲ့ အလောင်းကိုလာမကောက်ရဲဘူးလေ၊ ဒီတိုင်းပဲတစ်နေကုန်ထားတာ”

တိုက်ပွဲဖြစ်ပွါးပြီး ညနေပိုင်းအချိန်မှာတော့ စစ်ကောင်စီဘက်မှ ဒရုန်းအားကိုးဖြင့် သေဆုံးသွားတဲ့ ၎င်းစစ်သည်တွေအလောင်းကို လာရောက်ကောက်ယူဖို့ ကြိုးစားခဲ့ပြီးအဆိုပါ အလောင်းလာကောက်တဲ့ စစ်ကောင်စီတပ်သားတွေကို KIAနဲ့တော်လှန်ရေးအင်အားစုတွေက ထပ်မံတိုက်ခိုက်ခဲ့တာကြောင့် ထိခိုက်သေဆုံးမှုတွေများခဲ့တယ်လို့လည်းသိရပါတယ်။

” ဒရုန်းအားကိုးနဲ့ ညနေထပ်ပြီး အလောင်းလာကောက်သေးတယ်၊ အဖွဲ့လိုက်ကြီး တက်လာတာ ၊ ဒီဘက်ကပစ်တော့ အတွဲလိုက်ကြီး ထပ်ထိတာ ၊ တစ်နေကုန်ဆို ၂၀ လောက် ကျသွားကြပြီ”

တိုက်ပွဲအတွင်း စစ်ကောင်စီဗျူဟာကုန်းမှ လက်နက်ကြီး ရမ်းသမ်းပစ်ခတ်မှုတွေကြောင့် ဆန်းကြွယ်ကျေးရွာရှိ မစိုးရိမ်ကျောင်းတိုက်မှ ဆရာတော် တစ်ပါး ပျံလွန်တော်မူပြီး အသက်(၇)နှစ်အရွယ် ကလေးအပါ ပြည်သူ(၄)ဦး ထိခိုက်ဒဏ်ရာရခဲ့တယ်လို့လည်း သိရပါတယ်။

အဆိုပါတိုက်ပွဲအတွင်း ပြည်သူတွေသေဆုံးမှုနဲ့ပတ်သတ်ပြီး ဒေသခံပြည်သူတစ်ဦးမှလည်း

“အဓိကတော့ ဖားကန့်ဗျူဟာကုန်းက ပစ်ကူပေးတဲ့ လက်နက်ကြီးကြောင့်ပါဗျ”

ဟု BBM ကိုထပ်မံအတည်ပြုပြောကြားပါတယ်။ ဖားကန့်မြို့နယ်အတွင်း စစ်ကောင်စီစစ်ကြောင်းများ ဝင်ရောက်လာပြီးတဲ့အချိန်မှစတင်ကာ မြို့နယ်တစ်ခုလုံး တိုက်ပွဲပြင်းထန်ပြီး စစ်ရေးတင်းမာနေတဲ့ အခြေအနေရှိတာကြောင့် စစ်ဘေးရှောင်ဦးရေ ထပ်တိုးလာနိုင်ချေရှိတယ်လို့ ဒေသခံပြည်သူတွေမှ ပြောဆိုမှုတွေရှိနေပါတယ်။

photo-ပုံဟောင်း

တနင်္သာရီတိုင်း၊ ပုလောမြို့နယ်အတွင်းမှာ အတက်တန်းကျောင်းအတွင်း တပ်စွဲထားတဲ့ စစ်ကောင်စီ တပ်သားတွေက တိုက်ပွဲဖြစ်ပွားခြင်းမရှိဘဲ ဒရုန်းနဲ့ဗုံးသီး ကြဲချတိုက်ခိုက်ခဲ့တာကြောင့် နေအိမ်၂လုံးပျက်စီးသွားတယ်လို့ ဒေသခံသတင်းရင်းမြစ်တစ်ဦ်းက BBM ကိုပြောပါတယ်။

စက်တင်ဘာလ ၃ရက်နေ့က ပုလောမြို့နယ်၊ လှည်းကျွန်း၀ကျေးရွာကို တစ်မိုင်ကုန်းနားက အထက(ခွဲ)ပေါင်း အတွင်း ၀င်ရောက်တပ်စွဲထားတဲ့ စစ်ကောင်စီ တပ်သားတွေက တိုက်ပွဲဖြစ်ပွားခြင်းမရှိဘဲ ရွာအတွင်း PDFတွေရှိတယ်လို့စွပ်စွဲကာ အခုလို ဒရုန်းနဲ့ဗုံးကြဲချတိုက်ခိုက်ခဲ့တာပဲဖြစ်ပါတယ်။

“လှည်းကျွန်း၀ရွာမှာက တစ်မိုင်တောင်စခန်း အသိမ်းခံရကတည်းက လူတွေသိပ်မနေကြတော့ဘူး။ ဘုန်းကြီးကျောင်းမှာတောင် ဘုန်းကြီးတွေကိုယ်တိုင် စစ်ဘေးရှောင်နေကြတာ။ လူထိခိုက်မှုတော့မရှိဘူး။ စစ်ရှောင်နေကြတော့။ အိမ်၂ဆောင်တော့ ပြဲသွားတယ်”လို့ ‌ဒေသခံ‌သတင်းရင်းမြစ်က BBM ကိုပြောပါတယ်။

ဒါ့အပြင် ဇူလိုင် ၁၃ ရက်နေ့ကလည်း ပုလော၊ အထဲစုရပ်ကွက်ကျေးရွာအတွင်းကို ဒရုန်းနဲ့ ဗုံးသီးချ တိုက်ခိုက်မှုကြောင့် ဒေသခံ အမျိုးသားတစ်ဦး နောက်ကျော ဗုံးစထိမှန် ဒဏ်ရာတွေရရှိခဲ့တယ်လို့ မြိတ်ခရိုင်အမှတ် (၁) တပ်ရင်း၊ ပြောရေး ဆိုခွင့်ရှိသူက ပြောပါတယ်။

“ဒီဘက်တွေမှာက စစ်ကောင်စီက လေကြောင်းထက် ဒရုန်းကိုပိုပြီးအသုံးပြုလာတာရှိတယ်။ နေအိမ် ထိခိုက်ပျက်စီးမှု တွေလည်း ရှိတယ်။ လောလောဆယ်တော့ ထိခိုက်ဒဏ်ရာရရှိသူကို ပုလောဆေးရုံမှာ ဆေးကုသမှုခံယူနေပါတယ်” သူကဆက်လက်ဖြေကြားထားပါတယ်။

လက်ရှိမှာ စစ်ကောင်စီဟာ လာမယ့် ဒီဇင်ဘာလမှာ ရွေးကောက်ပွဲကျင်းပနိုင်ရေးအတွက် စစ်အုပ်ချုပ်ရေးကြေညာထားတဲ့ မြို့နယ် ၆၃မြို့နယ်ကို လေကြောင်းက‌သာမက စစ်မှုထမ်းအင်အားအများအပြားနဲ့ ထိုးစစ်ဆင်တိုက်ခိုက်‌နေတာပဲဖြစ်ပါတယ်။

ပုံ-ပုလောမြို့၀င်ဆိုင်းဘုတ်(ပုံဟောင်း)

#BBM#News#UpdateNews#Palaw#Junta#DroneAttack

မကွေး၊ ပဲခူး၊ ဧရာဝတီတိုင်းက နယ်စပ်တစ်လျှောက်မှာလည်း တိုက်ပွဲတွေ နေ့စဥ်ရက်ဆက် ဖြစ်ပွားနေ

ပြီးခဲ့တဲ့ ၂၀၂၃ ခုနှစ်၊ နိုဝင်ဘာ ၁၃ ရက်နေ့က စတင်ခဲ့တဲ့ အာရက္ခတပ်တော် AA ရဲ့ မြို့သိမ်း၊ စခန်းသိမ်းတိုက်ပွဲတွေဟာ လက်ရှိမှာ ၂ နှစ်နီးပါးတိုင်အောင် ရောက်ရှိလာခဲ့တာဖြစ်ပြီး ရခိုင်ပြည်သူ လူထုတစ်ရပ်လုံး ရည်မှန်းချက် အလုံးစုံပြည့်ဝတဲ့အထိ ဆက်လက်တိုက်ပွဲဝင်သွားမှာ ဖြစ်တယ်လို့ အာရက္ခတပ်တော် AA က မနေ့က စက်တင်ဘာလ ၅ ရက်နေ့မှာ ထုတ်ပြန်ထားပါတယ်။

အာရက္ခတပ်တော် AA ဟာ ၁၀၂၇ စစ်ဆင်ရေးအတွင်းမှာ ရခိုင်ကမြို့နယ် ၁၄ ခု အပါအဝင် ချင်းပြည်နယ်က ပလက်ဝမြို့နယ်တွေကို တိုက်ခိုက်သိမ်းပိုက်ထိန်းချုပ်ထားပြီး စစ်တွေ၊ ကျောက်ဖြူမြို့နယ်တို့မှာ တိုက်ပွဲတွေဖော်

ဆောင်နေတာလည်း ဖြစ်ပါတယ်။

အလားတူ ရခိုင်အစပ်က မကွေးတိုင်း၊ ပဲခူးတိုင်းနဲ့ ဧရာဝတီတိုင်းတို့မှာ ပူးပေါင်းမဟာမိတ်တွေနဲ့အတူ စခန်းသိမ်းတိုက်ပွဲတွေ နေ့စဥ်ရက်ဆက် ဖော်ဆောင်တိုက်ပွဲဝင်နေတာလည်း ဖြစ်ပါတယ်။

အဲဒီလို တိုက်ပွဲဖော်ဆောင်နေစဥ်အတွင်းမှာ စစ်ရှုံးစစ်ကောင်စီဟာ နိုင်ငံအနှံ့က ပြည်သူ့စစ်မှုထမ်း (ပစ) တွေကို အတင်းအဓမ္မတပ်သားသစ်စုဆောင်းကာ သူတို့ရဲ့လက်ကျန်တပ်ဖွဲ့ဝင်တွေနဲ့အတူ တော်လှန်ရေးလက်နက်ကိုင်အဖွဲ့အစည်းတွေ သိမ်းပိုက်ထိန်းချုပ်ထားတဲ့နေရာတွေကို ထိုးစစ်ဆင်မှုတွေ အဆက်မပြတ် ပြုလုပ်လာနေပါတယ်။

စစ်ကောင်စီတပ်ဟာ သူတို့စစ်သင်တန်းပေးထားတဲ့ စစ်မှုထမ်းတွေနဲ့အတူ အခုနှစ် ၂၀၂၅ ခုနှစ်၊ မတ်လက စတင်ကာ သူတို့ရဲ့အားသာချက်ဖြစ်တဲ့ လေကြောင်းပစ်ကူ၊ ရေကြောင်းပစ်ကူ၊ နည်းပညာအတန်အသင့် အဆင့်မြင့်ဒရုန်းတွေနဲ့ အာရက္ခတပ်တော် AA သိမ်းထားတဲ့ စစ်ကောင်စီရဲ့ တပ်မဌာနချုပ်၊ စစ်တိုင်းဌာနချုပ်၊ တပ်ရင်းဌာနချုပ် အပါအဝင် စစ်ရေးအရ အရေးပါသောနေရာတွေကို ပြန်လည်သိမ်းပိုက်ရရှိနိုင်ဖို့အတွက် ထိုးစစ်ဆင်တိုက်ခိုက်တာတွေ ပြုလုပ်လာနေတာလည်း ဖြစ်ပါတယ်။

စစ်ကောင်စီဟာ ရှမ်းမြောက်ဒေသအတွင်းမှာ သူတို့လက်လွှတ်ဆုံးရှုံးလိုက်ရတဲ့ တပ်စခန်းတွေကို ပြန်လည်ရရှိဖို့ ရည်ရွယ်ထားကာ တန်ပြန်ထိုးစစ်တွေနဲ့အတူ မြန်မာနိုင်ငံရဲ့ နေရာတစ်ချို့မှာ အသာစီးရ အောင်ပွဲရနေတယ်လို့ စိတ်ကြီးဝင်ကာ ဘဝင်မြင့်နေတယ်လို့လည်း AA က ဆိုထားပါတယ်။

အဲဒီလို စိတ်ကြီးဝင် ဘဝင်မြင့်ပြီး ယုံကြည်မှုလွန်ကဲနေတဲ့ စစ်ကောင်စီတပ်တွေဟာ အာရက္ခတပ်တော် AA နဲ့ ရင်ဆိုင်တိုက်ခိုက်နေရတဲ့ ရှေ့တန်းစစ်မြေပြင်နေရာတွေကို ရွှေ့ပြောင်းကာ ထိုးစစ်ဆင်တိုက်ခိုက်လာပေမဲ့လည်း AA ရဲ့ ခုခံစစ်နဲ့ တန်ပြန်ထိုးစစ်အောက်မှာ သတ္တိ၊ နည်းဗျူဟာအရ မယှဉ်နိုင်ဘဲ မြေပြင်ထိုးစစ်တိုင်းမှာ အကျအဆုံးများစွာကို အလူးအလဲခံနေရပြီးတော့ ခွေးပြေးဝက်ပြေး ထွက်ပြေးမှုတွေရှိတယ်လို့လည်း သိရပါတယ်။

စစ်ကောင်စီဟာ ဧရာဝတီတိုင်း-ရက္ခိုင်အစပ်၊ မကွေးတိုင်း-ရက္ခိုင်အစပ်နေရာတွေမှာ သူတို့လက်လွှတ်ထားရတဲ့နေရာတွေကို ပြန်လည်ရရှိဖို့အတွက် အားထုတ်ကြိုးပမ်းနေသလို ရခိုင်ပြည်အတွင်းက AA ဝန်းရံပိတ်ဆို့ထားတဲ့ စစ်တွေနဲ့ ကျောက်ဖြူမြို့နယ်မှာရှိတဲ့ လက်ကျန်စခန်းတွေကိုလည်း ထပ်မံမကျစေဖို့အတွက် ထိုးစစ်ဆင်တိုက်ခိုက်လာပေမဲ့လည်း AA ရဲ့ တန်ပြန်ထိုးစစ်အောက်မှာ အထိအခိုက်များစွာနဲ့ ဆက်လက်ကြုံတွေ့နေရတယ်လို့ AA က ဆိုပါတယ်။

၂၀၂၅ ခုနှစ်၊ စက်တင်ဘာလ ၄ ရက် နေ့မှာလည်း မကွေးအခြေစိုက် စစ်ကောင်စီရဲ့ စကခ (၁၇) လက်အောက်ခံ ခမရ (၅၇၄)တပ်ရင်းနဲ့ ဆောက်လုပ်ရေးအင်ဂျင်နီယာတပ်ခွဲ (၉၄၄)တပ်ရင်းက ပူးပေါင်းပါဝင်တဲ့ စစ်ကြောင်းဟာ မကွေးတိုင်း၊ ငဖဲမြို့နယ်၊ စွန်တက်ကျေးရွာရဲ့ အရှေ့မြောက်ဖက် မီတာ ၂၈၀၀ ခန့်အကွာအဝေးကို ထိုးစစ်ဆင်လာတာကြောင့် AA နဲ့ ၂ နာရီကြာ ထိတွေ့ဖြစ်ပွားခဲ့တယ်လို့ AA က ဆိုထားပါတယ်။

အဆိုပါတိုက်ပွဲအတွင်းမှာ စစ်ကောင်စီတပ်က လက်နက်ခဲယမ်း၊ စစ်အသုံး အဆောင်ပစ္စည်းတွေ၊ အလောင်းတွေနဲ့အတူ ကျောပိုးအိတ်အများအပြားကိုထားခဲ့ပြီးတော့ စကခ (၁၇) လက်အောက်ခံတပ်ရင်းတွေဟာ တပ်လန့်ကာ ပြန်လည်ဆုတ်ခွာသွားတယ်လို့လည်း သိရပါတယ်။

စစ်ကောင်စီဟာ စကခ (၁၇) အပြင် စကခ (၁၄) က တပ်ရင်းတွေမှာ အတင်းအဓမ္မ စစ်သားသစ်စုဆောင်းတာ၊ စစ်သင်တန်းဆင်းလာကြတဲ့ ရဲဘော်သစ်တွေကိုအသုံးပြုကာ ပဲခူးတိုင်းနဲ့ ရခိုင်ဒေသက ထိစပ်နေတဲ့ နေရာတွေမှာ အင်အား (၁၅၀၀) ခန့် ထပ်တိုးကာ မရပ်မနား ထိုးစစ်ဆင်မှုတွေကို ဆက်တိုက်ပြုလုပ်လာတာကြောင့် ပဲခူး-ရခိုင်အစပ်က နေရာအချို့မှာလည်း တိုက်ပွဲတွေ ပြင်းထန်နေတယ်လို့ AA ရဲ့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ ၂၀၂၅ ခုနှစ်၊ ဖေဖော်ဝါရီလ ၄ ရက်နေ့ကလည်း မကွေးတိုင်း၊ ဂုတ်စီးရိုးဒေသတိုက်ပွဲအတွင်းမှာ အမှတ် (၉၉) ခြေလျင်တပ်မဌာနချုပ်၊ အမှတ် (၉၉၂) နည်းဗျူဟာအဖွဲ့က အသက် (၄၆) နှစ်အရွယ်ရှိ ပြန်တမ်းဝင်အမှတ်၊ ကြည်း/၃၃၁၄၄ ဒုတိယဗိုလ်မှူးကြီး ကျော်ကျော်သက်၊ ယာယီနည်းဗျူဟာမှူး အပါအဝင် ဗျူဟာရုံးအဖွဲ့ဝင် (၁၇) ဦးတို့ကိုလည်း အာရက္ခတပ်တော် AA က လက်ရဖမ်းဆီးမိခဲ့တယ်လို့ သိရပါတယ်။

နောက်ထပ်လည်း စစ်ကောင်စီတပ်နဲ့ အာရက္ခတပ်တော် AA တို့ဟာ ပဲခူးတိုင်း၊ ပန်းတောင်မြို့နယ် ဆင်လမ်ကျေးရွာ အနောက်ဘက် (၂) ကီလိုမီတာနဲ့ (၁.၇) ကီလိုမီတာ အကွာအဝေးနေရာတွေမှာလည်းကောင်း၊ပန်းတောင်မြို့နယ်၊ ညောင်ကျိုးကျေးရွာရဲ့ အရှေ့ မြောက်ဘက် (၂.၅) ကီလိုမီတာအကွာအဝေး တောင်ကြောတွေမှာလည်းကောင်း တိုက်ပွဲတွေဆက်လက်ပြင်းထန်နေပါတယ်။

ဒါ့အပြင် အာရက္ခတပ်တော် AA နဲ့ ပူးပေါင်းမဟာမိတ်တပ်တွေ သိမ်းထားတဲ့ ဧရာဝတီတိုင်း – ရက္ခိုင်နယ်စပ်က စက်စက်ယိုကျေးရွာ ပတ်ဝန်းကျင်မှာလည်း စစ်ကောင်စီတပ်တွေက နေ့စဥ်ရက်ဆက်ဆိုသလို ထိုးစစ်ဆင်မှုတွေ ရှိနေတာကြောင့် တိုက်ပွဲတွေမှာလည်း ဒီနေ့အချိန်ထိ ဆက်လက်ပြင်းထန်နေတယ်လို့ AA က ဆိုထားပါတယ်။

အာရက္ခတပ်တော် AA ဟာ ရခိုင်က စစ်တွေနဲ့ ကျောက်ဖြူမြို့နယ်တွေကို အခုနှစ်ဖေဖော်ဝါရီလအတွင်းမှာ ထိုးစစ်ဆင်တိုက်ခိုက်နေတာဖြစ်ပြီး လက်ရှိမှာ ၆ လကျော်အထိကြာမြင့်လာခဲ့ပြီးလည်း ဖြစ်ပါတယ်။

ပြီးခဲ့တဲ့ စက်တင်ဘာလ ၃ ရက်နေ့မှာလည်း အာရက္ခတပ်တော် AA ဟာ ပဲခူးတိုင်း၊ ဥသျှစ်ပင်မြို့နယ်ညောင်ခြေထောက်ကျေးရွာရှိ ကပစ ၆ စက်ရုံနဲ့ ၇ မိုင်ခန့်အကွာက ဆင်လန်းကျေးရွာအနီးမှာ အခြေစိုက်ထားတဲ့ စစ်ကောင်စီရဲ့ ကာကင်းစခန်း ၄ ခုထက်မနည်းကို သိမ်းပိုက်ရရှိခဲ့တယ်လို့ သိရပါတယ်။

ပုံစာ – AA Info Desk