စစ်ရေး

မကွေးတိုင်း၊ ကံမမြို့နယ်၊ ရေနံ့သာရဲကင်းစခန်းကနေ ထွက်လာတဲ့ စစ်ကောင်စီစစ်ကြောင်းကို ၂ ကြိမ်တိုင်တိုင် မိုင်းဆွဲပစ်ခတ်တိုက်ခိုက်ခဲ့ရာ စုစုပေါင်း ၁၆ ဦးသေဆုံးခဲ့တယ်လို့ သရက်ခရိုင် အမှတ် ၄ တပ်ရင်းရဲ့ တာ၀န်ခံက ကိုမြတ်က BBM ကိုပြောပါတယ်။

ဒီဇင်ဘာလ ၁၂ ရက်နေ့မှာ ရွေးကောက်ပွဲအတွက်နယ်မြေချဲ့လာတဲ့ သရက်မြို့မှ အင်အား (၃၀)ပါ စစ်ကောင်စီစစ်ကြောင်းနဲ့ ရေနံ့သာရဲကင်းစခန်းမှ ထွက်လာတဲ့ အင်အား (၄၀)ပါ ပူးပေါင်းစစ်ကြောင်းဟာ သရက်-ကံမ လမ်းပိုင်းအတိုင်း နှစ်ဘက်ညှပ် စစ်ကြောင်းထိုးလာခဲ့တယ်လို့ ဆိုပါတယ်။

မနက် ၉ နာရီ၀န်းကျင်မှာ ကံမရေနံသာစခန်းမှ ထွက်လာတဲ့ အင်အား ၄၀ ခန့်ပါ စစ်ကြောင်းကို ကံမမြို့နယ် နတ်မီးတောက်ကျေးရွာအနီးမှာ စောင့်ကြိုပစ်ခတ်တိုက်ခိုက်ခဲ့ရာ ၅ မိနစ်ခန့်တိုက်ပွဲဖြစ်ပွားပြီး စစ်ကောင်စီဘက်မှ မိုင်းကွင်းထဲဝင်လာတဲ့ ၆ ဦးခန့် သေဆုံးခဲ့တယ်လို့ ဆိုပါတယ်။

“ရေနံ့သာဘက်ကလာတဲ့ အင်အား ၄၀ ပါစစ်ကြောင်းပေါ့၊ အဲ့ကနေ ရှေ့ပွိုင့်ထွက်လာတဲ့ စခတွေဒီမိုင်းကွင်းထဲကို ၀င်လာတဲ့အချိန်မှာ မိုင်းဆွဲတိုက်ခိုက်ခဲ့တာပါ၊ ထွက်လာတဲ့ ၆ ကောင်လုံး အတုံးအရုံးပဲဗျ၊ နောက်ကကျန်တဲ့စခတွေကိုတော့ လက်နက်ငယ်‌တွေနဲ့ ပစ်ခတ်ခဲ့ပါတယ်”လို့ တာ၀န်ခံ ကိုမြတ်က ဆက်ပြောပါတယ်။

အထိနာသွားတဲ့ စစ်ကောင်စီစစ်ကြောင်းဟာ လက်ကျန် အင်အား ၃၀ ခန့်နဲ့ သရက်-ကံမ လမ်းပိုင်းအတိုင်း ဆက်လက်စစ်ကြောင်းထိုးလာပြီး ထန်းဖြူကျေရွာနဲ့ ရေတွင်းကြီးကျေးရွာမှ ဒေသခံပြည်သူ နေအိမ်တွေကို ဖောက်ထွင်းမွှေနှောက်ခိုးယူပြီး ထွက်ခွာလာခဲ့တယ်လို့ ဆိုပါတယ်။

“ဒီကောင်တွေထုံးစံအတိုင်းပေါ့၊ စစ်ကြောင်းထိုးလာရင် အနည်းဆုံးတော့ ခိုးတာပဲ၊ အခုလည်း မွှေသွားတယ်ကြားတယ်ဗျ”လို့ ဆိုပါတယ်။

အဆိုပါစစ်ကြောင်းဟာ သရက်မြို့နယ် စက်တောင်ကျေးရွာအနီးအရောက် နေ့လယ် ၁၂ နာရီမှာ ထပ်မံပြီး အနီးကပ် စောင့်ကြိုပစ်ခတ်တိုက်ခိုက်ရာ စစ်ကောင်စီဘက်မှ ၁၀ ဦး ထပ်မံသေဆုံးခဲ့တယ်လို့ဆိုပါတယ်။

“အဲ့ဘက်ကျတော့ မိုင်းကွင်းမရှိဘူး၊ ဒီကောင်တွေ ထိုးလာတာကို ကြိုရထားတော့ အသင့်ကြိုစောင့်ပြီးတိုက်ခိုက်တာပေါ့၊ နာရီ၀က်လောက်ကြာတယ်ဗျ၊ အဲ့ဒီချိန်မှာ အနီးကပ်ဆိုတော့ ဒီကောင်တွေဘက်က အထိအခိုက်များသွားတယ်”လို့ ဆိုပါတယ်။

တိုက်ခိုက်ခံလိုက်ရတဲ့ သရက်မြို့မှ ထွက်လာတဲ့ စစ်ကြောင်းနဲ့ ပူပေါင်းမိပြီး သရက်မြို့နယ်၊ စက်တောင်ကျေးရွာ ဘုန်းကြီးကျောင်းအနီးမှာ လက်နက်ကြီးတပ်ဆင်ကာ တိုက်ပွဲဖြစ်ပွားရာ အနီးတဝိုက်ကို ရမ်းသမ်းပစ်ခတ်မှုတွေ ရှိတယ်လို့ ဆိုပါတယ်။

ဒါ့ကြောင့် တိုက်ပွဲထပ်မံဖြစ်ပွားနိုင်တာ ကြောင့် သရက်-ကံမလမ်းပိုင်းကို အသုံးပြုသွားလာကြမဲ့ ပြည်သူတွေအနေနဲ့ သတိပြုသွားလာကြပါဖို့ သရက်ခရိုင် တပ်ရင်း ၄ က အသိပေးထားပါတယ်။

ရှမ်းပြည်နယ်မြောက်ပိုင်း မိုးကုတ်ခရိုင်၊ မိုးမိတ်မြို့နယ်၊ မြစ်ဆုံကျေးရွာကို စစ်ကောင်စီတပ်က လေကြောင်းကနေ ဗုံးကြဲချတိုက်ခိုက်မှုကြောင့် ကလေးငယ်တွေအပါအဝင် အပြစ်မဲ့အရပ်သားပြည်သူ ၁၁ ဦး သေဆုံးသွားတယ်လို့ TNLA က ဒီကနေ့ ဒီဇင်ဘာလ ၈ ရက်နေ့မှာ ထုတ်ပြန်ထားပါတယ်။

ပြီးခဲ့တဲ့ ဒီဇင်ဘာလ ၆ ရက်နေ့၊ နံနက် ၉ နာရီအချိန်မှာ စစ်ကောင်စီတပ်က ဂျက်ဖိုက်တာ ၂ စီးနဲ့ မိုးမိတ်မြို့နယ်၊ မြစ်ဆုံကျေးရွာကို လာရောက်ဗုံးကြဲချတိုက်ခိုက်မှုကြောင့် ကလေးငယ် ၂ ဦး၊ အမျိုးသား ၇ ဦးနဲ့ အမျိုးသမီး ၂ ဦး စုစုပေါင်း ၁၁ ဦး တို့မှာထိခိုက်ဒဏ်ရာ ရရှိခဲ့တာလည်း ဖြစ်ပါတယ်။

အဆိုပါ စစ်ကောင်စီတပ်က ဗုံးကြဲချတိုက်ခိုက်မှုကြောင့် နေအိမ် ၁ လုံးမှာလည်း ဗုံးစတွေထိမှန်ကာ ပျက်စီးသွားတယ်လို့လည်း သိရပါတယ်။

ပြီးခဲ့တဲ့ အောက်တိုဘာ ၂၇ ရက်နေ့ကလည်း စစ်ကောင်စီတပ်ဟာ မိုးမိတ်မြို့နယ်၊ မန်ကျည်းပင်ကျေးရွာကို ပေါင် ၅၀၀ ဗုံး ၁ လုံး နဲ့ ပေါင် ၂၅၀ ဗုံး ၁ လုံးတို့ လာရောက်ကြဲချ တိုက်ခိုက်ခဲ့တာကြောင့် အရပ်သားပြည်သူ နေအိမ်တစ်လုံးမှာလည်း ဗုံးစတွေထိမှန်ကာ ပျက်စီးသွားခဲ့ရတာလည်း ဖြစ်ပါတယ်။

ဒါကြောင့် အရပ်သားပြည်သူတွေအနေနဲ့ စစ်ကောင်စီတပ်ရဲ့ ဗုံးကြဲချတိုက်ခိုက်မှုတွေကို ရှောင်ရှားနိုင်ဖို့အတွက် စစ်ရေးသတိအမြဲရှိကြဖို့ လိုအပ်ပြီး လေကြောင်းရန်ကနေ ကာကွယ်နိုင်ဖို့အတွက်လည်း ကာကွယ်ရေးဆိုင်ရာနည်းလမ်းတွေကို လိုက်နာဆောင်ရွက်ဖို့ လိုအပ်တယ်လို့ တအာင်းတပ် TNLA က သတိပေး ပြောဆိုထားပါတယ်။

ပြီးခဲ့တဲ့ အောက်တိုဘာလ ၂၉ ရက်နေ့က စစ်ကောင်စီတပ်နဲ့ တအာင်းတပ် TNLA တို့ဟာ တရုတ်ရဲ့ကြားဝင်ညှိနှိုင်းမှုနဲ့ အပစ်အခတ်ရပ်စဲရေးအတွက် သဘောတူလက်မှတ်ရေးထိုးခဲ့ကြပြီး၊ မိုးမိတ်နဲ့ မိုးကုတ်မြို့နယ်တွေက TNLA ဆုတ်ခွာပေးဖို့နဲ့ နှစ်ဖက်တပ်တွေ ထိုးစစ်ရောက်တဲ့နေရာမှာ ရပ်ဆိုင်းထားကြဖို့ စတဲ့အချက်အလက်တွေလည်း ပါဝင်ခဲ့တာဖြစ်ပါတယ်။

လက်ရှိမှာတော့ မိုးကုတ်နဲ့ မိုးမိတ်မြို့နယ်တွေအနီးမှာ စစ်ကောင်စီတပ်နဲ့ NUG လက်အောက်ခံ တော်လှန်ရေးတပ်တွေ တိုက်ပွဲတွေဖြစ်ပွားနေကြပြီး စစ်ကောင်စီတပ်ကလည်း မိုးကုတ်၊ မိုးမိတ်မြို့နယ်တွေကို လေကြောင်းကနေ ဗုံးကြဲချတိုက်ခိုက်နေတာလည်း ဖြစ်ပါတယ်။

ဖားကန့်ဗျူဟာကုန်းမှ လက်နက်ကြီး၊ လက်နက်ငယ်၊ စက်သေနတ်တွေနဲ့ ရမ်းသမ်းပစ်ခတ်နေ

ကချင်ပြည်နယ်၊ ဖားကန့်မြို့ပေါ်ကို စစ်ကောင်စီလက်‌အောက်ခံ ရဲတပ်ရင်း(၃၀)မှ အင်အား ၁၀၀ ကျော် ရောက်ရှိလာပြီး နှစ်ဘက်ပစ်ခတ်မှုတွေဖြစ်ပွားခဲ့တဲ့အပြင် ဖားကန့်ဗျူဟာကုန်းမှလည်း လက်နက်ကြီး၊ လက်နက်ငယ်နဲ့ စက်သေနတ်တွေ ဆက်တိုက်ပစ်ခတ်နေတယ်လို့ သိရပါတယ်။

အခုရက်ပိုင်းအတွင်း ဖားကန့်မြို့ကို မိုးကောင်းအခြေစိုက် ရဲတပ်ရင်း(၃၀)မှ အင်အား ၂၅၀ ခန့်ဟာ ယာဥ်တန်းတွေနဲ့ အင်အားဖြည့်ဖို့ တက်လာခဲ့တယ်လို့ သိရပါတယ်။

အဆိုပါ အင်အား ၂၅၀ ထဲမှ ပထမအသုတ်အဖြစ် အင်အား ၁၀၀ ကျော်ပါတဲ့ ရဲတပ်ရင်း(၃၀)မှ ရှေ့ပြေးအဖွဲ့ဟာ နိုဝင်ဘာလ ၈ ရက်၊ မနေ့က ဖားကန့်အဝင် လယ်ပြင်၊ လုံးခင်းအနီးသို့ ရောက်ရှိလာတာကြောင့် တော်လှန်ရေးအင်အားစုတွေက ဒရုန်းနဲ့ တိုက်ခိုက်တာအပြင် မိုင်းဆွဲတိုက်ခိုက်မှုတွေ ပြုလုပ်ခဲ့တယ်လို့ သိရပါတယ်။

“ဖားကန့်ကို ဒီရက်ပိုင်းအတွင်း ၁ ရက် ၂ ရက်အတွင်းမှာ ရဲတပ်ရင်း(၃၀)က အင်အား ၂၅၀၊ ၃၀၀ လောက် တက်လာတယ်လို့ ကျွန်တော်တို့သိရတယ်၊ စုံစမ်းလို့ရတယ်၊ အဲ့ရဲတပ်ရင်းက တက်လာတော့ မနေ့ကမနက်ပိုင်းလောက်မှာပဲ အင်အား ၁၀၀ လောက်က ဒီဖားကန့်အဝင် လယ်ပြင်ဆိုတာရှိတယ်၊ အဲ့ကိုရောက်လာတယ်လို့ သိရတယ်၊ အဲ့ကိုရောက်လာတဲ့နောက်ပိုင်းမှာပဲ ပစ်တဲ့ခတ်တဲ့ဟာတွေ၊ လယ်ပြင်၊ လုံးခင်းကနေ ဖားကန့်ကိုသွားမှာပဲ ပုံမှန်အရဆိုရင် အဲ့လိုရောက်လာပြီဆိုရင် ဒီမှာရှိတဲ့ ဒေသကာကွယ်ရေးအဖွဲ့ KIA နဲ့ KPDF တို့က အဲ့တာကိုလိုက်ပြီးတော့ တားတာ စီးတာ ပစ်တာပေါ့ ” လို့ ဖားကန့်ဒေသခံတစ်ဦးက BBM ကိုပြောပါတယ်။

အဆိုပါရဲတပ်ဖွဲ့တွေကို တော်လှန်ရေးအင်အားစုတွေက လမ်းတစ်လျှောက် တိုက်ခိုက်မှုတွေပြုလုပ်ခဲ့တာကြောင့် စစ်ကောင်စီလက်အောက်ခံ ရဲအချို့ထိခိုက်မှုတွေရှိတယ်လို့လည်း သိရပါတယ်။

ဒီလိုထိခိုက်မှုတွေရှိခဲ့တာကြောင့် ဖားကန့်ဗျူဟာကုန်းပေါ်မှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက တော်လှန်ရေးအင်အားစုတွေရှိမယ်လို့ ယူဆရတဲ့နေရာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်ရှင်းလင်းတာတွေကို အဆက်မပြတ် ပြုလုပ်ခဲ့တယ်လို့ သိရပါတယ်။

ဒီနေ့မနက်ပိုင်းမှာလည်း အဆိုပါဖားကန့်ဗျူဟာကုန်းမှ လက်နက်ကြီးတွေနဲ့သာမက စက်သေနတ်တွေပါသုံးပြီး ရမ်းသမ်းပစ်ခတ်မှုတွေ လုပ်နေတာကြောင့် ပြည်သူတွေအနေနဲ့ အပြင်ထွက်သွားလာရာမှာ သတိထားနေရတယ်လို့လည်း ဆိုပါတယ်။

“အဲ့လိုဖြစ်ပြီးတော့ မနေ့ညကတော့ တစ်လျှောက်လုံး၊ တစ်ညလုံး ဒရုန်းတွေချတယ်၊ အခုနေ့ခင်းပိုင်းလည်း ဒရုန်းတွေချတယ်၊ အဲ့လိုတွေဖြစ်တာ၊ မနေ့ညကဆိုရင်လည်း ဖားကန့်ဗျူဟာကုန်းကနေ လက်နက်ကြီးတွေပစ်တယ်၊ ခါတိုင်းထက်ထူးခြားတာက လက်နက်ငယ်တွေပါ ပစ်တာ၊ စက်သေနတ်တွေပစ်ဆွဲပစ်တယ်၊ အဲ့အခြေအနေပါဗျ၊ ပုံမှန်ဆို နည်းနည်းငြိမ်နေတာကနေ ရဲတပ်ရင်း(၃၀)ရောက်လာပြီးနောက်ပိုင်းမှာ လက်နက်ကြီးပစ်တယ်၊ လက်နက်ငယ်ပစ်တယ်၊ ဒရုန်းတွေချတယ် အဲ့လိုကြုံနေရပါတယ်ဗျ” လို့ အဆိုပါဒေသခံက ဆက်ပြောပါတယ်။

အဲဒီလို နှစ်ဘက်တပ်တွေရဲ့ ဒရုန်း၊ လက်နက်ကြီး၊ မိုင်းတွေနဲ့ တိုက်ခိုက်မှုတွေကြောင့် နေအိမ်အချို့ ထိခိုက်မှုတွေရှိခဲ့သလို ဒီနေ့မနက်ပိုင်းမှာလည်း ဖားကန့်နေပြည်သူတစ်ဦး ထိခိုက်သေဆုံးခဲ့ရတယ်လို့လည်း သိရပါတယ်။

“ဒီမနက် အဲ့ရဲကားတွေရဲ့နောက်ကနေ ဆိုင်ကယ်နဲ့ပါလာတဲ့ မိန်းကလေးတစ်ယောက် ဒရုန်းမှန်ပြီးသေတာအတည်ပြုလို့ရပါတယ်၊ နောက်ထပ် လူသေတာမျိုးတော့ မကြားပေမဲ့ လူနေအိမ်တွေ၊ ဘုန်းကြီးကျောင်းတွေ ထိခိုက်ပျက်ဆီးတာမျိုးတွေရှိပါတယ်ဗျ” လို့ ဒေသခံက ဆက်လက်ပြောပါတယ်။

စစ်ကောင်စီဟာ ပြီးခဲ့တဲ့လပိုင်းမှာ ဖားကန့်မြို့ရှိ မိုးကောင်းအခြေစိုက် စကခ(၃) အင်အားတွေကို ထုတ်နှုတ်သွားခဲ့သော်လည်း လက်ရှိမှာ မိုးကောင်းမြို့မှ ရဲတပ်ရင်း(၃၀)မှ အင်အားတွေနဲ့ ဖားကန့်ကို ပြန်လည်ဖြည့်တင်းတာတွေ ပြုလုပ်လာတာ ဖြစ်ပါတယ်။

Photo-ပုံဟောင်း

ဧရာဝတီတိုင်း၊ လေးမျက်နှာမြို့နယ်အတွင်း၊ ပုသိမ် – မုံရွာလမ်းပိုင်းရှိ စက်စက်ယိုကျေးရွာအနီးတွေမှာ စစ်ကောင်စီတပ်နဲ့ အာရက္ခတပ်တော် AA ၊ ပူးပေါင်းမဟာမိတ်တပ် PDF တို့ တိုက်ပွဲတွေ ပြင်းထန်နေပြီး စစ်ကောင်စီတပ်က သေဆုံးထိခိုက်မှုများပြားနေတယ်လို့ စစ်ရေးသတင်းရင်းမြစ်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ပုသိမ် – မုံရွာလမ်းပိုင်းကို သိမ်းပိုက်နိုင်ဖို့အတွက် စက်စက်ယိုကျေးရွာအနီးကို ထိုးစစ်ဆင်တိုက်ခိုက်လာနေပြီး စစ်ကောင်စီတပ်ကလည်း အင်အားအလုံးအရင်းနဲ့ ခုခံကာကွယ်နေတာကြောင့် တိုက်ပွဲတွေ ပိုမိုပြင်းထန်နေတယ်လို့ သိရပါတယ်။

အဆိုပါ တိုက်ပွဲတွေအတွင်းမှာ စစ်ကောင်စီတပ်က သေဆုံးထိခိုက်မှု များပြားနေတာကြောင့် ဟင်္သာတ၊ ကွင်းကောက်စတဲ့ မြို့နယ်တွေမှ စစ်ကားကြီးတွေနဲ့ လေးမျက်နှာမြို့နယ်အတွင်းကို စစ်အင်အားတွေ ဖြည့်တင်းနေရတယ်လို့ တော်လှန်ရေးတပ်ဖွဲ့ဝင်တွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ်တွေဟာ ပုသိမ် – မုံရွာလမ်းပိုင်းမှ ပန်းတောကြီး၊ မြို့ကုန်း၊ ကျောက်စရစ်ကုန်းနဲ့ သဲနုကုန်း စတဲ့ကျေးရွာတွေကို ထိန်းချုပ်ထားပြီး စစ်ကောင်စီတပ်ကလည်း အဲဒီကျေးရွာကို ပြန်လည်ရရှိဖို့အတွက် စက်စက်ယိုကျေးရွာနဲ့ အင်္ဂပူမြို့နယ်အတွင်းကနေ ထိုးစစ်ဆင်တိုက်ခိုက်ဖို့ ပြုလုပ်နေတယ်လို့လည်း သိရပါတယ်။

“လေးမျက်နှာမြို့နယ်မှာတော့ တိုက်ပွဲတွေဖြစ်နေကြတာရှိပါတယ်၊ အဓိကတော့ စက်စက်ယို ကျေးရွာအနီးမှာ ဖြစ်နေကြတာပါ၊ AA နဲ့ ပူးပေါင်းတပ်တွေက သူတို့ ထိန်းချုပ်ထားတဲ့ ပန်းတောကြီးရွာဖက်ကနေ စက်စက်ယိုကျေးရွာဖက်ကို ထိုးစစ်ဆင်လာတာရှိပါတယ်၊ စစ်ကောင်စီတပ်ကလည်း အင်အားတွေဖြည့်တင်းပြီးတော့ ရေနံ့သာဂိတ်ကနေ စစ်ကြောင်းထိုးလာတာကြောင့် တိုက်ပွဲတွေမှာ ပိုပြင်းထန်နေကြတာပါ ” လို့ တော်လှန်ရေးတပ်ဖွဲ့ဝင်တစ်ဦးက BBM ကို ပြောပါတယ်။

ပြီးခဲ့တဲ့ အောက်တိုဘာလ တတိယအပတ်ကလည်း စစ်ကောင်စီတပ်နဲ့ ပူးပေါင်းမဟာမိတ်တပ်တွေဟာ လေးမျက်နှာမြို့နယ်ရှိ စက်စက်ယိုကျေးရွာအနီးဝန်းကျင်နဲ့ တောတောင်တွေမှာ တိုက်ပွဲတွေပြင်းထန်စွာ ဖြစ်ပွားခဲ့ပြီး စစ်ကောင်စီကလည်း လေကြောင်း၊ ဒရုန်းနဲ့ လက်နက်ကြီးပစ်ကူတွေ အဆက်မပြတ်ပြုလုပ်ခဲ့တယ်လို့ ဆိုပါတယ်။

ဒါ့အပြင် နိုဝင်ဘာလ ၇ ရက်နေ့ကလည်း စက်စက်ယိုကျေးရွာအနီးမှာ တိုက်ပွဲတွေပြန်လည်ပြင်းထန်ခဲ့တာကြောင့် စစ်ကောင်စီတပ်က သေဆုံးထိခိုက်မှုများပြားခဲ့တဲ့အတွက် ဂျက်ဖိုက်တာ၊ Y-12 လေယာဥ်တွေနဲ့ တစ်ရက်လုံး ဗုံးကြဲချတိုက်ခိုက်မှုတွေ ရှိခဲ့တယ်လို့လည်း သိရပါတယ်။

လက်ရှိ တိုက်ပွဲတွေပြင်းထန်နေတဲ့ စက်စက်ယိုကျေးရွာနဲ့ ၄ မိုင်ကျော်အကွာအဝေးမှာ ရေနံ့သာစစ်ဆေးရေးဂိတ်ရှိနေတာဖြစ်သလို စစ်ကောင်စီတပ်ဟာ အဆိုပါ စစ်ဆေးရေးဂိတ်ကို စစ်အင်အားတွေ အဆက်မပြတ်ပို့ဆောင်နေတာဖြစ်ပြီး AA နဲ့ ပူးပေါင်းတပ်တွေရဲ့ ထိုးစစ်ကိုခုခံဖို့အတွက် ဘန်ကာတွေ အခိုင်အမာဆောက်လုပ်နေကြတယ်လို့လည်း AA နဲ့ နီးစပ်တဲ့စစ်ရေးသတင်းရင်းမြစ်တွေဆီက သိရပါတယ်။

ပြီးခဲ့တဲ့ နိုဝင်ဘာလပထမအပတ်မှာလည်း စစ်ကောင်စီဟာ ဟင်္သာတမြို့နယ်ကနေ စစ်ကားကြီး ၁၀ စီးကျော်နဲ့ လေးမျက်နှာမြို့နယ်ရှိကျေးရွာတွေ၊ ငသိုင်းချောင်းမြို့နယ်အတွင်းမှ ရေနံ့သာစစ်ဆေးရေးဂိတ်နဲ့ မြောက်စမ်းအမြောက်တပ် (အမတ ၃၄၄) တို့ကို အင်အားဖြည့်တင်းမှုတွေ ရှိခဲ့တယ်လို့လည်း သိရပါတယ်။

“ဟင်္သာတမြို့နယ်ကနေ စစ်အင်အားတွေ လေးမျက်နှာမြို့နယ်ကို ဆက်တိုက်ပို့ဆောင်နေတာပါ၊ ငသိုင်းချောင်းဖက်ကိုလည်း ပို့ဆောင်တာရှိပါတယ်၊ ပြီးခဲ့တဲ့တစ်ရက်လောက်ကဆိုရင် အမြောက်တပ်နဲ့ ရေနံ့သာဂိတ်ဖက်ကို စစ်ကား ၁၀ ကျော်လောက်တက်သွားတယ်လို့ သိရပါတယ်၊ စစ်ကောင်စီတပ်က အင်အားတွေဖြည့်မလောက် ဖြစ်နေကြတာပါ” လို့ AAနဲ့ နီးစပ်တဲ့ စစ်ရေးသတင်းရင်းမြစ်တစ်ဦးက ပြောပါတယ်။

တိုက်ပွဲပြင်းထန်နေတဲ့ စက်စက်ယိုကျေးရွာအနီးကို မြောက်စမ်းကျေးရွာမှာရှိတဲ့ အမြောက်တပ် (အမတ ၃၄၄) တပ်ရင်းကလည်း လက်နက်ကြီးတွေနဲ့ တစ်ရက်လုံး ပစ်ကူပေးနေတယ်လို့ သိရပါတယ်။

အဆိုပါ အမြောက်တပ်ကနေ လက်နက်ကြီးပစ်ခတ်မှုကြောင့် ဂွေးတောက်ကုန်း၊ ကွမ်းခြံကုန်း၊ ညောင်ပင်ကြီး၊ သပြုပင်၊ သပြေကွင်း၊ ရှမ်းစု၊ ကြပ်ကုန်း၊ ရုပ်သေးတန် စတဲ့ ကျေးရွာပေါင်း ၂၀ ကျော်မှ ဒေသခံတွေဟာ အခြားနေရာတွေကို စစ်ဘေးတိမ်းရှောင်နေကြရပြီး လူမရှိတဲ့နေအိမ်တွေ၊ စျေးဆိုင်ခန်းတွေကိုလည်း စစ်ကောင်စီတပ်က ဖောက်ထွင်းမှုတွေရှိနေတယ်လို့ ငသိုင်းချောင်းဒေသခံတွေဆီက သိရပါတယ်။

အာရက္ခတပ်တော် AA နဲ့ ပူးပေါင်းမဟာမိတ်တပ် PDF တို့ဟာ ရခိုင်ရိုးမတစ်လျှောက် ဧရာဝတီတိုင်းမှ ရေကြည်၊ သာပေါင်း ၊ ငါးသိုင်းချောင်း၊ လေးမျက်နှာ၊ အင်္ဂပူနဲ့ မြန်အောင်မြို့နယ်တွေအထိ ထိုးစစ်ဆင်တိုက်ခိုက်လာနေတာလည်း ဖြစ်ပါတယ်။

စစ်ကောင်စီတပ်ဖွဲ့၀င် ၅ ယောက် သေဆုံးကာ လမ်းတစ်လျှောက်က အမျိုးသမီးတွေ အပါအဝင် ပြည်သူ၁၁ ‌ဦးကို ပေါ်တာဆွဲသွား

မန္တလေးတိုင်း၊ တောင်သာမြို့နယ်၊ တမိုက်သာကျေးရွာမှာ တပ်စွဲထားတဲ့ စစ်ကောင်စီစခန်းကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာကြောင့် စစ်ကောင်စီတပ်သား ၅ ဦး သေဆုံးခဲ့တယ်လို့ မြင်းခြံခရိုင်အမှတ် ၃ တပ်ရင်းမှ တာဝန်ရှိသူ ဗိုလ်မူတူးက BBMကိုပြောပါတယ်။

နိုဝင်ဘာလ ၇ ရက်နေ့ မနက် ၅ နာရီ ခွဲ၀န်းကျင်အချိန်ခန့်က တောင်သာမြို့နယ်၊ မြင်းခြံ – ပုဂံ-ညောင်ဦးလမ်းမ ဘေး တမိုက်သာကျေးရွာမှာ ခဏ၀င်ရောက်နားနေတဲ့ အင်အား ၆၀ ခန့်ပါ စစ်ကြောင်းကို တိုက်ခိုက်ခဲ့တာကြောင့် စစ်ကောင်စီတပ်သား ၅ ဦးသေဆုံးကာ ၅ ဦး အပြင်း အထန်ဒဏ်ရာရရှိပြီး ဆေးရုံကို ပို့ဆောင်လိုက်တယ်လို့ သိရပါတယ်။

တိုက်ပွဲဖြစ်ပွားချိန် ၁နာရီခွဲကြာခဲ့ပြီး တော်လှန်ရေးတပ်ဖွဲ့တွေ ဆုတ်သွားမှ မြင်းခြံနဲ့ ကြာပို့ဆေးရုံကို သေနတ်တွေ ဖောက်ပြီး ပို့ဆောင်ပါတယ်လို့ ဆိုပါတယ်။

“တိုက်ပွဲကြာချိန်ကတော့၁ နာရီခွဲကြာတယ်ဗျ။ အခြေအနေဆိုးတဲ့ ၅ ကောင်ကိုတော့ မြင်းခြံ ဆေးရုံကို ပို့ထားတယ်လို့ကြားရတယ်။ မစိုးရိမ်ရတဲ့ ၃ကောင်ကိုတော့ ကြာပို့ဆေးရုံ ကိုပို့ပါတယ်။ ၈ ယောက်ကတော့ ထိခိုက်ဒဏ်ရာရခဲ့ပါတယ်။ တိုက်ပွဲဖြစ်ပြီး ကျွန်‌တော်တို့ ဆုတ်သွားတော့မှ ကြာပို့ဆေးရုံကိုသေနတ်ဖောက်ပြီး ‌ပို့တယ်လို့သိရပါတယ်”လို့ ဗိုလ်မူတူးက ဆက်ပြောပါတယ်။

ခွာစစ်ဆင်ချိန်မှာ စစ်ကောင်စီတပ်သားတွေ သေနေတာကို မျက်မြင်တွေ့ရှိခဲ့ရပေမဲ့ မြေပြင်အနေအထားအရ လက်နက်ကောက် ယူနိုင်ခြင်းမရှိဘူးလို့ ဆိုပါတယ်။

စစ်ကောင်စီတပ်ဟာ အခုလို တိုက်ခိုက်ခံခဲ့ရတာကြောင့် ကြာပို့ကျေးရွာကို သေနတ်များပစ်ဖောက်ပြီး လက်ဖက်ရည်ဆိုင်၊ မုန့် ဟင်းခါးဆိုင်‌ေတွက လူငယ် ၆ ယောက်နဲ့ မင်းကြိုကျေးရွာမှလည်း အမျိုးသမီးတွေအပါအဝင် ပြည်သူ ၅ ယောက် ကို ပေါ်တာဆွဲဖမ်းဆီးသွားတယ်လို့ သိရပါတယ်။

အဆိုပါတိုက်ခိုက်မှုကို မြင်းခြံခရိုင်အမှတ် ၃ တပ်ရင်းမှ တိုက်ခိုက်ခဲ့တာဖြစ်ပြီးတော့ ပြည်သူ့ကာကွယ်ရေး တပ်ဖွဲ့ဝင်တွေ အထိအခိုက်မရှိ ပြန်လည် ဆုတ်ခွာနိုင်ခဲ့တယ်လို့ ဆိုပါတယ်။

Video-မြင်းခြံခရိုင် တပ်ရင်း၃တပ်ရင်း

စစ်ကိုင်းတိုင်း၊ မုံရွာခရိုင်၊ အရာတော်မြို့မှာ စစ်ကောင်စီရဲ့ စစ်ဆေးရေးဂိတ်စခန်းကို တော်လှန်ရေးပူးပေါင်းတပ်တွေ ဝင်ရောက်တိုက်ခိုက်ခဲ့ရာ စစ်ကောင်စီတပ်သားတွေ စခန်းစွန့်ခွာထွက်ပြေးသွားတယ်လို့ ဒီပဲယင်းမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

နိုဝင်ဘာလ ၅ ရက်၊ မနက်ပိုင်းမှာ အရာတော်မြို့ အမှတ် (၂)ကျောင်းမှာ တပ်စွဲထားတဲ့ စစ်ဆေးရေးဂိတ်စခန်းကို တော်လှန်ရေးတပ်တွေက စီးနင်းတိုက်ခိုက်ခဲ့ရာ စစ်ကောင်စီတပ်သားတွေ ဝရုန်းသုန်းကားထွက်ပြေးသွားတယ်လို့ သိရပါတယ်။

စခန်းကို ၀င်ရောက်ရှင်းလင်းခဲ့ရာ ၇.၆၂ ကျည် ၅၁၁ တောင့်၊ ၅.၅၆ ကျည် ၄၀၀ တောင့်၊ Icon ၄လုံး၊ ငွေ ၂၉၄၆၀၀ ကျပ်၊ စစ်သုံးခရာ ၁ လုံး၊ ကျည်ကာဦးထုပ် ၁ လုံး၊ စစ်သုံးလွယ်အိတ် ၄ လုံး၊ ဆိုင်ကယ် ၃ စီး၊ ခမောက်ဝိုင်း ၁ လုံး၊ Equipment ၁ စုံနဲ့ စစ်အသုံးအဆောင်ပစ္စည်းအချို့ သိမ်းဆည်းရရှိခဲ့တယ်လို့ သိရပါတယ်။

တိုက်ပွဲဖြစ်ပွားချိန်ဟာ ၁၅ မိနစ်ခန့်ကြာခဲ့ပြီး စစ်ကောင်စီတပ်ဖွဲ့ဝင်တွေရဲ့ သေဆုံးထိခိုက်မှုကို စိစစ်နေဆဲဖြစ်ကြောင်းနဲ့ တော်လှန်ရေးရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

အဆိုပါ ပူးပေါင်းစစ်ဆင်ရေးကို အရာ‌တော်မြို့နယ် ပကဖ ၊ ဒီပဲယင်းမြို့နယ် ပကဖ နဲ့ ကျားသစ်နက် ပြောက်ကျားတပ်ဖွဲ့ (LDF) အဖွဲ့တို့က ပူးပေါင်းတိုက်ခိုက်ခဲ့တာဖြစ်တယ်လို့ သိရပါတယ်။

Video-ပြည်သူ့ကာကွယ်ရေးအဖွဲ့ ဒီပဲယင်းမြို့နယ်

မြန်မာနိုင်ငံအနှံ့မှာ စစ်ကောင်စီရဲ့ အကြမ်းဖက်တိုက်ခိုက်မှုတွေကြောင့် ပြီးခဲ့တဲ့ အောက်တိုဘာလ တစ်လအတွင်းမှာ အမျိုးသမီး ၇၀ ဦးသေဆုံးခဲ့ပြီး ၈၀ ဦးထိခိုက်ဒဏ်ရာ ရရှိခဲ့တယ်လို့ မြန်မာ့အမျိုးသမီးသမဂ္ဂ (BWU) က နိုဝင်ဘာလ ၇ ရက်နေ့မှာ ထုတ်ပြန်ထားပါတယ်။

စစ်ကောင်စီဟာ မြန်မာနိုင်ငံအတွင်းရှိ တိုင်း ၆ ခုနဲ့ ပြည်နယ် ၅ ခုမှာ လေကြောင်းတိုက်ခိုက်တာ၊ လက်နက်ကြီးပစ်ခတ်တိုက်ခိုက်တာတွေနဲ့ ဖမ်းဆီးသတ်ဖြတ်မှုတွေကြောင့် အမျိုးသမီးတွေ သေဆုံးခဲ့ရတာလည်း ဖြစ်ပါတယ်။

စစ်ကောင်စီသတ်ဖြတ်မှုကြောင့် အောက်တိုဘာလ တစ်လအတွင်း သေဆုံးသွားခဲ့ရတဲ့ အမျိုးသမီးတွေမှာ ရှမ်းပြည်နယ် (၂၃) ဦး၊ မန္တလေးတိုင်းမှာ (၁၃) ဦး၊ စစ်ကိုင်းတိုင်း (၁ဝ)ဦး၊ ချင်းပြည်နယ် (၃) ဦး၊ မကွေးတိုင်း (၃) ဦး၊ ပဲခူးတိုင်း (၅) ဦး၊ ကရင်ပြည်နယ် (၃) ဦး၊ မွန်ပြည်နယ် (၃) ဦး၊ ရခိုင်ပြည်နယ် (၂) ဦး၊ ဧရာဝတီတိုင်း (၄) ဦးနဲ့ တနင်္သာရီတိုင်း (၁) ဦးတို့ဖြစ်တယ်လို့ မြန်မာ့အမျိုးသမီးသမဂ္ဂ (BWU) ရဲ့ ထုတ်ပြန်ချက်မှာ ဖော်ပြထားပါတယ်။

ရှမ်းပြည်နယ်မြောက်ပိုင်းကို စစ်ကောင်စီဟာ အောက်တိုဘာလအတွင်းမှာ အကြိမ် ၃၀ နဲ့အထက် လေကြောင်းကနေ ဗုံးကြဲချတိုက်ခိုက်ခဲ့တာကြောင့် အမျိုးသမီးသေဆုံးမှု များပြားခဲ့ရတာဖြစ်တယ်လို့ မြန်မာ့အမျိုးသမီးသမဂ္ဂ (BWU) က ဆိုထားပါတယ်။

ပြီးခဲ့တဲ့အောက်တိုဘာလအတွင်းမှာ ထူးခြားဖြစ်စဥ်အနေနဲ့ အောက်တိုဘာလ ၆ ရက်နေ့၊ ညနေ ၈ နာရီခန့်မှာ မုံရွာနဲ့ ချောင်းဦးမြို့နယ်အစပ်၊ ချောင်းဦးမြို့နယ်မြောက်ခြမ်းတစ်နေရာမှာ မြန်မာ့ရိုးရာသီတင်းကျွတ်ပွဲတော် ဆီမီးထွန်းသပိတ် ပြုလုပ်နေသူတွေကို စစ်ကောင်စီတပ်က ပါရာမော်တာစက်တပ်လေထီးကို အသုံးပြုပြီး ၁၂၀ မမ လက်နက်ကြီးဗုံးနှစ်လုံး ကြဲချတိုက်ခိုက်ခဲ့တာကြောင့် သေဆုံးသူ (၂၂) ဦးနဲ့ ထိခိုက်ဒဏ်ရာရရှိသူ (၅၅) ဦးအထိ ရှိခဲ့တာလည်း ဖြစ်ပါတယ်။

သေဆုံးခဲ့ရတဲ့ အမျိုးသမီး ၇၀ ဦးမှာ လေကြောင်းတိုက်ခိုက်မှုကြောင့် (၅၆) ဦး၊ လက်နက်ကြီးပစ်ခတ်ခံရမှုကြောင့် (၈) ဦး၊ မတရားသတ်ဖြတ်ခံရမှုကြောင့် (၅) ဦး၊ မြေမြှုပ်မိုင်းနင်းမိတာကြောင့် (၁) ဦးတို့ဖြစ်ကြပြီး သေဆုံးသူတွေထဲမှ ၁၄ ဦးဟာ အသက် ၁၈ နှစ် အောက်တွေဖြစ်ကြတယ်လို့လည်း သိရပါတယ်။

ထိခိုက်ဒဏ်ရာရရှိသူ (၈၀) ဦးကတော့ လေကြောင်းတိုက်ခိုက်ခံရမှုကြောင့် (၆၇) ဦး၊ လက်နက်ကြီးပစ်ခတ်ခံရမှုကြောင့် (၅) ဦး၊ မတရားသတ်ဖြတ်ခံရမှုကြောင့် (၁) ဦး၊ မြေမြှုပ်မိုင်းနင်းမိတာကြောင့် (၃) ဦးနဲ့ လိင်ပိုင်းဆိုင်ရာအကြမ်းဖက်ခံရမှုကြောင့် (၄) ဦး တို့ဖြစ်ကြပါတယ်။

စစ်ကောင်စီတပ်ဟာ ၂၀၂၁ ခုနှစ်၊ ဖေဖော်ဝါရီလမှစတင်ကာ အာဏာသိမ်းပြီးတဲ့နောက်ပိုင်း (၅) နှစ်တာနီးပါးကာလအတွင်းမှာ စစ်ရာဇဝတ်မှုတွေနဲ့ လူသားမျိုးနွယ်တွေအပေါ် အမျိုးမျိုးသောရာဇဝတ်မှုတွေ၊ လူ့အခွင့်အရေးချိုးဖောက်မှုတွေကို နည်းမျိုးစုံနဲ့ကျူးလွန်နေတယ်လို့ မြန်မာ့အမျိုးသမီးသမဂ္ဂ (BWU) က ထုတ်ပြန်ပြောဆိုထားပါတယ်။

တနင်္သာရီတိုင်း၊ လောင်းလုံးမြို့တွင်းရှိ ကြံ့ခိုင်ရေးပါတီရုံးဖောက်ခွဲတိုက်ခိုက်ခံရပြီးတဲ့နောက် မီးလောင်ပျက်ဆီးသွားခဲ့ပြီး စစ်ကောင်စီတပ်သားတွေကလည်း မြို့တွင်းမှာ အစစ်အဆေးတင်းကြပ်နေတယ်လို့ ဒေသခံပြည်သူတစ်ဦးရဲ့ ပြောဆိုချက်အရ သိရပါတယ်။

နိုဝင်ဘာလ ၈ ရက် (ဒီနေ့)မနက်အစော ၈ နာရီခွဲခန့် မြို့တွင်းမှာရှိတဲ့ ကြံ့ခိုင်ရေးပါတီရုံးထံမှ ပေါက်ကွဲသံအကျယ်ကြီးကြားရပြီးနောက် မီးများစွဲလောင်ခဲ့တယ်လို့ သိရပါတယ်။

ပေါက်ကွဲမှုဖြစ်ပြီးသိပ်မကြာခင်မှာ စစ်ကောင်စီတပ်သားတွေက အဆိုပါကြံ့ခိုင်ရေးရုံးကို ရောက်ရှိလာခဲ့ပေမဲ့ ပေါက်ကွဲမှုဖြစ်ရာရုံးတစ်ခုလည်း မီးလောင်ပြာကျသွားတယ်လို့ သိရပါတယ်။

“တနင်္သာရီတိုင်းလောင်းလုံးမြို့တွင်းရှိ ကြံ့ဖွဲ့ပါတီရုံး နိုဝင်ဘာလ၈ရက်နေ့ မနက်၈-၃၀မှာဖေါက်ခွဲခံရပီး မီးလောင်သွားပါတယ်၊ ဝမ်းသာလိုက်တာဗျာ၊ အိမ်ကနေပေါက်ကွဲသံကြားတော့မြို့တွင်းကကြံ့ဖွံ့ရုံးဖြစ်နေတာပဲခင်ဗျား ခွေးတွေ(စစ်သား)ရောက်နေတော့အပြင်မထွက်ကြဘူး” လို့ လောင်းလုံးမြို့နေ ပြည်သူတစ်ဦးက BBM ကိုပြောပါတယ်။

ဒါ့အပြင်ပေါက်ကွဲမှုဖြစ်ပွားရာ ကြံ့ခိုင်ရေးရုံးနဲ့အနီးပတ်ဝန်းကျင်ကိုလည်း စစ်ကောင်စီလက်အောက်ခံ ရဲ၊ စစ်သားတွေက အင်အားတိုးချပြီး မသင်္ကာသူတွေကို မေးမြန်းတာတွေ မှတ်တမ်းတင်ဓာတ်ပုံရိုက်တာတွေပြုလုပ်ခဲ့တယ်လို့လည်း သိရပါတယ်။

စစ်ကောင်စီအနေနဲ့ ဒီလိုပေါက်ကွဲမှုတွေဖြစ်ပွားရင် မသက်ဆိုင်တဲ့ ဒေသခံပြည်သူတွေကိုပါ ဖမ်းဆီးညှင်းပန်းတာတွေပြုလုပ်လေ့ရှိတာမို့ ပေါက်ကွဲမှုဖြစ်ပြီးနောက် မြို့နေပြည်သူအများစုမှာ အပြင်မထွက်ဘဲ သတင်းကိုသာနားစွင့်နေရတယ်လို့ ဆိုပါတယ်။

“ခွေးတွေက(စစ်သား) မဲမဲမြင်ရင်လိုက်နေတော့ ကျွန်တော်ပြည်သူကတော့ ကြောက်နေကြတာပေါ့ခင်ဗျား၊ ခြေတွေလည်းရှုပ်နေတော့ အပြင်လဲထပ်မထွက်ရဲဘူး” လို့ အဆိုပါဒေသခံက ဆက်ပြောပါတယ်။

စစ်ကောင်စီအနေနဲ့ လာမဲ့ဒီဇင်ဘာလအတွင်း ရွေးကောက်ပွဲပြုလုပ်ကျင်းပမယ်လို့ ကြေငြာထားပြီးတဲ့နောက် အမတ်စာရင်း တင်သွင်းခိုင်းတာတွေ၊ ကျင်းပမဲ့မြို့နယ်စာရင်းတွေကို ထုတ်ပြန်တာတွေနဲ့ ရွေးကောက်ပွဲဆိုင်ရာစည်းမျဥ်းစည်းကမ်းတွေကို ထုတ်ပြန်ကြေငြာတာတွေ ပြုလုပ်နေတာကိုတွေ့ရပါတယ်။

Photo-ဒေသခံ

မန္တလေးတိုင်း၊ မြင်းခြံမြို့နယ်မှာ စစ်ကောင်စီထိုးစစ်ဆင်လာတဲ့ ၂ လတာအတွင်း စနိုက်ပါနဲ့ ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်ဖွဲ့၀င် ၃၃ ဦးသေဆုံးခဲ့တယ်လို့ ဇီးရိုးပြောက်ကျားတပ်ဖွဲ့ရဲ့ တပ်ရင်းမှူး ကိုသက်ကြီးက နို၀င်ဘာလ ၈ ရက်‌မှာ BBM ကိုပြောပါတယ်။

ဩဂုတ်လပိုင်းမှစပြီး မြင်းခြံမြို့နယ်ရဲ့ အရှေ့ဘက်၊ မြောက်ဘက်နဲ့ အရှေ့မြောက်ဘက်ကို စစ်ကြောင်းထိုးလာတဲ့ စစ်ကောင်စီစစ်ကြောင်းတွေကို စနိုက်ပါနဲ့ ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်ဖွဲ့၀င် ၃၃ ဦးသေဆုံးခဲ့တယ်လို့ ကိုသက်ကြီးက အတည်ပြုပြောကြားခဲ့တာပါ။

“၈ လပိုင်းကနေစပြီးတော့ ၁၀ လပိုင်းအထိ စုစုပေါင်း စခ ၃၃ ကောင်ကို ဇီးရိုးက စနိုက်ဘာတပ်စိတ်က ရှင်းလင်းနိုင်ခဲ့ပါတယ်”လို့ ကိုသက်ကြီးက BBM ကိုပြောပါတယ်။

ဇီးရိုးပြောက်ကြားတပ်ဖွဲ့ရဲ့ စနိုက်ဘာတပ်စိတ်ခေါင်းဆောင် ရဲဘော် မော်ကြီးက ဦးဆောင်တိုက်ခိုက်ခဲ့တာဖြစ်ပြီး အဆိုပါစနိုက်ဘာတပ်စိတ်ကြောင့် စစ်ကောင်စီစစ်ကြောင်း ရှေ့ဆက်မတိုးနိုင်ဘဲ ဟန့်တားနိုင်ခဲ့ပါတယ်လို့ ဆိုပါတယ်။

“ကလေးတွေကို စနစ်တကျသင်ပေးထားပါတယ်၊ စနိုက်ဘာ Team ရဲ့ ခေါင်းဆောင် မော်ကြီးဆိုတာ သိပ်ကောင်းတာ၊ သူစိတ်ပါရင် တစ်ကောင်ပြီးတစ်ကောင်ပဲ၊ Headshot တွေလည်းပါသလို အစုံပဲ၊ တခါတလေ ရွေ့လျားကျတော့လည်း နေရာစုံထိတာပေါ့”လို့ တပ်ရင်းမှူး ကိုသက်ကြီးက ဆက်ပြောပါတယ်။

အဆိုပါ စနိုက်ဘာတပ်စိတ်ကြောင့် စစ်ကောင်စီစစ်ကြောင်းတွေ ရှေ့ကိုဆက်မတိုးရဲဘဲ လေးငါးရက်ကြာအောင် ထိန်းထားနိုင်တဲ့အနေအထားရှိတယ်လို့လည်း သိရပါတယ်။

“ကခဲ့တဲ့ပွဲတွေကတော့ ‌ဆက်တိုက်လိုပါပဲ၊ တောက်လျှောက်ဖြစ်နေတာပါ၊ မနားတမ်းကနေရတာပါဗျ၊ ဒီစနိုက်ဘာကြောင့် စခ စစ်ကြောင်းတွေ လေးငါးရက်ကို မတိုးရဲဘဲ တန့်နေတာမျိုးတွေရှိတယ်၊ ကျွန်တော်တို့ ကလေးတွေက အကွာအဝေးတစ်ခုအထိကို ပိုင်ပိုင်နိုင်နိုင်ပစ်နိုင်တယ်”လို့ ကိုသက်ကြီးက ဆက်ပြောပါတယ်။

စစ်ကောင်စီအနေနဲ့ အင်အားဘယ်လောက်ပဲသုံးသုံး၊ လက်နက်ဘယ်လောက်ပဲ ကောင်းကောင်း ဆက်လက်ခုခံတော်လှန်နေမှာ ဖြစ်ကြောင်း ကိုသက်ကြီးက အသိပေးပြောကြားပါတယ်။

“ကျွန်တော်တို့ကတော့ သူတို့(စခ)တွေ ဘယ်လိုပဲ အင်အားသုံးသုံး၊ ထုထည်ပဲပါပါ၊ လက်နက်ပဲဘယ်လောက်ကောင်းကောင်း ကျွန်တော်တို့ ဇီးရိုးတွေ၊ ညီနောင်တွေအနေနဲ့ တွန်းလှန်နေပါတယ်ဗျ”လို့ ကိုသက်ကြီးက ဆက်လက်ပြောပါတယ်။

ပြီးခဲ့တဲ့ နိုဝင်ဘာလ ၄ ရက်၊ နေ့လယ်ပိုင်းမှာလည်း မြင်းခြံမြို့နယ်၊ လယ်သစ်ကျေးရွာရှိ စစ်ကောင်စီ စုပေါင်းဂိတ်ကို လက်နက်ငယ်တွေအပြင် ရဲဘော် ပေါ့ဘာက ရဲရင့်စွာ လမ်းပေါ်အထိတက်ပြီး ဘန်ကာထဲသို့ RPG နဲ့ ပစ်ခတ်ခဲ့တာကြောင့် စစ်ကောင်စီဘက်မှ ၈ ဦးသေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့တယ်လို့ မြင်းခြံခရိုင် တပ်ရင်း ၇ Zero ပြောက်ကျားတပ်ဖွဲ့က ထုတ်ပြန်ထားပါတယ်။

အထိနာ၍ ဆုတ်ခွာရချိန်တိုင်း ပြည်သူနေအိမ်တွေကို စစ်ကောင်စီ မီးပတ်ရှို့သွား

စစ်ကိုင်းတိုင်းအထက်ပိုင်းရှိ ဗန်းမောက်မြို့ကို ပြန်လည်ရရှိဖို့အတွက် စစ်ကောင်စီဘက်က နေ့စဥ် လေယာဥ်၊ လက်နက်ကြီး၊ ဒရုန်းတွေသာမက မြေပြင်စစ်ကြောင်းတွေကပါ တိုက်ခိုက်မှုတွေရှိနေပေမဲ့လည်း အထိနာကာပြန်လည်ဆုတ်ခွာနေရပြီး ထိခိုက်သေဆုံးမှုများနေတယ်လို့ သိရပါတယ်။

MOD လက်အောက်ခံတပ်ရင်းတပ်ဖွဲ့တွေနဲ့ မဟာမိတ် KIA တပ်ဖွဲ့တို့ ပူးပေါင်းပြီး ဗန်းမောက်မြို့ကို စက်တင်ဘာလနောက်ဆုံးပတ်အတွင်း သိမ်းပိုက်နိုင်ခဲ့တာဖြစ်ပြီး သိမ်းပိုက်စဉ်မှာ ဗန်းမောက်ရှိ စစ်ကောင်စီတပ်သားတွေနဲ့ SNA ပြည်သူ့စစ်တွေဟာ မြို့ကိုစွန့်ခွာ ထွက်ပြေးခဲ့ရတာ ဖြစ်ပါတယ်။

အဲဒီနောက် စစ်ကောင်စီဟာ ဟုမ္မလင်းမြို့နယ်ဘက်မှတဆင့် တပ်မ(၃၃) ယူနီဖောင်းဝတ် ပြည်သူ့စစ်မှုထမ်းဆင်း သင်တန်းသားတွေအများဆုံးပါဝင်တဲ့ အင်အား ၅၀၀ ကျော်ကို ဗန်းမောက်မြို့ကို ပြန်တိုက်ဖို့အတွက်စေလွှတ်ခဲ့ပြီး မြို့အသိမ်းခံရစဥ် ထွက်ပြေးလာတဲ့ စစ်ကြောင်းတွေနဲ့ ပူးပေါင်းကာ နေ့စဥ်လာရောက်တိုက်ခိုက်တာတွေ ပြုလုပ်တယ်လို့ သိရပါတယ်။

လာရောက်တိုက်ခိုက်ရာမှာ မြေပြင်စစ်ကြောင်းတွေအပြင် Y-12 ၊ ဒရုန်းနဲ့ လက်နက်ကြီးတွေကိုပါ အသုံးပြုတိုက်ခိုက်တာတွေ ပြုလုပ်ပေမဲ့ စစ်ကောင်စီတပ်တွေပဲ နေ့စဥ်အထိနာပြီး သေဆုံးထွက်ပြေးတာတွေ ရှိနေတယ်လို့ ဆိုပါတယ်။

“ဗန်းမောက်အခြေအနေကတော့ ကောင်းတယ် ခင်ဗျာ၊ SNA ကတော့ နေ့တိုင်းထိုးစစ်ဆင်နေတာ၊ ကျွန်တော်တို့ဘက်ကခံစစ်ကို ကောင်းကောင်းလုပ်ထားတော့ နေ့တိုင်းသူတို့ပဲအထိနာပြီး ပြန်ပြန်ဆုတ်သွားနေတယ်၊ နေ့မထိုးရင်ညထိုးတယ်၊ တစ်ရက်မှမပြတ်ဘူး၊ ဒရုန်း၊ လက်နက်ကြီးနဲ့ပဲ မဟုတ်ဘဲ Y-12 တွေနဲ့ပါ တွဲသုံးနေပါတယ်” လို့ ဗန်းမောက် KPDF မှ တော်လှန်ရေးရဲဘော်တစ်ဦးက BBM ကိုပြောပါတယ်။

ဒါ့အပြင် ဗန်းမောက်မြို့အတွင်းကို စစ်ကောင်စီရဲ့ တပ်မ(၃၃) ယူနီဖောင်းဝတ် စစ်သားတွေ အဓိကထားတိုက်ခိုက်နေတယ်ဆိုပေမဲ့လည်း အဆိုပါယူနီဖောင်းဝတ်အများစုဟာ SNA တပ်ဖွဲ့ဝင်တွေနဲ့ ပြည်သူ့စစ်တွေသာ အများဆုံးဖြစ်တယ်လို့ သိရပါတယ်။

ဗန်းမောက်မြို့ကို လာရောက်တိုက်ခိုက်နေတဲ့အင်အားတွေထဲ ရှမ်းနီပြည်သူ့စစ်(SNA)အများစုဖြစ်သလို ခုခံတော်လှန်ရာမှာလည်း ဗန်းမောက် KPDF အတွင်းရှိ တော်လှန်ရေးထဲမှ ရှမ်းနီလူငယ်တွေ အများအပြားပါဝင်ခုခံနေတယ်လို့လည်း သိရပါတယ်။

“ဟုမ္မလင်းက စစ်ကူလိုက်လာတယ်ဆိုတဲ့ တပ်မ(၃၃)ထဲမှာ အဓိကကတော့ SNA နဲ့ပြည်သူ့စစ်တွေများတာပါ၊ (၃၃)ရဲ့ယူနီဖောင်းကိုဝတ်ကြတာပါ၊ နောက်တစ်ခုက ခုစစ်တပ်တွေနဲ့ပေါင်းနေတဲ့ SNA ကိုလည်း ရှမ်းနီလို့တောင်မခေါ်စေချင်ဘူး၊ ဘာလို့လဲဆို ခုဗန်းမောက်ကိုခုခံကာကွယ်နေတဲ့အထဲ ကျွန်တော်တို့လို ရှမ်းနီလူငယ်တွေအများကြီးပါတာပဲ” လို့ အဆိုပါရဲဘော်က ဆက်ပြောပါတယ်။

စစ်ကောင်စီဟာ နိုဝင်ဘာလ ၇ ရက်နေ့ကလည်း အဆိုပါ SNA တပ်ဖွဲ့တွေနဲ့ပူးပေါင်းပြီး ဗန်းမောက်မြို့အနောက်ပိုင်းကို လေကြောင်းမှဗုံးအရင်ကြဲပြီးနောက် မြို့တွင်းဝင်နိုင်ဖို့ကြိုးစားခဲ့ပေမဲ့ တော်လှန်ရေးတပ်ဖွဲ့တွေရဲ့ တိုက်ခိုက်မှုကြောင့် အထိနာခဲ့ပြီး ထိခိုက်သေဆုံးသူတွေကို ပြန်လည်ခေါ်ဆောင်ကာ ဆုတ်ခွာသွားတယ်လို့ သိရပါတယ်။

အဲဒီလိုပြန်လည်ဆုတ်ခွာရာမှာ စစ်ကောင်စီဟာ သူတို့ဆုတ်ခွာရာလမ်းတစ်လျှောက်ရှိ ပြည်သူပိုင်နေအိမ်တွေကို မီးရှို့ဖျက်ဆီးတာတွေကို ပြုလုပ်ပြီးမှ ဆုတ်ခွာလေ့ရှိတယ်လို့လည်း ဆိုပါတယ်။

“မနေ့က Y-12 နဲ့ကြဲပြီး တက်လုံးဖို့လုပ်သေးတယ်၊ တိုးတာကတော့နေ့တိုင်းတိုး၊ နေ့တိုင်းအထိနာတာပဲ၊ လာတိုးတိုင်း သူတို့လူတွေကိုထမ်းထုတ်ပြီးပြန်ပြန်သွားရတာတွေ မြင်နေရတယ်၊ လူမကုန်သေးဘူးနေမှာ၊ ပြန်ပြန်ဆုတ်ရင်လည်း ကောင်းကောင်းမဆုတ်ဘူး အကုန်ပတ် မီးရှို့သွားတာ၊ လမ်းတစ်လျှောက်ကို” လို့ သူက ဆက်ပြောပါတယ်။

ဗန်းမောက်မြို့ဟာ ကချင်ပြည်နယ်နဲ့ စစ်ကိုင်းအစပ်ကြားရှိ မြို့ဖြစ်ပြီး အဆိုပါမြို့ကို တော်လှန်ရေးအင်အားစုတွေ တိုက်ခိုက်စဥ်က ရက်ပိုင်းအတွင်းရရှိခဲ့ပေမဲ့ စစ်တပ်အနေနဲ့ တစ်လကျော်ကြာမြင့်နေတဲ့အထိ သာလွန်အင်အားတွေနဲ့ ထိုးစစ်ဆင်နေသော်လည်း ပြန်လည်တိုက်ယူနိုင်ခြင်းမရှိသေးဘူးလို့ သိရပါတယ်။